Mark 12

Yigisə tii buꞌ vɨɨ mbɨə faŋ vəŋ nəə faꞌ maa məkɔ nswii

(Matiu 21.33-46; Lukas 20.9-19)

1Yeso kɨ nii tey kɨ gisə tɨ́ vəŋ maa yigisə tii laa, «Wə mɔ́ꞌ nə luu shɔ faŋ ŋwə nə kìi yindɨɨ yi, ndì kɔ̀ maa nswii. Ŋwə nə bìa vətɨ vətaŋ faŋ vɨ tìi nə greyp, taa yindɨɨ yɔ́, ndɔ̀ kà ŋkɔꞌ shɔ, kìa yindɨɨ yi yɔ́, shùŋtə, tə̀ə yibɨɨ maa məjiatə kəŋ məluꞌ mɔ́ꞌ nee taa tey yi, faŋ mbə fuu fɨ taa vətaŋ vətɨ vɔ́. Ŋwə baa fianə ŋii təyɔꞌ taa yindɨɨ yɔ́ maa məshii nshii fɨ taa yiyɔꞌ. Nɨniŋ, ŋwə nə lòotə yindɨɨ yi yɔ́ ŋkee jəə, buu kɔ tɨ́ vɨɨ maa nswii, ndɔ̀ gə̀ shɨ tɔŋ mɔ́ꞌ.

2Yighee məndɔꞌ nswii gə jwi kuꞌ, ŋwə tɔŋ wuu faꞌ wi tɨ́ vɨɨ vɔ́ laa vəŋ kɔ nswii, laa vəŋ kɔ waytə fɨ maa vətaŋ mbɨə faŋ vəŋ kwìi tɨ́ ŋwə maa nswii. 3Wuu faꞌ ghɔ́ gə, vɨɨ vɔ́ jia ŋwə saŋ, jɔ̀ŋ ŋwə nə ghɔ day. 4Tɨɨ nswii ghɔ́ baa kɨ tɔŋ wuu faꞌ day, vəŋ fwaŋnə ŋwə fɨ tɔ ŋwə, ndasə ŋwə. 5Tɨɨ yindɨɨ ghɔ́ baa kɨ tɔŋ wə dɨday, vəŋ zwi ŋwə. Sheꞌ nee, ŋwə baa kɨ tɔŋ vɨɨ vəmɔ́ꞌ vəyaŋ, vəŋ saŋ vəmɔ́ꞌ, zwìlə vəmɔ́ꞌ. 6Ŋwə nə baa kìi wə muꞌ ghɔ ŋwə; nə luu ŋkee ŋwiŋ wi faŋ ŋwə nə kàw ŋwə. Kɨ lùu maa yighee yiba, ŋwə tɔŋ ŋwiŋ wi ghɔ́ tɨ́ vəŋ, gisə laa vəŋ taa fee ŋwiŋ wi ghɔ́. 7Vɨɨ vɔ́ ye ŋwiŋ wi ghɔ́, gì sheꞌ vəŋ vəŋ laa, «Maa lùu wə ntɨə faŋ ŋwə ndɔ zɨ tɔ tii wi nə. Viŋ jwi, nsiŋ zwi ŋwə, buu vətɔ və̀ vənshə kìi nsiŋ.» 8Vəŋ jia ŋwə, zwì ŋwə, shàꞌ ŋku ki, mɔ̀ꞌ yiba ŋkɔꞌ. 9Yuu vəŋ yɨ̀ nɨniŋ nə, tɨɨ yindii ghɔ́ taa yɨ kə? Maa ŋwə taa jwi zwilə vɨɨ vɔ́, kɔ̀ vətɔ vi vɔ́ tɨ́ vɨɨ day maa nswii.»

10Yeso nə gì yigisə tii yɔ́, kɨ nii gì tɨ́ vəŋ laa, «Maa viŋ ta tìi shəŋ ŋwaꞌlə Nwi ŋkɨə faŋ ŋkə gì laa,

«Ŋoꞌ njyə faŋ vɨɨ məbɔŋ ndɔꞌ twèy nyə,

kìasə gu ŋoꞌ maa məbɔŋ mfay ŋii.

11Lùu nu faŋ yɨ̀ tɨta Nwi.

Luu ŋkee nu jəə tɨ́ nsiŋ.» #Sam 118.22-23.

12Vɨɨ kwalə məfeꞌ Nwi nə vɨɨ mədeesə ŋwaꞌlə Nwi nə vɨɨ taa fɨ taa ŋii Nwi zɔ, kə̀ə jɨɨsə maa məjia ŋwə, buꞌ laa vəŋ nəə kɔꞌ kɨɨ laa ŋwə nə gì yigisə tii yɔ́ kɔ̀ŋ vəŋ. Vəŋ zɔ nɨniŋ, luu nə, kee jia ŋwə yighee yɔ́ me, buꞌ laa vəŋ nəə fee vɨɨ. Nɨniŋ, vəŋ meꞌtə ŋwə, ndɔ̀ gə̀ nə ŋwaa vəŋ.

Faŋ vɨ nə bìtə nu kɔ̀ŋ nu tasə tɨ́ Yeso

(Matiu 22.15-22; Lukas 20.20-26)

13Nə luu maa yighee yɔ́, vɨ tɔŋ vɨɨ mɔ́ꞌ fɨ taa nwaa vɨɨ Farisii, nə vɨɨ mɔ́ꞌ fɨ taa nwaa vɨɨ məbiŋ nu fwàŋ Herod, tɨ́ Yeso laa vəŋ kɔꞌsə ŋwə maa yigisə yi. 14Vəŋ jwi, gì tɨ́ ŋwə laa, «Tɨta, yia kɔꞌ kɨɨ laa a lùu wuu yinsəŋ, kee shəŋ maa mbɨꞌtə wə me, kee bee fee yikwalə wə me. A deesə sheꞌ nu Nwi yinsəŋ. Nɨniŋ, yia kəə bitə nu tɨ́ ghɔ laa, ŋkə kùꞌnə laa vɨ kɨ mɔꞌ tasə tɨ́ fwàŋ Kaysa mu, mu bey?» 15Yeso zɔ yigi yɔ́, kɨɨ nə mənay vəŋ, gì tɨ́ vəŋ laa, «Viŋ mɔŋ mə tɨ́ kə? Viŋ jwi nə ka, də̀ shee!» 16Vəŋ jwi nə ka, də̀ tɨ́ ŋwə. Ŋwə ndeynə, bìtə tɨ́ vəŋ laa, «Tɔ wə kə, nə yizii nyə̀ lùu njyə ndə?» Vəŋ bəŋsə tɨ́ ŋwə laa lùu ŋkə fwàŋ Kaysa. 17Yeso zɔ bəŋsə vəŋ, gi laa, «Viŋ kɔ fa Kaysa tɨ́ Kaysa, kɔ̀ fa Nwi tɨ́ Nwi.» Shuu vəŋ yɔŋ maa ŋwə.

Nu məywey fɨ shɨ yiku

(Matiu 22.23-33; Lukas 20.27-40)

18Vɨɨ fɨ taa nwaa vɨɨ Sadusii faŋ vəŋ nə gì laa məywey fɨ shɨ yiku kee lùu shɔ me, jwi, bìtə tɨ́ Yeso laa, «Tɨta, Mose nə nyɔ̀ꞌ tɨ́ nsiŋ taa ŋwaꞌlə Nwi laa, 19«Kɨ luu wə mɔ́ꞌ ku, mèꞌtə zu wi, faŋ vəŋ kee kìi wee me, weenshu wə ghɔ́ taa ghaa ndaa wəzwi ghɔ́, bì vaŋ fuŋ tɨ́ ŋku weenshu wi ghɔ́.» #Diteronimi 25.5-6. 20Nɨniŋ, vaŋ-nshwi nə luu shɔ kwatia. Mfɔŋ ndaa wəzwi, ku, kee bì wee me. 21Mbeꞌsə yi kɨ nii ndàa wəzwi ghɔ́, ku, kee bì wee me. Ŋgwə lwesə vətia yɨ sheꞌ nɨniŋ. 22Sheꞌ nee, vəŋ kwatia ndaa wəzwi ghɔ́, kùkə, tuu muꞌ kee bì wee me. Kɨ lùu fɨ yiba, wəzwi ghɔ́ ku nɨzi. 23Nɨniŋ, maa yighee məywey fɨ shɨ yiku, wəzwi ghɔ́ ndɔ lùu ŋgwə ndə, yuu vəŋ kwatia nə ndàa ŋwə nə?» 24Yeso gi tɨ́ vəŋ laa, «Maa viŋ gù maa nu kɔ́, buꞌ laa viŋ kee kɨ̀ɨ nə ŋwaꞌlə Nwi nə wutə Nwi me. 25Yighee njyə faŋ vɨɨ ndɔ ywey fɨ shɨ yiku, vəŋ ndɔ luu sheꞌ yaa nshiisə-ŋiisə Nwi; wəndɔŋ kee baa ndàa wəzwi me, wəzwi kee baa ndàa wəndɔŋ me. 26Gə fɨ maa məywey vəŋku və vɨɨ fɨ shɨ yiku, maa viŋ ta tii fɨ taa ŋwaꞌlə Nwi, waytə ŋkɨə faŋ Mose nə nyɔ̀ꞌ buꞌ shuꞌ gay faŋ ŋkə nəə kɨɨ nə. Taa waytə ŋwaꞌlə kɔ́, Nwi gì tɨ́ Mose laa yi lùu Nwi Abraham, nə Nwi Isak, nə Nwi Jeykob. #Eksodɔs 3.6. 27Nɨniŋ, Nwi kee lùu Nwi vəŋku vənsisə me; Nwi lùu Nwi vɨɨ bweynə. Nɨniŋ, viŋ gù dɨdɨꞌ.»

Ntɨ njyə vɨsɨ fɨ taa ntɨsə Nwi lùu njyə?

(Matiu 22.34-40; Lukas 10.25-28)

28Wə mɔ́ꞌ fɨ taa ŋwaa vɨɨ mədeesə ŋwaꞌlə Nwi zɔ faŋ vəŋ nəə mɔŋ Yeso nə yigi nə. Ŋwə nə kɨɨ laa Yeso nə bəŋsə jəə. Nɨniŋ, ŋwə jwi yɨ Yeso nə fwi yiley, bìtə tɨ́ ŋwə laa, «Ntɨ njyə vɨsɨ fɨ taa ntɨsə Nwi lùu njyə?» 29Yeso bəŋsə tɨ́ ŋwə laa, «Njyə vɨsɨ lùu laa,

«Viŋ zɔ mɔɔ, vɨɨ Isirayl,

tɨta Nwi lùu Nwi ŋwaa-nsiŋ.

Luu sheꞌ ŋwə lùu Nwi.

30Kɨ kaw Tɨta, Nwi wə, nə fwi yə yinshə,

kaw ŋwə nə ŋwaa wə nshə,

baa nə mbɨꞌtə yə yinshə,

nə wutə kə kənshə!» #Diteronimi 6.4-5.

31Ntɨ njyə faŋ nyə beꞌsə, lùu laa,

«Kɨ kaw wənjɨɨ wə yaa nshɨ-tɔ wə!» #Levitikɔs 19.18. Ntɨ yimɔ́ꞌ kee baa lùu shɔ faŋ nyə shɔ̀ɔ nsə-wə me.»

32Wə ghɔ́ gi tɨ́ ŋwə laa, «A gì ŋkee jəə, tɨta, a gì yinsəŋ laa Nwi luu sheꞌ muꞌ, Nwi mɔ́ꞌ kee baa lùu shɔ, tɨ̀ lɨꞌ ŋwə me. 33Baa nə nu məkaw Nwi nə fwi yinshə nə yitɔfə yinshə nə wutə kənshə, baa nə nu məkaw wənjɨɨ wə yaa nshɨ-tɔ wə, vənu vɔ́ bàw shɔ̀ɔ vənu və mətwaŋ nyaasə nə məsɨɨ nyaasə, kɔ̀ Nwi shɔ.» 34Yeso zɔ faŋ ŋwə nə beŋsə nə tɔ ley. Ŋwə gi tɨ́ ŋwə laa, «A kee lùu ntaŋ fɨ maa məŋii yifwàŋ Nwi me.» Yiŋkii kɨ shɔ̀ɔ, wə nə kee baa lùu shɔ faŋ ŋwə nə kee fèe maa məbitə nu tɨ́ Yeso me.

Nu kɔ̀ŋ wuu məbweysə vɨɨ Nwi

(Matiu 22.41-46; Lukas 20.41-44)

35Shi mɔ́ꞌ faŋ Yeso nəə deesə nu Nwi taa ŋii Nwi yikwalə, ŋwə nə gì laa, «Sii yɨ̀ kə, vɨɨ mədeesə ŋwaꞌlə Nwi gi laa, wuu məbweysə vɨɨ faŋ ŋwə ndɔ̀ fɨ ghɔ Nwi, lùu wee ŋiꞌ ŋii fwàŋ Deyvid? 36Maa Zwitə Nwi nə yɨ̀sə nshɨ-tɔ fwàŋ Deyvid gi laa,

«Tɨta Nwi nə gì tɨ́ tɨta ŋwaa laa,

duꞌnə nsi maa kwiŋ maꞌnə ŋwaa,

zìꞌ maa yighee njyə faŋ mə taa mɔꞌ

vɨɨ mbeenə və vɨsɨ ghɔ,

a tə ghuu ghə tɔ vəŋ.» #Sam 110.1.

37Nɨniŋ, nshɨ-tɔ fwàŋ Deyvid nəə tii wuu məbweysə vɨɨ ghɔ́ nə tɨta wi. Sii kaꞌ ŋwə baa lùu ŋwiŋ wi kɨkə?» Nwaa vɨɨ vəyaŋ faŋ vəŋ nə zɔ̀ yigisə Yeso, nə kàw maa məzɔ yigisə yi yɔ́ dɨdɨꞌ.

Faŋ Yeso nə gì yigi kɔ̀ŋ vɨɨ mədeesə ŋwaꞌlə Nwi

(Matiu 23.1,5-7,14; Lukas 20.45-47)

38Faŋ Yeso nəə deesə nu Nwi nɨniŋ nə, ŋwə nə baa gì laa lee, «Viŋ kɨ shiinə yiŋwaa yiŋ fɨ ghɔ vɨɨ mədeesə ŋwaꞌlə Nwi faŋ vəŋ kaw maa məmɔꞌ njwisə dəsə maa vəŋ, kaw laa vɨ kɨ shɔꞌtə vəŋ taa vəshəŋ və təwiŋ, 39kaw maa məduꞌ fuu vəŋkaw vəkwi taa ŋii məshəŋtə, baa kaw maa məduꞌ fuu vəŋkaw vəkwi maa vəshəŋ və məzɨ vənu. 40Viŋ kɔꞌ kɨɨ laa, vəŋ zɨ vətɔ və vəki ŋkusə, shɔꞌtə Nwi nə təgi təyaŋ təyaŋ, tay dɨdɨꞌ maa məboꞌ sɨ vɨɨ. Nsɔꞌ njyə faŋ Nwi ndɔ kwaŋ maa vəŋ ndɔ shɔɔ ki.»

Yigi kɔ̀ŋ nu məmɔꞌ ka tɨ́ Nwi

(Lukas 21.1-4)

41Yeso kɨ nii gə̀ dùꞌnə nsi vɨsɨ shəŋ məmɔꞌ ka taa ŋii Nwi yikwalə, kɨ ye faŋ vɨɨ mɔ̀ꞌ ka taa ŋwaꞌ məmɔꞌ ka. Vɨɨ təka vəyaŋ mɔꞌ ka yaŋ. 42Zu ŋku mɔ́ꞌ faŋ nə luu mbəə, jwi mɔ̀ꞌ vəfɨlaŋ tee. 43Yeso ye, tìi vɨɨ məzwetə nu ki yɨ ŋwə, gì tɨ́ vəŋ laa, «Maa viŋ nii yè zu ŋku wì faŋ ŋwə luu mbəə nə. Viŋ zɔ! Mə gì tɨ́ viŋ yinsəŋ laa ŋwə mɔ̀ꞌ ka, ŋwə yaŋ shɔ̀ɔ ŋgwə vɨɨ vənshə faŋ vəŋ nii mɔ̀ꞌ ka taa ŋwaꞌ məmɔꞌ ka tɨ́ Nwi. 44Mə gì nɨniŋ, buꞌ laa vɨɨ vənshə jwi mɔ̀ꞌ, bə̀ fa taa mba. Gə fɨ maa wəzwi ghɔ́, ŋwə jwi mɔ̀ꞌ sheꞌ fa ŋkɨə faŋ ŋwə kìi, kee baa bə̀ tuu fa yiba laa ŋwə gə zɨ̀ fɨ fuŋ me.»

Currently Selected:

Mark 12: bav

Highlight

Copy