Utandiko 25
25
Ana nayauze yakwe Abulaamu
(1Mil 1:32-33)
1Abulaamu watwite umwanaci namuze, izina lyakwe a Ketula. 2Ketula wamuvyalile Zimulani, Yokisyani, Medani, Midyani, Isyibaki na Syuwa. 3Yokisyani wali a Isi wakwe Syeba na Dedani, na ana yakwe Dedani aonsi yali aina Asyuli, aina Letusi na Leumi. 4Ana yakwe Midyani aonsi yali a Efa, Efeli, Hanoki, Abida na Elidaa. Yaa yonsi yali amu mupanda wakwe Ketula.
5Abulaamu wasilile Isaki vyuma vyonsi vino wakweti. 6Lelo lino atali kuti afwe walanga wapaatula vyuma vimwi apeela ku ana amu aci yauze. Lyene ayafuntusya kuli Isaki ayatuma ukuya ikala ku mpanga yaku ufumondaka.
Kufwa nu kuzikwa kwakwe Abulaamu
7Abulaamu watenzi imyaka umwanda onga na makumi cinimbali na isano. 8Lyene Abulaamu afwa pa musinku wa kukota cuze, umukombe uwa myaka ivule. Nga yamuzika ukwaizi ivikolwe vyakwe. 9Ana yakwe Isaki na Isumeli yamuzika mwi cele lyamu Makipela, mu calo icali cakwe Efuloni, umwana umonsi wakwe Zoyali, umwina Hiti, ku ufumondaka wakwe Mamule. 10#Uta 23:3-16 Icalo cino Abulaamu wakazile ukufuma ku ina Hiti, amuno Abulaamu na Sala oili yazisilwe. 11Lino Abulaamu wafwa, “Leza apolelela Isaki uwatenzi pipi ni cifula cino camwangwa ukuti Beeli Laai Loi.”
Amu mupanda wakwe Isumeli
(1Mil 1:28-31)
12Yaa ali amu mupanda wakwe Isumeli, umwana umonsi wakwe Abulaamu wino Haga umwina Eguputo, muzya wakwe Sala wamuvyalile.
13Yaa ali mazina ya ana yakwe Isumeli aonsi mu kulondenkana kwao: Nebayoti wali iyeli lyakwe Isumeli, nga a Kedali, Adibeeli, Mibisamu, 14Misyima, Duma, Masa, 15Hadadi, Tema, Yetuli, Nafyisi na Kedema. 16Yaa ali ana yakwe Isumeli, nupya mazina yao yapilwe ku mizi nu ku ncende zya nsakwe zyao, intunguluzi ikumi na ziili ukulingana ni mitundu yao. 17Isumeli wakweti imyaka umwanda onga na makumi yatatu na cinimbali lino wafwile, nga yamuzika ukwaizi ivikolwe vyakwe. 18Ana yakwe Isumeli yatenzi pakasi ka mpanga ya Havila na Syuli, ku ufumondaka wa Eguputo, lwa kuya ku Asyuli. Yatenzi apalukane ukufuma ku ina yauze, ana yakwe Abulaamu.
Kuvyalwa kwakwe Esau na Yakobo
19Yaa ali amu mupanda wakwe Isaki, umwana umonsi wakwe Abulaamu. 20Isaki wali ni myaka amakumi yani lino watwite Labeka, umwana umwanaci wakwe Betuele, umwina Alamu mu mpanga ya Mesopotamya. Kalume wakwe Labeka a Labani, nga nawe kwene wali umwina Alamu. 21Umuci wakwe wali ng'umba, atakweti ana. Caleka Isaki wamupepelanga kuli Yawe. Yawe auvwa mapepo yakwe na Labeka asenda indilwa. 22Lino ana yatacili yavyalwe, yapunkana muze nu muze mu ndilwa, asuka Labeka ailizyanya ati, “Uzye pacani cino icintu cii cikucitikila vii kunondi?” Alino apita ku kupepa kuli Yawe, ku kumuuzya muno ciile.
23 #
Lom 9:12
Yawe nawe amunena ati,
“Munuli muli inko zili zya antu.
Ulavyala antu yaili,
yao alacimvyanya mu wikazi wao.
Wenga alaya na maka ukuluta muze.
Silenzi alaya muomvi wa muto.”
24Lyene insita ifika yakuti avyale, nga avyala ana aonsi yampundu. 25Mwana wankolelo wali muyenzulukile, ni pipi lyakwe lyali wa cizwalo ca mavumbu. Amutemela izina ati a Esau.#25:25 ESAU: Izina li mu Ciyebulai likasenula ukuti ipipi (mavuzi). 26Muto wavilwe ala alemelile ikasa lyakwe ku kantunta kakwe silenzi caleka amutemela izina ati a Yakobo#25:26 YAKOBO: Izina lii mu Ciyebulai likasenula ukuti cintunta.. Isaki wali ni myaka amakumi mutanda lino Labeka wamuvyalile ana.
Esau wakazya uyeli wakwe
27Alumendo yalya yakula. Esau aya mulunzi mucenjele, waombelanga mu mpanga. Lelo Yakobo wali umutekelele, wasyalanga uku ng'anda. 28Isaki watemilwe Esau wakwe cimwi, pano walyanga inyama ya mpanga ino wakomanga amuletela. Lelo Labeka nawe watemilwe Yakobo.
29Uwanda umwi Yakobo welekanga ilanda, nga Esau awela ukufuma ku kulunga. Wali ni nzala, 30nga anena Yakobo ati, “Namawa ulwezwe, mpeko musunyi uyenzu.” (Acino yamutemile yati, Edomu).
31Yakobo aasuka ati, “Namakupeela ndi cakuti watala wampeela nsambu zya uyeli wako.”
32Esau avwanga ati, “Cisuma! Ndi pipi nu kufwa, nga usuma ci uno nsambu zingancitila ndakai?”
33 #
Aye 12:16
Yakobo amunena ati, “Utale ulape ukuti umampa nsambu zya uyeli wako.”
Esau alapa nu kukazya nsambu zya uyeli wakwe kuli Yakobo. 34Lyene Yakobo amupeela umukate nu musunyi wi landa. Esau alya amwa, nga alino akatuka afumapo. Vii, ali vino Esau wasawisye nsambu zya uyeli wakwe.
Currently Selected:
Utandiko 25: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
