Utandiko 26
26
Isaki waya wikala ku Gelali
1Kwali cipowe nacuze mu mpanga ilya wakwe cici icali pa nsita yakwe Abulaamu. Isaki aya kuli Abimeleki, umwene wa ina Filisti ku Gelali. 2Lyene Yawe aloleka kuli Isaki, avwanga ati, “Utapita ku Eguputo, lelo ikala mu mpanga kwene ii, muno nakunena ukwikala. 3#Uta 22:16-18 Tala ikala kuno kwene, nga namakupolelela nupya namaya nawe. Ndapeela impanga ii yonsi kunuli nu ku amu mupanda wako. Ndafikilizya ulayo uno nacisile kuli so Abulaamu. 4Ndalenga ana yako kuvula wa ntanda zya mwiyulu, nupya ndayapeela impanga ii yonsi. Mitundu yonsi ili nu kunguzya kuti njipolelele wakwe vino natimpolelela ana yako. 5Ndakupolelela, pamulandu wakuti Abulaamu wanjelanga nu kusunga amasunde yane, malayo na malamulo yane.”
6Caleka Isaki watenzi mu Gelali. 7#Uta 12:13; 20:2 Lino aonsi aku Gelali yamuzya pa muci wakwe, avwanga ati, “Akaci wane. Wene atazumile ukuti Labeka u muci wakwe, pamulandu wa koopa ukuti aonsi akuku yangamukoma kuti yatwale Labeka, pano wali umuyembe cuze. 8Lino Isaki wikalako amanda yamwi, Abimeleki umwene wa ina Filisti, waile asungamila pansi mu nzota yakwi sano lyakwe, nga alola Isaki akumbite Labeka akumutonya mayele.” 9Lyene Abimeleki uca atuma akuya ama Isaki kwisano amunena ati, “Walola Labeka alinzile aye umuci wako. Pacani watile akaci wako?”
Isaki aasuka ati, “Nelenginye vino yangankoma ndi nalanda nati umuci wane.”
10Abimeleki amuuzya ati, “Uzye cii cino wacita kunotuli icani? Pano iciya cakuti umwi uwamu antu yane alala nu wako, uyi uu wange utuponele, nupya ale wewe walenga.” 11Abimeleki apeela ilamulo ku antu yakwe ayasoka ati, “Wensi wino angacuzya umuntu wi nanti umuci wakwe, ali nu kukomwa.”
12Isaki walimile ivyakulya mu mpanga ilya, nga mu mwaka ulya wazombwile maila umwanda ukuluta vino wakomile, pano Leza wamupolelile. 13Wene aya umukama, nga ni vyuma vyakwe ivisanduluka mpaka aya umukama apapela ukama. 14Aina Filisti iyaya nu uzuwa panoli pano wakwata ufyo wa mfwele nu wa ng'ombe ukulu cuze, nga na azya avule. 15Acino aina Filisti yazika ni vifula vino aomvi yakwe isi wakwe Abulaamu yimvile lino atacili afwe. 16Abimeleki anena Isaki ati, “Fuma mu mpanga itu. Wemo watukwata amaka ukutuluta.”
17Lyene Isaki afumako, aya aikala mu cifoloma ca Gelali. 18Nupya afukula ni vifula vino imvile pa nsita yakwe isi Abulaamu nupya vino aina Filisti yazisile pacisila ca kufwa kwakwe Abulaamu, nga avitemela na mazina yano isi wavyamanga. 19Aomvi yakwe Isaki yimba cifula mu cifoloma yazana amanzi asenguluke. 20Cifula cici cileta kupazyanya pali yakacema ya ina Gelali na yakacema yakwe Isaki yala yakuti, “Amanzi akwitu!” Lyene Isaki atemela cifula cici izina ati Eseki#26:20 ESEKI: Mu Ciyebulai izina lii likasenula ukuti Intazi., pamulandu wakuti yacitine ivikanza na aliwe.
21Aomvi yakwe Isaki yimba cifula cuze, naco kwene cileta kupazyanya. Cifula cico Isaki acitemela izina ati, Sitina#26:21 SITINA: Mu Ciyebulai izina lii likasenula ukuti ukulemanila. 22Asuka Isaki afumako aya kuze, nako aya aimba cifula. Kwene kutali kulemanila pa cifula cico. Caleka acitemela izina ati Leoboti, ala akuti, “Ndakai Yawe watatupela incende apavungulwike pa kwikala, nga na antu itu yalasanduluka mu mpanga kwene ii.”
23Isaki afuma kuku aya ku Belisyeba. 24Uwanda uwa kwene usiku Yawe aloleka kunoli amunena ati, “Nene Leza wakwe so Abulaamu. Utuvwa intete indi nawe. Namakupolelela nu kukupeela ana avule, pamulandu wa ulayo uno nalavile muomvi wane Abulaamu.” 25Isaki akuula kavuwa kuku nga apepa Yawe. Nga aimika itaalu lyakwe, na aomvi yakwe yimba ni cifula.
Ulayo pakasi kakwe Abimeleki na Isaki
26 #
Uta 21:22
Abimeleki afuma ku Gelali ukwizalola Isaki, wali pamwi na Auzati inkombe yakwe, na Fikoli musika mukalamba wa vita vyakwe. 27Isaki ayuzya ati, “Uzye pacani cino ndakai mwiza ku kundola, lelo lino mwali anisi yane mwanzinzile mu mpanga inu?”
28Lyene yaasuka yati, “Pano pali ndakai twamanya ukuti Yawe ali nawe, nga nupya twatitwelenganya ukuti palinzile ukuya cipangano pakasi kakwe wewe naswe. Tukulonda kuti ulaye 29ukuti utalatuzanza ndi vino swemo tutakuzanzile. Twali nu luse kunuli tuleka upita mutende. Ndakai caticimanyika vino Yawe wakupolelela.” 30Isaki ayateyanyizizya cimulo, nga yalya nu kumwa. 31Uca katondotondo cila muntu alapa nu kulaya, alino Isaki apakasyanya nayo muli ucuza.
32Uwanda kwene ulya aomvi yakwe Isaki iza kunoli yamunena vyapa cifula cino yimbanga yati, “Twatituzana amanzi.” 33Alino atemela cifula cici izina ati, “Syiba. Uli mulandu uno nilelo cifulo cici cicili cikaamwa Belisyeba.”
Aci yakwe Esau Ainamasi
34Esau wali ni myaka amakumi yani lino watwite Yudifi umwana umwanaci wakwe Beeli, mwina Hiti, nga watwite na Basemati umwana wakwe Eloni, mwina Hiti. 35Aci yaa oili yaletile Isaki na Labeka ulanda.
Currently Selected:
Utandiko 26: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
