Utandiko 9
9
Upangano wakwe Leza na Nowa
1 #
Uta 1:28
Leza apolelela Nowa na ana yakwe ati, “Vyalalini musanduluke muce mulimbe insi yonsi. 2Inyama zyonsi ni vyunyi vyonsi ivikapapuka nga ni inswi zyonsi vilaamoopa. Vyonsi navika mu makasa inu. 3Vyonsi vyaumi ivikapita mwalya. Wakwe vino natiile mwalya musalu, namupeela kuti vyonsi viye ivyakulya. 4#Levi 7:26, 27; 17:10-14; 19:26; Malg 12:16, 23; 15:23 Lelo mutakezye ukulya inyama muno mucili uwazi, pano uwazi uli umi wakweyo. 5Wino watala akatwe wene wazwisya uwazi nawe alakomwa. Inyama iyakoma umuntu ndaikoma. 6#Kuf 20:13; Uta 1:26 Nu muntu uwakoma umuntu muze,
nawe kwene antu yauze yalamukoma.
Pano umuntu waumvilwe mu cata cakwe Leza.
7 #
Uta 1:28
Caleka mulinzile kuvyalana muvule mukumane insi yonsi.”
8Lyene Leza anena Nowa na ana yakwe ati, 9“Nacita upangano ndakai pakasi kakwe wewe na amu mupanda wako alakulondelela 10nu ku vyaumi vyonsi ivili nawe, ivyunyi, iviteekwa, inyama zyamu mpanga, na consi cafumile nawe mu cange. 11Ndaiusya upangano wane uwakuti, ‘Iviumbwa vyonsi vyaumi vitalatala vyononeke nupya kuli mulamba foo, nupya kutalatala kuye mulamba uwakonona insi.’ ”
12Nupya Leza anena Nowa ati, “Cimanyililo ca upangano uno nkucita namwe ni viumbwa vyonsi cakuti, 13Nika umulalamfuti umwiyulu, na cii cili cimanyililo ca upangano wane ku viumbwa vyaumi mu nsi. 14Lyonsi lino ikumbi lya mvula lyafisya nu mulalamfuti ndi waloleka umwiyulu, 15ndaiusya upangano wane kunomuli nu ku viumbwa vyonsi vyaumi uwakuti, kutalaya mulamba nupya uwakonona viumbwa vyonsi vyaumi nanti insi. 16Lyonsi lino mulalamfuti waloleka mu makumbi ndaulola nu kwiusya upangano wa manda pe uli pakasi kakwe nene ni viumbwa vyaumi vyonsi vyamu nsi. 17Cili cimanyililo cino nacita ca upangano wane ni viumbwa vyaumi vyonsi vyamu nsi.”
Nowa na ana yakwe aonsi
18Ana yakwe Nowa afumile mu cange a Syemu, Hamu, na Yafeti. Hamu ali isi wakwe Kenani. 19Ana ya yatatu yakwe Nowa vili vikolwe vya antu yonsi aya mu nsi.
20Nowa wali umulimi nupya uwatandike kulima icalo ca matingi. 21Walanga wamwa waini akoleka, azula, alala tupu mwi Taalu lyakwe. 22Lino Hamu, isi wakwe Kenani wingila mwi taalu, alola isi ali tupu, nga afuma aya anena aina. 23Lyene Syemu na Yafeti yatozile umwingila yawika kwitundu pa maye yao nga yapita cundansinzi iyaya mwi taalu, yamuvimba, yala yamufutatile kuti yatamulola tupu. 24Lino waini wamukololoka, Nowa auvwa vino umwana wakwe wa munono wali wacita kunoli. 25Asoka avwanga ati,
“Citipu ciye kuli Kenani,
Wene alaya muzya ku ina yakwe.
26Alumbanyiwe Yawe, Leza wakwe Syemu!
Kenani alaya muzya wakwe Syemu.
27Su Mwene Leza angalenga kuti Yafeti asanduluke,
na ana yakwe yakikale pamwi na ana yakwe Syemu.
Kenani alaya muzya wakwe Yafeti.”
28Pacisila cakwe mulamba Nowa aikala imyaka 350. 29Afwa lino waya ni myaka 950.
Currently Selected:
Utandiko 9: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
