Mareko 13
13
Kuru Neḡa Fahe Hauḡiꞌuma rae Reiro
(Mataio 24:1-2, Luka 21:5-6)
1Iesu ani Badiꞌa ḡahunohauꞌeteꞌe Neḡanonoꞌo buarotene, ane mazaonoꞌo edeḡa maꞌeteꞌe vazeḡa ꞌahoganiꞌa ꞌahige rae niro. 'Ihore vazeḡa, ḡianoꞌi! Hadi iraḡa zuni ne iraḡa ꞌadi nugo ḡianoꞌi! Manohuga tauḡi!' 2Rehano Iesuꞌa ninaꞌa, ꞌahige reiro. 'Ne boro ꞌadi horoneꞌehehe? Hadi ꞌahoga hadi ꞌahoga ani ranao mene radiꞌuma madaḡa onaiꞌuma. Agire azaḡa niduꞌa fahe ruruniꞌuma.'
Mada ḡonagano ibitiꞌuma haḡaiḡa
(Mataio 24:3-14, Luka 21:7-19)
3Iesu ani Olive maḡano, aꞌe Badiꞌa ḡahunohauꞌeteꞌe Neḡa naenaeḡano ehorirotene, Petero, Iakobo, Ioane ebu Aniderea zeḡeꞌa sifu ḡadiniro. 4'Efoꞌi! Aꞌe noꞌe madaḡano? Eꞌe haḡaiḡa niduꞌa fureraꞌuma madaḡano, nagi haḡai nu badeḡaniꞌa ibite fureraꞌuma?' 5Iesuꞌa zinaꞌa, ꞌahige reiro. 'Za Ḡianoꞌi! Hena vazeꞌa tutuze soꞌoziꞌuma. 6Vaze ḡehaḡaniꞌa eḡe ni radu onaiꞌuma, ebu ꞌahige reꞌuma. “Eꞌe Keriso” Ebu vaze ḡehaḡa tutuze soꞌoziꞌuma. 7Uti hariḡa, haba haniꞌa, ga haba faḡanonoꞌo egoꞌidene, ago rihanoꞌi! ꞌAdiꞌe fureraꞌuma ḡauḡa, rehano mada ḡonagaꞌe ize, izema. 8Mazaḡa avoꞌa neḡaniꞌa, avoꞌa neḡa teite utitiꞌuma. |iGavamani|r ꞌahoganiꞌa, |igavamani|r ꞌahoga teite utitiꞌuma. Haba nunu zamaḡano habaꞌa hagariꞌuma. Zaga zuni hiaꞌuma. Rehano aꞌe ḡadaheḡano aduga hidiꞌeteꞌe daꞌo. Aduga nu ize mene fureraneha.
9Zaeꞌa bare dugute toꞌi! Mazaḡaniꞌe kanisoro azaḡa zamao ohoze tiꞌuma. Ebuni Iuda kuru neḡa zamaḡano bouziꞌuma. Eḡe uꞌano, |igavamani|r vazeḡa zu zuhiꞌa, zeḡe zamao edaꞌuma. Ebu zeḡe ubumao eḡe hari manoḡa rae fureniꞌuma. 10Mada ḡonaga ize, izema mougano, Badiꞌa hari manoḡaꞌe, haba niduꞌa zamaḡano haramo ziniꞌuma. 11Ebu noꞌe madaḡano oboze teadu, kotao ohozoꞌidene, nagini ḡoeꞌa reꞌuma rae, ago zamare borofoꞌi! Madaḡaniꞌa feuroꞌidene, zaeꞌa ḡoeriꞌuma ḡoeꞌa ziniꞌuma. Zaꞌe eꞌe daꞌo rae furenoꞌi! Mazaḡa zaeꞌa ḡoeriꞌuma ḡoeꞌaꞌe, zaeꞌa mene ḡoereꞌohe. Rehamo Vine Zaḡoḡaniꞌa ḡoereꞌohe. 12Negoḡaniꞌa negoḡa revohanadu, maꞌuma. Ebu moganiꞌa ubuga revohanadu, maꞌuma. Ebu ubudezeꞌa viꞌa moga maḡuno ziniꞌuma, ebu runeo tuḡuziꞌuma. 13Vaze vaze niduꞌa eḡe ni uꞌano, za heꞌeheꞌeziꞌuma. Rehano edau gigaru onamo meiteꞌe vazeḡaꞌe ḡabone hidiꞌuma.
Sausauzeꞌeteꞌe riho ḡauḡa edaꞌuma madaḡa
(Mataio 24:15-28, Luka 21:20-24)
14Rehano sausauzeꞌeteꞌe riho ḡauḡa ani, aneꞌa mene edaꞌuma habaꞌano edaꞌuma. Eꞌe horonoꞌidene, Meꞌodeꞌeteꞌe vazeḡa ederoꞌi! Iudea habaꞌano radiuꞌeteꞌe azaḡa haba maḡa uꞌa ferau onamoꞌi! 15Ne touḡariḡano ahiꞌa ohoneꞌeteꞌe vazeḡaniꞌe bare ovoadu, ne mene diuḡiꞌuma, ane tohe mouga veize. Rehano feraꞌuma. 16Mebao gaueꞌeteꞌe vazeḡaniꞌe, ane dabua mouga veize mene bariꞌuma. Rehano feraꞌuma. 17Eꞌe madaḡano, ahiꞌeta roḡaeḡa zuni, nune hina ene guraḡa ḡubuzeꞌeteꞌe roḡaeḡa, zeꞌe vetuḡaḡa. Feranoga mene idaḡa. 18Irugu madaḡano, eꞌe madaḡaniꞌa mene fureranoga veize kuranoꞌi! 19Mazaḡa eꞌe madaḡano vaze niduꞌa aduga hidiꞌuma. Badiꞌa aniꞌa ḡadaheḡano ḡau niduꞌa haḡairoteꞌeanoꞌo onao izidi, ꞌahiguḡa haḡaiḡa mene fureraro. Vehuꞌu zuni ꞌahiguḡa mene bare fureraꞌuma. 20Zuhiꞌa Boro aniꞌa, eꞌe madaḡa mene futufine, vaze tiba zuni mene ḡabode radiꞌuma. Rehamo aneꞌa mae tiroteꞌe azaḡa* uꞌano, eꞌe madaḡa futufiꞌuma reiro.
21Ebu vaze ꞌahoganiꞌa zinaꞌa, 'Ḡianoꞌi, Kerisoꞌe ꞌahi eꞌe!' ga 'Omo ꞌeꞌe!' rae zoꞌidene, eꞌe ḡoeꞌa ago mae ḡihinoꞌi. 22Mazaḡa ḡuriro Kerisoḡa zuni ḡuriro peroveta azaḡa fureraꞌuma. Ebu Badiꞌaꞌa rae tiroteꞌe azaḡa tutuze soꞌozihi radu haḡai nu badeḡa boro bagaḡa zu zaguzagaꞌuma haḡaiḡa haḡaiꞌuma. 23Eꞌanoꞌo zaeꞌa bare dugute toꞌi! Haḡai niduꞌa, aneꞌa ize, izema fureranogano, zae veize rae fureneꞌohe.'
Vaze Ubuganiꞌa ovaiꞌuma
(Mataio 24:29-31, Luka 21:25-28)
24Ebu aduga hidiꞌuma madaḡa hauḡine, eꞌe madaḡano madaꞌe uzaboraꞌuma. Batoꞌe mene agaraꞌuma. 25Buzuvaꞌe adureonoꞌo rururu buaꞌuma. Ebu adure ḡianeꞌeteꞌe gigiꞌaḡaniꞌe hagahagariꞌuma. 26Ebu eꞌe madaḡano eḡe, Vaze Ubuganiꞌa ḡoze zamaḡano ovaiꞌuma. Gigiꞌa inaraḡa boro zuni agaḡa manoḡa madu ovaiꞌuma. Ebu vaze vazeꞌa eꞌe horoniꞌuma. 27Ebu hena eḡeꞌa tuḡure viga tuḡuziꞌuma. Ebu haba niduꞌanonoꞌo, Badiꞌaꞌa rae tiroteꞌe azaḡa nuꞌoziꞌuma. Haba ḡonaganonoꞌo haba ḡonaga azaḡa nuꞌoziꞌuma.
Madaḡa haniteꞌeteꞌe ederoꞌi!
(Mataio 24:32-35, Luka 21:29-33)
28Figi ireḡa mazao naginiꞌa fureruꞌeteꞌe ḡianadu, ederoꞌi. Ezaganiꞌa butiru itadu rouḡaniꞌa udufaꞌoga horonetene irugu madaḡa haniteha rae edereꞌohe. 29Eꞌe teige ꞌahiguḡaniꞌa fureruꞌeteꞌe horonineꞌe, eḡe, Vaze Ubuganiꞌa adureonoꞌo bare ovaiteꞌe ederoꞌi. 30Hubehune ziꞌohe. Izidi radiuꞌeteꞌe azaḡa mene hauḡiꞌuma, onamo ꞌahiguḡaguḡa niduꞌa fureraꞌuma. 31Adure zu rahaꞌe hauḡiꞌuma. U eḡe ḡoereꞌe radiu tuḡutuḡu.
Guhiu radoꞌi!
(Mataio 24:36-44)
32Rehano naniꞌa ꞌahiguḡaniꞌa fureraꞌuma, emeḡe niduꞌa aḡuꞌa. Adureo radiuꞌeteꞌe aneruḡa zuni aḡuꞌa. Badiꞌa Ubuga zuni aḡuꞌa. U eḡe Mama daꞌo edeḡa. 33Zaeꞌa dugute toꞌi! Ḡiane radoꞌi! Mazaḡa za aḡuꞌa, eꞌe madaḡa naniꞌa onaiꞌuma. 34Aꞌe, vazeꞌa ane ne modadu, onameꞌeteꞌe heuḡa. Aniꞌa iḡuneꞌeteꞌe madaḡano, ane tuḡure azaḡa mazao, gau tiba tiba ziniꞌuma. Ebu ibiheta ḡianeꞌeteꞌe vazeḡa ninaꞌa, “Ehamu radoꞌi!” reꞌuma. 35Eꞌanoꞌo fairu ḡianoꞌi! Mazaḡa za aḡuꞌa ne zuhiꞌaḡa naniꞌa bare onaiꞌuma. Ḡorava oheꞌano ga, ohere nemanema ga, irara moneo ga, oheredaꞌo, za aḡuꞌa. 36Aniꞌe, za aḡuꞌa madaḡano, bare onaiꞌuma. Ebu zaeꞌa bazeꞌenogano hanizine, nougiꞌuma? 37Eḡeꞌa zae ziꞌeteꞌe ḡoeꞌaꞌe, vaze niduꞌa zuni ziꞌohe: Ḡiane radoꞌi!'
Currently Selected:
Mareko 13: KSJ
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, INC.
