Luka 24

Yesu wazyukuka kufuma ku afwe

(Mat 28:1-10; Mk 16:1-8; Yoa 20:1-10)

1Katondo tondo pa wanda wakutandika mulungu, anaci yasenzile vya mununko usuma vino yalanga yati yateyanya, iyaya nu kwi lindi. 2Yazanyile iwe lyati likunkulusiwapo mpiti kufuma pa mulyango wi lindi. 3Lelo lino ingilemo, yatazanyile icala ca Mwene Yesu. 4Lino yacili yakuzunguka cuze pali cii, mukupumikizya, antu yaili aonsi iimilila pa mbali yao ala yazwite vizwalo viyengese cuze. 5Anaci yuvwa intete cuze, nga inamila pansi, alino antu yaya yayuzya yati, “Uzye pacani mukulondela umupuma mu afwe? 6Asimo muno, watazyukuka. Iusyini vino wamunenyile lino wali mu Galile, 7#Mat 16:21; 17:22; 20:18; Mk 8:31; 9:31; 10:33; Luk 9:22; 18:31 ati, ‘Umwana wa muntu alinzile apelwe ku antu yakaifya, nu kutanwa, na pa wanda wakulenga yatatu alazyukuka.’”

8Lyene iyiusya amazwi yakwe, 9nga lino yawela kufuma kwi lindi, iyalandila alondezi ikumi na wenga nga nayauze onsi vintu vii vyonsi. 10Anaci yaya yali a Maliya uwaku Magadala, Yoana na Maliya nyina wakwe Yakobo, nga na anaci yauze ali nao, yano yalandile atumwa vintu vii. 11Lelo mazwi yaa yuvwika wa myawe ku atumwa, nupya yatataile. 12Lelo Petulo akatuka asimwilila nu kwi lindi. Lyene ainama, asungamilamo, alola sile insalu zitiswe zyamutengo zituzi. Alino aswilila ukwakwe ala akuzunguka pali cino icacitike.

Ivyacitike pa kuya ku Emausi

(Mk 16:12-13)

13Uwanda kwene ulya alondezi yakwe Yesu yaili yayanga ku muzi uwamwangwa Emausi, uwali manye makilomita ikumi na lyonga kufuma ku Yelusalemu, 14ala yakulanzyanya pa vintu vii vyonsi ivyacitike. 15Lyene lino yacili yakulanzyanya, Yesu apalama nu kupitila pamwi nao. 16Lelo manso yao yakufilwe nga yaposiwa kumulooka. 17Yesu ayauzya ati, “Uzye mukulanzyanya cani lino mukupita?”

Nao iimilila cele, ni vinso vya ulanda. 18Lyene wenga pano yali izina lyakwe a Keleopa, amuuzya ati, “Uzye wewe uli mwenyi wenga sile mu Yelusalemu atamanyile vintu vino vyati vicitikamo mu manda yaa?”

19Nawe amuuzya ati, “Uzye vintu ci?” Nao yaasuka yati, “Vintu vyacitikile Yesu uwaku Nazaleti. Uwali a Kasema wa maka mu vicitwa nu mu mazwi pa manso yakwe Leza nga na pa manso ya antu onsi. 20Yasimapepo akalamba nga ni ntunguluzi yamupile kuti apingulwe ukufwa, alino yamutanyile. 21Lelo twapaalile ukuti aliwe angaya uwakuleka kuti aina Izlaeli yakululwe. Endi, kulunda pali cii, uu uli wanda uwalenga yatatu kufuma pano cacitikile. 22Nupya kulunda pali cii, anaci yamwi amwi umba litu iyatuzungusya cuze. Iyaile kwi lindi katondo tondo, 23lelo yatali yazana icala cakwe. Lyene iyawela ala yakulanda vino yati yalola cilolwa ca angeli yano ali yayanena vino wene umumi. 24Yamwi muli sweswe iyaya nu kwi lindi yazana ukuti cili wakwe vino anaci yali yakulanda, lelo yatali yamuweni.”

25Lyene Yesu ayanena ati, “Viwelewele mwe, mwe muno mwakoma myenzo pa kutaila vintu vino yakasema yalanda. 26Uzye citalondekwanga ukuti Katuula uwalavilwe acule mu vintu vii nga alino aingile mu lulumbi lwakwe?” 27Lyene Yesu ayalondolwela vyonsi vyaya mu mpapulo zyakwe Mose na yakasema, pamulandu wakwe umwisikulu.

28Lino yapalama pipi nu ku muzi uno yayangamo, Yesu acita kwati akupuzya. 29Lelo yamupapata yati, “Ikala naswe, pano ilanzi lyatemba na kakuku ikatola.” Caleka aingila aikala nao. 30Lyene lino watenzi nao pa cakulya, atoola mukate, ataizya, aumokoola, alino aupela kunoyali. 31Lyene manso yao yakupuluka nga nao yamulooka. Alino nawe ata kuloleka ku manso yao. 32Nao yavwanzyanya yati, “Uzye myenzo itu itali ikupya uku luzango lino wali akulanda naswe mu nzila, nu kutulondolwela malembelo?”

33Pa nsita kwene ilya yakatuka yaswililamo ku Yelusalemu. Kuko akuno yaile yazana alondezi ikumi na wenga yati yakongana pali pamwi na auze, 34yala yakuvwanga yati, “Cumi Umwene watazyukuka, nu kuloleka kuli Simoni.” 35Lyene nao oili yalondolwela auze cino icacitike pa museo, na vino yamanyile Umwene lino wamokoozile umukate.

Yesu waloleka ku alondezi yakwe

(Mat 28:16-20; Mk 16:14-18; Yoa 20:19-23; Mil 1:6-8)

36Walanga lino antu yaya oili yacili yakuvwanga cii, mukupumikizya Yesu aimilila pakasi kao nga ayanena ati, “Mutende uye namwe.”

37Lelo yene yacintukila yuvwa intete cuze, yala yakwelenganya vino yalola umuyeye. 38Lelo nawe ayanena ati, “Uzye pacani mwasakamikwa? Uzye pacani mukutwisika mu myenzo inu? 39Lolini, makasa yane ni ngazo zyane. Ala anene kwene! Mumpampante nu kulola, pano umuyeye utakwata munyefu na mafupa, wakwe vino mukulola nkweti.”

40Lyene lino walanda cii, ayalanga makasa yakwe ni ngazo zyakwe. 41Lelo nalyo kwene pamulandu wakuzuziwa nu luzango, lino yatali yataile, yazunguka, nga nawe ayauzya ati, “Uzye mukweti cakulya cimwi pano?” 42Nao yamupeela citina ca nswi iyoce, 43alino nawe atoola alya pa manso yao. 44Lyene ayanena ati, “Vii, vili vintu vino namunenanga lino nali namwe, ukuti vintu vyonsi vino vyalemvilwe pamulandu wane mu mpapulo zyakwe Mose na zyakwe yakasema, nga nu mu Masamu vilinzile kufikiliziwa.” 45Lyene akupulula myenzo yao kuti yamanye malembelo. 46Alino ayanena ati, “Calembwa ukuti, Katuula uwalavilwe alinzile kucula. Na pa wanda wakulenga yatatu alazyukuka kufuma ku afwe, 47nga nu kuti mwi zina lyakwe kuye kukosola ku antu amu nko zyonsi, kutandikila mu Yelusalemu, pakuti yazenzuke nu kuti Leza ayelele maifyo yao. 48Mwemwe yakambone pa vintu vii. 49#Mil 1:4 Nani ndatuma panomuli cino Tata wandaya. Lelo mulinzile mulolele mu musumba, kufika lino mulapokelela maka kufuma kwiyulu.”

Yesu wasendwa kwiyulu

(Mk 16:19-20; Mil 1:9-11)

50Lyene ayasenda kufika nu ku Betaniya, nga akatusya makasa yakwe ayapolelela. 51#Mil 1:9 Lino acili akuyapolelela, ayasya asendwa kwiyulu kupela. 52Lyene [yamupepa, nga] yaswilila ku Yelusalemu, ala yali nu luzango cuze, 53nu kusumba nsita yao ya mapepo lyonsi mu Ng'anda ikulu yakwe Leza, ala yakulumbanya Leza.

Currently Selected:

Luka 24: MamL13

Highlight

Copy