Utandiko 41
41
Yosefu wilula ciloto cakwe Falao
1Lino papita myaka iili Falao alota aimi mu mbali ya Luzi lwa Nailo. 2Lyene alola ing'ombe cinimbali iziine nupya zitelepe, zikufuma mu luzi zitandika ukulya mu matete. 3Lyene kwiza ing'ombe nazyuze cinimbali zyonde iziipe, ziza zimilila mupipi ni zyuze mu nkumba ya luzi. 4Alino ing'ombe zyonde iziipe zilya ing'ombe iziine. Lyene Falao azyuka. 5Lino wakasula nupya, Falao alota ciloto nacuze. Lyene alola misakinta ya ngano cinimbali ili ku lusawa longa, yali ikuloleka ikulu nupya ice ningo. 6Lyene ku lusawa ululi lumwi kutumba misakinta nayuze cinimbali, inyale nupya ifooke pamulandu wa muza uno wafumanga mu lwanga. 7Lyene alola imitwe inyale ya ngano imila imitwe iyali ice ningo. Falao azyuka azana ukuti wali akulota.
8 #
Dan 2:2
Lino kwaca katondo Falao asakamala cuze. Caleka aama amamanyamano na antu yamano yonsi amu Eguputo nga ayalotwela viloto, lelo kutali nanti wenga wakuti angilula muno viloto viile.
9Lyene mukulu wakwe yakatumikila ya lwako lwakwe waini ku mwene anena Falao ati, “Musambazi ndinzile njilongwele vino naluvyanya. 10Insita imwi we musambazi Falao wakalipile aomvi yako, ulema mukulu wakwe yakapanga ya mikate nga nani kwene, utunyepa utuyalila mu ng'anda yaminyololo. 11Usiku uli umwi cila wenga munotuli walosile ciloto, nga cila ciloto cali na muno ciile. 12Mulumendo Muyebulai apano wali, muzya wa mukulu wakwe kalinda wa ng'anda yaminyololo. Lino twamulondolwile viloto vitu, nawe ailula viloto vitu, atunena cila muntu muno ciloto cakwe ciile. 13Nga ni vintu vyatucitikile kulinga navino wilwile. Nemo imunswilizya pa ncito nu unji nawe imumunyonga.”
14Lyene Falao apeela ilamulo kuti yalete Yosefu, nga yamuleta zuwa ukufuma ku ng'anda yaminyololo. Alino pacisila cakumupeela inyele azula ivizwalo vya anyepwe azwala usaka, nga aiza kuli Falao. 15Nga Falao anena Yosefu ati, “Nalinalota iciloto lelo antu yonsi yatiyaposiwa ukwilula muno viile. Natinuvwa ukuti wemo ndi unguvwa iciloto ungaciilula.”
16Yosefu azumila ati, “Nemo ntangacita cico, lelo Leza amapeela wilulo usuma kuli Falao.”
17Falao anena Yosefu ati, “Nalinalota nimilile pa cituntu ca Luzi lwa Nailo. 18Alino ing'ombe cinimbali iziine zitelepe zyali zyafuma mu luzi ziza zimalya mu matete. 19Lyene nupya kwali kwiza ing'ombe zyuze ziili zyonde nupya iziipe mukuloleka. Zyali ziili ing'ombe zyonde izyaipisya zino ntatala nalola mu mpanga yonsi ya Eguputo. 20Ing'ombe zyonde zyali zyalya iziine. 21Lelo lino ing'ombe zyonde zyali zyalya iziine kusi umuntu angalola kupusana pano zyali zikuloleka vivi kwene izyonde ndi vino zyali zili pankolelo. Lyene nalinapampuka, nazyuka. 22Nupya kwene nalinalota iciloto nacuze. Nalinalota misakinta ya ngano cinimbali ili ku lusawa longa, nga yali ikuloleka ikulu nupya ice ningo. 23Lyene ku lusawa ululi lumwi kwafuma misakinta nayuze cinimbali, inyale nupya ifooke pamulandu wa muza uno wafumanga mu lwanga. 24Lyene imitwe inyale ya ngano imila imitwe iyali ice ningo. Nalinalotwela amamanyamano, lelo kutali kuli umwi uwa kwilula viloto vii.”
25Yosefu anena Falao ati, “Viloto vyakwe Falao vyoili vikusenula icintu conga sile. Leza watakunena vino amacita. 26Ing'ombe ziine cinimbali, imyaka cinimbali. Ni misakinta ya ngano cinimbali, ikulu nupya ice, nayo kwene imyaka cinimbali. Viloto vyako vyoili vikusenula icintu conga. 27Ing'ombe zyonde cinimbali izyafumile pacisila nga ni misakinta cinimbali ya ngano inyale nupya ifooke pamulandu wa muza uwamu lwanga, imyaka cinimbali iya cipowe. 28Cili ndi vino nakunenyile we Falao mwene wakwisaci, Leza watakusoka pali vino ali nu kucita. 29Kulaya ivyakulya ivivule cuze mu mpanga ya Eguputo pa myaka cinimbali. 30Pacisila ca myaka iyo, kulaya cipowe pa myaka cinimbali mu Eguputo, ni myaka iyo isuma italiusiwa ukuti yaliko awe, nga ni cipowe cilonona mpanga. 31Imyaka cinimbali ya vyakulya vivule antu yataliusya pamulandu wa cipowe icilapona, icilipisya cuze. 32Mulandu uno iciloto ciizile kunuli umu nzila ziili, umusambazi Falao, pakuti cikulange vino umwene Leza aliwe wateyanya ci, na kuti asininkizye ukuti ali nu kucicita mu kasita kakwene kakwiza.
33“Caleka ndakai mwene wakwisaci ulinzile ukutoola umuntu mulamoke wa mano nu kumanyikisya kwa kulola ivyankolelo, awino ulasike ukangalila mu mpanga ya Eguputo. 34Acino cingazipa Falao asolole intunguluzi nazyuze mu mpanga yakwe monsi muno yapeela, kuti zyatoola conga camuli visano pa vyakulya vya antu mu Eguputo mu myaka iyo cinimbali ya vyakulya vivule cuze. 35Yalinzile yakolonganika ivyakulya mu nsita kwene ikwiza. Yalinzile yaombe mwi lamulo lyako we Falao, ukusunga ivyakulya mu zyankoma muli cila musumba nu kuvilolela. 36Ivyakulya vii vilinzile vitutilwe mu zyankoma kuti vikaye ivyakuomvya mu nsita ya myaka cinimbali ya cipowe cino cilapona mu Eguputo, pakuti antu amu Eguputo yatakafwe ku cipowe.”
Yosefu yamucita mulasi uwamu Eguputo
37Falao na yacilolo yakwe yazumila pa uteyanyo wa musango uu. 38Nga Falao auzya yacilolo yakwe ati, “Aukwi kuno tungazana umuntu wa musango ndi wi, akweti Mupasi wakwe Leza?”
39Falao anena Yosefu ati, “Pakuti Leza watakusokolwela vii, kusi nanti wenga akweti ukumanya kuu nanti amano ukukuluta. 40Nakucita ukuya mulasi wa mpanga yane, na antu yane yalayela amasunde yako. Ndakuluta sile pamulandu wakuti nene indi mwene wa mpanga yonsi ya Eguputo. 41Nakucita ukuya mulasi wa mpanga yonsi ya Eguputo.” 42#Dan 5:29 Falao azula imbalaminwe yakwe ya cimanyililo ca usambazi, azwika Yosefu ku munwe, amuzwika nu mwingila usuma nga atoola munyololo wakwe zaabu amukoweka mu nsingo. 43Avino amukwezya na pi celeta lyakwe lya wene, nga asilika yapita inkolelo, yazuka yakupunda yati, “Fumini mu nzila.” Vii avino Falao wamucisile ukuya mulasi wa mpanga yonsi ya Eguputo. 44Kulunda pali cii Falao nupya anena Yosefu ati, “Nene ndi Falao, nga ukwaula insambu yako, kusi umuntu nanti wenga mu Eguputo monsi alacita icintu icili consi.” 45Falao atemela Yosefu izina Zafenati Panea. Amupa nu mwanaci wakutwala, Asenati, umwana umwanaci wakwe Potifela.#41:45 POTIFELA: Asi wiya uwali umusambazi wakwe Yosefu Simapepo uwamu musumba wa Oni. Yosefu watandile kuzinguluka impanga yonsi ya Eguputo.
46Yosefu wali ni myaka yakuvyalwa amakumi yatatu lino watandike kutumikila Falao, umwene waku Eguputo. Ndi Yosefu wafuma umwi sano ala waya ku kutandala konsi mu Eguputo. 47Mu nsita ya myaka cinimbali ya vyakulya vivule impanga yamezizye ivyakulya ivivule cuze. 48Yosefu akolonganika ivyakulya vyonsi mu myaka cinimbali ya vyakulya vivule mu Eguputo ala akututila mu zyankoma mu misumba ilya. 49Lyene Yosefu atutila ivyakulya vivule cuze mu zyankoma, cakuti asazya ukupima pano wingi wa ngano wali wa lusenga lwa muli yemba luno utangupende.
50Lino imyaka ya cipowe itali kuti ifike, Yosefu waviile ana yaili aonsi muli Asenati, umuci wakwe nupya umwana umwanaci wakwe Potifela, uwali simapepo waku Oni. 51Nga Yosefu ati, “Leza watalenga kuti nilile ucuzi wane onsi kumwi na amu ng'anda yakwe Tata.” Caleka atemela umwana wakwe umonsi iyeli ati a Manase. 52Nupya ati, “Leza watampela ana mu mpanga ya ucuzi.” Caleka atemela umwana umonsi wakwe ciili izina ati a Efulemu.
53Lino myaka cinimbali ya vyakulya vivule mu Eguputo yasila, 54#Mil 7:11 imyaka cinimbali ya cipowe nayo itandika, ukulingana navino Yosefu walanzile. Nga kwali inzala mu mpanga zyuze zyazingulwike Eguputo. Lelo monsi mu mpanga ya Eguputo mwali ivyakulya. 55#Yoa 2:5 Lino mu Eguputo monsi mwatandika kuya icipowe, antu yalilila Falao kuti ayapeele ivyakulya. Caleka Falao apeela ilamulo ku antu yakwe yonsi amu Eguputo ati, “Mwaya kuli Yosefu, nga vino amamunena avino mulondele.” 56Acino lino cipowe cakumana impanga yonsi, Yosefu ayulila aina Eguputo inkoma zyonsi zya vyakulya, pano inzala iipisye yakumine impanga zyonsi. 57Antu ukufuma mu mpanga zyonsi iizanga ku Eguputo kuli Yosefu ku kukala ivyakulya, pamulandu wakuti inzala yakomile cuze mu nsi yonsi.
Currently Selected:
Utandiko 41: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
