Utandiko 16
16
Haga wavyala Isumeli
1Lyene Salai, umuci wakwe Abulamu atavyalile iya umwana nanti wenga. Lelo wakweti muzya mukazyana mwina Eguputo izina lyakwe a Haga. 2Salai anena Abulamu ati, “Lola nemo Yawe wancita ukuya ng'umba. Uzye utange utwale Haga pakuti limwi angamvyalila ana?” Abulamu azumila vino Salai wamunena. 3Caleka Salai apeela Haga kuli Abulamu kuti aye umuci wakwe. (Cii, cacitike pacisila lino Abulamu wikala mu Kenani pa myaka ikumi). 4Nga Abulamu amanya Haga, nawe asenda indilwa. Lino Haga walola ukuti wasenda indilwa atandika ukuya ni vilumba kuli Salai nu kumusoweka. 5Salai avwanzya Abulamu ati, “Wewe ukulenga kuti Haga angansoweka nu kuntumfya. Nemwisikulu nakupiile muzya wi. Lelo lino wene wamanya ukuti watasenda indilwa wataya ni misuli kunondi. Si Yawe ka aliwe apingule umulandu witu, wapali wewe nani!”
6Lyene Abulamu azumila ati, “Cisuma, Haga acili muzya wako nupya acili mu makasa yako. Cita consi cino ukulonda kunoli.” Lyene Salai atandika kuzunya Haga cakuti asuka apuuka.
7Mungeli wakwe Yawe akomanya Haga mu lwanga pa kafukoka ka manzi mu museo uwaya ku Syuli. 8Mungeli avwanzya Haga ati, “Haga we muzya wakwe Salai uzye wafuma kwi nupya ukuya kwi?”
Haga nawe aasuka ati, “Napuuka mangu Salai.”
9Mungeli wakwe Yawe ati, “Swilila kuli Salai nu kuya ikala mwi sunde lyakwe wa muzya.” 10Mungeli wilya nupya avwanga ati, “Ndasandulula amu mupanda wako, nga yalavula cakuti kutangaya umwi angayapenda.” 11Nupya mungeli wilya amunena ati, “Watusenda indilwa nga ulavyala umwana umonsi, ulamutemela izina Isumeli, pamulandu wakuti Yawe watauvwa ukulilizika kwako. 12Lola umwana wako alaikala wakwe colwa. Alakatukila umuntu ali wensi, na antu yonsi yalamukatukila. Wene atalauvwana na kazi kakwe.”
13Haga aelenganya ati, “Uzye umucumi natindola Leza wino akandola?” Caleka atemela Yawe, wino wavwanzile kunoli ati, “Wewe Leza akalola.” 14Acino antu yakaama icifula icaya pakasi ka Kadesyi na Beledi yati, “Beeli Laai Loi.”#16:14 BEELI LAAI LOI: Izina li mu Ciyebulai lyalola mukuti Icifula cakwe wino uwa umi akandola.
15 #
Gal 4:22
Lyene Haga avyalila Abulamu umwana umonsi, na Abulamu amutemela izina ati Isumeli. 16Pa nsita ilya lino Haga wamuvyalile Isumeli Abulaamu wali ni myaka amakumi cinani na mutanda.
Currently Selected:
Utandiko 16: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
