Utandiko 44
44
Kuponga kwa lwako
1Lyene lino yamala ukulya nu kumwa, Yosefu apeela ilamulo ku muomvi wino wali akangalila uwamu ng'anda yakwe ati, “Zuzya ingano mwi saka lyakwe cila muntu kulingana nu usendelo, nga cila muntu muswilizizye impiya zyakwe, uzike papela ya ngano mwi saka. 2Utoole ulwako lwakwe siluva wike mwi saka lya mwina wao munono, pamwi na zino wakalile ingano.” Alino muomvi wilya acita ndi vino Yosefu wamunenyile.
3Katondotondo aomvi yalya yatuma aina yakwe Yosefu, nga nayo yakatuka pamwi na yapunda yao yapita. 4Lino yatali yafike kutali ukufuma mu musumba, Yosefu anena muomvi wino wali akangalila uwamu ng'anda yakwe ati, “Simula, londelela antu yalya. Ndi wayazana uyuzye uti, ‘Musambazi wane wacisile cisuma kunomuli, uzye pacani cino mwamuwezezya uyi pa usuma? 5Uzye pacani cino mwiya ulwako lwakwe siluva lwa musambazi wane? Ulwako luu aluno akamwela amanzi, nupya aluno akaomvya pa kusapola. Cumi, mwatala mulandu ukulu cuze pa kwiya ulwako.’”
6Lino muomvi wakwe Yosefu wasimula, afika inkolelo yao, nga ayanena amazwi yano wamunenyile. 7Antu yalya yamwasuka yati, “Musambazi tutamanyile cino ukuvwanga. Kunotuli cipelele kutali ukucita icintu camusango ndi uwo. 8Umanyile ningo ukuti lino twafumile ku mpanga ya Kenani twakuwezizye impiya zino twazanyile mu masaka itu. Uzye pacani cino tungiila siluva nanti zaabu uwamu ng'anda ya musambazi wako? 9Musambazi ndi cakuti umwi uwa munotuli wazanikwa nu lwako lulo, cumi akomwe, nga na swensi asyala tulaya azya yako.”
10Muomvi wakwe Yosefu avwanga ati, “Endi, nazumila, lelo wiyo kwene asenzile amazanikwa nu lwako amaya muzya wane, nga na mwensi asyala mumapita mu untungwa.” 11Caleka zuwazuwa iisya masaka yao pansi, nga cila muntu asapula isaka lyakwe. 12Muomvi wakwe Yosefu atandika kusakaula mukutekela, kutandikila kuli silenzi nga asyalikizya nu muto wao. Nga ulwako luzanikwa mwi saka lyakwe Benjamini. 13Yasilenzi yakwe Benjamini yalepola vizwalo vyao, nga yaponelwa nu ulanda ukulu cuze. Yanyepa nupya visendo vyao pali yapunda yao, nga yaswilila ku musumba.
14Lino Yuda na ina yakwe yaswilila ku ng'anda kwakwe Yosefu, iyazana acili mu ng'anda. Nga yafukama pansi yafupime inkolelo yakwe. 15Yosefu ayuzya ati, “Uzye cani cino mwatimucita? Uzye mutamanyile kuti umuntu wino ali mwene akateeka ndi vino nene angamanya kupitila mu kusapola, ivintu vino antu yakucita mu umfisolo?”
16Yuda aasuka ati, “Musambazi, uzye tuli ni cakuvwanga kunuli?” “Uzye tungapazya cani? Mulandu wene tukweti pano Leza watalenga kuti uyi witu usokoloke. Asi wenga sile wino azanyilwe nu lwako mwi saka lyakwe amaya muzya wako, lelo swensi kwene muno tuyelile ndakai twaya azya yako.” 17Yosefu avwanga ati, “Awe ntangacita vivyo! Suka sile azanyilwe nu lwako mwi saka lyakwe amaya muzya wane. Mwemuno mwasyala mwensi, mungaswilila kuli so mutende nupya antungwa.”
Yuda wapapata Yosefu kuti asapule Benjamini
18Yuda apalamila kuli Yosefu, nga avwanga ati, “Napapata musambazi, nzumilizye kuti mvwange kunuli mu untungwa. Utasoka pamulandu wane, pano wewe kwene uli wa mwene umwisikulu. 19Musambazi, watuzizye uti, ‘Uzye mwakwata so nu mwina winu namuze?’ 20Naswe twaswike tuti, ‘Endi twakwata tata mukote, nga twakwata nu muto witu wino tata waviile mu ukote wakwe. Silenzi wa mulumendo wi wafwile mpiti, lyene muli nyina aliwe wenga sile uwasyala nu umi. Tata wamutemwa cuze.’
21“Musambazi, wemo watunenyile kuti tungaleta muto witu kuno kuti wize umulole. 22Naswe twakunenyile we musambazi tuti, ‘Mulumendo atangafuma pa manso yakwe tata, pano ndi cii cacitike, tata angafwa.’ 23Lyene wavwanzile uti, ‘Ndi mwaca mutizile na nkwangu winu ntalamuzumilizya kuti tulolane namwe.’
24“Lino twaswilile kumwitu kuli tata muzya wako, twamulondolwile vino we musambazi watunenyile. 25Alino atunena ati, ‘Nupya swililini mukatukalile utwakulya natuze.’ 26Naswe tunena tata tuti, ‘Tutangaya ku kukala ivyakulya pano umuntu wilya atangatuzumilizya kuloleka ku manso yakwe suka sile twayako nu muto witu. Lyene tumapita ndi cakuti muto witu nawe kwene amapita naswe.’
27“Alino tata nawe atunena ati, ‘Yanamwe! Uzye mutamanya ukuti umuci wane Lakeli wamvyalile sile ana aonsi yaili? 28Umuze wenga waponga mpiti. Alinzile kuti walepozilwe ku vilyanyi vyamu mpanga pamulandu wakuti ntatala namulola ukufuma lino wafumile kuno.’ 29Ndi mwapita nu muto winu wi, limwi cimwi cingamucitikila munzila, lyene amazwi ya ulanda yano mungiza nayo angankoma mu ukote wane.”
30Yuda atwalilila kuvwanga ati, “Musambazi, caleka ndakai ndi ningaswilila kuli tata kwaula mulumendo, ale wene alafwa ndi walola ukuti insi nu mulumendo. 31Pano tata wika amano mu mulumendo kwene wi, nupya mukote, na mazwi ya ulanda yano ningaya nayo yangalenga kuti afwe. 32Kulunda pali cico, nafimile umi wane ne mwisikulu kuli tata mucifulo ca mulumendo. Namunenyile inti ndi ntalawela nu mulumendo kunuli ukampeele mulandu!
33“Musambazi, caleka ndakai leka mulumendo aswilile na yasilenzi, nene namasyala kuno wa muzya mu cifulo ca mulumendo. 34Ntangaswilila ku muzi kuli tata ndi insi nu mulumendo. Ntangatemwa kulola tata mu ulanda lino ungamucitikila.”
Currently Selected:
Utandiko 44: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
