Utandiko 17
17
Ukusilamulwa, icilangililo ca upangano
1Lino Abulamu wali ni myaka amakumi fundimbali na fundimbali, Yawe aloleka kunoli nga amunena ati, “Nene Leza Wamaka yonsi. Uwanguvwila mu manda ya umi wako yonsi nu kucita vyawololoke pe. 2Namacita upangano nawe nupya ndasandulula amu mupanda wako.” 3Lyene Abulamu afukama pansi afupime, nga Leza amunena ati, 4“Upangano uno nkucita uli ndi vii. Nkukulaya ukuti ulaya cikolwe ca nko zivule. 5#Lom 4:17 Ni zina lyako litacili Abulamu. Lelo limaya Abulaamu, pano nakucita ukuya cikolwe ca nko zivule. 6Ndasandulula amu mupanda wako, nga muno yali yamwi yalaya aene. Amu mupanda wako yalavula cakuti yalaya inko.
7 #
Luk 1:55
“Ndafikilizya kusunga upangano wane kunuli nu ku amu mupanda wako mu mikulo ilalondelela yonsi. Wene ulaya upangano wa manda pe. Ndaya Leza wako na Leza wakwe yano amu mupanda wako. 8#Mil 7:5 Mpanga ya Kenani, muno watuwiza wa mwinamasi, ndaipela kunuli nu ku amu mupanda wako ukuya iyakwao pe na pe, nga Nani ndaya Leza wao.”
9Leza anena Abulaamu ati, “Nawe kwene ulinzile ukuzumila kufikilizya kusunga upangano wakwe nene nawe, nga na ana amu mupanda wako. 10#Mil 7:8; Lom 4:11 Wewe na amu mupanda wako mulinzile kuzumila ukuti umonsi wensi wa munomuli alinzile kusilamulwa. 11Ndakai mwasilamulwa, nga cii cilaya cili cilangililo ca upangano pakasi kakwe mwemwe nani. 12Mukulo onsi ukwiza, umwana umonsi wavyalwa wamala amanda cinani, aye uwaluko lwako nanti foo, aye umwana wa muzya wapa ciyanza nanti muzya wensi wino mwakala ku inamasi, alinzile kusilamulwa. 13Nanti ana kuvyalwa nanti ana kukalwa ni mpiya yalinzile kusilamulwa. Cilaya cilangililo pa mili inu ukulanga vino upangano pali mwemwe nani uwa manda pe. 14Uwa monsi wensi wino atalasilamulwa atalapendelwa pamwi na antu yakwe, pano atafikilizye upangano wane.”
15Nupya Leza anena Abulaamu ati, “Lyene Salai umuci wako, mutamamwamanga izina muti a Salai. Ukufuma ndakai izina lyakwe limaya Sala. 16Ndamupolelela nga nawe alakuvyalila umwana umonsi. Ndamupolelela alaya a nyina wa nko zyonsi. Mu mupanda wakwe mulafuma aene.”
17Lyene Abulaamu afukama pansi afupime. Atandika kuseka lino welenganya wati, “Uzye mucumi umonsi ali ni myaka umwanda angavyala umwana? Uzye Sala wino ali ni myaka amakumi fundimbali cumi angavyala umwana?” 18Lyene Abulaamu auzya Leza ati, “Uzye citange cizipe mupolelele Isumeli kwene wi?”
19Leza amunena ati, “Awe cisi vivyo. Lelo umuci wako Sala alakuvyalila umwana umonsi nga nawe ulamutemela izina Isaki. Ndafikilizya upangano wane na aliwe nga na amu mupanda wakwe amanda pe. Upangano uu ulaya uwa manda pe ku ana yakwe alalondelapo. 20Wati unena pali Isumeli, acino ndamupolelela alaya na ana avule cuze. Alaya a isi wa ntunguluzi ikumi na ziili. Ndalenga amu mupanda wakwe ukuya uluko lukulu. 21Lelo ndafikilizya upangano wane na Isaki wino Sala alakuvyalila mu nsita kwene ii, umwaka ukwiza.” 22Lino Leza wamala kulanda na Abulaamu, afumapo amusya.
23Ukufuma uwanda kwene ulya Abulaamu wasilamwile Isumeli umwana wakwe umonsi, na azya yonsi yano avyalilwe mu ng'anda yakwe na yano wakazile, nu mwana wensi umonsi mu ng'anda yakwe ndi vino Leza wamunenyile ukucita. 24Abulaamu wasilamwilwe lino wali ni myaka amakumi fundimbali na fundimbali. 25Na Isumeli umwana wakwe umonsi kwene lino wali ni myaka ikumi na itatu. 26Pa wanda kwene ulya Abulaamu na Isumeli umwana wakwe yasilamwilwe. 27Pamwi na azya yonsi yakwe Abulaamu.
Currently Selected:
Utandiko 17: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
