Mark 10

Nu mətɨꞌ wəzwi

(Matiu 19.1-12; Lukas 16.18)

1Yeso kɨ nii ndɔ̀ fɨ shɨ Galilii, gə̀ zìꞌ kwiŋ shɨ Judia, nə kwiŋ mɔ́ꞌ fɨ yiba muu mə Jordan. Vɨɨ vəyaŋ baa kɨ faynə yɨ ŋwə. Ŋwə deesə nu Nwi tɨ́ vəŋ yuu nə luu nshinə yi. 2Vɨɨ fɨ taa nwaa vɨɨ Farisii jwi yɨ ŋwə, bìtə tɨ́ ŋwə laa, «Ŋkə kùꞌnə tɨ́ wəndɔŋ faŋ ŋwə tɨꞌ zu wi mu?» Vəŋ nə bìtə nu kɔ́ maa məmɔŋ Yeso. 3Ŋwə bəŋsə tɨ́ vəŋ, gì laa, «Mose nə sɔ̀ꞌ kɨkə tɨ́ viŋ taa ŋwaꞌlə Nwi?» 4Vəŋ gi laa, «Mose nə biŋ laa wə nyɔꞌ ŋwaꞌlə mətɨꞌ wəzwi, kɔ tɨ́ zu wi, buu jɔŋ ŋwə.» #Diteronimi 24.1. 5Yeso gi tɨ́ vəŋ laa, «Aŋ viŋ, nə luu sheꞌ buꞌ fwi yiweꞌ yiŋ laa ŋwə nə kɔ̀ ntɨ yɔ́ tɨ́ viŋ. 6Ŋkee maa vənzi və mbi faŋ Nwi nə fɔŋ nàysə mbi nə, ŋkə nə kee lùu nɨniŋ me. Maa ŋwaꞌlə Nwi gì laa, «Nwi nə bɔ̀ŋ vɨɨ yaa wəndɔŋ nə wəzwi,» #Jenesis 1.27. 7baa nə laa, «Wəndɔŋ ndɔ meꞌtə tii wi nə nshu wi, gə̀ fàynə ghɔ zu wi. 8Vəŋ vəbɔɔ faynə gù fa kəmuꞌ.» #Jenesis 2.24. Nɨniŋ, vəŋ kee baa lùu vəbɔɔ me, kɨ nii lùu yaa wə muꞌ. 9Nɨniŋ, fa faŋ Nwi fàynə shəŋ muꞌ, kɨ wə gaasə me!»

10Yeso ghɔ vɨɨ məzwetə nu ki kɨ nii bə̀ŋ, gə̀ ŋìi taa ŋii. Vɨɨ məzwetə nu ki jwi baa kɨ bitə tɨ́ ŋwə kɔ̀ŋ nu kɔ́. 11Ŋwə gi tɨ́ vəŋ laa, «Wəndɔŋ faŋ ŋwə ndaa zu wi, baa fùusə ŋwə, gə̀ ndàa wəzwi day, buu ŋwə gù maa ntɨ Nwi kɔ̀ŋ nu məndaa. 12Sheꞌ nɨniŋ, wəzwi faŋ ŋwə ndàa ndəə wi, baa tɨ̀ꞌ ŋwə, gə̀ ndàa wəndɔŋ day, buu ŋwə gù maa ntɨ Nwi kɔ̀ŋ nu məndaa nɨzi.»

Faŋ Yeso nə tù mənɔŋ-bwaŋnə tɔ vaŋmbwaa

(Matiu 19.13-15; Lukas 18.15-17)

13Nə luu maa yighee yɔ́, vɨɨ jwi nə vaŋmbwaa, jwì kɔ̀ tɨ́ Yeso laa ŋwə kɔŋ vəŋ. Vɨɨ məzwetə nu ki ye, shə̀ tɨ́ vɨɨ vɔ́. 14Yeso ye, ŋkə bɨ tɨ́ ŋwə. Ŋwə gi tɨ́ vɨɨ məzwetə nu ki laa, «Viŋ biŋ vaŋmbwaa kɨ jwi yɨ mə! Kɨ viŋ baa fəŋ vəŋ me! Viŋ kɔꞌ kɨɨ laa vɨɨ mbɨə faŋ vəŋ ndɔ zɨ nu yifwàŋ Nwi, lùu vɨɨ faŋ vəŋ lùu yaa vaŋmbwaa və̀. 15Viŋ zɔ! Mə gì tɨ́ viŋ yinsəŋ laa, wə ntɨə faŋ ŋwə kee bìŋ nu yifwàŋ Nwi yaa weembwa wuubwa me, buu ŋwə kee ndɔ ŋii shɔ me.» 16Ŋwə gi nɨniŋ, shàꞌ vaŋmbwaa vɔ́, mɔ̀ꞌ ghɔ ghi maa vəŋ, tù mənɔŋ-bwaŋnə tɔ vəŋ.

Ŋkə ndɔ luu kəweꞌ tɨ́ vɨɨ təka maa məzɨ nu yifwàŋ Nwi

(Matiu 19.16-30; Lukas 18.18-30)

17Yeso kɨ nii fùu fu, zìꞌ jɨɨ, wə mɔ́ꞌ nyɨŋ jwì, tùŋ vətɔ vəyəə vi nsi vɨsɨ ŋwə, bìtə tɨ́ ŋwə laa, «Tɨta, a lùu wuu jəə. Mə kəə bitə tɨ́ ghɔ laa, mə sii taa yɨ kə buu zɨ məbwey vəlwaŋ faŋ ŋwə gòꞌsə yighee muꞌ?» 18Yeso gi tɨ́ ŋwə laa, «Sii yɨ̀ kə a tii mə nə wuu jəə? Wə kee lùu shɔ faŋ ŋwə lùu wuu jəə me, tɨ̀ lɨꞌ Nwi me. 19Gə fɨ maa nu ŋkɨə faŋ a bìtə shee nə, a kɔꞌ kɨɨ nə ntɨsə Nwi laa, «Kɨ ghɔ zwi wə me! Kɨ ghɔ tii wəzwi faŋ kee luu ŋgwunə me! Kɨ ghɔ shaw me! Kɨ ghɔ sɨɨ ba tɔ wə me! Kɨ ghɔ fuŋsə wə me! Kɨ zɔnə tii wə nə nshu wə!» #Eksodɔs 20.12-17. 20Wə ghɔ́ bəŋsə tɨ́ ŋwə laa, «Tɨta, mə yaa nuŋsə vənu vɔ́ vənshə shù fɨ weembwa.» 21Yeso ndeynə ŋwə, kàw ŋwə, gì tɨ́ ŋwə laa, «A bəə sheꞌ nu kəmuꞌ. Nu kɔ́ lùu laa, a gə fìŋtə vətɔ və vənshə, kɔ̀ ka ghɔ́ nshə tɨ́ mbəəsə, jwì bèꞌsə mə, buu a ndɔ kii vətɔ vəyaŋ shɨ Nwi.» 22Wə ghɔ́ zɔ yigi yɔ́, yikəꞌ yi gu. Ŋwə ndɔ kɨ gə nə məluŋ, buꞌ laa ŋwə nə kìi vətɔ ŋkee vəyaŋ.

23Yeso kɨ nii kìasə, ndèynə vɨɨ məzwetə nu ki, gì tɨ́ vəŋ laa, «Ŋkə ndɔ lùu ŋkee kəweꞌ tɨ́ vɨɨ faŋ vəŋ kìi təka maa məzɨ nu yifwàŋ Nwi.» 24Shuu vəŋ yɔ̀ŋ maa yigi yi yɔ́. Ŋwə baa kɨ gì tɨ́ vəŋ laa, «Vaŋ vaŋ, ŋkə ndɔ lùu ŋkee kəweꞌ maa məŋii taa yifwàŋ Nwi. 25Ŋkə lùu kəyaysə tɨ́ nyaa yikwalə maa məshɔɔ fɨ maa ŋɔŋ tasə, fɨ ghɔ tɨɨ ka maa məŋii nu yifwàŋ Nwi.» 26Shuu vəŋ yɔŋ shɔ̀ɔ ki. Vəŋ gi sheꞌ vəŋ vəŋ laa, «Sii ndɔ bwey ndə?» 27Yeso ndeynə vəŋ, gì laa, «Tɨ́ vɨɨ ŋkə lùu kəweꞌ, kee luu tɨ́ Nwi me, buꞌ laa tɨ́ Nwi vənu vənshə lùu vəyaysə.»

28Pita kɨ nii tey kɨ gisə tɨ́ ŋwə laa, «Maa yia nə mèꞌtə vətɔ vənshə, bèꞌsə ghɔ!» 29Yeso bəŋsə tɨ́ ŋwə laa, «Mə naysə ŋkee nu yinsəŋ tɨ́ viŋ laa, kɨ luu wə meꞌtə ŋii yi, tɨꞌnə me vaŋ-nshwi vi vəndɔŋ nə mbə vəki, tɨꞌnə me nshu wi, tɨꞌnə me tii wi, tɨꞌnə me vaŋ vi, tɨꞌnə me ndɨɨ si buꞌ mə nə nu ntɔŋ yijəə Nwi, 30buu ŋwə ndɔ ye ndɔꞌ nə vaŋ-nshwi vi vəndɔŋ nə mbə vəki, nə vənshu vi nə vaŋ vi vəyaŋ, nə ndɨɨ si səyaŋ maa yighee mbi nyə̀ ndwə, ŋkee maa yighee ŋɨꞌ, ndɔ baa kii məbwey vəlwaŋ fɨ yighee yiba. 31Nɨniŋ nə, vɨɨ vəyaŋ faŋ vəŋ lùu vɨsɨ, ndɔ luu yiba; vɨɨ yiba ndɔ luu vɨsɨ.»

Faŋ Yeso nə baa nàysə nu ŋɨꞌ yi tɨ́ vɨɨ məzwetə nu ki

(Matiu 20.17-19; Lukas 18.31-34)

32Yeso ghɔ vɨɨ məzwetə nu ki kii toꞌ fuu jɨɨ, gə̀ ntɨꞌ Jerusalem, Yeso gə fɨ vɨsɨ vəŋ. Nɨniŋ, shuu vəŋ yɔŋ laa ŋwə gə shɔ, kee fɨfee me. Vɨɨ mbɨə faŋ vəŋ nəə beꞌsə ŋwə nə, fee. Ŋwə ndi vɨɨ məzwetə nu ki njɔsə-bɔɔ nə, sùꞌtə ghɔ vəŋ, baa tey kɨ naysə nu ŋkɨə faŋ ŋkə taa gay maa ŋwə tɨ́ vəŋ. 33Ŋwə nə gì laa lee, «Viŋ zɔ! Nsiŋ koꞌ gə̀ Jerusalem, vɨ taa jia Wuu yinsəŋ Nwi, kɔ̀ tɨ́ vɨɨ kwalə məfeꞌ Nwi nə vɨɨ mədeesə ŋwaꞌlə Nwi, vəŋ sɔꞌ ŋwə, shìa laa vɨ zwi ŋwə, kɔ ŋwə tɨ́ vɨɨ tətɔŋ fu. 34Vɨɨ tətɔŋ fu taw ŋwə, sheꞌ mənti maa ŋwə, saŋ ŋwə nə vəmfa, ndɔ zwi ŋwə. Vəshi kɨ shɔɔ vətia, ŋwə ywey.»

Bàw wuu kwalə fɨ taa nwaa vɨɨ Nwi kɨ shi kɨkə?

(Matiu 20.20-28; Lukas 22.24-27)

35Jeyms ghɔ Jɔn, vaŋ Zebedii, kɨ nii fùu jwì vɨsɨ Yeso, gì tɨ́ ŋwə laa, «Tɨta, yia kəə laa a yɨ nu ŋkɨə faŋ yia taa ndwaŋ fɨ ghɔ ghɔ.» 36Ŋwə gi tɨ́ vəŋ laa, «Viŋ kəə laa mə yɨ kə maa viŋ?» 37Vəŋ gi laa, «Yɨsə laa wə fɨ wia ndɔ duꞌ maa kwiŋ maꞌnə wə, wuu mɔ́ꞌ duꞌ maa kwiŋ ŋkwii, yighee njyə faŋ a ndɔ zɨ yifwàŋ, kɨ sɔꞌ.» 38Yeso gi tɨ́ vəŋ laa, «Viŋ kee kɨ̀ɨ nə nu ŋkɨə faŋ viŋ bìtə me. Kaꞌ viŋ nu fɨ taa ndaw ŋɨꞌ njyə faŋ mə ndɔ nu fɨ fuŋ mu? Kaꞌ viŋ fi muu mbɨə faŋ mə ndɔ fi mu?» 39Vəŋ gi tɨ́ ŋwə laa kaꞌ vəŋ yɨ̀ nu kɔ́. Ŋwə gi tɨ́ vəŋ laa, «Ndaw ŋɨꞌ njyə faŋ mə ndɔ nu, viŋ taa nu nɨzi. Muu mbɨə faŋ mə ndɔ fi, viŋ taa fi nɨzi. 40Gə fɨ maa nu məduꞌ maa kwiŋ maꞌnə ŋwaa nə maa kwiŋ ŋkwii, ŋkə kee lùu nu faŋ bìŋ mə me; ŋkə ndɔ luu tɨ́ vɨɨ mbɨə faŋ Nwi lòotə tɨ́ vəŋ.» 41Bətə vɨɨ yighuŋ zɔ yigisə vaŋ Zebedii yɔ́, ŋkə bɨ tɨ́ vəŋ. Vəŋ tey kɨ bee Jeyms ghɔ Jɔn. 42Yeso ye nɨniŋ, tii vɨɨ məzwetə nu ki yɨ ŋwə, gì tɨ́ vəŋ laa, «Maa viŋ kɨɨ laa vɨɨ mbɨə faŋ vəŋ dùꞌ laa vəŋ sɔꞌ məshɨ, yaa kɨ bwasə vɨɨ nsi; vɨɨ kwalə taa məshɨ yaa kɨ yɨnə vɨɨ. 43Kɨ ŋkə lùu nɨniŋ taa ŋwaa viŋ me! Wə ntɨə faŋ ŋwə kəə lùu wuu kwalə taa ŋwaa viŋ, bàw ŋwə lùu wuu faꞌ wiŋ. 44Wə ntɨə faŋ ŋwə kəə lùu vɨsɨ tɨ́ viŋ, bàw ŋwə luu buꞌ tɨ́ viŋ vənshə, 45fɔnə nshɨ-tɔ ŋwaa faŋ mə nə jwi mbi gù wə, nə kee jwì laa vɨ kɨ faꞌ tɨ́ mə me; mə nə jwi kɨ faꞌ tɨ́ vɨɨ. Mə ndɔ baa kɔ ŋkee ŋwaa ŋwaa, kù maa məyweysə vɨɨ vəyaŋ.»

Faŋ Yeso nə shùꞌ wuu sɨ fɨsə

(Matiu 20.29-34; Lukas 18.35-43)

46Yeso ghɔ vɨ vɨɨ vi gə zìꞌ ntɨꞌ Jeriko, shɔ̀ɔ fɨ ntɨꞌ yɔ̀, baa kii gə, vɨɨ məzwetə nu ki nə nwaa vɨɨ vəyaŋ nə beꞌsə ŋwə. Vəŋ fuu fɨ ntɨꞌ yɔ́, wuu vəndwaŋ mɔ́ꞌ nə sɨ ghi fɨsə, nə dùꞌ mbɨɨ jɨɨ. Yizii yi lùu Bartimiɔs, wee Timeɔs. 47Ŋwə zɔ laa shɔɔ Yeso, wuu Nazaret, ŋwə tey kɨ yumə, gi laa, «Yeso, wuu ŋiꞌ ŋii Deyvid, kee gəŋ saŋ!» 48Vɨɨ vəyaŋ shə tɨ́ ŋwə, gì laa ŋwə shia. Nɨniŋ, ŋwə metə baa yùmə shɔ̀ɔ yighee vɨsɨ laa, «Wuu ŋiꞌ ŋii Deyvid, kee gəŋ saŋ!» 49Yeso tɨŋnə, gì laa vɨ tii ŋwə. Vəŋ tii wuu sɨ fɨsə ghɔ́, gì tɨ́ ŋwə laa, «Ka fwi yə, ndɔ, ŋwə tii ghɔ.» 50Ŋwə meꞌ njwi yi yindiŋ, bìsə yizɔ, gə̀ yɨ Yeso. 51Yeso gi tɨ́ ŋwə laa, «A sii kəə laa mə yɨ kə maa ghɔ?» Wuu sɨ fɨsə ghɔ́ gi laa, «Tɨta ŋwaa, yɨsə mə kɨ ye vədɨꞌ!» 52Yeso biŋ, gì tɨ́ ŋwə laa, «Gə nə ŋwaa wə; a bwaŋnə buꞌ laa a nùŋ fwi yə maa mə.» Sheꞌ yighee tii-njii sɨ ghi ley, ŋwə yenə jəə, kɨ nii bèꞌsə Yeso jɨɨ.

Currently Selected:

Mark 10: bav

Highlight

Copy