Tio 6

Uvaʼs itxhusun quBʼaal Jesuus tiʼ ilotxhox invaʼq meebʼaʼ

1Oqetz laʼ tzaj sekʼuul ilotxhox invaʼq meebʼaʼ, tul jit ech ivatz xaol laʼ etaqʼ u lotxhbʼal. Tan oq ech ivatz xaol laʼ etaqʼ u lotxhbʼal, tul aʼetz vet esaʼe toksal eqʼij taʼn inqʼa xaol. Tul oqetz ech laʼ ebʼane, tul yeʼletz invaʼq etxʼaqaʼm laʼ taqʼ u quBʼaal Tiuxh, uvaʼ tu amlikaʼ.

2Pet oqetz laʼ etaqʼ invaʼq lotxhbʼal, tul yeʼ laʼ etaleʼl tiʼ toksal eqʼij, eche nik ibʼan inqʼa xaol, inqʼa bʼan vatz kuxh nik ibʼaneʼ. Tan tetxhal nik toqʼsa trompeeta t-inqʼa qʼeʼtxaq bʼey, atz t-inqʼa kʼulbʼal ibʼ tiʼ toksal iqʼij taʼn inqʼa xaol. Pet toq val sete uvaʼ, aʼetz vet vatzil taqʼax itxʼaqaʼm tu amlikaʼ u toksal iqʼij taʼn inqʼa xaol tzitza vatz txʼavaʼ. 3Tan oq laʼ etaqʼ invaʼq lotxhbʼal te invaʼq meebʼaʼ, tul jitoq laʼ eyoloʼk te u xaol, uvaʼ etaj yolxhtuʼ, kam uvaʼ laʼ etaqʼa, eche tatin kaʼvaʼl veqʼabʼ uvaʼ jitoq laʼ bʼen te veqʼabʼ vemax kam uvaʼ laʼ ebʼan tuchʼ veqʼabʼ vesebʼal. 4Echetz laʼ ebʼane tuchʼ u oya uvaʼ jutx kuxh laʼ etaqʼtaʼ. Tan taʼnetz kuxh vet u quBʼaal Tiuxh, uvaʼ laʼ ilon u oya uvaʼ jutx kuxh laʼ etaqʼtaʼ, laʼ aqʼon vetxʼaqaʼm ech ivatz inqʼa xaol.

Uvaʼs itxhusun quBʼaal Jesuus tiʼ inatxhax Tiuxh

Luk 11.2-4

5Pet tuulbʼaletz uvaʼs laʼ enatxht Tiuxh, tul jit ech laʼ ebʼan, eche uvaʼ nik ibʼan inqʼa xaol uvaʼ bʼan vatz kuxh nik motx ibʼaneʼ. Tan chiibʼiyaq kuxh tiʼ itxakeʼv t-inqʼa kʼulbʼal ibʼ, atz t-inqʼa qʼeʼtxaq bʼey tiʼ inatxhax Tiuxh. Tan aʼaq kuxh isaʼ toksal iqʼij taʼn inqʼa xaol. Pet toq val sete uvaʼ qatetz ikʼull vete vitxʼaqaʼm tiqʼabʼ inqʼa xaol, pet jit tiqʼabʼ quBʼaal Tiuxh. 6Tuulbʼaletz uvaʼs laʼ enatxht Tiuxh, tul ech laʼ ebʼan s-eche: Bʼeenoxh laʼ ejupt etibʼ tetotzotz. Tul laʼ yolon vet ex tuchʼ u quBʼaal Tiuxh uvaʼ yeʼ naʼl tatin sekʼatza. Toqetz val sete uvaʼ aʼetz vet u quBʼaal Tiuxh uvaʼ yeʼ naʼl tatin sekʼatza, laʼ oksan eqʼij ech ivatz inqʼa xaol.#Isaiias 26.20; 1 Kroonikas 29.11 7Tul jit jatpaqul kuxh laʼ pal ex tiʼ talax inqʼa eyol uvaʼs laʼ enatxht Tiuxh, eche uvaʼ nik ibʼan inqʼa xaol, inqʼa jit tij imam Israeel, inqʼa yeʼ ootzaqin tetz Tiuxh. Tan aʼaq titzʼabʼal uvaʼ jatpaqul kuxh laʼ pal tiʼ talax inqʼa iyol, yaʼne laʼ abʼili, atz laʼ tzaqʼbʼeli. 8Jitetz ech laʼ ebʼan, eche uvaʼ nik ibʼan inqʼa xaol inqʼae. Tan tira tootzaql vet quBʼaal Tiuxh kam uvaʼ nik isaʼon sete, kʼuxh yeʼnaq etabʼitaʼ.

9Pet ech laʼ motx enatxht Tiuxh s-eche:

«QuBʼaal Tiuxh, axh

uvaʼ at axh tu amlikaʼ,

taʼn kuxh axh toq qoksa aqʼij.

10Avul tiʼ ibʼanax

iqʼesalil t-qaanima.

Tul aʼ laʼ qubʼan

kam vavitzʼabʼal

nik ibʼanax t-amlikaʼ,

tul echat uvaʼe

laʼ bʼanax vatz u txʼavaʼ.

11Tul aqʼ qetxhbʼubʼal

s-txheelaʼ,

u tetz jun qʼij.

12Tul kuy sotzsa

inqʼa qupaʼv,

eche nik qukuyt ipaʼv

inqʼa xaol,

inqʼa nik bʼanon

u yeʼbʼaʼn s-qe.

13Tul yeʼ akuyeʼ

uvaʼ laʼ etxhbʼul qukuʼ t-paʼv.

Pet kol oʼ kʼuxh nik tetxhbʼu

Satanaas qukuʼ t-paʼv.

[Tan aʼ nik qusaʼeʼ

uvaʼ, aʼ axh, laʼ bʼanon

iqʼesalil s-qiibʼa.

Tan taʼn axhe,

uvaʼ sibʼ aviqleʼm.

Atz taʼn axh laʼ oksal aqʼij

tuulbʼal jattanulxh yaʼbʼ.

Tul echxhte,]»

chaq ex.#1 Kroonikas 29.11

14Tan oq laʼ ekuy ipaʼv inqʼa xaol, inqʼa laʼ bʼanon u yeʼbʼaʼn sete, tul echatetzxh laʼ ikuyt quBʼaal Tiuxhe vepaʼv, u quBʼaal Tiuxh uvaʼ een tu amlikaʼ. 15Pet oq yeʼ laʼ ekuy ipaʼv inqʼa xaol, inqʼa laʼ bʼanon u yeʼbʼaʼn sete, tul yeʼlatetz vepaʼv laʼ ikuy quBʼaal Tiuxh.

Uvaʼs itxhusun quBʼaal Jesuus tiʼ u maqo ibʼ tiʼ txʼaʼoʼm tiʼ inatxhax Tiuxh

16Tuulbʼaletz uvaʼs laʼ emaqt etxʼaʼon tiʼ inatxhax Tiuxh, tul jit txumuʼm kuxh vet atil ekaʼy laʼ ebʼana. Eche nik ibʼan inqʼa xaol uvaʼ bʼan vatz kuxh nik motx ibʼaneʼ, tan tira txhan kuxh vet nik motx tiqʼo kuʼl tibʼ tuchʼ ikaʼyeʼ. Tan aʼaq nik motx itxʼebʼeʼ uvaʼ laʼ oksal iqʼij taʼn inqʼa xaol tiʼ vimaqt tibʼ tiʼ itxʼaʼoneʼ. Pet toq val sete uvaʼ ikʼulletz vete vitxʼaqaʼm tiʼ u toksal iqʼij. 17Pet tuulbʼaletz uvaʼs laʼ emaqt etxʼaʼon tiʼ inatxhax Tiuxh, tul ech laʼ ebʼan s-eche: Laʼ etxʼaj evatz, tul laʼ exej eviʼ. 18Echetz yeʼ laʼ ikʼutxht ekaʼye vatz inqʼa xaol uvaʼ maqel etibʼ tiʼ etxʼaʼon tiʼ inatxhax Tiuxh. Pet taʼn kuxh u quBʼaal Tiuxh, uvaʼ yeʼ naʼl tatin sekʼatza, ootzaqin tetz. Aʼetz vet u quBʼaal Tiuxh, uvaʼ yeʼ naʼl tatin sekʼatza, laʼ oksan eqʼij ech ivatz inqʼa xaol.

Uvaʼs itxhusun quBʼaal Jesuus tiʼ u kolbʼal txʼijbʼal qʼij uvaʼ tu amlikaʼ

Luk 12.32-34

19Toq val sete uvaʼ yeʼ laʼ bʼen ekʼuul tiʼ imolox inqʼa mam txʼijbʼal qʼij tzitza vatz u txʼavaʼ. Tan laʼ pokʼti. Atz laʼ itxhukʼu ivatz. Atz laʼ qʼaji, atz tal uvaʼ laʼ utxhk ikʼott elqʼom, atz telqʼat elqʼom.#Santiaago 5.2-3 20Pet aʼ bʼenk ekʼuul tiʼ ibʼanax inqʼa bʼaʼn uvaʼ nik isaʼ quBʼaal Tiuxh, tan aʼetz u txʼijbʼal qʼije uvaʼ nik imol tibʼ vatz quBʼaal Tiuxh tu amlikaʼ, tal uvaʼ yeʼl paqul laʼ pokʼti; atz yeʼ laʼ itxhukʼu ivatz; atz yeʼ laʼ qʼaji; atz tal uvaʼ yeʼ laʼ utxhk ikʼott elqʼom; atz telqʼat elqʼom. 21Tan tal uvaʼ nik emolvat u txʼijbʼal eqʼij, tan eenetze vetaanima tiʼ titzʼaleʼ, maq tzitza vatz txʼavaʼ, atz maq tu amlikaʼ.

Uvaʼs itxhusun quBʼaal Jesuus, tiʼ uvaʼ, aʼ u bʼaʼn laʼ ibʼan inqʼa xaol tuchʼ inqʼa kam uvaʼ at s-xeʼ

Luk 11.33-36

22U bʼaqʼ evatz, tan eche txiqubʼal tatin t-vetxhiʼoʼl tiʼ tilix inqʼa kam kuxh tiqleʼm. Oqetz bʼaʼn u bʼaqʼ evatz, tul niketz etile inqʼa kam tibʼaʼnil. Echatetz kuxhte oq laʼ etila kam nik isaʼon te vaʼq u xaol, tul laʼ elotxha. Oqetz ech laʼ ebʼane, tul tzitzi nik ekʼutxhvat uvaʼ, aʼ vet u quBʼaal Tiuxh nik bʼekʼon ex. Tan eche tatin vet txiqubʼal tetaanima tatin quBʼaal Tiuxh sekʼatza. 23Pet oqetz kantxhaq u bʼaqʼ evatz, tul yeʼetz nik etil vete inqʼa kam tibʼaʼnil. Oqetz aʼl tel laʼ iyan vevatz, tul tira laʼ kaj vet ex s-tzot. Tul toktoetz vete laʼ kajk ex. Echatetz kuxhte oq yeʼ nik etil kam nik isaʼon te inqʼa xaol, tul oq aʼ kuxh nik etitzʼa vetetz, tul toktoetze atil ex vatz quBʼaal Tiuxh tiʼ vetatxhvat inqʼa kam.

Uvaʼs itxhusun quBʼaal Jesuus, tiʼ uvaʼ taʼn kuxh laʼ bʼanax kam uvaʼ nik isaʼ quBʼaal Tiuxh

Luk 16.13

24Yeʼletz laʼ utxhi uvaʼ tzum laʼ ekʼuulat kaʼvoʼq bʼaal aqʼon. Tan laʼ koq utxhi uvaʼ laʼ esaʼ invaʼl, tul laʼ etixva txha invaʼte. Atz laʼ chiibʼ ex tiʼ invaʼl, tul laʼ eteesa txha iqʼij invaʼte. Echetz vetatine tuchʼ quBʼaal Tiuxh, tan laʼ koq utxhi uvaʼ laʼ bʼen ekʼuul tiʼ quBʼaal Tiuxh, tul laʼ bʼen txhan ekʼuul tiʼ u txʼijbʼal qʼij vatz txʼavaʼ.

Uvaʼs itxhusun quBʼaal Jesuus, tiʼ uvaʼ yeʼ kuxh laʼ el taanima inqʼa xaol tiʼ inqʼa kam uvaʼ nik isaʼon s-te

Luk 12.22-31

25Toq val sete: Yeʼ kuxh el etaanima tiʼ vetatin tzitza vatz u txʼavaʼ, jankʼale tiʼ kam uvaʼ laʼ etetxhbʼu, atz tiʼ kam uvaʼ laʼ etukʼa. Atz jitoq laʼ el etaanima tiʼ kam oksaʼm laʼ etoksa setiʼ. Tan aʼ palnaʼq tiqleʼm u qʼij qusaq vatz quBʼaal Tiuxh viʼ u tel qaanima tiʼ u etxhbʼubʼal. Atz aʼ palnaʼq u qʼij qusaq vatz quBʼaal Tiuxh viʼ quviqt u qutxhiʼoʼl tuchʼ u oksaʼm. 26Pet bʼenoq kuxh sete tiʼ txoo inqʼa tzʼichin uvaʼ nik ixaon vatz amlikaʼ. Tan yeʼ nik motx taveʼ. Atz yeʼ nik motx ikol tetxhbʼubʼal. Atz jitoq nik ikol tetxhbʼubʼal t-kʼoay. Tul nik itxhej tetxhbʼubʼal taʼn quBʼaal Tiuxh uvaʼ tu amlikaʼ. Tul aʼetz kol ex yeʼ laʼ txhej etetz taʼn quBʼaal Tiuxh; atz aʼ ex, sibʼ etiqleʼm viʼ inqʼa tzʼichin vatz quBʼaal Tiuxh. 27Kʼuxhetz laʼ kuxh el etaanima tzitza vatz txʼavaʼ tiʼ u qʼij esaq, tan yeʼxhabʼil invaʼq ex laʼ oleʼv ex tiʼ echʼij jaʼ kaʼkʼutxhbʼatoʼq.

28Atz yeʼat kuxh el etaanima tiʼ vetoksaʼm, tan laʼat txheji. Tul bʼenoq kuxh sete kam nik ibʼan ichʼij inqʼa xuʼm, inqʼa t-vitz. Tan bʼane nik koq motx taqʼonveʼ. Atz nikat koq motx ichem toksaʼm, poro nik motx ichʼijeʼ. Aʼetz kol ex yeʼ laʼ txhej etetz taʼn quBʼaal Tiuxh, atz aʼ, ex sibʼ etiqleʼm vatz quBʼaal Tiuxh. 29Pet toq val sete, tiʼ uvaʼ s-naʼya, kʼuxh josqʼilichxh u toksaʼm Salomoon, poro antxh inqʼa xuʼm palnaʼqich iviqix viʼ ikaʼy inqʼa toksaʼm Salomoon.#1 Reeyes 10.4-7; 2 Kroonikas 9.3-6

30Kʼuxhetz josqʼilxh iviqix inqʼa xuʼm taʼn quBʼaal Tiuxh, inqʼa nik etil s-txheel, poro ech qal tzʼeʼ t-oorno, ¡aʼetz kol ex yeʼ laʼ tilbʼe ex quBʼaal Tiuxh tuulbʼal u qʼij esaq! Pet aʼe tan bʼiil txhan vatz kʼuqlebʼal ekʼuul tiʼ quBʼaal Tiuxh. 31Tan toq txheoq taʼn quBʼaal Tiuxh. Pet yeʼ kuxh el etaanima, tiʼ uvaʼ: «¿Kamebʼ kuxh toq qetxhbʼu? Atz ¿kamebʼ kuxh toq qukʼa? Atz ¿kamebʼ toq qoksa?» chaq koq ex. 32Tan aʼetz kuxh inqʼa xaole, inqʼa yeʼ ootzaqin tetz quBʼaal Tiuxh, txhokony kuxh taanima tiʼ inqʼa kam inqʼae. Pet koq ex, tan tootzaq quBʼaal Tiuxh kame uvaʼ nik isaʼon sete tiʼ jankʼal inqʼa kam inqʼae.

33Pet aʼ quBʼaal Tiuxh etxhok s-bʼaxa tiʼ ibʼant iqʼesalil tetaanima; atz aʼ etxhok ibʼanax u jik uvaʼ nik isaʼ quBʼaal Tiuxh. Echetz jankʼalxhte inqʼa kam uvaʼ nik isaʼon sete, tan aʼl toq taqʼt tel quBʼaal Tiuxh s-tiʼ. 34Echetz yeʼ kuxh el etaanima tiʼ u qʼij uvaʼ s-eqal, tan aʼl bʼaʼn uvaʼ qaloq etitzʼa txha vet tetz u qʼij uvaʼ s-eqal. Tan ate uvaʼ nik isaʼon tuulbʼal u qʼij uvaʼe. Tan ataq kuxh itzaʼlal iqʼomal taʼn jununil qʼij. Pet Tiuxh laʼ lotxhon ex tiʼ etzuqbʼet etibʼ.

Currently Selected:

Tio 6: ixlC

Highlight

Copy