Xhun 1

XHUN

Uvaʼs talt Xhun inuqul tiʼ u Alol Inuqul u tatin quBʼaal Tiuxh

1Atichxh vet u Alol Inuqul u tatin quBʼaal Tiuxh uvaʼs ixeʼt tzaan u qʼij saq. Tul atichxh u Alol Inuqul u tatin quBʼaal Tiuxh s-kʼatza bʼenamen. Tul antichxh Tiuxh u Alol Inuqul u tatin quBʼaal Tiuxh.{*}#1.1 ¿Kam talax u yol?: —...Alol Inuqul u tatin quBʼaal Tiuxh, —chiche. Aʼ nik talvat tiʼ quBʼaal Jesuus uvaʼ, aʼ quBʼaal Jesuus u alol inuqul u tatin quBʼaal Tiuxh te inqʼa xaol. Aʼ tzajnaʼq quBʼaal Jesuus kʼatz quBʼaal Tiuxh, tul ul tal te inqʼa xaol kam uvaʼ nik isaʼ quBʼaal Tiuxh laʼ tootzaqil inqʼa xaol, eche uvaʼ nik tal tu Xhun 3.34 tuchʼ 12.49-50. At vaʼt nik elkaʼpun u yol uvaʼ ‹Alol Inuqul,› aʼe u quBʼaal Jesuus uvaʼ alol iyol quBʼaal Tiuxh. Tan aʼ quBʼaal Jesuus alonaʼq tetz viyol quBʼaal Tiuxh tiʼ iviinqixsat inqʼa kam s-kaqaayil xeʼ qʼij saq. 2Echetz yeʼxnaqich u qʼij saq, tul atichxh u Alol Inuqul u tatin quBʼaal Tiuxh s-kʼatza. 3Tan antxh quBʼaal Tiuxh alon iviinqixsal jankʼal inqʼa kam s-kaqaayil te u Alol Inuqul u tatineʼ. Aʼetz u Alol inuqul u tatin quBʼaal Tiuxh viinqixsan kaqaayil inqʼa kam. Tan yeʼl invaʼq kam ati uvaʼ jit koq aʼ viinqixsan. 4Tul aʼ u Alol Inuqul u tatin quBʼaal Tiuxh vixeʼal u qʼij saq. Tul aʼ qat ul kʼutxhun u tatin quBʼaal Tiuxh te inqʼa xaol uvaʼ, aʼe vinuqul, eche itxiqun vaʼq txiqubʼal qat ikʼutxht te inqʼa xaol.{*}#1.4 ¿Kam talax u yol uvaʼ?: —...eche itxiqun vaʼq txiqubʼal, —chiche. Aʼ nik talvat tiʼ quBʼaal Jesuus, uvaʼ, aʼ quBʼaal Jesuus u kʼutxhul tetz u bʼey kʼatz quBʼaal Tiuxh, eche vaʼq txiqubʼal uvaʼ laʼ txiqun ibʼey invaʼq u xaol uvaʼ tokto nik xaonka. 5Aʼetz vet u Alol Inuqul u tatin quBʼaal Tiuxh qat alon inuqul xoʼl inqʼa xaol, eche itxiqun vaʼq txiqubʼal tu tokto. Tul yeʼletz inqʼa xaol, inqʼa bʼanol tetz yeʼbʼaʼn, qat oleʼv tiʼ imaqtxʼ talax u tatin quBʼaal Tiuxh s-xoʼl, eche yeʼ laʼ toleʼv u tokto tiʼ imaqtxʼ itxiqun u txiqubʼal.

6Alaletz val u vinaq xoʼl inqʼa tij imam Israeel uvaʼ Xhunich ibʼij, uvaʼ quBʼaal Tiuxh chʼexon.{*}#1.6 Tio 3.1-12; Kuxh 1.1-8; Luk 3.1-20. ¿Jabʼiste Xhun nik tal u versiikulo uvaʼa? Aʼ Xhune, u aqʼol kuʼ xaol xeʼ aʼ, nik taleʼ. Aʼ Xhune, vikʼaol Sakariias, atz u tal Elisaveet. Aʼ nik talvat tu Luk 1.5-25. Tul tal itxhʼoj txutx tibʼ Xhun tuchʼ Jesuus. Tul vajqil ichʼ bʼaxal Xhun vatz Jesuus. Pet jit aʼ Xhun nik taleʼ uvaʼ tzʼibʼan u uʼ uvaʼa, tiʼ kam pal ibʼan quBʼaal Jesuus vatz qʼij saq. 7Aʼetz s-tiʼil alal Xhun vatz txʼavaʼ tiʼ ibʼaxabʼsat Xhun talaxeʼ uvaʼ, tetxhal laʼich ul vaʼl u Alol inuqul u tatin quBʼaal Tiuxh, uvaʼ eche vaʼq txiqubʼal laʼich tatineʼ. Echetz laʼich iqeexe u Alol Inuqul u tatin quBʼaal Tiuxh taʼn jankʼal inqʼa xaol. 8Jitichetz aʼ Xhun u Alol Inuqul u tatin quBʼaal Tiuxh uvaʼ, eche txiqubʼal, pet Xhun kuxh ul bʼaxabʼsan talaxeʼ uvaʼ laʼich ul uvaʼ, eche txiqubʼal. 9Tan yaʼnaʼqich u Alol Inuqul u tatin quBʼaal Tiuxh laʼich ul vatz txʼavaʼ uvaʼ tzajnaʼq kʼatz quBʼaal Tiuxh uvaʼ laʼich ul alon vet vinuqul inqʼa yol tiʼ quBʼaal Tiuxh xoʼl jankʼal inqʼa xaol vatz txʼavaʼ, eche itxiqun vaʼq txiqubʼal xoʼl xaol laʼich tuleʼ.{*}#1.9 U yol ‹vinuqul› nik tal viyolbʼal quBʼaal Tiuxh, tan nima vatzlen kuxh nik elkaʼpun. Pet aʼxh bʼaxa nik elkaʼpun uvaʼ ‹tzajnaʼq kʼatz quBʼaal Tiuxh,› atz ‹u quBʼaal Tiuxh nik alon,› chich telaʼpun.

10Atz aʼe, uvaʼ viinqixsan jankʼal inqʼa kam vatz txʼavaʼ tixeʼtebʼal qʼij saq. Yaʼnetze ul vet u Txiqubʼal vatz txʼavaʼ. Kʼuxhetz eche, tan tira yeʼ motx bʼen te inqʼa xaol vatz txʼavaʼ u tiqleʼm u Txiqubʼal. 11Aʼetz ulk vatz u txʼavaʼ uvaʼ iviinqixsa s-tetz. Tul yeʼ kʼulux taʼn inqʼa imol s-tijaq imam Israeel. 12Pet jankʼalxh oʼ, uvaʼ qat kʼulun, tul qat quqeja kame u tiqleʼm. Aʼetz oʼe uvaʼ qat taqʼ qiqleʼm, tiʼ uvaʼ, oʼ vet kʼaol imeʼal quBʼaal Tiuxh. 13Tan jit ech qat qok s-kʼaol imeʼal, eche itxhej vaʼq nitxaʼ uvaʼ tuchʼ itxhiʼoʼl ikaqal u xaol laʼ txhej ka. Atz jit tuchʼ atxhaʼv tetz vaʼq vinaq. Pet aʼ u quBʼaal Tiuxh qat oksan oʼ s-kʼaol imeʼal.

14Bʼenetz vet u Alol Inuqul u tatin quBʼaal Tiuxh s-vaʼl alam aanima. Tul atin vet s-quxoʼl. Tul tira motx qila uvaʼ mam yol u tatineʼ, tan, tiʼ uvaʼ, aʼ iqʼomal tzaan taʼn uvaʼ mam yol tatin u quBʼaal Tiuxh. Tul taʼn kuxhte invaʼl, yeʼxhabʼil vaʼt eche. Tul tira motx tal inuqul s-qe tiʼ u quBʼaal Tiuxh.{*}#1.14 U yol ‹unigénito› uvaʼ nik tal tu kastiiya, tan aʼ nik elkaʼp, tiʼ uvaʼ iKʼaolxh quBʼaal Tiuxh u quBʼaal Jesuus, eche uvaʼ nik tal t-Saalmo 2.7; Tio 1.20 tuchʼ Evreeos 1.5-7. Nikat tal u yol ‹unigénito› t-Xhun 1.14 tuchʼ 3.16.

15Tul aʼ ulk Xhun, u aqʼol kuʼ xaol xeʼ aʼ, tiʼ talax u tulebʼal u Alol Inuqul u tatin quBʼaal Tiuxh. Tul sichʼin Xhun tiʼ talax el inqʼa yol. Tul ech tal s-eche: —Aʼetz u Vinaqe, uvaʼ ech nikich val s-tiʼ s-eche: «U Vinaq uvaʼ yaʼn tul s-viʼ,» kʼuxh xeʼt in sete. Tan palnaʼq tiqleʼm sinviʼ. Aloq atxhteʼe s-naʼya. Tan aʼe, uvaʼ aʼxh naʼy tatin sinvatz, —xeʼt Xhun xoʼl inqʼa xaol.

16Tan jankʼal oʼ, aʼ qat qukʼulvat u mam ibʼaʼnil tiʼ ibʼant inqʼa mam yol tiʼ u tatineʼ. Tul bʼenaʼl kuxh ibʼen vibʼaʼnil qat qil ibʼantaʼ, kʼuxh jit qukʼulel uvaʼ ul ibʼan inqʼa bʼaʼnil s-quxoʼl. 17Bʼantan bʼaʼn inqʼa bʼekʼbʼal uvaʼ taqʼ ka Moisees te inqʼa kʼuy qumam uvaʼ taqʼ quBʼaal Tiuxh s-te. Petetz koq vet uvaʼ ul ibʼan JesuKriisto, tan palnaʼq vet s-tiʼ. Tan tira mam bʼaʼnil ul ibʼan JesuKriisto tiʼ ikuyux inqʼa qupaʼv. Tul tira ul tal vinuqul s-qe tiʼ u quBʼaal Tiuxh. 18Poro yeʼxhabʼil invaʼq ilonaʼq tetz u quBʼaal Tiuxh. Pet taʼn kuxh vaʼl viKʼaol quBʼaal Tiuxh ootzaqin tetz; aʼe Jesuus uvaʼ vaʼl kuxh tuchʼ quBʼaal Tiuxh. Aʼetz uvaʼe, qat aqʼon qootzaqi u quBʼaal Tiuxh.

Uvaʼs talt Xhun, u aqʼol kuʼ xaol xeʼ aʼ, tiʼ uvaʼ, aʼich quBʼaal Jesuuse u Kriisto

Tio 3.1-12; Kuxh 1.1-8; Luk 3.1-20

19Tuulbʼaletz uvaʼs nikich talt Xhun viyolbʼal quBʼaal Tiuxh tu txʼavaʼ uvaʼ yeʼl xaol jeqlich s-tuul, tul txhaqax bʼen jolol inqʼa oksan yol vatz Tiuxh taʼn inqʼa iqʼesal tuqʼeʼybʼal tijaq imam Israeel, een atichaq tu tenam Jerusaleen. Ant txhaqax jolt inqʼa leviich tiqleʼm.{*}#1.19 ¿Kam talax u yol ‹inqʼa levii tiqleʼm› nik tal tzitza? Aʼ nik talvat tiʼ jolol inqʼa xaol, lotxholaq tetz inqʼa iqʼesal uqʼeʼybʼal xoʼl inqʼa tij imam Israeel. Tul nikich ilotxhon tiʼ inqʼa aqʼon tiʼ vinatxhkʼuulal Tiuxh tu tostiuxh t-Jerusaleen, eche uvaʼ nik tal t-Luk 10.32. Tan quBʼaal Tiuxh alon ka s-tiʼ, uvaʼ atichaq tiqleʼm tiʼ tatin tu bʼuʼq tostiuxh, tuulbʼal uvaʼs atich Moisees tuchʼ Aroon, eche uvaʼ nik tal tu Nuumeros 3.1-48. Tan tijaq imam Leviie inqʼa nik tal tzitza, pet jit tij imam Aroon. Tul aʼ inqʼae, jatvatzul kuxh aqʼon nikich ibʼan tiʼ ilotxhox inqʼa oksan yol vatz Tiuxh tu tostiuxh tu tenam Jerusaleen. Pet yeʼlichaq tokebʼal tiʼ toksal yol vatz Tiuxh. Pet taʼn jolt inqʼa tij imam Levii, inqʼa tijich imam vet Aroon atich tokebʼal tiʼ toksal yol vatz Tiuxh, eche uvaʼ nik tal tu Eeksodo 6.25 tuchʼ Nuumeros 1.50-53; 3.9, 12, 32, 41, 45; 4.19-49; 18.7, 23 tuchʼ Deuteronoomio 27.14-26. Tan aʼaqich isaʼ tabʼil inuqul u yol te Xhun. Echaqetz tal te Xhun s-eche: —¿Jaʼletz axh? —xeʼtaqe. 20Yaʼne tal vet Xhun inuqul u yol, s-tiʼ uvaʼ jabʼilich Xhun. Pet yeʼxhkam imuq Xhun talax vinuqul, tiʼ uvaʼ jitich aʼ Xhune u Kriisto. Tul ech tal Xhun s-eche: —Jit ine u Kriisto, —xeʼt Xhun.

21Tul echaq motx tal te Xhun s-eche: —¿Jaʼletz axh bʼa? Pet ¿maq axh Eliias? —xeʼtaqe.#Malakiias 4.5

Tul ech tal Xhun s-eche: —Yeʼle. Jit in Eliias, —xeʼt Xhun.

Tul echaq motx tal te Xhun s-eche: —¿Maqetz aʼ, axhe u qʼexsan tetz viyol quBʼaal Tiuxh uvaʼ tzʼibʼamal ka taʼn Moisees? —xeʼtaqe.#Deuteronoomio 18.15-18

Yaʼne ech tal Xhun s-eche: —Yeʼle. Jit ine, —xeʼt Xhun.

22Yaʼne echaq tal te Xhun s-eche: —¿Aletz inuqul bʼa s-qe jaʼl axh? Tan bʼen nal qal inuqul te inqʼa qat motx txhaqon tzaan oʼ. Pet antetzxh axh alon jaʼletz axh, —xeʼtaqe.

23Yaʼne ech tal Xhun s-eche: —Ine uvaʼ alel ka inqʼa yol s-tiʼ taʼn Isaiias, u qʼexsanich tetz viyol quBʼaal Tiuxh. Aʼ tal ka uvaʼ een laʼ bʼen sichʼink vaʼl xaol tu txʼavaʼ uvaʼ yeʼl xaol jeqlel s-tuul.

Tul ech laʼ tal s-eche: «Jikbʼavaqxh etibʼ vatz u quBʼaal uvaʼ tuleʼ, eche laʼ ijikbʼixsal vaʼq bʼey tiʼ ipal paʼl vaʼq mam iqʼesal,» chich u yol, —xeʼt Xhun.#Isaiias 40.3

24Poro antich jolol inqʼa fariseeo xoʼl inqʼa txhaqax tzaan tiʼ tabʼil te Xhun kamich u tiqleʼm Xhun. 25Tul echaq motx tabʼi te Xhun s-eche: —¿Keʼchetz nik aaqʼt kuʼ inqʼa xaol bʼa xeʼ aʼ, oq jit axh u Kriisto, tul oq jit axh Eliias, atz oq jit axh u qʼexsan tetz viyol quBʼaal Tiuxh? —xeʼtaqe.

26Yaʼne ech tal Xhun s-eche: —Bʼantan xeʼ aʼ kuxh nik vaqʼvat kuʼ inqʼa xaol. Pet il vet invaʼl u Vinaq at s-quxoʼl uvaʼ yeʼx etootzaqitaʼ. 27Poro u Vinaq uvaʼe, tan atxhteʼe s-naʼya. Tul tira palnaʼq tiqleʼm sinviʼ. Echetz jitoq inkʼulel uvaʼ laʼ inchiteʼl ichichʼ xaʼp t-toq, —xeʼt Xhun te inqʼa txhaq.

28Poro een ibʼanvat inqʼa yol inqʼae tu tenam Vetaavara, jala el u xaomla aʼ u Jordaan tal uvaʼ nikich taqʼvat kuʼ Xhun inqʼa xaol xeʼ aʼ.

Uvaʼs talt Xhun uvaʼ, aʼ quBʼaal Jesuus laʼich bʼanon ivatzil inqʼa chelem karneʼl vatz quBʼaal Tiuxh

29Echetz vet eqal, tul til Xhun taqʼbʼ Jesuus s-kʼatza. Tul ech tal Xhun s-eche: —Il naq u Vinaq jay tuleʼ, uvaʼ toq oksaloq vatz Tiuxh, eche nik toksal vaʼq chelem karneʼl vatz Tiuxh. Tan quBʼaal Tiuxh qat aqʼon tzaan tiʼ ikuyux vipaʼv inqʼa xaol, tul yeʼ laʼ bʼen vet tu kʼaxkʼo tiʼ itxhojt inqʼa ipaʼv, kʼuxh kamxh xaolil vatz txʼavaʼ.#Isaiias 53.4-7; Evreeos 10.10; Apokaliipsis 17

30Aʼetz u Vinaqe, uvaʼ ech nikich val s-tiʼ s-eche: «U Vinaq uvaʼ yaʼn tul s-viʼ, tan tira palnaʼq tiqleʼm sinviʼ. Tul atxhteʼe s-naʼya. Tan aʼe, uvaʼ aʼxh naʼy tatin sinvatz,» kʼuxh chich in sete. 31Poro yeʼich vootzaql u tiqleʼm u Vinaq uvaʼe. Pet aʼetz itxaʼk uvaʼ nik vaqʼ kuʼ ex xeʼ aʼ, tiʼ uvaʼ jankʼalxh oʼ, inqʼa tij imam Israeel, laʼ ootzaqin u tiqleʼm u Vinaq uvaʼe, —xeʼt Xhun.

32-33Tul ibʼaxabʼsaat Xhun talax paqte, tiʼ uvaʼ kamich u tiqleʼm Jesuus. Tul ech tal Xhun s-eche: —Yeʼichetz vootzaqle oq Kriistoich tiqleʼm u Vinaq uvaʼe. Pet taʼn kuxh vootzaqliche uvaʼ quBʼaal Tiuxh txhaqon in tiʼ taqʼax kuʼ inqʼa xaol xeʼ aʼ, inqʼa nikich titzʼa tibʼ t-inqʼa ipaʼv. Tul sebʼtichetz vaqʼt kuʼ inqʼa xaol xeʼ aʼ, tul ech tal quBʼaal Tiuxh s-ve s-eche: «Atetz vaʼl u Vinaq uvaʼ toq eel ikuʼl vinTiuxhil s-tiibʼa. Tul toq eel tatin s-tiibʼa. Aʼetz uvaʼe, laʼ aqʼon vinTiuxhil tetaanima, tiʼ ijalp vetxumbʼal sinvatz,» xeʼt quBʼaal Tiuxh s-ve.

Antxhtuʼ. Tan viletz ikuʼl viTiuxhil Tiuxh tiibʼa Jesuus, eche paraamuxh. Tul atin s-tiibʼa. Echetz vootzaqit vete u tiqleʼm Jesuus.#Xhun 7.39; Vibʼanoʼm inqʼa Apoostol 2.1-47

34Inetzxh ilon ikuʼl viTiuxhil Tiuxh tiibʼa Jesuus, echetz nik valte sete uvaʼ iKʼaolxh quBʼaal Tiuxh Jesuus, —xeʼt Xhun.

Uvaʼs bʼaxaxh tok bʼen kaʼl inqʼa vinaq tiʼ quBʼaal Jesuus

35Echetz vet s-eqal, tul atich Xhun tziʼ u xaomla aʼ Jordaan inpaqte. Tul imolich tibʼ Xhun tuchʼ kaʼvaʼl inqʼa nikich itxhus tibʼ s-kʼatza. 36Tul til Xhun ipal Jesuus. Tul ech tal Xhun te inqʼa nikich itxhus tibʼ s-kʼatza s-eche: —Il naq u Vinaq ile, uvaʼ toq oksaloq vatz quBʼaal Tiuxh, eche nik toksal vaʼq chelem karneʼl vatz quBʼaal Tiuxh, —xeʼt Xhun.

37Taʼnetzxh tabʼi kaʼvaʼl inqʼa nikich itxhus tibʼ kʼatz Xhun u yol uvaʼe, tul okaq vet bʼen tiʼ Jesuus.

38Sutxhqʼetz Jesuus tiʼ iqul, tul til Jesuus tok vet bʼen kaʼvaʼl inqʼa vinaq s-tiʼ.

Yaʼne ech tal Jesuus s-te s-eche: —¿Kam nik etxhokeʼ? —xeʼt Jesuus.

Tul echaq tal inqʼa vinaq s-eche: —Ravii, ¿tal atil avotzotz? —xeʼtaqe. (‹Txhusul,› chich telaʼp u yol Ravii.)

39Yaʼne ech tal Jesuus s-eche: —Koʼvaq bʼa s-viʼ. Tul koʼvaq etileʼ tal uvaʼ atil in, —xeʼt Jesuus. Tul bʼenaq veteʼ. Tul kajaq vet ka tal uvaʼ atich Jesuus, tan aʼxh ibʼant vet kajvaʼl oora s-kuʼebʼal qʼij.

40Lixhichetz ibʼij vaʼl u vinaq uvaʼ abʼin u yol uvaʼ maʼtich talt Xhun tiʼ Jesuus. Tul titzʼinich Simoon Luʼ u vinaq uvaʼe. Aʼetz u vinaqe uvaʼ ok bʼen tuchʼ vaʼt vimol tiʼ Jesuus.

41Yaʼne ex itxhok vet Lixh u tatzik; aʼe Simoon. Tul ech tal vet Lixh s-te s-eche: —Qatetz uy vet naq u Mesiias, —xeʼt Lixh. (Aʼ nik elkaʼp u yol Mesiias, ‹Kriisto,› tu yolbʼal grieego.) 42Tul iqʼol vet tzaan Simoon vatz Jesuus taʼn Lixh.

Tiletz vet Jesuus taqʼbʼ Simoon, tul ech tal Jesuus s-te s-eche: —Axh Simoon vikʼaol Jonaas.{*}#1.42 U bʼij Jonaas tu yolbʼal evreeo, aʼ nik elkaʼpun Juan tu yolbʼal grieego. Pet Xhun nik elkaʼp t-quyolbʼal. Pet Seefas vet abʼij toq ibʼaneʼ, —xeʼt Jesuus te Simoon. (U bʼij ‹Seefas› tu yolbʼal arameeo, aʼ nik elkaʼpun ‹Pedro› tu yolbʼal grieego. Tul ‹sivan› nik elkaʼp u bʼij Seefas.)

Uvaʼs talt Jesuus tok bʼen Piʼl tuchʼ Natanaeel s-tiʼ

43Echetz vet eqal, tul ikʼaq tibʼ Jesuus tiʼ ibʼen tuulbʼal Galileea. Tul ex ileq Jesuus val u vinaq uvaʼ Piʼlich ibʼij. Tul ech tal Jesuus te Piʼl s-eche: —Koʼ s-viʼ, —xeʼt Jesuus. 44Poro vaʼlich kuxh itenam Piʼl tuchʼ Lixh, atz tuchʼ Luʼ. Tan eenaqich jeqlel tu tenam Vetsaaida.

45Yaʼne ex leqexoq Natanaeel taʼn Piʼl. Tul ech tal Piʼl te Natanaeel s-eche: —Qat qootzaqil naq uvaʼ itzʼibʼa ka Moisees inqʼa yol s-tiʼ, atz naq uvaʼ tzʼibʼamal ka yol s-tiʼ taʼn jolt inqʼa qʼexsanich tetz viyol quBʼaal Tiuxh. Aʼetz naqe u Jesuus, vikʼaol Xhuʼl, u aj tenam Nasareet, —xeʼt Piʼl te Natanaeel.

46Poro ech tal Natanaeel s-eche: —¡Aʼ tzikxh laʼ txhejk txhan invaʼq vinaq uvaʼ aj txumbʼal tu tenam Nasareet! —xeʼt Natanaeel.

Tul ech tal Piʼl s-eche: —Koʼ qileʼ eeleʼ, —xeʼt Piʼl.

47Tiletz vet Jesuus taqʼbʼ Natanaeel, tul ech tal Jesuus tiʼ Natanaeel s-eche: —Iletz invaʼl qumol s-tij imam Israeel uy s-quxoʼl uvaʼ yeʼl tzʼeqo tzij s-vatz, —xeʼt Jesuus.

48Yaʼne ech tal Natanaeel te Jesuus s-eche: —¿Kam anatxhbʼe oq yeʼl tzʼeqo tzij sinkʼatza? —xeʼt Natanaeel.

Tul ech tal Jesuus s-eche: —Yeʼxnaq isaʼeʼt tzaan axh Piʼl, tul vootzaqxh vet axh, uvaʼs at axh jaqʼ tzeʼ u iigo, —xeʼt Jesuus.

49Tul ech tal vet Natanaeel te Jesuus s-eche: —¡Txusul qetz, aʼ bʼak axhe viKʼaol quBʼaal Tiuxh! Atz ¡aʼ bʼak axhe uvaʼ toq bʼanon u mam iqʼesalil s-quxoʼl, oʼ, inqʼa tij imam Israeel! —xeʼt vet Natanaeel.

50Yaʼne ech tal Jesuus te Natanaeel s-eche: —Niketz aqejeʼ uvaʼ at viqleʼm, tan, tiʼ uvaʼ, ech inqʼa yol qat val see s-eche: «Vootzaqxh vet axh uvaʼs at axh jaqʼ tzeʼ u iigo,» chich in see. Tiʼetz uvaʼe, qat aqejvat. Pet aloq ateletz kuxh inqʼa kaebʼal aanima toq eel inbʼantaʼ, inqʼa palnaʼq tiʼ inqʼa nik val see, —xeʼt Jesuus.

51Tul ech tal Jesuus inpaqt s-eche: —Tira nuqxh nik val sete: Toq etileʼ uvaʼ jaqlel vet u amlikaʼ. Tul toq etil ipal jaʼ, atz ikuʼl inqʼa aanxel s-viibʼa, in, u Kʼaola uvaʼ qat bʼen in s-alam aanima, —xeʼt Jesuus.#Jeenesis 28.12

Currently Selected:

Xhun 1: ixlC

Highlight

Copy