Utandiko 39
39
Yosefu nu muci wakwe Potifa
1Ndakai Yosefu ala yamusenda ku Eguputo na Potifa mwina Eguputo wenga wamuli yacilolo yakwe Falao, uwali intunguluzi yakwe yakalolela ya kwisano kwakwe Falao, wamukazile ukufuma ku ina Isumeli amulesile ku Eguputo. 2#Mil 7:9 Yawe wali na Yosefu, nu kulenga kuti vintu vyonsi vyamuzipila. Wikalanga mu ng'anda ya musambazi wakwe mwina Eguputo. 3Nawe waweni ukuti Yawe akaazwa Yosefu muli vyonsi vino akucita. 4Potifa watemilwe Yosefu ni milimo yakwe, nga icalesile kuti amupe nu wangalizi pali vyonsi vino wakweti na pa ng'anda yakwe. 5Ukufuma lino wapile Yosefu uwangalizi wapali vyonsi vino wakweti vyapa ng'anda, Mwene apolelela ng'anda ya mwina Eguputo mulandu wakwe Yosefu. Upolelelo wa Mwene wali pali vyonsi vino Potifa wakweti vyamu ng'anda, nga ni vyamu vyalo kwene. 6Potifa apeela vyonsi ni milimo yapa ng'anda mu makasa yakwe Yosefu. Wene aelenganya ukulya kutupu.
Yosefu wali mulumendo wa cata cisuma nupya muyembe cuze. 7Lino papita amanda umuci wakwe Potifa atandika ku kumbwa Yosefu, amutoka ati, “Ndanga tulale nawe!”
8Yosefu akana ati, “Si lola vino umusambazi wane wancita mwangalizi muno ng'anda. Kutacili cimwi cino akalemako, nga wapeela vyonsi mu wangalizi wane. 9Nkweti amaka mu ng'anda ii wakwe vino umusambazi wane akweti. Wene wampeela maka pali vyonsi, lelo kufumyako sile wewe we muci wakwe. Uzye lyene ningacita uli cintu caipa ndi ci nu kwifya kuli Leza wane?” 10Nanti angala mama wamuzyanga cila wanda, Yosefu atamuvwanga cakuya ku musanzi wakwe.
11Lelo uwanda umwi lino Yosefu wingile mu ng'anda ku kuomba imilimo, mutali muomvi muze umwi mu ng'anda. 12Muka Potifa aya amutinta ikoti lyakwe ati, “Iza ku musanzi wane.” Lelo Yosefu amufyumbutuka, autukila apanzi, nga umwanaci asyala ni koti mu minwe. 13Lino umuci wakwe Potifa walola kuti utukila panzi wamusila ikoti mu minwe, 14aama aomvi aombanga mu ng'anda nga avwanga ati, “Lolini ci! Uwane waleta Muyuda wi mu ng'anda itu kuti aize aatuzewanya. Wali wiza ku muputule wane ati tulale nawe. 15Lino uuvwa kuno napunda, wene asya ikoti lyakwe lii mu makasa yane, nga autuuka afuma nu mu ng'anda.”
16Lyene umuci wakwe Potifa asunga ikoti kufika lino umusambazi wakwe Yosefu wawezile. 17Lino iya wawela, amulandila ati, “Muzya wilya Muyuda wino waleta kuno, wali wangingilila ku musanzi ku kwiza mpatikizya kuti tulale nawe. 18Lelo lino nalinapunda wali utukila apanzi, wasya ni koti lyakwe aili.”
19Lino umusambazi wakwe Yosefu uvwa amazwi yaa asoka cuze. 20Alema Yosefu amwika mu ng'anda yaminyololo kuno umwene wasungilanga anyepwe akuno Yosefu aikala. 21#Mil 7:9 Lelo Yawe wacingililanga Yosefu nga nu kumupolelela. Cii, calesile kuti kalinda wa anyepwe umukalamba azangila muli Yosefu. 22Caleka kalinda wa anyepwe umukalamba aika Yosefu pali ukangalila wa anyepwe yauze onsi. Amupa amaka akulolela vyonsi vyacitikanga mu ng'anda yaminyololo. 23Kalinda wa anyepwe acefya nu kwangalila, nga vyonsi vyali mu makasa yakwe Yosefu pano Yawe wacingililanga Yosefu nu kulenga kuti vyonsi vino wacitanga vyamuzipila.
Currently Selected:
Utandiko 39: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
