Xhun 6

Uvaʼs tilt inqʼa xaol inaʼsat quBʼaal Jesuus oʼvaʼl paan tuchʼ kaʼvaʼt txay, tul yekich motx tal vet tok quBʼaal Jesuus siqʼesalil

Tio 14.13-21; Kuxh 6.30-44; Luk 9.10-17

1Xamtichetz veteʼ, tul bʼen vet Jesuus jala el u mam aʼ tu Galileea uvaʼ Tiveerias ibʼij inpaqte. 2Tul mam tenam txhʼuyich tiʼ Jesuus, tan motx til inqʼa kaebʼal aanima uvaʼ ibʼan Jesuus tiʼ ibʼanax inqʼa yaabʼ bʼaʼn.

3Yaʼne bʼen vet jaʼ Jesuus viʼ val u vitz tuchʼ inqʼa nikich itxhus tibʼ s-kʼatza. Tul kʼuqeʼv Jesuus tzitzi. 4Tul toqnaʼqich uloq vet u qʼij tiʼ inimal u nimla qʼij Ipal Aanxel uvaʼ nikich inima inqʼa tij imam Israeel.

5Yaʼne til Jesuus uvaʼ mam xaol kʼulich vet tibʼ tiʼ Jesuus. Tul ech tal Jesuus te Piʼl s-eche: —¿Tal bʼen quloqʼvat txʼix, tul laʼ txʼaʼon inqʼa xaol inqʼae? —xeʼt Jesuus. 6Poro aʼich kuxh isaʼ Jesuus tiltaʼ kam laʼich tal Piʼl tiʼ u yol. Tan tootzaqich Jesuus kam uvaʼ laʼich ibʼan Jesuus.

7Yaʼne ech tal Piʼl s-eche: —Kʼuxh laʼxh bʼen quloqʼ ipaan inqʼa xaol tuchʼ ijaʼmil laj kʼaloq (200) quqʼij tiʼ aqʼon, poro laʼ koqxh tzʼeq tiʼ taqʼax bʼiitxhaoq te junun xaol, —xeʼt Piʼl.

8Yaʼne tzaqʼbʼ Lixh, u titzʼin Simoon Luʼ, Lixh uvaʼ atich ok s-tatxhul kabʼlaval inqʼa nikich itxhus tibʼ kʼatz Jesuus. Tul ech tal Lixh te Jesuus s-eche: 9—Il naq val u xaak ila, uvaʼ iqʼomal oʼvaʼl talaq paan taʼn uvaʼ sevaadaxhtuʼ. Tul il kaʼvaʼt talaq votzʼim txay iqʼomal taʼn naq. Poro tira yeʼ laʼ tzʼeq vatz mamala xaol, —xeʼt Lixh.

10Yaʼne ech tal Jesuus s-eche: —Bʼanvaq ikuʼ inqʼa xaol s-kaqaayil, —xeʼt Jesuus te inqʼa nikich itxhus tibʼ s-kʼatza. Tan mam chʼim atich tal uvaʼ atichaqe. Tul motx kuʼ vet inqʼa xaol s-kaqaayil viʼ inqʼa chʼim. Tul kamal oʼvaʼlenich mil (5,000) vinaq atich xoʼl inqʼa xaol.

11Yaʼne itxey Jesuus inqʼa paan, tul taqʼ Jesuus taʼntiuxh te quBʼaal Tiuxh s-tiʼ. Tul taqʼ vet Jesuus te inqʼa nikich itxhus tibʼ s-kʼatza. Aʼetz vet inqʼa nikich itxhus tibʼ kʼatz Jesuus jatxon el xoʼl inqʼa xaol. Tul echat kuxh ibʼan Jesuuse te inqʼa txay. Tul nikich taqʼax te inqʼa xaol jankʼal uvaʼ nikich motx ijaqeʼ.

12Txʼaʼonetz vet inqʼa xaol s-bʼaʼn, tul ech tal vet Jesuus te inqʼa nikich itxhus tibʼ s-kʼatza s-eche: —Molvaq inqʼa yal etxhbʼubʼal. Tul yeʼxhkam inbʼeeq laʼ bʼutxhuxi, —xeʼt Jesuus.

13Yaʼne imol vet inqʼa nikich itxhus tibʼ kʼatz Jesuus viyal inqʼa paan uvaʼ motx taqʼ vet ka inqʼa xaol. Tul kabʼlavat xuʼk noj taʼn inqʼa iyal oʼvaʼl u paan.

14Tiletz vet inqʼa xaol u kaebʼal aanima uvaʼ ibʼan Jesuus, tul echaq tal vet s-eche: —¡Nuq bʼakxhtuʼ, tan aʼ bʼak u qʼexsan tetz viyol quBʼaal Tiuxhe uvaʼ alel ka u tulebʼal s-quxoʼl! —chichich vet inqʼa xaol tiʼ Jesuus.#Deuteronoomio 18.15-18

15Poro bʼenetz vet te Jesuus uvaʼ saʼich txeyp Jesuus taʼn inqʼa xaol tiʼ iyaʼlul ok s-mam iqʼesal. Tul qʼaʼv vet jaʼ Jesuus inpaqte s-junal viʼ u vitz.

Uvaʼs ixaon quBʼaal Jesuus viʼ u mam aʼ

Tio 14.22-27; Kuxh 6.45-52

16Aalemalichetz iqʼeqx veteʼ, tul motx bʼen vet kuʼ inqʼa xaol tziʼ u mam aʼ Galileea, inqʼa nikich itxhus tibʼ kʼatz Jesuus. 17Tul motx pal vet ok tuul val u vaarko. Tan aʼaqich isaʼ ipal paʼl jala el u mam aʼ. Tan aʼ, u tenam Kapernauum, kʼaqichaq taʼn. Qʼeqxetz veteʼ, tul yeʼnaqich uloq Jesuus s-xoʼl.

18Yaʼne ul vet val u mam kaqiqʼ viʼ u mam aʼ. Tul tira nikich teyu tibʼ u aʼ taʼn. 19Kamal oʼvaʼl, atz maq vajqil kiloometro maʼtich ixajtoʼk u vaarko viʼ u mam aʼ, tul ajtxh motx til vet inqʼa nikich itxhus tibʼ kʼatz Jesuus uvaʼ sebʼtich ixaon ok Jesuus viʼ u mam aʼ. Tul aqʼbʼ vet kʼatz u vaarko. Tul yekichaq motx samun veteʼ.

20Yaʼne ech tal Jesuus s-eche: —Yeʼ kuxh xoʼv ex, tan ine, —xeʼt Jesuus.

21Taʼnetzxh okaʼp Jesuus tuul u vaarko, tul yekichxh motx chiibʼ vet inqʼa nikich itxhus tibʼ s-kʼatza. Tul nal kuxh taqʼbʼ vet Jesuus tuchʼ inqʼa nikich itxhus tibʼ s-kʼatza tu atibʼal tal uvaʼ kʼaqichaq taʼn.

22Echetz vet eqal, tul tira sotz ikʼuul inqʼa xaol, tiʼ kam tulbʼe Jesuus ibʼenaʼ. Tan til inqʼa xaol, inqʼa atich ka titziʼ u mam aʼ, uvaʼ taʼnxh vaʼl u vaarko atiche. Atz motx tila uvaʼ yeʼl Jesuus ok bʼen tuul u vaarko xoʼl inqʼa nikich itxhus tibʼ s-kʼatza. Pet taʼn til inqʼa xaol uvaʼ taʼnxh inqʼa nikich itxhus tibʼ kʼatz Jesuus bʼenaq s-junal tuul u vaarko. 23Tul maʼtich taqʼbʼ kaʼt inqʼa vaarko tuchʼaq xaol, inqʼa tzajnaʼqich tu tenam Tiveerias, titziʼ u mam aʼ uvaʼ naqlich kuxh kʼatz tal uvaʼ motx itxʼaʼvat inqʼa xaol inqʼa paan, uvaʼs taqʼt Jesuus taʼntiuxh te quBʼaal Tiuxh tiʼ inqʼa paan.

24Tiletz vet inqʼa xaol uvaʼ yeʼlich vet Jesuus tuchʼ inqʼa nikich itxhus tibʼ s-kʼatza, echetz tokaq vet bʼene t-inqʼa vaarko, inqʼa tzajnaʼqich tu tenam Tiveerias. Tul bʼenaq vet tiʼ itxhokox Jesuus inpaqte tu tenam Kapernauum.

Uvaʼs ibʼant tibʼ quBʼaal Jesuus eela tuchʼ u paan uvaʼ nik itzʼeʼvsan inqʼa xaol vatz txʼavaʼ, pet aʼ quBʼaal Jesuus nik itzʼeʼvsan inqʼa xaol vatz quBʼaal Tiuxh

25Aqʼbʼetz vet inqʼa xaol jala el u mam aʼ tal uvaʼ atich vet Jesuus, tul ex leqexoq Jesuus taʼn. Tul echaq tal te Jesuus s-eche: —Txhusul qetz, ¿jankʼaxetz avul tzitza? Tan il axh nik qutxhok axh, —xeʼtaqe.

26Yaʼne ech tal Jesuus s-eche: —Tira toq val sete: Il in nik motx etxhok in, poro jit, tiʼ uvaʼ qat motx etil inqʼa kaebʼal aanima uvaʼ qat inkʼutxh sevatz, s-ilbʼal tetz uvaʼ, in, u Kriisto, pet, tiʼ uvaʼ qat motx txʼaʼon ex, atz qat motx noj ex. Echetz nik motx etxhokt ine. 27Pet txhokvaq in, poro jit tiʼ u etxhbʼubʼal uvaʼ at imotxebʼal. Pet aʼ etxhokvat in tiʼ u etxhbʼubʼal uvaʼ laʼ aqʼon qʼij esaq uvaʼ yeʼl iyaʼebʼal imotxebʼal. Aʼetz uvaʼe, laʼ vaqʼ sete, in, u Kʼaola uvaʼ qat bʼen in s-alam aanima. Tan aʼ ine, uvaʼ at t-inqʼabʼ taʼn vinBʼaal tiʼ taqʼax sete, —xeʼt Jesuus.

28Yaʼne ech tal vet inqʼa xaol te Jesuus s-eche: —¿Kametz laʼ qulbʼe, tul aʼ laʼ qubʼan uvaʼ nik isaʼ quBʼaal Tiuxh s-qe? —xeʼtaqe.

29Tul ech tal Jesuus te inqʼa xaol s-eche: —Aʼetz nik tal quBʼaal Tiuxh sete uvaʼ laʼ eqej in, in vitxhaq u quBʼaal Tiuxh uvaʼ qat taqʼ tzaan sexoʼl, —xeʼt Jesuus.

30Yaʼne ech tal inqʼa xaol s-eche: —Bʼanetz invaʼtoʼq kaebʼal aanima bʼa s-quvatz tiʼ akʼutxht s-qe uvaʼ, axh u Kriisto. Kametz invaʼq toq abʼan s-quvatz, tul toq qileʼ; yaʼne toq quqej axh. 31Tan ech ibʼan Moiseese s-naʼya, tan ikʼutxh val u kaebʼal aanima te inqʼa kʼuy qumam tiʼ taqʼt u manaa. Tul motx tetxhbʼu tu tzaqa txʼavaʼ. Tan ech tzʼibʼamal ka t-viyolbʼal quBʼaal Tiuxh s-eche: «Taqʼ Moisees tetxhbʼu inqʼa xaol, etxhbʼubʼal uvaʼ een tzajk tu amlikaʼ,» chich u yol, —xeʼtaq inqʼa xaol te Jesuus.#Eeksodo 16.4-15; Saalmo 78.24

32Yaʼne ech tal Jesuus s-eche: —Tira toq val sete: Jit Moiseese aqʼon u paan uvaʼ een tzajk tu amlikaʼ. Pet aʼ vinBʼaale aqʼon tzaan. Echatetz kuxhte s-txheel. Tan aʼ vinBʼaale nik aqʼon tzaan vaʼt u Paan uvaʼ tzajnaʼql tu amlikaʼ, uvaʼ inuqulxhtuʼ. 33Echetz aʼ u nuqla Paane uvaʼ, aʼ vinBʼaal, uvaʼ een tu amlikaʼ, qat aqʼon tzaan. Tul aʼ u Paan nik aqʼon qʼij saq uvaʼ yeʼl iyaʼebʼal imotxebʼal te kamxh xaolil vatz txʼavaʼ, —xeʼt Jesuus.

34Yaʼne ech tal inqʼa xaol s-eche: —Quqʼesal, aqʼetz u paan bʼa s-qe s-bʼenamen uvaʼ nik aaleʼ, —xeʼtaqe.

35Tul ech tal Jesuus s-eche: —Aʼetz ine, u Paan uvaʼ nik aqʼon qʼij isaq inqʼa xaol uvaʼ yeʼl iyaʼebʼal imotxebʼal. Tan jaʼl uvaʼ laʼ ok bʼen s-viʼ, tul yeʼl inpaqt laʼ vaʼyi. Atz jaʼl uvaʼ laʼ qeon in, tul yeʼl inpaqt laʼ tzaq itziʼ.

36Qatetz vall sete, tul kʼuxh il inqʼa kaebʼal aanima nik etileʼ, inqʼa nik inbʼaneʼ, tan qat koq eqej in s-tiʼ. 37Pet jankʼal u xaol uvaʼ, aʼ vinBʼaal nik aqʼon s-ve, tul aʼetz uvaʼe, nik tok bʼen s-viʼ tiʼ inqeexeʼ. Jaʼletz u xaol uvaʼ laʼ txhʼuyeʼv s-viʼ, tul yeʼ laʼ vixva ka. 38Tan tiʼ koq voksat u vitzʼabʼal, tul qat tzaj in tu amlikaʼ. Pet aʼ ul voksa u titzʼabʼal vinBʼaal uvaʼ txhaqon tzaan in. 39Aʼetz titzʼabʼal vinBʼaal uvaʼ txhaqon tzaan in, uvaʼ yeʼxhabʼil invaʼq inqʼa xaol laʼ tzʼeqxi, inqʼa qat taqʼ vinBʼaal s-ve. Tan qat taqʼ vinBʼaal s-ve uvaʼ, in laʼ itzʼeʼvsan inqʼa xaol inpaqte, uvaʼs laʼ vaqʼt kuʼ u yol tinuqul tiibʼa jankʼal u tenam s-kaqaayil. 40Atz aʼat titzʼabʼal vinBʼaal, uvaʼ txhaqon tzaan in, uvaʼ laʼ iqej in jankʼal inqʼa xaol, tiʼ uvaʼ laʼ til inbʼantaʼ. Tul atetz qʼij isaq u xaol uvaʼ yeʼl iyaʼebʼal imotxebʼal laʼ ibʼana. Tul in laʼ motx itzʼeʼvsan inpaqte t-vimotxebʼal qʼij saq, —xeʼt Jesuus.

Uvaʼs teesal iqʼij quBʼaal Jesuus taʼn inqʼa iqʼesal uqʼeʼybʼal, tiʼ uvaʼs talt quBʼaal Jesuus uvaʼ quBʼaal Tiuxh txhaqon tzaan

41Yaʼne xeʼt vet inqʼa iqʼesal tuqʼeʼybʼal inqʼa tij imam Israeel tiʼ iyolox Jesuus, tiʼ uvaʼ ech maʼtich talt Jesuus s-eche: —Aʼetz ine u Paan, in, uvaʼ een tzajnaʼql in tu amlikaʼ, —xeʼt Jesuus.

42Echetz nikich motx tal inqʼa iqʼesal uqʼeʼybʼal s-vatzaq s-eche: —¿Kametz talax u yol nik tal naq uvaʼe? «Een tzajnaʼql in t-amlikaʼ,» chich kuxh naq. Tan bʼane yeʼetz koq qootzaql naq u Jesuus. Atz ikʼaol Xhuʼl kuxh naqe. Tul qootzaql itxutx ibʼaal naq, —chichichaq veteʼ.

43Yaʼne ech tal Jesuus s-eche: —Yeʼ kuxh eyol in. 44Tan yeʼxhabʼil invaʼq xaol laʼ qeon in, oq jit aʼ vinBʼaal, uvaʼ txhaqon tzaan in, laʼ oksan tu taanima. Tan jatvaʼl inqʼa laʼ qeon in, tul tetxhal laʼ itzʼeʼv inpaqte vaʼn uvaʼs laʼ vaqʼt kuʼ inqʼa yol tinuqul tiibʼa jankʼal inqʼa xaol.

45Tan ech val u yol tzʼibʼamal ka taʼn vaʼl inqʼa qʼexsanich tetz viyol quBʼaal Tiuxh tiʼ inqʼa xaol, inqʼa laʼ qeon in s-eche: «Aʼ u quBʼaal Tiuxh laʼ txhusun inqʼa xaol s-kaqaayil,» chich u yol. Tul laʼ toksa tu taanima tiʼ viqejt in. Echetz nik valte sete, jaʼl uvaʼ qat abʼin viyol vinBʼaal, tul qat itxhabʼa kam uvaʼ nik tal vinBʼaal, tul aʼetz u qeol vetze.#Isaiias 54.13; Jeremiias 31.33-34 46Tan taʼn kuxh in, uvaʼ een tzajnaʼql in tu amlikaʼ, ilonaʼq tetz vinBʼaal; pet yeʼxhabʼil invaʼtoʼq. 47Tira toq val sete: Jaʼl uvaʼ laʼ qeon vinyol, tul aʼetz uvaʼe, at qʼij isaq uvaʼ yeʼl iyaʼebʼal imotxebʼal. 48Aʼetz ine, u Paan uvaʼ nik aqʼon qʼij isaq inqʼa xaol uvaʼ yeʼl iyaʼebʼal imotxebʼal.

49Poro kʼuxhetz tetxhbʼuxh inqʼa kʼuy qumam u manaa uvaʼs motx ipal tu tzaqa txʼavaʼ, tan motx kami. 50Pet s-txheel, tan aʼetz ine, uvaʼ ech in, eche u Paan, in, uvaʼ een tzajnaʼql in tu amlikaʼ. Jaʼletz u xaol uvaʼ laʼ etxhbʼun vintxhiʼoʼl, tul aʼetz u xaole uvaʼ yeʼ laʼ kami. 51Echetz aʼ ine, uvaʼ tzajnaʼql in t-amlikaʼ, u aqʼol tetz qʼij saq. Tan ech in, eche u paan. Jaʼletz u xaol uvaʼ laʼ etxhbʼun vintxhiʼoʼl, tul aʼetz uvaʼe, yeʼl iyaʼebʼal imotxebʼal qʼij isaq. Poro u etxhbʼubʼal uvaʼ nik valeʼ, uvaʼ toq vaqʼ te inqʼa tenam vatz txʼavaʼ, tan aʼe vintxhiʼoʼl uvaʼ toq vaqʼ kʼaxbʼisaloq tiʼ taqʼax u qʼij saq uvaʼ yeʼl iyaʼebʼal imotxebʼal, —xeʼt Jesuus.

52Yaʼne xeʼt vet inqʼa iqʼesal uqʼeʼybʼal tiʼ iyolox Jesuus s-vatzaq. Tul echaq motx tal s-eche: —¿Keʼch laʼ taqʼt naq vitxhiʼoʼl qetxhbʼu? —xeʼtaqe.

53Yaʼne ech tal Jesuus s-eche: —Tira toq val sete: Oq yeʼ laʼ etetxhbʼu vintxhiʼoʼl, atz yeʼ laʼ etukʼa vinkaqal, in u kʼutxhul tetz quBʼaal Tiuxh vatz txʼavaʼ, tul yeʼl qʼij esaq kʼatz quBʼaal Tiuxh laʼ ibʼana.{*}#6.53 ¿Kam talax u yol tal Jesuus?, tiʼ: —...tetxhbʼul vitxhiʼoʼl... —chiche, atz tuchʼ uvaʼ —...tukʼal vikaqal, —chiche. Aʼetz talaxe tiʼ viqeex vikam quBʼaal Jesuus, atz tuchʼ u tel vikaqal quBʼaal Jesuus. Aʼetz uvaʼe, nik aqʼon qʼij isaq u xaol, uvaʼ yeʼl iyaʼebʼal imotxebʼal, eche uvaʼ taqʼt quBʼaal Tiuxh qʼij isaq inqʼa tij imam Israeel s-naʼya tu tzaqa txʼavaʼ. Tan taqʼ kuʼl quBʼaal Tiuxh manaa; atz taqʼat quBʼaal Tiuxh u aʼ, uvaʼ eluʼl tuul u sivan. Aʼetz nik ibʼanvat quBʼaal Jesuus eela u tetxhbʼul vitxhiʼoʼl tiʼ taqʼt u qʼij isaq inqʼa xaol uvaʼ yeʼl iyaʼebʼal imotxebʼal, tuchʼ tetxhbʼul u paan uvaʼ nik aqʼon qʼij isaq u xaol vatz txʼavaʼ. Pet jit aʼ tal Jesuus uvaʼ tira koqxh laʼich etxhbʼul vitxhiʼoʼl, atz tira koqxh laʼich ukʼal vikaqal. 54Pet jaʼl u xaol uvaʼ laʼ etxhbʼun vintxhiʼoʼl, tul laʼ tukʼa vinkaqal, tul at qʼij isaq uvaʼ yeʼl iyaʼebʼal imotxebʼal. Atz laʼ vitzʼeʼvsa inpaqte uvaʼs laʼ vaqʼt kuʼ yol tinuqul tiibʼa jankʼal inqʼa xaol. 55Tan yeʼxhkam invaʼtoʼq laʼ aqʼon qʼij isaq inqʼa xaol uvaʼ yeʼl iyaʼebʼal imotxebʼal tiibʼa vintxhiʼoʼl vinkaqal. 56Tan jaʼl uvaʼ laʼ etxhbʼun vintxhiʼoʼl, atz vinkaqal, tul aʼetz uvaʼe, vaʼl inyol s-tuchʼ, atz vaʼl iyol s-vuchʼ.

57Tan vinBʼaal, uvaʼ txhaqon tzaan in, tan aʼe vixeʼal u qʼij saq. Tul aʼetz vinBʼaal nik aqʼon u qʼij insaq. Echatetz kuxh laʼ vaqʼt qʼij isaqe inqʼa xaol uvaʼ laʼ qeon in. Atz jabʼil uvaʼ laʼ etxhbʼun vintxhiʼoʼl, tul aʼetz uvaʼe, at qʼij isaq vaʼn. 58Echetz aʼ ine, uvaʼ een tzajnaʼql in tu amlikaʼ, uvaʼ ech in, eche u paan. Poro jit ech u Paan uvaʼ nik val sete, eche u manaa uvaʼ motx tetxhbʼu inqʼa kʼuy qumam. Tan motx tetxhbʼu u manaa, poro motx kami. Pet jaʼl uvaʼ laʼ etxhbʼun u Paan uvaʼ nik val sete, tan yeʼl iyaʼebʼal imotxebʼal qʼij isaq laʼ ibʼana, —xeʼt Jesuus.

59Ayaʼletzxh inqʼa yole motx tal Jesuus xoʼl inqʼa xaol uvaʼs itxhusun Jesuus tu kʼulbʼal tibʼ inqʼa tij mam Israeel tu tenam Kapernauum.

Uvaʼs tel ka jolol inqʼa xaol tiʼ quBʼaal Jesuus taʼn inqʼa yol uvaʼ tal quBʼaal Jesuus

60Tul sibʼaletz vet jolt inqʼa nikich itxhus tibʼ kʼatz Jesuus motx abʼin u yol. Tul ech motx tal vet s-eche: —Tzaʼlxh vet inqʼa yol uvaʼ nik tal Jesuus. Tan ¡jaʼl koqxh vet invaʼq laʼ oleʼv tiʼ ikʼuluxeʼ! —xeʼtaqe.

61Tul yekich bʼen te Jesuus uvaʼ motx talaq vet inqʼa xaol yol tiʼ teesal iqʼij inqʼa iyol Jesuus, tanul inqʼa xaol uvaʼ nikich itxhus tibʼ s-kʼatza.

Tul ech tal vet Jesuus s-eche: —¿Maqetz nik inkʼaxbʼisa ex tuchʼ inqʼa yol uvaʼ nik valeʼ? 62Aaletzebʼxh toq ekʼaxbʼ tele uvaʼs toq etilt inqʼaʼv jaʼ paqte tu amlikaʼ tal uvaʼ tzajnaʼql in, atz uvaʼ atich in s-bʼaxa, in, u Kʼaola uvaʼ qat bʼen in s-alam aanima. 63Aʼetz talax u yol uvaʼ nik val sete s-eche: Tan aʼ viTiuxhil Tiuxhe uvaʼ nik aqʼon qʼij esaq uvaʼ yeʼl iyaʼebʼal imotxebʼal. Pet jit aʼ laʼ aqʼon qʼij esaq uvaʼ yeʼl iyaʼebʼal imotxebʼal tiʼ etxʼaktoʼk tiʼ kam uvaʼ nik ebʼaneʼ. Echetze inqʼa yol, uvaʼ nik valeʼ, tan tetz viTiuxhil Tiuxhe. Tul aʼetz uvaʼe, nik aqʼon qʼij esaq uvaʼ yeʼl iyaʼebʼal imotxebʼal. 64Poro at ex yeʼ nik qeon inqʼa yol uvaʼ nik valeʼ, —xeʼt Jesuus. Tan yekich tootzaqi tzaan Jesuus jaʼl inqʼa xaol, inqʼa yeʼlich laʼ qeon Jesuus, atz jaʼl uvaʼ laʼich oksan Jesuus tiqʼabʼ inqʼa iqʼesal uqʼeʼybʼal.

65Tul ech tal Jesuus s-eche: —Echetz nik valte sete uvaʼ yeʼxhabʼil invaʼq xaol laʼ ok bʼen s-viʼ oq jit aʼ vinBʼaal laʼ oksan tu taanima, —xeʼt Jesuus.

66Tul mamala vet jolt inqʼa nikich itxhus tibʼ kʼatz Jesuus, motx elaq vet ka taʼn u yol uvaʼ tal Jesuus. Tul yeʼ txhʼuyeʼvaq vet tiʼ Jesuus.

67Yaʼne ech tal Jesuus te kabʼlaval inqʼa nikich itxhus tibʼ s-kʼatza s-eche: —¿Keʼch ex? ¿Maq ant ex toq eloq ka ex? —xeʼt Jesuus.

68Yaʼne ech tal Simoon Luʼ s-eche: —InBʼaal, ¿tal koq laʼ qukʼaqa? Tan taʼn axhe nik alon inuqul inqʼa yol s-qe uvaʼ laʼ aqʼon qʼij qusaq uvaʼ yeʼl iyaʼebʼal imotxebʼal.#Tio 16.16; Kuxh 8.29; Luk 9.20 69Tul nik quqejeʼ uvaʼ: ¡Aʼ, axhe, u Kriisto! Atz ¡qootzaqle uvaʼ, axh, iKʼaol quBʼaal Tiuxh, u aqʼol qʼij saq! —xeʼt Luʼ.

70Yaʼne ech tal Jesuus s-eche: —Echxhte uvaʼ nik aaleʼ. Pet aloq kʼuxh in chʼexon ex sekabʼlaval, tan il invaʼl at sexoʼl uvaʼ atoʼk Satanaas t-taanima. Tan yeʼ nik iqej in, in, u Kriisto, —xeʼt Jesuus te inqʼa nikich itxhus tibʼ s-kʼatza. 71Aʼetz Juudase, u aj Karioote, vikʼaol Simoon, tal Jesuus tuchʼ u yol. Tan aʼ Juudas laʼich oksan Jesuus tiqʼabʼ inqʼa iqʼesal uqʼeʼybʼal, kʼuxh atichxh ok s-tatxhul xoʼl kabʼlaval inqʼa nikich itxhus tibʼ kʼatz Jesuus.

Currently Selected:

Xhun 6: ixlC

Highlight

Copy