Luka 8

Muso minw tun be Yezu dɛmɛ

1O kɔ, Yezu tun be yaala duguba ni dugudenninw na ka waajuli kɛ ka Ala ka masaya kibaru diman fɔ. A ka kalanden tan ni fila tun be n'a ye, 2#Mat 27.55-56; Mar 15.40-41; Luka 23.49 ani muso damani fana, Yezu tun ye jina gwɛn ka bɔ minw dɔw la, ka dɔw kɛnɛya: Magidalaka Mariyamu, Yezu tun ye jina wolonwula gwɛn ka bɔ min la, 3ni Zaani min ye *Erɔdi ka nafolo kɔlɔsibaga Suza muso ye, ni Suzani, ani muso wɛrɛw, minw tun be Yezu n'a ka kalandenw dɛmɛ n'u bololafɛnw ye.

Sɛnɛkɛla talen

(Mat 13.1-9; Mar 4.1-9)

4Jamaba tagara lajɛn, mɔgɔw tun be bɔ duguw bɛɛ la ka taga Yezu sɛgɛrɛ. A ye talen la ko:

5«Sɛnɛkɛla dɔ bɔra ka taga ka suman seri. K'a to serili la, kisɛ dɔw tagara ben sira daa la. Tɛmɛbagaw y'u dɔn, kɔnɔw y'u kunu. 6Dɔw fana tagara ben farayɔrɔ la. U falenna dɔrɔn, u sara bari sumaya tun te u kɔrɔ. 7Dɔw fana tagara ben ŋɔni yɔrɔ la, u falenna, u ni ŋɔni wilila ɲɔgɔn fɛ, ŋɔni y'u degun. 8Dɔ wɛrɛw tagara ben dugukoloɲuman na. U falenna ka wili ka kisɛ kɛ. Olu y'u ɲɔgɔn kɛmɛ kɛmɛ sɔrɔ.»

O kuma fɔnin kɔ, Yezu pɛrɛnna ko: «Tulo be min fɛ ka mɛnni kɛ, o ka mɛnni kɛ.»

Mun na Yezu be talen la?

(Mat 13.10-13; Mar 4.10-12)

9Yezu ye talen min la, a ka kalandenw y'a ɲininga o kɔrɔ la. 10#Eza 6.9-10 A y'u jaabi ko: «See dira aw ma ka Ala ka masaya gundow lɔn. Nga a koo be fɔ tɔw ye talen le la, waasa u filɛli kɛtɔ, u kana foyi ye, u mɛnni kɛtɔ, u kana foyi faamu.

Yezu be sɛnɛkɛla talen kɔrɔ fɔ

(Mat 13.18-23; Mar 4.13-20)

11«N ye talen min la, o kɔrɔ filɛ nin ye: Sumansi, o ye Ala ka kuma le ye. 12Mɔgɔ dɔw bɔnin be sirada fɛ, kisɛ benna yɔrɔ min na. U mana Ala ka kuma mɛn, Sutana be na o kuma bɔ u kɔnɔ, janko u kana la a la ka kisi. 13Mɔgɔ dɔw fana bɔnin be farayɔrɔ fɛ. N'u y'o kuma mɛn, u be sɔn a ma ni nisɔndiya ye. Nga a te sigiyɔrɔ sɔrɔ u kɔnɔ, u be la o kuma na tumanin kelen dɔrɔn, ni kɔrɔbɔli nana, u be ban a kuma la. 14Mɔgɔ dɔ wɛrɛw fana bɔnin be ŋɔni yɔrɔ fɛ. Olu mana kuma mɛn, hamikow, ni nafoloko, ni diyanakow b'o kuma nagasi fɔɔ nafa te sɔrɔ a la. 15Dɔw fana bɔnin be dugukoloɲuman fɛ. Olu mana kuma mɛn, u b'a minɛ ni dusuɲuman ye fɔɔ nafa be sɔrɔ a la.»

Yezu ka ladili, mɛnni kɛcogo ta faan fɛ

(Mar 4.21-25)

16 # Mat 5.15; Luka 11.33 Yezu y'a fɔ tugu ko: «Mɔgɔ si te fitinɛ mana k'a bila gongo jukɔrɔ, walima kalaka jukɔrɔ. Nga o b'a bila fɛɛn dɔ kan, janko mɔgɔ minw be don soo kɔnɔ, u ka yeli kɛ.

17 # Mat 10.26; Luka 12.2 «Fɛɛn o fɛɛn dogonin be, o bɛɛ bena ye. Gundo si te yen min tena bɔ kɛnɛ kan.

18 # Mat 25.29; Luka 19.26 «Aw k'aw ka mɛnni kɛcogo kɔlɔsi, bari fɛɛn be min fɛ, dɔ bena fara o ta kan, nga fɛɛn te min fɛ, hali a be miiri ko min b'a fɛ, o bena bɔsi a la.»

Yezu baa n'a balimaw

(Mat 12.46-50; Mar 3.31-35)

19Yezu tun be yɔrɔ min na, a baa n'a dɔgɔninw tagara yen. Nga u tun te sera ka gwɛrɛ a la minkɛ jama kosɔn, 20dɔ y'a fɔ a ye ko: «Karamɔgɔ, i baa n'i dɔgɔninw lɔnin be kɛnɛma k'u mako b'i la.»

21Nga Yezu ye o tigi jaabi ko: «Mɔgɔ minw be u tulo malɔ Ala ka kuma na k'a sira taama, olu le ye ne baa ni ne dɔgɔninw ye.»

Yezu be fɔɲɔ lalɔ

(Mat 8.18,23-27; Mar 4.35-41)

22Loon dɔ la, Yezu donna kurun kɔnɔ n'a ka kalandenw ye. A y'a fɔ u ye ko: «An ka taga baa kɔ.» 23K'u to baa cɛma kurun boli la, Yezu sinɔgɔra. Fɔɲɔba dɔ wilila, fɔɔ kurun tun be ɲini ka fa jii la. U tun be farati la. 24O la, a ka kalandenw gwɛrɛl'a la k'a kunun k'a fɔ a ye ko: «Karamɔgɔ, karamɔgɔ, an satɔ filɛ!»

Yezu kununna ka kuma fɔɲɔ ni jii kunna. Fɔɲɔ lɔra, jii malara, yɔrɔ malara. 25O kɔ, Yezu y'a fɔ a ka kalandenw ye ko: «Aw jigi be min?»

Kalandenw kabakoyara fɔɔ siranya donna u la n'u be ɲɔgɔn ɲininga Yezu koo la ko: «Cɛɛ nin ye jɔn ye? Hali fɔɲɔ ni baji be sɔn a ta ma?»

Yezu be jinakulu gwɛn

(Mat 8.28-34; Mar 5.1-20)

26Yezu n'a ka kalandenw sera Gadare mara la. Baa y'o mara ni Galile ta danfara bɔ. 27Yezu jigira ka bɔ kurun kɔnɔ dɔrɔn, jinatɔcɛ dɔ nan'a kunbɛn. Kabini tumajan, a tun te fani don. A tun te si dugu kɔnɔ tugu fɔɔ kaburutu la. 28Cɛɛ ye Yezu ye minkɛ dɔrɔn, a pɛrɛnna kosɔbɛ ka taga kunbiri gwan Yezu kɔrɔ k'a kaan bɔ ko: «Mun b'an cɛ, Fɛɛn bɛɛ kuntigi Ala Dencɛ Yezu? Ne b'i daali, i kana ne tɔɔrɔ.» 29Cɛɛ nin y'o fɔ, bari Yezu tun b'a fɔra ko jina ka bɔ a la. Jina nin tun b'a tɔɔrɔ tuma caaman, mɔgɔw tun b'a bolo n'a seenw bɛɛ siri ni jɔrɔkɔw ye k'a bila. Nga a tun be to k'u tigɛtigɛ, jina be taga n'a ye kongo kɔnɔ.

30Ayiwa, Yezu ye cɛɛ ɲininga ko a tɔgɔ be di.

A y'a jaabi ko Jinakulu. A y'o fɔ bari jina caaman tun b'a la. 31Jina nunu ye Yezu daali kosɔbɛ ko a kana olu gwɛn ka taga u ɲagwanyɔrɔ la.

32O y'a sɔrɔ lɛkuluba dɔ tun be dumuni kɛra kulu kan. Jina nunu ye Yezu daali ko a k'a to u ka taga don o lɛɛw la. Yezu sɔnna. 33Jinaw bɔra cɛɛ la ka taga don lɛɛw la. Lɛkulu girinna ka bɔ kulu kan ka taga don baji la ka sa.

34U dɛndɛbagaw y'o koo ye minkɛ, u bolila ka taga o kibaru fɔ dugu kɔnɔ ni dafɛduguw la. 35Koo min kɛra, mɔgɔw bɔra ka taga o filɛ. U sera Yezu fɛ. U y'a ye ko jina tun bɔra cɛɛ min na, ale siginin be Yezu seen kɔrɔ, fani b'a kaan na, a ɲamalɔnin lo. U siranna kosɔbɛ. 36Cɛɛ kɛnɛyara cogo min na, minw y'o ye, olu y'o lakali mɔgɔw ye. 37O la, u bɛɛ y'a ɲini Yezu fɛ ko a ka bɔ u ka mara la, bari a siranya boɲana u fɛ. Yezu donna kurun kɔnɔ ko a be taga, 38cɛɛ y'a ɲini a fɛ ko ni ale be se ka taga n'a ye.

Nga Yezu y'a jaabi ko: 39«Segi ka taga i ka soo, Ala ye koba min kɛ i ye, i ka o bɛɛ lakali.»

Yezu ye koba min kɛ cɛɛ ye, a tagara o lakali dugu nin bɛɛ kɔnɔ.

Yezu be tagara Zayirisi fɛ

(Mat 9.18-26; Mar 5.21-43)

40Yezu kɔsegira ka bɔ baa kɔ tuma min na, mɔgɔw bɛɛ y'a kunbɛn ni nisɔndiya ye, bari u bɛɛ tun b'a makɔnɔna. 41O tuma na, cɛɛ dɔ sera min tɔgɔ ko Zayirisi. Kalanso kuntigi tun lo. A tagar'a kunbiri gwan Yezu kɔrɔ, k'a daali ko a ka sabali ka taga ale ka soo, 42bari ale denmuso man kɛnɛ, ko a be ɲini ka sa, k'o denmuso nin dɔrɔn le ye ale deen ye. Deen nin sii tun be saan tan ni fila ɲɔgɔn.

Yezu taatɔ o yɔrɔ la, mɔgɔw tun b'a digidigi fɔɔ k'a degun. 43O y'a sɔrɔ, muso dɔ tun b'u cɛma, min ka koli tun te banna n'a kɛra a ma bana ye kabini saan tan ni fila. A bololafɛn bɛɛ banna, bari a tun tagara furakɛla caaman fɛ. Nga a ka bana ma nɔgɔya. 44A gwɛrɛla Yezu la jama cɛma ka maga a ka fani dakun na a kɔfɛ. O yɔrɔnin bɛɛ, a ka koli lɔra. 45Yezu ye ɲiningali kɛ ko: «Jɔn magara ne la?»

Mɔgɔ si ma sɔn k'a fɔ ko ale lo. Piyɛri ye kuma ta k'a fɔ ko: «Karamɔgɔ, i ɲaa b'a la ko mɔgɔw b'i digidigira fɔɔ k'i degun.»

46Nga Yezu ko: «Mɔgɔ dɔ magara ne la, bari ne y'a lɔn ko ne ka fanga ye kabako dɔ kɛ sisan sisan.» 47Muso nin y'a lɔn ko koo nin tena se ka dogo tugu minkɛ, a yɛrɛyɛrɛtɔ tagar'a kunbiri gwan Yezu kɔrɔ. A magara a la kuun min na, ani a kɛnɛyara yɔrɔnin kelen cogo min na, a y'o bɛɛ lakali Yezu ye mɔgɔw bɛɛ ɲana. 48Yezu y'a fɔ a ye ko: «N balimamuso, i kisira i ka lanaya kosɔn. Taga hɛrɛ la.»

49Ka Yezu to o kuma na, mɔgɔ dɔ bɔra kuntigi Zayirisi ka soo ka na a fɔ a ye ko: «I denmuso banna, kana karamɔgɔ sigɛn tugu.»

50Yezu y'o kuma mɛn minkɛ, a y'a fɔ Zayirisi ye ko: «Kana siran, la Ala la dɔrɔn, i denmuso bena kisi.»

51U sera Zayirisi ka soo tuma min na, Yezu ma sɔn mɔgɔ si ka don n'a ye boon kɔnɔ fɔɔ Piyɛri, ni Zan, ni Zaki, ani sungurunin faa n'a baa dɔrɔn. 52Mɔgɔ bɛɛ tun be kasira ka kule sungurunin ka saya koo la. Yezu y'a fɔ u ye ko: «Aw kana kasi, sungurunin ma sa, nga a be sinɔgɔra le.»

53Mɔgɔw y'a lɔn ko sungurunin sara tiɲɛ na minkɛ, u yɛlɛla Yezu ma. 54A donna ka sungurunin suu minɛ a bolo ma k'a fɔ a ye ko: «Sungurunin, wili.» 55O yɔrɔnin bɛɛ, deen nii segir'a ma, a wilila. Yezu y'a fɔ u ye k'u ka dumuni d'a ma. 56Deen wolobagaw kabakoyara kosɔbɛ. Nga Yezu y'a fɔ u ye k'a gwɛlɛya k'u kana o koo nin ɲafɔ mɔgɔ si ye.

Currently Selected:

Luka 8: AKKDC08

Highlight

Copy