Xhun 5

Uvaʼs ilakp iviʼ inqʼa iqʼesal tuqʼeʼybʼal inqʼa tij imam Israeel, tiʼ uvaʼs ibʼant quBʼaal Jesuus bʼaʼn val u yaabʼ tu xeem qʼij, u saavado

1Xamtichetz veteʼ, tul bʼen vet jaʼ Jesuus tu tenam Jerusaleen tuulbʼal uvaʼs nikich inimat inqʼa tij imam Israeel val vinimla qʼij. 2Atichetz val u atibʼal molbʼal tibʼ aʼ tu tenam Jerusaleen uvaʼ Veteesda chichich eʼl tu yolbʼal evreeo. Tul aʼ atich kʼatz val vijubʼalil vibʼitzʼil u tenam uvaʼ Tetz Karneʼl ibʼij. Tul atich txhaq oʼloʼil piraal s-kʼatza.{*}#5.2 ¿Kametz tatin u molbʼal tibʼ aʼ nik tal u versiikulo uvaʼa? Atich oʼvaʼl molbʼal tibʼ aʼ tetz txʼajbʼal tibʼ inqʼa xaol. Tul oʼvaʼlenich bʼitichla atibʼal uvaʼ naʼnaʼq aʼ s-tuul tetz txʼajbʼal tibʼ inqʼa xaol. Tul atichetz ipaʼtebʼal txhaq junun. Tul atichaq txeybʼal jaʼ tetz viviʼ s-txala txhaq tuul. Tul nikich motx itxʼaj tibʼ inqʼa xaol tuul u aʼ. Tul atetz xaol uvaʼ oybʼaliche, tul aʼ nikich itxhok itzʼakpeʼ; tul laʼ kuʼ xeʼ u aʼ. 3-4Mamalaetz yaabʼ atich tzitzi. Atich inqʼa tzotiche. Atz atich inqʼa koyelich ibʼenaʼ. Atz atich inqʼa tzeʼuʼxich kuxh itxhiʼoʼl. [Tul aʼ nikichaq itxʼebʼ ibʼant bʼaʼn. Atz aʼ nikichaq motx itxʼebʼ paqte itiʼnsal u aʼ taʼn val u aanxel. Aʼetz val u aanxel nikich tul tu atibʼal tetz naʼebʼal aʼ tiʼ itiʼnsal u aʼ. Tul jatu talen kuxh nikich ulka. Jaʼletz u yaabʼ uvaʼ bʼaxa nikich ikoʼp xeʼ u aʼ tuulbʼal uvaʼs maʼt itiʼn u aʼ, tul yek nikich ibʼan bʼaʼn, kʼuxh kamxh yaabʼilil nikich motx bʼanon.]

5Atichetz val u vinaq tzitzi uvaʼ vinaq vajxaqlavalich vet yaʼbʼ tok yaabʼil s-tiʼ. 6Tul til Jesuus uvaʼ xoklich u yaabʼ. Tul tootzaqich Jesuus uvaʼ naʼynaqich tok vet yaabʼil s-tiʼ. Tul ech tal Jesuus s-te s-eche: —¿Nik asaʼeʼ laʼ abʼan bʼaʼn? —xeʼt Jesuus.

7Tul ech tal u yaabʼ s-eche: —Atz ee, inqʼesal. Aloq jaʼl koq invaʼq nik aqʼon koʼp in xeʼ u aʼ uvaʼs nik ixeʼt u aʼ tiʼnoq. Tan yaʼnaqxh in saʼ pal kuʼ in, tul vaʼlen nik ibʼaxabʼ kuʼ sinvatz, —xeʼt u yaabʼ.

8Yaʼne ech tal Jesuus te u yaabʼ s-eche: —Lakpen. Tul lak vatxʼatxh tzeʼ. Tul xaon veteʼ, —xeʼt Jesuus.

9Taletz kuxh Jesuus u yol uvaʼe, tul yekich ibʼan vet u vinaq bʼaʼn uvaʼ oybʼaliche. Tul ilak vet vitxʼatxh tzeʼ. Tul xaon veteʼ. Poro xeem qʼij saavadoich u qʼij uvaʼs ibʼant u vinaq bʼaʼn taʼn Jesuus.

10Yaʼne ech tal vet inqʼa iqʼesal uqʼeʼybʼal te u vinaq uvaʼ maʼtich ibʼant bʼaʼn s-eche: —Yeʼbʼaʼn vatz u qubʼekʼbʼal uvaʼ laʼ eeqʼo vatxʼatxh tzeʼ txheelaʼ tu xeem qʼij saavado, —xeʼtaqe.

11Tul ech tal u vinaq s-eche: —¿Kametza? Tan aʼ u vinaq qat alon s-ve uvaʼ qat bʼanon in bʼaʼn. Tan ech qat tal s-ve s-eche: «Iqʼo vatxʼatxh tzeʼ. Tul xaon veteʼ,» chich s-ve, —xeʼt u vinaq uvaʼ maʼtich ibʼant bʼaʼn.

12Yaʼne tabʼi inqʼa iqʼesal uqʼeʼybʼal te u vinaq. Tul echaq tal s-eche: —¿Jaʼletz naqe uvaʼ?: «Iqʼo vatxʼatxh tzeʼ. Tul xaon veteʼ,» chich see, —xeʼtaqe. 13Poro yeʼich ootzaqimal vibʼij Jesuus taʼn u vinaq uvaʼ bʼanax bʼaʼn. Tan maʼtich tel vet el Jesuus xoʼl inqʼa xaol, inqʼa atich tzitzi.

14Bʼiilichetzxh vet s-tuul, tul ikʼul tibʼ Jesuus tuchʼ u vinaq tu nimla atibʼal tuulbʼal u tostiuxh. Tul ech tal Jesuus te u vinaq s-eche: —Nik val see uvaʼ bʼaʼn vet axh. Pet yeʼl vet axh laʼ paʼvin axh. Tan oq laʼ paʼvin axh, tul aʼl pal iviʼ u kʼaxkʼo laʼ ul seebʼa, —xeʼt Jesuus.

15Yaʼne bʼen vet u vinaq. Tul ex tal vet u yol te inqʼa iqʼesal tuqʼeʼybʼal inqʼa tij imam Israeel uvaʼ Jesuus bʼanon bʼaʼn. 16Echetz s-tiʼile xeʼt vet inqʼa iqʼesal uqʼeʼybʼal tiʼ itxhokox Jesuus, atz tiʼ iyatzʼax el Jesuus, tan, tiʼ uvaʼ ibʼan Jesuus bʼaʼn u vinaq tuulbʼal u xeem qʼij saavado.

17Yaʼne ech tal Jesuus te inqʼa iqʼesal uqʼeʼybʼal s-eche: —Yeʼl vinBʼaal nik itanbʼa taqʼonveʼ, tetxhal tul tu qʼij uvaʼa, kʼuxh xeem qʼij. Echatetz kuxh uvaʼe nik inbʼane, —xeʼt Jesuus.

18Kʼuxhetz ech tal Jesuuse, tan aalxh nikich ibʼant inqʼa iqʼesal uqʼeʼybʼal yaʼl tiʼ iyatzʼax el Jesuus, tan, tiʼ uvaʼ nikich teesa Jesuus iqʼij u bʼekʼbʼal tetz u xeem qʼij saavado s-vatz, atz, tiʼ uvaʼ nikich tal Jesuus Tiuxh sibʼaal. Tul nikich ibʼan tibʼ Jesuus eela tuchʼ quBʼaal Tiuxh s-vatz.

Uvaʼs talt quBʼaal Jesuus te inqʼa iqʼesal uqʼeʼybʼal tiʼ kam laʼ motx tulbʼe tilixeʼ uvaʼ iKʼaol quBʼaal Tiuxh quBʼaal Jesuus

19Yaʼne ech tal Jesuus te inqʼa iqʼesal uqʼeʼybʼal s-eche: —Tira toq val sete: Yeʼxhkam vaʼq laʼ inbʼan sinjunal, in viKʼaol quBʼaal Tiuxh. Pet aʼ nik inbʼan kam uvaʼ nik vil ibʼant vinBʼaal. Tan kam uvaʼ nik ibʼan vinBʼaal, tul antetzxh uvaʼe nik inbʼane. 20Tul at taanima vinBʼaal Tiuxh s-viʼ, tan in viKʼaol. Tul nik ikʼutxh s-ve jankʼal uvaʼ nik ibʼaneʼ. Tul nik taqʼ viqleʼm tiʼ ibʼanaxeʼ. Tul atel kuxh kam toq etil inbʼantaʼ uvaʼ palnaʼq tiibʼa uvaʼ nik etileʼ. Tan aʼ u quBʼaal toq lotxhon in tiʼ ibʼanaxeʼ. Echetz toq ikaj etaanimae s-tiʼ. 21Tan kamxh nik tulsat vinBʼaal taanima inqʼa kamnaʼq tiʼ taqʼax qʼij isaq, tul echatxh laʼ vaqʼte u qʼij saq uvaʼ yeʼl iyaʼebʼal imotxebʼal te u xaol uvaʼ, in laʼ saʼon. 22Tul yeʼxhabʼil invaʼq xaol laʼ taqʼ kuʼ vinBʼaal yol tinuqul tiʼ vipaʼv. Pet aʼ qat taqʼvat vinBʼaal t-inqʼabʼ uvaʼ, aʼ in, laʼ aqʼon kuʼ yol tinuqul tiʼ inqʼa xaol.#Vibʼanoʼm inqʼa Apoostol 20.11-15 23Tul kamxh uvaʼ nik toksal iqʼij vinBʼaal taʼn inqʼa xaol, tul echatxh laʼ toksal inqʼije taʼn inqʼa xaol. Jaʼletz uvaʼ yeʼ laʼ oksan inqʼij, tul aʼetz koq vinBʼaal uvaʼ txhaqon tzaan in, laʼ oksal iqʼij taʼn.

24Tira toq val sete: Jaʼl u xaol nik abʼin vinyol, tul laʼ iqeja uvaʼ, aʼ vinBʼaal txhaqon tzaan in, atetz qʼij isaq uvaʼ yeʼl iyaʼebʼal imotxebʼal. Atz yeʼletz vete u yol laʼ jaʼp s-tiibʼa tiʼ ibʼen tu kʼaxkʼo uvaʼ laʼ iqʼon tu kamchil, pet at vet qʼij isaq.

25Tira toq val sete: Laʼ opoon vaʼl qʼij uvaʼ toq tabʼi vet inqʼa xaol vinyol, in, viKʼaol quBʼaal Tiuxh, inqʼa xaol, inqʼa yeʼl qʼij isaq kʼatz vinBʼaal Tiuxh. Jaʼletz uvaʼ laʼ qeon vinyol, tul aʼetz uvaʼe, at qʼij isaq uvaʼ yeʼl iyaʼebʼal imotxebʼal. Tan aʼetz vete uvaʼ atil oʼ s-txheel. 26Tan kamxh u tiqleʼm vinBʼaal at tiʼ taqʼax u qʼij saq uvaʼ yeʼl iyaʼebʼal imotxebʼal, tul echatetzxh u viqleʼme at taʼn tiʼ taqʼax qʼij saq uvaʼ yeʼl iyaʼebʼal imotxebʼal, in viKʼaol. 27Atz qat taqʼ vinBʼaal viqleʼm tiʼ taqʼax kuʼ yol tinuqul tiʼ inqʼa xaol tiʼ vipaʼv, in, u Kʼaola uvaʼ qat bʼen in s-alam aanima.

28Poro yeʼl ex laʼ kaj etaanima tiʼ inqʼa yol uvaʼ qat val sete. Tan laʼ opoon invaʼl qʼij uvaʼ jankʼal inqʼa kamnaʼql veteʼ laʼ abʼin vinsikʼletaʼ. 29Tul yek laʼ motx itzʼatxh veteʼ. Jaʼletz u xaol uvaʼ bʼanon u bʼaʼn, tul aʼetz inqʼae, yek laʼ vitzʼeʼvsa inpaqte. Tul aʼ u bʼaʼn laʼ bʼen tileʼ. Pet jaʼl inqʼa xaol uvaʼ bʼanon u yeʼbʼaʼn, tul laʼ motx itzʼeʼv qʼaoq inpaqte. Poro in laʼ aqʼon vet jaʼp u yol s-tiibʼa tiʼ ibʼen tu kʼaxkʼo. 30Tul yeʼxhkam invaʼq nik intxʼol ibʼanax sinjunal. Pet bʼaxa nik vabʼi te vinBʼaal kam laʼ inbʼana. Yaʼnetze nik vaqʼ kuʼ u yol tinuqul. Tul inuquletzxh uvaʼ nik inbʼan tiʼ taqʼax kuʼ yol tinuqul. Tan jit aʼ u vitzʼabʼal nik voksa sinjunalil, pet aʼ nik voksa u titzʼabʼal vinBʼaal uvaʼ txhaqon tzaan in.

31Oqetz junt kuxh laʼ val inuqul inqʼa yol s-viʼ, tiʼ u viqleʼm, tul laʼ koq ok s-tuul. 32Pet at vaʼt uvaʼ nik alon inuqul inqʼa yol s-viʼ. Echetz vootzaqle uvaʼ inuqulxhte inqʼa yol uvaʼ nik tal s-viʼ.

33Tan aʼ, uvaʼs etxhaqt bʼen kaʼl inqʼa emol tiʼ tabʼil te Xhun, tiʼ uvaʼ kamich u viqleʼm, tul echatxh talt Xhun inuqul inqʼa yole s-viʼ.#Xhun 1.19 34Poro jit aʼ nik inkʼuqbʼa inkʼuul tiʼ vaʼq u yol uvaʼ laʼ tal invaʼq u xaol s-viʼ. Pet nik viqʼo tzaan u yol tiʼ talt Xhun inuqul u yol s-viʼ, tiʼ uvaʼ laʼ eqea, atz laʼ chitp ex t-inqʼa epaʼv. 35Tul tira nikich tal Xhun jankʼal vinuqul s-viʼ. Tan echich Xhun, eche invaʼq xamal uvaʼ nik toybʼeʼ, tul nik itxiquneʼ. Tul chiibʼ ex tiʼ tabʼil inqʼa yol tuulbʼal jolol qʼij.

36Poro atel jolt kam uvaʼ nik alon inuqul inqʼa yol s-viʼ uvaʼ sibʼ palnaʼq viʼ uvaʼ tal Xhun s-viʼ. Tul aʼat nik alon inuqul inqʼa yol s-viʼ, jankʼal inqʼa kaebʼal aanima nik motx inbʼaneʼ. Tan aʼetz uvaʼe, qat itxhaq in vinBʼaal tiʼ ibʼanaxeʼ. Echetz aʼ, inqʼa inbʼanoʼm, nik kʼutxhun uvaʼ, aʼ vinBʼaal txhaqon tzaan in.

37Echetz ant vinBʼaal, uvaʼ txhaqon tzaan in, nik alon inuqul inqʼa yol s-viʼ tuchʼ jankʼal inqʼa nik motx inbʼan taʼn. Tul yeʼl inpaqxoʼq etabʼi iyoloneʼ, atz yeʼl inpaqxoʼq etila. 38Tul yeʼ nik enima viyol vinBʼaal. Tan yeʼ nik eqejeʼ uvaʼ, aʼ ine, uvaʼ txhaqel tzaan in taʼn.

39Pet bʼantan tekʼxh nik etxhʼoti viyolbʼal quBʼaal Tiuxh, inqʼa tzʼibʼamal ka. Tan aʼ nik etitzʼa uvaʼ tiʼ vetxhʼotit inuqul viyolbʼal quBʼaal Tiuxh toq eleqvat qʼij esaq uvaʼ yeʼl iyaʼebʼal imotxebʼal. Aʼetz nik yolonk viyolbʼal quBʼaal Tiuxh s-viʼ. 40Tul aaletz yeʼ nik esaʼt inqeexeʼ in, u Kriisto, in, uvaʼ laʼ aqʼon qʼij esaq uvaʼ yeʼl iyaʼebʼal imotxebʼal.

41Aloq jit aʼ nik intxhoke uvaʼ laʼ oksal inqʼij taʼn inqʼa xaol. 42Tan vootzaq vetxumbʼal. Tul vootzaqle uvaʼ yeʼl etaanima tiʼ u quBʼaal Tiuxh.

43Pet qat ul in tuchʼ u tiqleʼm vinBʼaal uvaʼ taqʼ s-ve. Tul yeʼ nik ekʼul in. Vaʼtenetz koq xaol laʼ ul toksa iqʼij sexoʼl, tul aʼetz uvaʼe toq ekʼule. 44Tul keʼchetz koq laʼ eqejt in, tan aʼ nik etxhok toksal eqʼij sevatzaqil. Tul jit aʼ nik etxhok toksal eqʼij taʼn quBʼaal Tiuxh, uvaʼ taʼn kuxhte u Tiuxh.

45Tul yeʼ laʼ etitzʼa uvaʼ, aʼ, in, laʼ xotxhon ex te vinBʼaal. Pet atz aʼ Moisees toq xotxhon ex, tiʼ uvaʼ yeʼ nik enima inqʼa bʼekʼbʼal uvaʼ itzʼibʼa ka, kʼuxh aʼxh kʼuqlel ekʼuul tiʼ kam uvaʼ itzʼibʼa ka Moisees. 46Pet nik koq eqej inqʼa yol uvaʼ itzʼibʼa ka Moisees, tul nik koq eqej inqʼa yol nik valeʼ. Tan s-viʼe itzʼibʼavat ka Moisees inqʼa yol. 47Pet oqetz yeʼ nik eqej inqʼa yol uvaʼ itzʼibʼa ka Moisees s-viʼ, ¡keʼchetz koq laʼ eqejt inqʼa yol uvaʼ nik motx valeʼ! —xeʼt Jesuus te inqʼa iqʼesal tuqʼeʼybʼal inqʼa tij imam Israeel.#Deuteronoomio 18.15, 18

Currently Selected:

Xhun 5: ixlC

Highlight

Copy