Mar 10
10
Yezu ye min fɔ furusa koo la
(Mat 19.1-12; Luka 16.18)
1Yezu wilila ka bɔ o yɔrɔ la ka taga Zude mara la, Zurudɛn baji kɔ. Jamaba tagara lajɛn a kɔrɔ tugu. A ye kuma ta k'u kalan i n'a fɔ a tun be to k'a kɛ cogo min na ka kɔrɔ.
2 *Fariziɲɛ dɔw gwɛrɛla a la k'a ɲininga ko: «A daganin be cɛɛ k'a muso furu sa wa?»
U y'o fɔ k'a kɔrɔbɔ.
3Yezu fana y'u ɲininga ko: «Musa ye sariya jumɛn sigi aw ye o koo la?»
4 #
Sad 24.1-4; Mat 5.31 U y'a jaabi ko: «Musa sɔnna ko cɛɛ ka furusasɛbɛ dilan ka sɔrɔ k'a muso bila.»
5Yezu y'a fɔ u ye ko: «Aw ka dusugwɛlɛya le y'a to Musa y'o sariya sigi aw ye. 6#Kod 1.27; 5.2 N'o tɛ, diɲɛ daminɛtuma na, ‹Ala ye cɛɛ ni muso dan.› 7#Kod 2.24 O le kosɔn, cɛɛ ben'a faa n'a baa to yen ka nɔrɔ a ka muso la. 8U fila be jɛn ka kɛ kelen ye. O cogo la, u te fila ye tugu, nga kelen. 9O la, Ala ye fɛɛn min jɛn k'a kɛ kelen ye, mɔgɔ si kana o faran.»
10Yezu n'a ka kalandenw kɔsegira soo tuma min na, u y'a ɲininga o koo la tugu. 11#Mat 5.32; Kor fɔlɔ 7.10-11 A y'a fɔ u ye ko: «Mɔgɔ o mɔgɔ y'a muso furu sa ka dɔ wɛrɛ ta, o tigi be kakalaya kɛ, a b'a muso fɔlɔ hakɛ ta. 12Ni muso min bɔra a cɛɛ fɛ ka taga furu dɔ wɛrɛ fɛ, o fana be kakalaya kɛ.»
Yezu be duba kɛ denmisɛn dɔw ye
(Mat 19.13-15; Luka 18.15-17)
13Mɔgɔw tagara Yezu sɛgɛrɛ ni denmisɛn dɔw ye ko a k'a bolo la u kan ka duba kɛ u ye, nga a ka kalandenw sɔngɔra u kunna. 14Yezu y'o ye minkɛ, a dimina kalandenw kɔrɔ k'a fɔ u ye ko: «Aw k'a to denmisɛnw ka na ne fɛ, aw kana u bali, bari Ala ka masaya ye olu bɔɲɔgɔnw le ta ye. 15#Mat 18.3 Tiɲɛ na, ne b'a fɔ aw ye ko ni mɔgɔ min ma sɔn Ala ka masaya ma i n'a fɔ denmisɛn b'a kɛ cogo min na, o tigi tena se ka don a la fewu.»
16O kɔ, Yezu ye denmisɛn nunu ta kelen kelen k'a bolo la u kan ka duba kɛ u ye.
Yezu ni nafolotigi dɔ
(Mat 19.16-30; Luka 18.18-30)
17Yezu taatɔ dugu wɛrɛ la, cɛɛ dɔ bolila ka taga kunbiri gwan a kɔrɔ k'a ɲininga ko: «Karamɔgɔɲuman, ne ka kan ka mun kɛ ka nii banbali sɔrɔ?»
18Yezu y'a fɔ a ye ko: «Mun na i be ne wele karamɔgɔɲuman? Mɔgɔɲuman si te yen ni Ala kelen tɛ. 19#Bɔk 20.12-16; Sad 5.16-21 I be Ala ka sariyaw lɔn: ‹I kana mɔgɔ faga, i kana kakalaya kɛ, i kana soɲali kɛ, i kana galon seereya kɛ, i kana mɔgɔ si tɔɲɔ, i faa n'i baa boɲa.› »
20Cɛɛ y'a jaabi ko: «Karamɔgɔ, ne ye olu bɛɛ bato kabini n denmisɛn tuma.»
21O la, Yezu y'a filɛ, a koo diyara a ye. A y'a fɔ a ye ko: «Fɛɛn kelen b'i jɛn. Taga i bololafɛnw feere k'o wari tilan fantanw cɛ, o la, i bena nafolo sɔrɔ sankolo la. O kɔ, na tugu ne kɔ.»
22O kuma ye cɛɛ ɲaa sisi. A dusu kasinin tagara, bari nafoloba tun b'a fɛ.
23Kalandenw tun ye Yezu lamini. A y'u filɛ k'a fɔ u ye ko: «Nafolotigiw donko ka gwɛlɛ Ala ka masaya la!»
24O kuma ye kalandenw kabakoya. Yezu ye kuma ta tugu k'a fɔ u ye ko: «N balimaw, minw jigi be nafolo kan, olu donko ka gwɛlɛ Ala ka masaya la dɛ! 25Ɲɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka masaya la.»
26Kalandenw kabakoyara tugu ka dama tɛmɛ fɔɔ u tun b'a fɔra ɲɔgɔn ye ko: «O tuma na, jɔn le bena se ka kisi?»
27Yezu y'u filɛ k'a fɔ ko: «Koo dɔw be yen, adamadenw te se ka min kɛ, nga Ala be se k'o kɛ, bari Ala be se fɛɛn bɛɛ la.»
28Piyɛri y'a fɔ Yezu ye ko: «A filɛ, an ye fɛɛn bɛɛ to yen ka tugu e kɔ.»
29Yezu y'a jaabi ko: «Tiɲɛ na, ne b'a fɔ aw ye ko ni mɔgɔ o mɔgɔ y'a ka dugu to, walima a balimacɛw, walima a balimamusow, walima a faa, walima a baa, walima a deenw, walima a ka forow to yen, ne ni kibaru diman kosɔn, 30siga t'a la, o tigi bena olu bɛɛ ɲɔgɔn kɛmɛ kɛmɛ sɔrɔ diɲɛ nin na. A bena duguw sɔrɔ, ka dɔgɔ ni kɔrɔw sɔrɔ, ka baaw sɔrɔ, ka deenw sɔrɔ, ka forow sɔrɔ. A bena tɔɔrɔ fana sɔrɔ, nga a bena nii banbali sɔrɔ sini. 31#Mat 20.16; Luka 13.30 Ɲamɔgɔ caaman bena kɛ kɔmɔgɔw ye, kɔmɔgɔw bena kɛ ɲamɔgɔw ye.»
Yezu b'a ka saya n'a kununko fɔ tugu
(Mat 20.17-19; Luka 18.31-34)
32Yezu n'a ka kalandenw tun be sira kan ka taga Zeruzalɛmu. A tun be u ɲafɛ. Kalandenw hakili ɲagaminin tun lo. Mɔgɔ minw tun b'u kɔ, siranya tun be olu la. Yezu tagara n'a ka kalanden tan ni fila ye u danna tuguni. Koo min ben'a sɔrɔ, a y'o fɔ u ye. 33A y'a fɔ ko: «A filɛ, an be tagara Zeruzalɛmu. O yɔrɔ la, u bena Mɔgɔ Dencɛ don sarakalasebagaw kuntigiw ni sariya karamɔgɔw bolo. U ben'a fɔ ko a ka kan ka faga. O kɔ, u ben'a don siya wɛrɛw bolo. 34U bena yɛlɛ a ma, k'u daji tu a kan, k'a bugɔ ni golokami ye, k'a faga, nga tile saba a faganin kɔ, a bena kunun.»
Zaki ni Zan ka ɲinita Yezu fɛ
(Mat 20.20-28)
35O kɔ, Zebede ka dencɛ fila, Zaki ni Zan, gwɛrɛla Yezu la k'a fɔ a ye ko: «Karamɔgɔ, an bena fɛɛn min ɲini i fɛ, an b'a fɛ i k'o kɛ an ye.» 36Yezu y'u ɲininga ko: «Aw b'a fɛ ne ka mun kɛ aw ye?»
37U y'a jaabi ko: «I bena sigi masaya la ni nɔɔrɔ ye tuma min na, i ka sɔn an kelen ka sigi i kinibolo fɛ, kelen ka sigi i numanbolo fɛ.»
38 #
Luka 12.50
Yezu y'a fɔ u ye ko: «Aw be fɛɛn min daali, aw t'o lɔn. Tɔɔrɔ min bena ne sɔrɔ, aw be se k'o ɲɔgɔn muɲu wa? Ne bena batize cogo min na, aw bena sɔn o ɲɔgɔn na wa?»
39U y'a jaabi ko: «An bena se.» Yezu y'a fɔ u ye ko: «Tɔɔrɔ ni sigɛn min bena ne sɔrɔ, o ɲɔgɔn bena aw fana sɔrɔ, 40nga, ka sigi ne kinibolo fɛ, walima ne numanbolo fɛ, ne t'o latigɛbaga ye. O yɔrɔw labɛnna minw ye, u bena di olu le ma.»
41Kalanden tɔw y'o mɛn minkɛ, u dimina Zaki ni Zan kɔrɔ. 42#Luka 22.25-26 Yezu y'u wele k'a fɔ u ye ko: «Aw b'a lɔn ko diɲɛ kɔnɔ, siya ɲamɔgɔw be kuntigiya kɛ tɔw kan, mɔgɔbabaw be fanga yira u la. 43#Mat 23.11; Mar 9.35; Luka 22.26 A man kan ka kɛ ten aw cɛma. Ni mɔgɔ min b'a fɛ ka kɛ mɔgɔbaba ye aw cɛma, o tigi ka kan ka kɛ aw ka baaraden ye. 44Ni mɔgɔ min b'a fɛ ka kɛ ɲamɔgɔ ye aw cɛma, o ka kan ka kɛ aw bɛɛ ka jɔɔn ye, 45bari Mɔgɔ Dencɛ ma na waasa mɔgɔw ka baara kɛ a ye, nga a nana ka mɔgɔw mako ɲa, ani k'a yɛrɛ nii di ka kɛ mɔgɔ bɛɛ kunmabɔ sara ye.»
Yezu be fiɲɛntɔ Baritime kɛnɛya
(Mat 20.29-34; Luka 18.35-43)
46Yezu n'a ka kalandenw ni jamaba sera Zeriko. U bɔtɔ o dugu kɔnɔ, Time dencɛ Baritime min kɛra fiɲɛntɔ ye, o tun siginin be sira daa la ka daalili kɛ. 47A y'a mɛn ko Nazarɛtika Yezu be tɛmɛna minkɛ, a y'a daminɛ ka pɛrɛn ko: «Masacɛ Dawuda dencɛ Yezu, makari ne la.»
48Mɔgɔ caaman sɔngɔra a kunna ko a ka je, nga a pɛrɛnna ka tɛmɛ fɔlɔta kan ko: «Dawuda dencɛ, makari ne la.»
49Yezu lɔra k'a fɔ ko: «Aw k'a wele n ye.» O la, u ye fiɲɛntɔ wele k'a fɔ a ye ko: «I hakili sigi. Wili, a ko i ka na.»
50A y'a ka foroca fili ka pan ka lɔ. A taamana ka taga Yezu fɛ. 51Yezu y'a ɲininga ko: «I b'a fɛ ne ka mun kɛ i ye?» A y'a jaabi ko: «Karamɔgɔ, ne ka yeli kɛ tugu.»
52Yezu y'a fɔ a ye ko: «Taga. I kɛnɛyara i ka lanaya kosɔn.» O yɔrɔnin bɛɛ, a ye yeli kɛ, a tugura Yezu kɔ.
Currently Selected:
Mar 10: AKKDC08
Highlight
Share
Copy
Want to have your highlights saved across all your devices? Sign up or sign in
La Bible en Jula © Alliance Biblique du Burkina Faso, 2007.
