Utandiko 43
43
Aina yakwe Yosefu yaswilila ku Eguputo pamwi na Benjamini
1Cipowe mu Kenani cipisya ukuluta. 2Nga lino amu ng'anda yakwe Yakobo yalya nu kumala ingano zyonsi zino yafumizye ku Eguputo, Yakobo anena ana yakwe ati, “Nupya swililini mukatukalile twakulya.”
3Yuda anena isi ati, “Muntu wilya watusokile na maka ukuti atalatuzumilizya kuloleka pa manso yakwe, suka sile twayako nu muto witu. 4Tulapita nu kuya mukalila ivyakulya ndi mwazumilizya kuti tupite nu muto witu. 5Ndi mutakulonda, tutalapita, pamulandu wakuti umuntu wilya watunenyile kuti atalatuzumilizya kulolekela pa manso yakwe suka sile twayako nu muto witu.”
6Izlaeli avwanga ati, “Mwaya nu mulomo vwile! Uzye pacani cino mwalenzile macuzi ndi yaa kunodi pa kunena umuntu wilya muti mwakwata muto winu namuze?”
7Nayo yaasuka yati, “Muntu wilya watwalilile kuuzikisya vino tuli nga nu kuuzikisya pa amu ng'anda itu ati, ‘Uzye so acili umumi? Uzye mwakwata munyonko namuze? Lyene naswe twaasuka mauzyo yakwe. Uzye ngani twamanyile uli kuti amatunena kuti tukize nu mwina witu?’ ”
8Yuda anena isi ati, “Mpeko mulumendo, nga naswe tumakatuka twapita likwene, pakuti sweswe swensi na amu ng'anda itu tutakafwe ni nzala. 9Nafima umi wane ne mwisikulu ukampeele mulandu ndi ntalawela nu mulumendo mutende kunuli. 10Ndi tutaalangana kuno, ndakai ngani twapita maila yaili ukuya nu kuwela.”
11Lyene isi ayanena ati, “Ndi cili vivyo, fwandi mulasi mumusendeleko vintu visuma vya muno mpanga mu masaka inu. Mukamupele wa mawila ya mulasi. Mumutwalile tumina twa muti, nu tuuci tunono, vyamununko usuma, mbalala, ni viseekwa ivyakolana na makole. 12Nupya musende ni mpiya maila yaili ukuluta pali zino mwasenzile, pamulandu wakuti mulinzile ukuya wezezya impiya zino zyazanikwe mu masaka inu kuno. Limwi yaluvyanyizye sile pakwika lupiya mu masaka inu. 13Tolini muto winu mukatuke mwapita likwene. 14Si Leza Wamaka yonsi angalenga umuntu wiyo akaye na mizu panomuli, pakuti akamuwezezye munyonko wino wasyala pamwi na Benjamini. Lyene nemo ndi ukufwilwa kwa ana, kaciye vivyo kwene usi mulandu.”
15Caleka aina yakwe Yosefu yasenda vya mawila ni mpiya maila yaili ukuluta pali zizi, nga na Benjamini. Iyakumpeka iyaya ku Eguputo nga lino yafika kuku yaya kukulolana na Yosefu. 16Lino Yosefu walola Benjamini ali nayo, anena kangalila, uwamu ng'anda yakwe ati, “Senda antu yaku ng'anda kwane. Kafyule inyama uteyanye, tumaiza tulye nayo pa nsita ya musanya.”
17Alino umuntu wilya acita wakwe vino wapilwe ilamulo, nga asenda aina yakwe Yosefu ku ng'anda.
18Nga lino yakuya ku ng'anda pamwi nawe, yuvwa intete nga yelenganya yati, “Yatuleta kuno pamulandu wa mpiya zino twaswilile nazyo mu masaka pa ulendo wakutandika. Mukupumikizya yamatuzanza, yatole yapunda itu, nga yatucite ukuya azya yakwe.”
19Caleka lino yafika pa mulyango wa ng'anda, yanena kangalila uwamu ng'anda yakwe Yosefu yati, 20“Musambazi, twapapata uvwa kunotuli, twatazile twiza kuno ilya nkolele ku kukala ivyakulya. 21Lino tukuswilila ku muzi, tufika pa nsakwe, tusapula masaka, na cila muntu azana impiya zino wakalile ingano zili mu mufuko papela ya ngano, mwi saka lyakwe. Twatituleta impiya zizyo kunuli. 22Twatitwiza ni mpiya nazyuze izya kukalila ivyakulya navyuze. Tutamanyile umuntu wino wisile impiya mu masaka itu.”
23Kangalila wilya aasuka ati, “Mutasakamala. Mutuvwa ni ntete. Leza winu Leza wakwe so, alinzile kuti wamwikile impiya mu masaka inu. Nene naposile impiya zino mwalipile.” Lyene aleta Simeoni kunoyali.
24Alino kangalila aingizya aina yakwe Yosefu mu ng'anda. Apela amanzi kunoyali pakuti yangafulala ingazo zyao, nga apeela na yapunda ivyakulya. 25Yatoola vya mawila yateyanya vyakupeela kuli Yosefu lino amaiza musanya, pamulandu wakuti yayanenyile ukuti yamaiza yaliile pamwi nawe. 26Lino Yosefu wafika ku ng'anda, yamutwalila vya mawila mu ng'anda, yafukama pansi yafupime kunoli. 27Yalamukana nga Yosefu auzya mutende wao lyene avwanga ati, “Mwanenyile pali lwakwe so mukote, uzye ali uli? Uzye acili umumi? Uzye acili akomile?”
28Nayo yaasuka yati, “Tata, wino akakutumikila, acili umumi nupya acili akomile.” Nga yafukama pansi yafupime kunoli.
29Lino Yosefu walola Benjamini mwina wakwe avwanga ati, “Uzye wi ali nkwangu winu, wino mwanenyile? Mulumendo, Leza akupolelele.” 30Lyene Yosefu afumapo zuwazuwa pamulandu wa lukundo nu luse. Wali pipi nu kulila. Caleka aingila mu muputule wakwe amuno aya alila. 31Lino wata kulila afulala ku manso, afuma ku muputule, asipa nupya, nga apeela ilamulo ati, “Mpelini ivyakulya.” 32Lyene Yosefu yamupeela ivyakulya aalya wenga api tebulo, na ina yonsi pamwi api tebulo lyuze. Aina Eguputo yano ali mu ng'anda nayo ala yakulya onga, pamulandu wakuti aina Eguputo yalolanga ukuti cali icawinyi ukulila pamwi na Ayebulai. 33Cipango cino aina yakwe Yosefu yalilangapo, calolenkine na cakwe Yosefu. Yatenzi kukonkana nu kuvyalwa kwao, ukufuma ku wikolo kufika nu ku munono. Lino aina yakwe Yosefu yalola vino yatenzi, yalolekesyanya nu kuzunguka cuze. 34Ivyakulya vimulwanga kunoyali ukufuma api tebulo lyakwe Yosefu, lelo Benjamini wimwilwe maila yasano ukuluta aina yakwe onsi. Caleka yalya nu kumwa yazanga pamwi na Yosefu.
Currently Selected:
Utandiko 43: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
