Mark 11

Faŋ Yeso nə ŋìi ntɨꞌ Jerusalem

(Matiu 21.1-11; Lukas 19.28-40; Jɔn 12.12-19)

1Yeso ghɔ nwaa vɨɨ vɔ́ kɨ lùu nshənə fɨ ntɨꞌ Jerusalem, zìꞌ taa ntɨꞌsə Betfage nə Betani, ŋiꞌ baŋ Vətɨ-və-Məŋgwə. Ŋwə tɔŋ fɨ maa vɨɨ məzwetə nu ki vəbɔɔ, 2gì tɨ́ vəŋ laa, «Viŋ gə taa ntɨꞌ njyə faŋ nyə luu vɨsɨ viŋ nə. Viŋ taa kɨ ŋii taa ntɨꞌ yɔ́, yè wee-jiakasə shɔ, faŋ tuu wə muꞌ nə kee ta koꞌ dùꞌsə ŋiꞌ ki fuu yi me, faŋ vɨ shùŋ shɔ. Viŋ keꞌ, jwì nə ŋwə. 3Kɨ ghaŋ wə bitə tɨ́ viŋ laa viŋ sii yɨ kə, viŋ gì tɨ́ ŋwə laa, «Tɨta ŋwaa-nsiŋ kəə nyə,» buu wə ghɔ́ taa yasə tɔŋ nyə feenə.» 4Vəŋ gə, ye sheꞌ faŋ Yeso nii nàysə tɨ́ vəŋ nə, yè wee-jiakasə faŋ vɨ shùŋ shuufɔ mbɨɨ jɨɨ. Vəŋ keꞌtə. 5Vɨɨ vəmɔ́ꞌ faŋ vəŋ nə tɨ̀ŋnə yifi, gi tɨ́ vəŋ laa, «Viŋ sii yɨ kə? Viŋ sii keꞌtə wee-jiakasə ŋwə̀ buꞌ kə?» 6Vəŋ naysə tɨ́ vɨɨ vɔ́ sheꞌ faŋ Yeso nii nàysə tɨ́ vəŋ nə. Vɨɨ vɔ́ meꞌtə vəŋ. 7Vəŋ ndi wee-jiakasə ghɔ́, jwì nə ŋwə tɨ́ Yeso, mɔ̀ꞌ njwisə vəŋ fuu jɨŋ yi. Yeso kɨ nii kòꞌ dùꞌnə fuu yi, shɔ̀ɔ kɨ gə. 8Ŋwə gə nɨniŋ, vɨɨ vəyaŋ zisə njwisə vəŋ jɨɨ. Vɨɨ mɔ́ꞌ zisə gay faŋ vəŋ nə tə̀ŋ fɨ taa ndɨɨsə. (Vəŋ nə yɨ̀ nu kɔ́ maa məbəŋsə Yeso.) 9Vɨɨ mbɨə faŋ vəŋ nəə gə vɨsɨ nə vɨɨ mbɨə faŋ vəŋ nəə beꞌsə fɨ̀ yiba, toꞌ luꞌ, gisə laa,

«Məbəŋsə tɨ́ Nwi!

Məbəŋsə tɨ́ wə ntɨə faŋ ŋwə jwi nə,

maa yizii tɨta Nwi!

10Məbəŋsə tɨ́ yifwàŋ njyə faŋ nyə ndɔ fùu

yaa yifwàŋ tii ŋwaa-nsiŋ Deyvid!

Məbəŋsə tɨ́ Nwi fɨ taa yizɔ!» #Sam 118.26.

11Sheꞌ nee, Yeso ŋii ntɨꞌ Jerusalem, shɔ̀ɔ gə̀ ŋìi taa ŋii Nwi yikwalə, ndèynə vətɔ vənshə, kɨ nii fùu gə̀ ntɨꞌ Betani ghɔ vɨ vɨɨ məzwetə nu ki njɔsə-bɔɔ, buꞌ laa yighee nə duꞌtə nyə shɔ̀ɔ.

Faŋ Yeso nə ndà tɨ taŋ

(Matiu 21.18-19)

12Fu kɨ lee Yeso ghɔ vɨ vɨɨ məzwetə nu ki baa ndɔ̀ fɨ ntɨꞌ Betani, baa kɨ gə ntɨꞌ Jerusalem. Vəŋ kii gə, jɨŋ za Yeso. 13Ŋwə ye tɨ taŋ kəmɔ́ꞌ fɨ ntaŋ, faŋ vɨ tii nə tɨ fig. Vəvi luu fuu yi. Ŋwə gə yifi maa məkəə laa vətaŋ lùu fuu yi mu? Ŋwə kɨ gə yɨ tɨ taŋ kɔ́, ye laa taŋ kee lùu fuu yi me. Nə luu sheꞌ vəvi fuu yi, buꞌ laa nə kee lùu yighee yuu tɨ kɔ́ koonə me. 14Yeso gi tɨ́ tɨ kɔ́ laa, «Tuu kee taŋ kee ndɔ baa koonə fuu ghɔ, tɨ́ kaꞌ wə kwə me!» Vɨɨ məzwetə nu ki zɔ yigi yɔ́.

Faŋ Yeso nə jɔ̀ŋ vɨɨ mbeꞌlə fɨ taa ŋii Nwi

(Matiu 21.12-17; Lukas 19.45-48; Jɔn 2.13-17)

15Yeso ghɔ vɨ vɨɨ məzwetə nu ki gə ziꞌ ntɨꞌ Jerusalem. Ŋwə baa gə̀ ŋìi taa ŋii Nwi yikwalə, tey kɨ jɔŋ vɨɨ vənshə faŋ vəŋ nəə fiŋ vətɔ shuu ŋii Nwi yikwalə yɔ́, nə mbɨə faŋ vəŋ nəə ywenə vətɔ fɨ fuŋ. Ŋwə dɔŋsə vətɔ faŋ vɨɨ məkwiinə ka nùŋsə ka fuu yi, nə vəŋkaw və vɨɨ mbɨə faŋ vəŋ nəə fiŋ vəbɔŋsə. 16Ŋwə kee baa biŋ laa wə baa shàꞌ fa, shɔɔ nə ŋkə fɨ yifi me. 17Ŋwə gi tɨ́ vəŋ laa, «Ŋkə lùu taa ŋwaꞌlə Nwi laa, vɨ taa kɨ tii ŋii Nwi nə ŋii məshɔꞌtə Nwi tɨ́ mbi yinshə. Nɨniŋ, viŋ nùŋ ŋii nyə̀, nyə gu shəŋ vəndɔꞌ.» #Aysaya 56.7; Jeremaya 7.11. 18Vɨɨ kwalə məfeꞌ Nwi nə vɨɨ mədeesə ŋwaꞌlə Nwi zɔ nu kɔ́, kɨ kəə jɨɨsə maa məzwi ŋwə, buꞌ laa vəŋ nəə fee ŋwə, fɔnə vɨɨ vəyaŋ nəə bəŋsə ŋwə maa vənu mbɨə faŋ ŋwə nəə deesə nə.

Wə nùŋ fwi yi maa Nwi, shɔ̀ꞌtə Nwi, buu ŋwə kìi wutə

(Matiu 6.16; 21.20-22)

19Kɨ lùu laynəfu, Yeso ghɔ vɨ vɨɨ məzwetə nu ki baa fùu fɨ maa ntɨꞌ yɔ́, kɨ bəŋ jwi taa nshia-ndoo-mbisɨ. 20Faŋ vəŋ kii jɨjwi taa nshia-ndoo-mbisɨ, yè tɨ taŋ kì, tɨ́ vəvi vi yoo, mbɨɨ yi semə, zìꞌ maa ghay ghi. 21Pita lumə nu ŋkɨə faŋ Yeso sɨ gì tɨ́ tɨ taŋ kɔ́ nə, gì tɨ́ Yeso laa, «Tɨta, ye, tɨ taŋ kì faŋ a nə ndà nə, ŋkə yòo.» 22Yeso bəŋsə tɨ́ vəŋ laa, «Bàw viŋ nuŋ fwi siŋ maa Nwi! 23Viŋ zɔ! Mə naysə tɨ́ viŋ laa, wə ntɨə faŋ ŋwə ye baŋ nyə̀, gì tɨ́ nyə laa, «Muꞌnə, gə̀ fìŋ taa mamuu,» kɨ gì nɨniŋ, kee kìi fwisə bɔɔ me, baa nùŋ fwi yi maa Nwi laa nu kɔ́ taa gay nɨniŋ, buu ŋkə taa gay faŋ ŋwə kəə. 24Nɨniŋ, mə naysə tɨ́ viŋ laa, fa tɨ̀ me fa faŋ viŋ ndwaŋ fɨ ghɔ Nwi, faŋ viŋ shɔꞌtə Nwi, viŋ kii ndwaŋ, viŋ nùŋ fwi siŋ maa Nwi laa ŋwə taa kɔ yinsəŋ, buu viŋ taa kii. 25Nɨniŋ, yighee tɨ̀ me yighee faŋ viŋ tɨ̀ŋnə maa məshɔꞌtə Nwi, viŋ bɨ ndènə yibɨsə vɨɨ maa viŋ ŋkəə, tɨ́ kɨ kaꞌ Tii wiŋ faŋ ŋwə lùu yizɔ, ndènə yibɨsə yiŋ nɨzi. 26Viŋ kɔꞌ kɨɨ laa, viŋ kɨ luu kee ndènə yibɨsə vɨɨ me, buu kaꞌ Tii wiŋ fɨ yizɔ kee ndènə yibɨsə yiŋ me.»

Faŋ vɨ nə bìtə tɨ́ Yeso laa wutə ki ndɔ̀ fɨ fə?

(Matiu 21.23-27; Lukas 20.1-8)

27Yeso ghɔ vɨ vɨɨ məzwetə nu ki baa kii jwi ntɨꞌ Jerusalem. Yeso jwi, kɨ toꞌ fɨ taa ŋii Nwi yikwalə, vɨɨ kwalə məfeꞌ Nwi, nə vɨɨ mədeesə ŋwaꞌlə Nwi, nə vɨɨ taa fɨ taa ŋii Nwi jwi yɨ ŋwə, 28bìtə tɨ́ ŋwə laa, «A yɨ vənu və̀ nə kəŋ wutə ŋkɨə? Kɔ̀ ndə kɔ̀ wutə kɔ́ tɨ́ ghɔ maa məyɨ vənu vɔ́?» 29Yeso bəŋsə tɨ́ vəŋ laa, «Mə kəə bitə nu kəmuꞌ tɨ́ viŋ nɨzi. Viŋ taa bəŋsə shee, buu mə naysə shəŋ ŋkɨə faŋ wutə kaŋ maa məyɨ vənu vɔ́ ndɔ̀ fɨ fuŋ tɨ́ viŋ. 30Viŋ naysə shee laa nu məfi muu fɨ ghɔ Jɔn nə luu nu faŋ ŋkə nə ndɔ̀ fɨ ghɔ Nwi mu, mu nə luu nu wə mənsaw?» 31Vəŋ bɨꞌtə fɨ taa fwisə vəŋ, kɨ gisə sheꞌ vəŋ vəŋ laa, «Kɨ luu nsiŋ gi laa «fɨ ghɔ Nwi», buu ŋwə taa bitə tɨ́ nsiŋ laa, sii yɨ̀ kə, nsiŋ kee bìŋ ŋwə me. 32Nɨniŋ, nsiŋ kɨ luu gi laa nə luu sheꞌ nu wə mənsaw, ŋkə taa luu kɨkə? Kaꞌ nsiŋ kee gì nɨniŋ me, buꞌ laa vɨɨ vənshə bɨꞌtə laa Jɔn nə luu nshiiŋii-sɔghɔ yinsəŋ.» Nɨniŋ, vəŋ nəə fee vɨɨ, 33kɨ nii bə̀ŋsə tɨ́ Yeso laa vəŋ kee yikɨɨ me. Yeso gi tɨ́ vəŋ laa, «Nɨniŋ ghɔ́, mə kee taa naysə shəŋ ŋkɨə faŋ wutə kaŋ kɔ́ ndɔ fɨ fuŋ, buu mə kɨ yɨ vənu vɔ́ shɔ nə, tɨ́ viŋ me.»

Currently Selected:

Mark 11: bav

Highlight

Copy