Xhun 4

Uvaʼs iyolon quBʼaal Jesuus tuchʼ val u ixoq aj Samaaria

1-2Nikichetz tal inqʼa fariseeo tiʼ Jesuus uvaʼ palnaʼqich tatxhul inqʼa xaol nikich tok s-niman tetz Jesuus, tul nikich taqʼ kuʼ xeʼ aʼ. Pet aloq jit Jesuus nikich aqʼon kuʼ inqʼa xaol xeʼ aʼ, pet aʼ inqʼa nikich itxhus tibʼ kʼatz Jesuus. Tul nikich ipal paʼl tatxhul viʼ inqʼa nikich taqʼ kuʼ Xhun xeʼ aʼ. Tabʼietz quBʼaal Jesuus kam uvaʼ nikich tal inqʼa fariseeo s-tiʼ, 3tul yekich el vet bʼen Jesuus tuulbʼal Judeea. Atz yekich vet tuulbʼal Galileea inpaqte. 4Poro tetxhal pal nalich Jesuus tuulbʼal Samaaria.

5Aqʼbʼetz vet Jesuus tuchʼ inqʼa nikich itxhus tibʼ s-kʼatza t-val u tal tenam Sikaar, antxh tuulbʼal Samaaria, kʼatz vitxʼavaʼ Jakoov uvaʼ taqʼ ka s-naʼya te Xhuʼl, vikʼaol,#Jeenesis 33.19; Josuee 24.32 6tal uvaʼ ikʼotvat Jakoov val u julil aʼ uvaʼ sibʼ atich bʼen. Aʼxhetz itxhaqʼaan qʼij, tul aqʼbʼ Jesuus tzitzi. Tul kʼuqeʼv Jesuus titziʼ vitzʼachil vijulil u aʼ, tan koʼlinaʼqich vet Jesuus t-xajoʼm.{*}#4.6 Tuulbʼaletz uvaʼs ikʼuqeʼv quBʼaal Jesuus titziʼ vijulil u aʼ, tul itxhaq bʼen quBʼaal Jesuus inqʼa nikich itxhus tibʼ s-kʼatza tiʼ iloqʼox txʼix.

7Yaʼne ul val u ixoq aj Samaaria tiʼ tiqʼol jaʼul tajaʼ tu jul. Tul ech tal Jesuus te u ixoq s-eche: —Aqʼ inbʼeeq vajaʼ saxeʼ, tul toq vukʼa, —xeʼt Jesuus. 8Eenaqichetz inqʼa nikich itxhus tibʼ kʼatz Jesuus tu tenam tiʼ iloqʼox txʼix.

9Yaʼne ech tal u ixoq te Jesuus s-eche: —¿Kam s-tiʼil nik aabʼi avajaʼ s-ve? Tan in aj Samaaria, tul axh tij imam Israeel. Tul ootzaqle uvaʼ yeʼ nik iqʼiila tibʼ inqʼa aj Samaaria tuchʼ inqʼa tij imam Israeel, —xeʼt u ixoq te Jesuus.

10Tul ech tal Jesuus s-eche: —Bʼaʼn uvaʼ ootzaql koq vibʼaʼnil quBʼaal Tiuxh uvaʼ laʼ utxhi laʼ taqʼ see, atz ootzaql koq u viqleʼm, in, uvaʼ nik abʼin vajaʼ see, tul laʼetz utxhi laʼ aabʼi avajaʼ s-ve, uvaʼ itzʼchil nik ibʼaneʼ uvaʼ nik taqʼ qʼij saq uvaʼ yeʼl iyaʼebʼal imotxebʼal. Tul laʼ vaqʼ see, —xeʼt Jesuus.

11Yaʼne ech tal u ixoq s-eche: —Iqʼesal, kametz koq laʼ uule tiqʼol jaʼul avajaʼ, tan yeʼxhkam invaʼq iqʼomal aaʼn. Tul sibʼ at bʼen u aʼ paqte. Pet aloq ¿taletz atil u aʼ bʼa uvaʼ itzʼchil nik ibʼaneʼ nik aaleʼ? 12Tan bʼane aʼetz koq axh palnaʼq aviqleʼm viʼ Jakoov, u kʼuy qumam, uvaʼ kʼoton ka u julil aʼ uvaʼa. Tan antxh u julil aʼe, uvaʼ nikich ul tiqʼovat Jakoov tajaʼ. Tul nikich tukʼa tuchʼ inqʼa kʼaol imeʼal, atz tuchʼ inqʼa ikarneʼl, atz tuchʼ inqʼa ivaʼk, —xeʼt u ixoq te Jesuus.

13Yaʼne ech tal Jesuus s-eche: —Jaʼl u xaol uvaʼ laʼ ukʼan u aʼ uvaʼa, tan laʼ kam t-tzaqa tziʼil inpaqte. 14Pet u xaol uvaʼ laʼ ukʼan u aʼ uvaʼ, in laʼ aqʼon s-te, tan yeʼl inpaqt laʼ kam t-tzaqatziʼil. Tan eche titzʼ invaʼq viʼal aʼ toq tatin qʼij isaq u xaol. Tul yeʼl iyaʼebʼal imotxebʼal qʼij isaq laʼ ibʼana, —xeʼt Jesuus.

15Tul ech tal vet u ixoq te Jesuus s-eche: —Iqʼesal, aqʼ u aʼ bʼa s-ve uvaʼ nik aaleʼ. Tul yeʼl inpaqt laʼ tzaq intziʼ. Atz yeʼl vet in laʼ ul in tiʼ tiqʼol aʼ tzitza, —xeʼt u ixoq.

16Yaʼne ech tal Jesuus s-eche: —Bʼaʼn kuxh teʼe. Pet aʼl quuxh; tul quxh iqʼo tzaan vatzumel. Tul ul axh sinvatz s-tuchʼ, —xeʼt Jesuus.

17Tul ech tal u ixoq s-eche: —Yeʼl intzumel, —xeʼt u ixoq.

Tul ech tal Jesuus s-eche: —Echxhte uvaʼ nik aaleʼ: «Yeʼl intzumel,» chich axh. 18Tan oʼvaʼx vinaq eeqʼo. Iletz invaʼt vinaq iqʼomal aaʼn s-txheel, poro jitat atzumel. Echetz inuqulxhte uvaʼ nik aaleʼ, —xeʼt Jesuus.

19Yaʼne ech tal u ixoq te Jesuus s-eche: —Iqʼesal, nik ibʼen s-ve uvaʼ axh qʼexsan tetz iyol quBʼaal Tiuxh. 20Pet kametz s-tiʼil uvaʼ antxh nikich natxhkʼuulank inqʼa kʼuy qumam tzitza tu vitz uvaʼ atil oʼ s-txheel. Pet aʼetz nik etaleʼ, ex inqʼa tij imam Israeel, uvaʼ tetxhal kuxh aʼ laʼ utxhk natxhkʼuulaʼm tu tenam Jerusaleen, —xeʼt u ixoq te Jesuus.{*}#4.20 ¿Jabʼiste vitz nik tal u ixoq tzitza? Aʼ nikich tal u ixoq u vitz Jeresiim tuulbʼal Samaaria.

21Yaʼne ech tal Jesuus s-eche: —Toq val see, ixoq, uvaʼ: Il vet inqʼa qʼij tuleʼ uvaʼ jit kuxh taʼn tu vitz uvaʼa, atz tu tenam Jerusaleen, laʼ natxhkʼuulalik Tiuxh, tul toqxh ibʼan uvaʼ nik valeʼ. 22Jankʼal ex inqʼa aj Samaaria nik motx enatxhkʼuulan qʼaoq. Poro yeʼ etootzaqle jaʼl uvaʼ nik enatxhkʼuula. Pet oʼ inqʼa tij imam Israeel, tan nik motx qunatxhkʼuulaneʼ. Tul qootzaqle jaʼl uvaʼ nik qunatxhkʼuula. Tan s-qiʼe, oʼ inqʼa tij imam Israeel, toq ulk u chitpichil t-inqʼa paʼv.

23Pet opoonyetz vet inqʼa qʼij, tan aʼetz vete uvaʼ atil oʼ s-txheel, uvaʼ tu taanxelalxh inqʼa niman tetz quBʼaal Tiuxh laʼ tzajk vinatxhkʼuulaneʼ. Tan aʼetz nik isaʼ quBʼaal Tiuxh, inqʼa taanxelalxh laʼ tzajk u natxhkʼuulaʼm. Aʼetz u nuqla natxhkʼuulaʼme uvaʼ nik isaʼ quBʼaal Tiuxh. Tul aʼetz nik itxhok quBʼaal Tiuxh inqʼa xaol uvaʼ taanxelalxh laʼ tzajk vinatxhkʼuulaneʼ. 24Tan u quBʼaal Tiuxh, aanxelal kuxh vet tatineʼ. Echetz s-tiʼile jatvaʼlxh inqʼa xaol nik saʼon inatxhkʼuulal Tiuxh, tul taanxelalxh laʼ tzajk vinatxhkʼuulaneʼ. Atz aʼ viTiuxhil Tiuxh laʼ toksa s-tuul tiʼ vinatxhkʼuulaneʼ, —xeʼt Jesuus te u ixoq.{*}#4.24 Aʼetz tal quBʼaal Jesuus inuqul te u ixoq uvaʼ jit tiʼ u atibʼal tal uvaʼ laʼ utxhk natxhkʼuulaʼm. Pet een tiʼ u natxhkʼuulaʼm uvaʼ een laʼ tzajk tu taanxelal u xaol. Tan eche uvaʼ nikich ibʼan s-naʼya, tan kʼuxh niim nikich tzajk inqʼa tij imam Israeel, tan een nikich ex inatxhkʼuulavat Tiuxh tu tenam Jerusaleen. Pet aʼetz vet itxaʼk uvaʼ ul taqʼ tibʼ quBʼaal Jesuus kamoq, tiʼ uvaʼ laʼ utxh vet inatxhkʼuulat inqʼa xaol Tiuxh s-jununil. Atz yekxh vet vinatxhkʼuulan vatz Tiuxh. Tan aʼ vaʼl u tetxhlal nik ex kʼutxhun, tiʼ uvaʼs tel vet ikʼuul quBʼaal Jesuus, tul tira yekich rinp vet kuʼl u chelkin tʼebʼkin bʼuʼq u qʼanbʼal tuul u tostiuxh. Aʼetz nik elkaʼpune uvaʼ jit tetxhal een laʼ utxhk natxhkʼuulaʼm tu tenam Jerusaleen. Tio 27.51.

25Yaʼne ech tal u ixoq te Jesuus s-eche: —Vootzaqle uvaʼ laʼ ul u Mesiias. Aʼe, uvaʼ Kriisto alel s-tiʼ inpaqte. Atz aʼ uvaʼe, laʼ uli, tul laʼ ul tal inuqul jankʼal inqʼa yol s-qe, —xeʼt u ixoq.

26Tul ech tal Jesuus s-eche: —Aʼetz ine uvaʼ nik inyolon savuchʼ s-txheel, —xeʼt Jesuus te u ixoq.

27Tuulbʼaletz uvaʼs sebʼtich iyolon Jesuus tuchʼ u ixoq, tul ul vet inqʼa nikich itxhus tibʼ kʼatz Jesuus. Tul yekich kuxh motx kajaq taanima, tiʼ uvaʼs nikich iyolon Jesuus tuchʼ u ixoq. Poro yeʼxhabʼil invaʼq ech alon s-eche: —¿Kam nik aabʼi te Jesuus? —xeʼtaq koq te u ixoq. Atz: —¿Kam nik ayol tuchʼ u ixoq? —xeʼtaq koq te Jesuus.

28Yaʼne taqʼ vet ka u ixoq vitxeʼn. Tul bʼen vet ok tu tenam. Tul ech ex tal vet te inqʼa xaol tu tenam s-eche: 29—Koʼvaq s-viʼ. Tul koʼ qil val u Vinaq uvaʼ jikxh qat talt s-ve jankʼal inqʼa bʼanel vaʼn. Aʼetz nik vale uvaʼ, aʼ vet u Kriistoe, —xeʼt u ixoq.

30Yaʼne tzaj vet inqʼa xaol tu tenam, tul ulaq vet vatz Jesuus.

31Ayaʼl s-tuul nikich iyaʼlul Jesuus tiʼ itxʼaʼon taʼn inqʼa nikich itxhus tibʼ s-kʼatza. Tul ech nikich motx tal te Jesuus s-eche: —Txhusul qetz, txʼaʼon, —chichichaqe.

32Yaʼne ech tal Jesuus s-eche: —Il intxʼix ati uvaʼ nik vetxhbʼu. Pet aʼe tan, yeʼ etootzaqle, —xeʼt Jesuus.

33Tul ech motx tal vet inqʼa nikich itxhus tibʼ kʼatz Jesuus s-vatzaq s-eche: —Atebʼ invaʼq xaol qat ul aqʼon itxʼix Jesuus, —xeʼtaqe.

34Yaʼne ech tal Jesuus te inqʼa nikich itxhus tibʼ s-kʼatza s-eche: —Nik innima kam uvaʼ nik isaʼ vinBʼaal laʼ inbʼana. Tul nik insaʼ itzoqpisal s-kaqaayil kam uvaʼ qat itxhaq tzaan in vinBʼaal tiʼ ibʼanaxeʼ. Aʼetz uvaʼe, nik tetxhbʼu u vaanxelal vatz quBʼaal Tiuxh.

35Echetze ex, tan ech nik motx etal s-eche: «Kajvaʼt ichʼ laʼ motx txhokp ivatz inqʼa txhiko,» chich ex. Pet toq val sete uvaʼ ech tatin inqʼa xaol, eche u txhiko. Tan mamala xaol nik isaʼ tok tzaan s-viʼ. Saqivaq etileʼ, tan ile qʼanbʼiyaq veteʼ. Tul laʼ utxh vet itxhokoxeʼ. 36Tan jatvaʼl inqʼa laʼ molon ok inqʼa xaol sinkʼatza tiʼ ibʼen tu qʼij saq uvaʼ yeʼl iyaʼebʼal imotxebʼal, tan at itxʼaqaʼm s-tiʼ. Eche u xaol uvaʼ laʼ molon vet vivatz inqʼa txhiko, tan laʼ ikʼul txhojbʼal tetz s-tiʼ. Tul atat itxʼaqaʼm jaʼtvaʼl uvaʼ nik alon vinyol, eche u xaol uvaʼ laʼ avan u txhiko. Tul tzumetz kuxh laʼ motx ichiibʼ vet sinkʼatza.{*}#4.36 Nikich motx tok vet inqʼa aj Samaaria s-niman tetz Jesuus kʼuxh jitichaq tij imam Israeel. 37Tan nuqxhte val u yol uvaʼ ech nik tal s-eche: «Vaʼl xaol laʼ avan invaʼq txhiko, tul vaʼt vet xaol laʼ txhokon ivatz,» chich u yol.{*}#4.37 ¿Jaʼle u xaol uvaʼ txhikon s-bʼaxa nik tal quBʼaal Jesuus? Aʼ inqʼa qʼexsanich tetz viyol quBʼaal Tiuxh motx alon ka tiʼ u tulebʼal u Kriisto, eche Moisees, tetxhal topoon kʼatz Xhun, u aqʼol kuʼ xaol xeʼ aʼ. Pet ¿jaʼletz vete u xaol laʼ molon vivatz u txhiko tal quBʼaal Jesuus? Aʼetz vete inqʼa apoostol, tan aʼ inqʼae, motx itxhaq vet bʼen quBʼaal Jesuus tiʼ ipaxsal viyolbʼal xoʼl inqʼa xaol. Tul motx imol vet inqʼa xaol. Atz jankʼal kuxh vet inqʼa s-txheel nik molon inqʼa xaol jatvaʼl inqʼa nik alon viyolbʼal quBʼaal Tiuxh. 38Echetz il ex qat intxhaql bʼen ex tiʼ imolox ok inqʼa xaol sinkʼatza, eche imolox vet ivatz txhiko. Kʼuxhetz jit ex qat txhikon, tan jolten inqʼa qat txhikon, pet aʼetz vet ex, toq okoq ka ex tiʼ imolox vet vivatz inqʼa txhiko, —xeʼt Jesuus te inqʼa nikich itxhus tibʼ s-kʼatza.

39Mamalaetz vet xaol, inqʼa aj Sikaar uvaʼ at tuulbʼal Samaaria, motx qeon vet Jesuus tiʼ viyol u ixoq uvaʼ ech nikich tal s-eche: —Qat motx tal u vinaq s-ve jankʼal inqʼa bʼanel vaʼn, —chichich vet u ixoq tiʼ Jesuus.

40Echetz mamala vet inqʼa aj Samaaria aqʼbʼ kʼatz Jesuus, tul motx ijaq vet bʼaʼnil te Jesuus, tiʼ uvaʼ laʼich kaj Jesuus s-xoʼl. Echetz ikaj vet Jesuuse kaʼvaʼl qʼij xoʼl inqʼa aj Samaaria.#Vibʼanoʼm inqʼa Apoostol 8.5 41Tul mamalaat vet inqʼa aj Samaaria motx qeon vet Jesuus, tiʼ uvaʼs motx tabʼit vet inqʼa yol titziʼ Jesuus.

42Tul echaq nikich motx tal vet te u ixoq s-eche: —Jitetz taʼn koq kuxh vayol qat qabʼi, tul qat quqej Jesuus, pet qat qillaʼ, atz qat qabʼilaʼ uvaʼ aʼ bʼak u Kriistoe, atz u Chitol tetz kamaq kuxh xaolil vatz txʼavaʼ, —chichich vet inqʼa xaol te u ixoq.

Uvaʼs iqeex quBʼaal Jesuus taʼn val viqʼesal uvaʼ bʼanax bʼaʼn val vikʼaol taʼn quBʼaal Jesuus

43-44Maʼtichetz talt Jesuus u yol uvaʼ yeʼl invaʼq qʼexsan tetz viyol quBʼaal Tiuxh nik toksal iqʼij t-vitenam. Pet eletz vet kaʼvaʼl qʼij tatin Jesuus t-Samaaria, tul bʼen vet Jesuus tuulbʼal Galileea. Tul yeʼlichetz s-kʼuul Jesuus uvaʼ laʼich kʼulux Jesuus tibʼaʼnil.#Tio 13.57; Kuxh 6.4; Luk 4.24

45Pet aqʼbʼetz vet Jesuus tuulbʼal Galileea, tul kʼulux tibʼaʼnil taʼn inqʼa aj Galileea. Tan maʼtich motx tilt inqʼa mamala kaebʼal aanima uvaʼ motx ibʼan Jesuus tu tenam Jerusaleen. Tan ex inqʼa aj Galileea tu tenam Jerusaleen tiʼ inimal u nimla qʼij Ipal Aanxel.#Xhun 2.23

46Yaʼne aqʼbʼ vet Jesuus inpaqte tu tenam Kanaa tuulbʼal Galileea, tal uvaʼ taqʼvat bʼen Jesuus u aʼ s-taʼl uuva. Atichetz val u vinaq, aj tenam Kapernauum, uvaʼ iqʼesalich kʼatz Eroodes Antiipas, u mam iqʼesal. Tul oybʼalich ikʼaol viqʼesal.#Xhun 2.1-11 47Tabʼietz veteʼ uvaʼ atich vet Jesuus tuulbʼal Galileea, tan yaʼnaqich kuxh tel tzaan Jesuus tuulbʼal Judeea. Tul ul ijaq viqʼesal bʼaʼnil te Jesuus uvaʼ laʼich bʼen ibʼan Jesuus bʼaʼn vikʼaol. Tan bʼiitich kuxh ikam vet taʼn yaabʼil.

48Yaʼne ech tal Jesuus s-eche: —Eche uvaʼ yeʼ koq qat inkʼutxh inqʼa etxhlal, atz uvaʼ mam yol tilix sevatz, tul laʼ koq eqej in, —xeʼt Jesuus.

49Tul ech tal viqʼesal s-eche: —Inqʼesal, bʼan bʼaʼnil s-ve. Tul bʼen koq eel val vinkʼaol, loqʼe yeʼx kamoq, —xeʼte.

50Yaʼne ech tal Jesuus s-eche: —Quuxh; tul quxh il vakʼaol. Tan ile bʼaʼn veteʼ, —xeʼt Jesuus. Tul ikʼuqbʼa vet viqʼesal ikʼuul tiʼ viyol Jesuus. Tul bʼen veteʼ.

51Yeʼnaqichetzxh aqʼbʼoq viqʼesal t-totzotz, tul ul kʼultxhoq vet taʼn inqʼa taqʼonvil. Tul echaq motx tal s-te s-eche: —¡Il vakʼaol bʼaʼn veteʼ! —xeʼtaqe.

52Yaʼne tabʼi vet viqʼesal te inqʼa bʼanolaq taqʼon uvaʼ kam oora ibʼan u xaak bʼaʼn.

Tul echaq tal s-eche: —Evet tzaane yaʼ vet u xamal tiʼ vakʼaol uvaʼs ibʼant vaʼl oora s-kuʼebʼal qʼij, —xeʼt inqʼa bʼanolaq taqʼon.

53Echetz ibʼen vete te vibʼaal u xaak uvaʼ aʼxh iyaʼ vet u xamal tiʼ vikʼaol tu oora uvaʼs ech tal Jesuus s-te s-eche: —Il vakʼaol bʼaʼn veteʼ, —xeʼt Jesuus. Tul qeex vet Jesuus taʼn viqʼesal tuchʼ jankʼal tatin t-totzotz, tiʼ uvaʼ, aʼich Jesuuse u Kriisto.

54Aʼetz vikaʼv kaebʼal aanimae ibʼan Jesuus uvaʼs atich vet tuulbʼal Galileea uvaʼs maʼtich tel tzaan tuulbʼal Judeea.

Currently Selected:

Xhun 4: ixlC

Highlight

Copy