Mareko 9
9
1Ebu hena ꞌahige rae ziro. 'E hubehune ziꞌohe. Za nu ꞌada radiuꞌetaꞌaꞌe, mene rudaꞌuma, onamo Badiꞌaꞌa gigiꞌa inaraḡa hina ibitohanoga veize onaiꞌuma. Eꞌe horoniꞌuma.'
Iesu iraḡaniꞌa nufiro
(Mataio 17:1-13, Luka 9:28-36)
2Mada fuꞌo tu tiba fare enogano Iesuꞌa Petero, Iakobo ebu Ioane zamazadu, zeḡe daꞌo maḡa boro itiro. Ebuni zeḡe ubumao Iesu iraḡaniꞌa nufiro. 3Zuni dabuaḡaniꞌa ꞌuranadu, vazavazahiro. Haba niduꞌa zamaḡano vazeꞌa mene ꞌouge vuzuꞌe deheneꞌohe. 4Ebuni Eliaꞌa Mose* teite zeḡe mazao fureranadu, Iesu ḡoreniro. 5Peteroꞌa Iesu ninaꞌa, 'Ihore vazeḡa! Eme ꞌadama radiuꞌetaꞌaꞌe manoḡa tauḡi. Nugo taruha uḡidu ogoratihi, tiba ḡae veize, tiba Mose veize ebu tiba Elia veize.' 6Ani aḡuꞌa, nagini reꞌumaꞌe. Eꞌanoꞌo ꞌouge reiro, ze rihau rudaro ꞌahine. 7Ebu ḡozeꞌa feuradu, zeḡe ꞌuiro. Ebu ḡoze zamaḡanonoꞌo ago ꞌahoga igiro, raenaꞌa, 'ꞌAdiꞌe eḡe Ubude, eḡe zamarone. Ḡoeꞌa egohanoꞌi!' 8Zeḡeꞌa ehamarotene, vaze ꞌahoga mene horoniro, rehano Iesu daꞌo horoniro.
9Zeꞌa maḡanonoꞌo ovairoteꞌea, Iesuꞌa ziro, raenaꞌa, “Zae ubumao fureranateꞌe ḡauḡaniꞌe, vaze mazao ago rae furenoꞌi, onamo Vaze Ubuganiꞌa runeonoꞌo bare ḡabode iḡunogano.” 10Zeḡeꞌa ani ḡoere egoharo. Rehano zeḡe daꞌo bone ḡoꞌane vaḡiro, raenaꞌa, 'Iesuꞌa runeonoꞌo bare ḡabode iḡuniꞌuma raꞌetaꞌaꞌe nagini?' 11Ebuni zeḡeꞌa Iesu ḡadinenaꞌa, 'Nougadu Mose goro ḡoeꞌa ihozeꞌeteꞌe azaḡaniꞌa raenaꞌa, “Ibiteꞌe Eliaꞌa onaiꞌuma.” raꞌohe?' 12Iesuꞌa naenaezinaꞌa, ꞌahige reiro. 'Eliaꞌe hubehune ibite onaiꞌuma, ḡau niduꞌa mae izifoga. Nougadu ibite bone buka zaḡoḡa zamaḡanoꞌe raenaꞌa, “Vaze Ubugaꞌe aduga ḡehaḡa hidiꞌuma, ebu rae oꞌoꞌniꞌuma.” reido? 13Rehano eḡeꞌa ziꞌohe. Elia ai onaeha, ebu vaze nuꞌa ane mazao zeḡe ura haḡaiḡa haḡaeha, ibite buka zaḡoḡa zamaḡano tiroteꞌe teigenaꞌa.'
Iesuꞌa, vine sauꞌaniꞌa ohoze komeꞌa ragano reiroteꞌe fainiro
(Mataio 17:14-21, Luka 9:37-43a)
14Iesu zuni Petero, Iakobo ebu Ioane, zeḡe ḡazaḡaꞌa ane tahiꞌa fuꞌo tu ḡazaḡa fare mazao feuri ꞌovoiro. Vaze ḡuḡuvaḡaniꞌa, zeḡe fuꞌo tu ḡazaḡa fare edau ḡeḡezoga horoziro. Ebu Mose goro ḡoeꞌa ihozeꞌeteꞌe azaḡaniꞌa, Iesu tahiꞌa tahiꞌa teite rotetiro. 15Ebu vaze ḡuḡuvaḡaniꞌa Iesu horonirotene, zaguzaganadu, ane vaḡe dure onamiro, ebu hidadu matuꞌoharo. 16Iesuꞌa ane tahiꞌa ḡadizenaꞌa, 'Zeḡe teite nagini uꞌano roteteꞌohe?' rae ziro. 17Ebu vaze ꞌahoganiꞌa ḡuḡuva zamaḡanonoꞌo naenaeniꞌenaꞌa, 'Ihore vazeḡa, e ubudehe ḡae vaḡe tutune onaeha, mazaḡa aniꞌe vine sauꞌaniꞌa ragano radu, ḡoeroga mene idaḡa. 18Vine sauꞌaniꞌa agatiniꞌetene, rahao mae feuneꞌohe. Hebeꞌanonoꞌo busureꞌohe. Ḡonoga atiteꞌohe, ebu ahiꞌaniꞌa taiduꞌohe. E ḡae tahiꞌa tahiꞌa mazao, vine sauꞌa hegone bunoga veize ḡadimana rehano, ze hegone bunihi ra, rehano mene idaraneha.'
19Amaḡe Iesuꞌa zinaꞌa, 'O! Za Badiꞌa mazao mene fieꞌeteꞌe azaḡa! E za teite nouge daꞌo radiu onaꞌuma? E nouge ihoze onameꞌeꞌuma? Tahiꞌa kobeꞌa tutune aroꞌi eḡe vaḡe.' reiro. 20Zeḡeꞌa ane vaḡe tutune ariro. Vine sauꞌaniꞌa Iesu horonirotene, tahiꞌa komeꞌa mae ketoketoniro. Rahao higau bauriro, ebu kiure ragaviro, ebu hebeꞌanonoꞌo busuriro. 21Iesuꞌa moga ḡadiniro. ꞌAhige reiro. 'Noꞌe madaḡano ani ugi ꞌahi meiro?' Moganiꞌa ninaꞌa, 'Ani komeꞌa madaḡano meiro.' 22Ebu raenaꞌa, 'Iḡaiḡa ire roga zamaḡano zu vu zamaḡano, vine sauꞌaniꞌa mae feuneꞌohe, ani uraꞌe ḡaboneḡa sausaunihi raduni. Ḡa fainoga edeḡa roꞌidene, vetuḡafoꞌi ebu danafoꞌi!' 23Iesuꞌa niro. ' “Ḡa edeḡa roꞌidene” rae ihiꞌehehe? Badiꞌa mazao fieꞌeteꞌe vazeḡaniꞌe, nagi gauḡa haḡaogaꞌe edeḡa. 24Tahiꞌa komeꞌa moganiꞌa ḡarihe ḡihau niro. ꞌAhige reiro. 'E Badiꞌa mazao fieꞌohe. Rehano eḡeꞌa mene idaruꞌeteꞌe moneo, danahoꞌi!'
25Iesuꞌa vaze ḡehaḡaniꞌa dure onairoteꞌe horozirotene, vine sauꞌa taꞌiroharo. 'Ḡa, vaze mae uhuneꞌeteꞌe zu mae baboneꞌeteꞌe vineḡa sauꞌa! Eḡeꞌa ḡaꞌohe. Ane mazaonoꞌo buanoꞌi! Ane ragano bare ago roꞌi!' 26Vine sauꞌaniꞌa ḡihau ḡaniḡanauꞌenaꞌa, tahiꞌa komeꞌa mae ketoketonadu, buaro. Ebu tahiꞌa komeꞌaniꞌa rune teige baziro. Vaze ḡehaḡaniꞌa ani horonadu, ze ꞌane ani rudaneha reiro. 27Rehano Iesuꞌa evoꞌano mae ḡihiniro, ebu tahiꞌa komeꞌaniꞌa iḡune edaro.
28Iesuꞌa ne ꞌahoga diuḡirotene, tahiꞌaḡaniꞌa sifu sifu ḡadiniro. 'Nougaꞌahi emeḡeꞌa vine sauꞌa hegone bunoga mene idaraneha?' 29Iesuꞌa zinaꞌa, 'Vine sauꞌa ꞌahiguḡaꞌe kuru hina daꞌo hegoze buzeꞌohe. Mene kurauneꞌe, vine sauꞌa ꞌuguḡaniꞌe hegoze buzogaꞌe mene idaḡa.'
Iesuꞌa rune hariḡa bare reiro
(Mataio 17:22-23, Luka 9:43b-45)
30Iesuꞌa ane tahiꞌa tahiꞌa teite eꞌe habaꞌa mode iḡunadu, Galilea habaꞌano vitau onamiro. Ebu Iesuꞌe aneꞌa noumao radiuꞌeteꞌe, vazeꞌa ederoga mene uratiro. 31Mazaḡa aniꞌe tahiꞌaḡa ihozeꞌenaꞌa, onamiro ꞌahine. ꞌAhige reiro. 'Eḡe, Vaze Ubuganiꞌe, vazeꞌa meꞌuma, ebu uḡuhiꞌuma. Ebu mada uḡidu zamaḡano bare ḡabode iḡuniꞌuma.' 32Rehano zeꞌe, aniꞌa ḡoerirotaꞌaꞌe mene zamariro, ebu zeꞌa ḡadinoga riharo.
Iniuꞌe hitagano raꞌohe?
(Mataio 18:1-5, Luka 9:46-48)
33Zeꞌa Kaperanauma neḡano feuriro. Zeḡeꞌa ne diuḡirotene, Iesuꞌa tahiꞌaḡa ḡadiziro. 'Za ibio onaateꞌe zamaḡano, nagini ḡoꞌane onaeha?' reiro. 34Rehano zeꞌe mene ḡoreniro, ibio onaateꞌe zamaḡano iniu niḡa boro raenaꞌa, zeḡeꞌa zeḡe bare ḡoꞌaziro ꞌahine. 35Ebu Iesuꞌa ehoradu, ane tahiꞌa gaubanana aheu fare (12) huziro. Ebu ꞌahige rae ziro. 'Iniuꞌa niḡa boro reihi reine, aniꞌa ane bare ꞌuꞌuḡano reꞌuma, ebu tuḡure vazeḡa reꞌuma. 36Ebu aniꞌa ohoze komeꞌa zamahanadu, zeḡe zamao ohoniro, ebu evoꞌa hina ohanadu, ꞌahige rae ziro. 37'Iniuꞌa eḡe uꞌano tahiꞌa komeꞌa ꞌahiguḡa mae ḡihinine, aniꞌe eḡe mae ḡihiheꞌohe. Ebu iniuꞌa eḡe mae ḡihihine, aniꞌe eḡe daꞌo mene mae ḡihiheꞌohe, rehano Badiꞌa, eḡe Mama zuni mae ḡihineꞌohe.'
Iniuꞌa mene rofine, ani eme danafeꞌohe
(Luka 9:49-50)
38Ioaneꞌa Iesu niro. 'Ihore vazeḡa, vaze ꞌahoganiꞌa ḡae niḡano vine sauꞌa sauꞌa hegoze buziroteꞌe emeḡeꞌa horoniro, ebu emeḡeꞌa ani garariro, aniꞌe emeḡe teite mene rauꞌe ꞌahine.' 39Rehano Iesuꞌa ziro. 'Ani ago gararoꞌi! Mazaḡa eḡe nio gigiꞌa inaraḡa haḡaeꞌeteꞌe haḡaiḡa* haḡaeꞌeteꞌe vazeḡa, eꞌe haḡaiḡa enogano, eḡe ni mene sausaune ḡoeriꞌuma. 40Mazaḡa eme mene rofeꞌeteꞌe vazeḡaniꞌe, emeḡe danafeꞌeteꞌe vazeḡa. 41E hubehune ziꞌohe. Ḡaeꞌa Keriso niḡa mae ḡihineꞌeteꞌe uꞌano, iniuꞌa gagone vuḡa ḡanine, aniꞌe hubehune eꞌe naeḡa meꞌuma.'
Haḡai sauꞌano tutune veꞌoneꞌeteꞌe
(Mataio 18:6-9, Luka 17:1-2)
42'Tahiꞌa komeꞌa ꞌahiguḡa eḡe mazao fieꞌeteꞌe zamaḡano, iniuꞌa haḡai sauꞌano tutune veꞌonihi reine, aniꞌe hadi boro bagaḡa ꞌunuḡano autadu, davarao mae feunine, manoḡa. 43Ebu evoꞌoꞌa mae veꞌoꞌoꞌidene, variꞌe modoꞌi! Evoꞌo naeḡa oꞌoꞌa reꞌudemo, ꞌouge ḡabone hidogaꞌe manoḡa. Hena evoꞌo aheu radu, radiu tuḡutuḡu ireḡa* diuḡogaꞌe sauꞌa. 45Ebu odaḡoꞌa tutuꞌe veꞌoꞌoꞌidene, variꞌe modoꞌi! Odaḡo naeḡa oꞌoꞌa reꞌudemo, ꞌouge ḡabone hidogaꞌe manoḡa. Hena odaḡo aheu radu, radiu tuḡutuḡu ireḡa diuḡogaꞌe sauꞌa. 47Ebu ubumaḡoꞌa tutuꞌe veꞌoꞌoꞌidene, ḡude modoꞌi! Ubumaḡo tiba reꞌudemo, ꞌouge Badiꞌaꞌa ibitohauꞌeteꞌe habaꞌa diuḡogaꞌe manoḡa. Hena ubumaḡo aheu radu, radiu tuḡutuḡu ireḡa diuḡogaꞌe sauꞌa. 48Eꞌe habaꞌano radiu tuḡutuḡu idiḡa ḡehaḡaniꞌa, vaze ahiꞌa au radiuꞌeꞌuma, zuni ireḡaniꞌe mene vidaꞌuma.
49Vaze niduꞌaꞌe ire hina deheziꞌuma. 50Damaꞌe manoḡa, rehamo damaꞌa aberaune, nouge nouge bare ininiꞌuma? Zamaꞌa manorifine, dama zamao toꞌi, zuni nabudizeta tone radiu tiburanoꞌi!'
Currently Selected:
Mareko 9: KSJ
Highlight
Share
Copy
Want to have your highlights saved across all your devices? Sign up or sign in
Wycliffe Bible Translators, INC.
