Utandiko 42
42
Aina yakwe Yosefu yiiza ku Eguputo ku kukala ingano
1Lino Yakobo uvwa ukuti ku mpanga ya Eguputo kuli ingano, auzya ana yakwe ati, “Uzye pacani cino mutenzi mukulolekesya sile?” 2#Mil 7:12 Nga atwalilila ukulanda ati, “Natinuvwa ukuti ku Eguputo kuli ingano. Pitini mukakale ingano zimwi kuti tutafwa ni nzala.” 3Caleka aina yakwe Yosefu ali ikumi iyafuma ku Kenani iyaya ku kukala ingano ku Eguputo. 4Lelo Yakobo atazumilizye Benjamini wino yavilwe na Yosefu nyina na isi wenga kuti apite pamwi nayo. Wacisile cii pamulandu wakoopa ukuti Benjamini angazanzwa. 5Avino ana yakwe Izlaeli aonsi yapita pamwi na antu yauze ku kukala ingano, pamulandu wakuti mu mpanga ya Kenani mwali cipowe. 6Yosefu, mulasi wa mpanga ya Eguputo, wakazyanga ingano ku antu yonsi afumile konsikonsi mu nsi. Caleka aina yakwe Yosefu yaya kunoli, nga yafukama pansi yafupime iinamika impumi zyao pa musili. 7Lino Yosefu walola aina yakwe, ayalooka, lelo acita ngati atayamanyile. Alino ayuzya mu ukali ati, “Uzye mufumile kwi mwemwe kwene?”
Nayo yaasuka yati, “Tufumile ku Kenani, twizile kala ivyakulya.”
8Nanti angala Yosefu walooka, lelo aina yakwe yene yaposiwa kumulooka.
9 #
Uta 37:5-10
Yosefu aiusya viloto vya pali aliyo vino walosile nga ayanena ati, “Mwemwe nengu, mwizile lola ndi tukweti utonte, na vino mungazanza impanga itu.”
10Nayo yamwasuka yati, “Musambazi, tusi nengu foo. Twatitwiza wa yaomvi yako kuti tukale sile ivyakulya. 11Swensi pamwi twavilwe ana aonsi ikumi na yaili kuli tata wenga. Musambazi, tusi nengu foo, sweswe antu acumi.”
12Yosefu ayanena ati, “Awe! Mwizile lola ndi tukweti utonte, na vino mungazanza impanga itu.”
13Nayo yaasuka yati, “Musambazi twavyalwa ana aonsi ikumi na yaili, swensi pamwi ku muntu wenga sile mwina Kenani. Mwina witu wenga wafwa, nga nu muto witu ndakai asile kuli tata.”
14Lelo Yosefu aasuka ati, “Cili ndi vino nalinavwanga, mwemwe nengu. 15Pakuti nsininkizye ukuti vino mukuvwanga pali nkwangu winu ivyacumi, namacita vii: Mwi zina lyakwe Falao nalapa ukuti mutalaswilila mpaka muto winu akize kuno. 16Wenga uwa munomuli alinzile apite akamulete. Asyala mwensi mumasungwa mu ng'anda yaminyololo mpaka ndole ukuti vino mukuvwanga ivyacumi. Ndi cisi vivyo, nalapa mwi zina lyakwe Falao, ale mwemwe nengu.” 17Lyene ayasunga mu ng'anda yaminyololo pa manda yatatu.
18Pa wanda uwalenga yatatu Yosefu ayanena ati, “Nene muntu wino akaopa Leza. Caleka citini cii kuti mutakomwa. 19Pakuti nsininkizye ukuti mwemwe acumi, wenga uwa munomuli amasyala asungwe mu ng'anda yaminyololo muno mwali. Mwemuno mwasyala mumaswilila kuti mutwale ingano zino mwatimukala ku amu mang'anda inu kuno kuli cipowe. 20Lyene mulinzile mukize na nkwangu winu kunondi. Cii cilasininkizya kunondi ukuti vino mukunena ivyacumi, nga nani ntalamukoma.”
Nayo yazumilizya pali cii, 21nga yavwanzyanya yati, “Cumi ndakai twavunukwa pamulandu wakwe vino twacisile ku muto witu lino twaweni vino ali mu ntazi, nga na vino wapapatanga kuti tuwake umi wakwe. Lelo swemo tutuvwile kupapata kwakwe. Cii icingalenga kuti tuye mu ntazi ndi ii.”
22 #
Uta 37:21, 22 Lubeni avwanga ati, “Namunenyile nati mutacisa mulumendo, lelo mutalondanga kuvwa. Mwalola lyene, ndakai tukucula pamulandu wa mfwa yakwe.” 23Yosefu uvwanga vino yakulanda, lelo yene yatamanyile cii pano wavwanganga kunoyali kupitila muli kasenula wa mazwi. 24Lyene Yosefu afuma panoyali aseleuka nga atandika kulila. Lino wateeka umwenzo aswilila, asenda Simeoni, apeela ilamulo, nga yamunyepa pa manso yao.
Aina yakwe Yosefu yaswilila ku Kenani
25Lyene Yosefu apeela ilamulo ku yaomvi kuti yazuzye ingano mu masaka ya ina yakwe nu kuyaswilizizya impiya cila muntu mwi saka lyakwe, nga ayapeela ni mpao. Alino aomvi yakwe Yosefu nayo iyacita vivyo kwene. 26Lyene aina yakwe Yosefu yanyepelela masaka ya ngano pali yapunda yao, nga yakatuka ulendo. 27Lino yafika pa cifulo cino yaile yalala indo, wenga pano yali asapula isaka kuti apeele punda ivyakulya, nga azana impiya papela ya ngano mwi saka. 28Aama aina ayanena ati, “Lolini, nemo yatiyambwezezya impiya zyane. Asi zii, mwi saka!” Papo kwene myenzo yao ikunta, yuvwa intete cuze, nga yauzyanya yati, “Uzye cii icani, cino Leza watacita kunotuli?”
29Lino yafika ku Kenani kuli isi Yakobo, yamulondolwela vyonsi ivyacitike kunoyali, yati, 30“Mulasi wa mpanga ya Eguputo watunenanga mu ukali ati sweswe nengu mu mpanga yakwe. 31Naswe twamwaswike tuti, ‘Tusi nengu foo, sweswe antu acumi. 32Twavilwe ana aonsi ikumi na yaili swensi pamwi kuli tata wenga. Mwina witu wenga wafwa nga nu muto witu asile ku Kenani kuli tata.’
33“Muntu wi, mulasi wa mpanga nawe aasuka ati, ‘Namacita vii kuti ndole ndi mwemwe antu acumi. Wenga uwa munomuli amasyala nani kuno, lyene asyala mulaswilila kuti mutwale ingano ku amu mang'anda inu kuno kuli cipowe. 34Mukize na nkwangu winu, kunondi. Lyene ndamanya ukuti musi nengu foo, lelo mwemwe antu acumi. Ndamusapwila mwina winu muce mwacita nu uculuzi muno mpanga.’”
35Lyene lino yafumfumula masaka yao, yazana impiya mwi saka lyakwe cila muntu. Nga lino yalola impiya, yene pamwi na isi kwene Yakobo yuvwa intete cuze. 36Isi ayanena ati, “Uzye mukulonda kuti mponzye ana yane onsi? Yosefu waponga, lyene na Simeoni kwene wataponga, nga ndakai mukulonda musende na Benjamini kwene. Ala! Nene nkucula ne so, asi mwemwe.”
37Lubeni anena isi ati, “Ndi ntalaya nkawele nawe, uce wize ukome ana yane aonsi yaili. Mumwike sile mu maka yane, nupya ndamuwezya.”
38Lelo Yakobo avwanga ati, “Mwana wane atangapita namwe, pano umwina wafwa, nga wikwene wenga sile asilepo. Limwi icintu cimwi cingamucitikila mu nzila. Nene muntu mukote, lyene amazwi aulanda yano mungiza nayo angankoma.”
Currently Selected:
Utandiko 42: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
