Juan 18

LA GLORFICAÇON DE JASUS

Paixon de Jasus

Jasus ye preso

(Mateus 26,47–56; Marcos 14,43–50; Lucas 22,47–53)

1Habendo Jasus dezido estas cousas, fui-se culs sous deciplos pa l outro lhado de la ribeira de Cedron, adonde habie un huorto i antrou alhá culs deciplos del. 2Judas, que lo atraiçonara, tamien coincie aquel sítio, porque Jasus ajuntaba-se muita beç alhá culs deciplos del. 3Anton, habendo Judas recebido ls suldados i ls oufeciales de ls xefes de ls saçardotes i de ls fariseus, fui-se alhá cun lhinternas, fachuqueiros i armas. 4Jasus, sabendo todas las cousas que se íban a dar cun el, adelantrou-se i dixo-le: «De quien andais a saber?» 5Eilhes respundírun-le: «De Jasus, l nazareno.» Jasus dixo-le: «Sou you.» I Judas, que lo antregara, staba cun eilhes. 6Anton, quando el le dixo: «Sou you», arreculórun i caírun-se por tierra. 7Tornou-le, anton, a preguntar: «De quien andais a saber?» I eilhes dezírun-le: «De Jasus, l nazareno.» 8Jasus tornou-le: «Yá bos l dixe que sou you; mas se andais a saber de mi, deixai ir a estes ambora.»

9Para que se cumprira la palabra que habie dezido: «De ls que me deste, nun perdi ningun deilhes.»

10Anton, Simon Pedro, que tenie spada, sacou-la i dou-le cun eilha al criado de l sumo saçardote, cortando-le l’oureilha de l lhado dreito. Chamában-le Malco a esse criado. 11Mas Jasus dixo-le a Pedro: «Mete la tue spada na baina; nun tengo de buer l cálece que miu Pai me dou?»

Ye lhebado a Anás i ye negado por Pedro

(Mateus 26,59–66.69–75; Marcos 14,55–64.66–72; Lucas 22,55–62.66–71)

12Anton ls suldados, l quemandante i ls criados de ls judius, prendírun a Jasus i atórun-lo. 13Adepuis, lhebórun-lo an purmeiro a Anás, por ser l suogro de Caifás, que era l sumo saçardote aquel anho. 14Habie sido Caifás quien le dira l cunseilho als judius de que cumbenie que un home se morrira pul pobo todo.

15Simon Pedro i outro deciplo íban atrás de Jasus. Este deciplo era coincido de l sumo saçardote i, assi, antrou cun Jasus na sala de l sumo saçardote. 16Pedro staba de l lhado de fuora, a la puorta. Saliu, anton, l outro deciplo, que era coincido de l sumo saçardote, i falou-le a la porteira, lhebando a Pedro para andrento. 17Anton, la porteira dixo-le a Pedro: «Tu nun sós tamien de ls deciplos deste home?» El dixo-le: «Nó, nun sou.»

18Ora stában-se eilhi ls criados a calcer al lhume, porque fazie friu; i cun eilhes staba-se a calcer Pedro tamien.

19L sumo saçardote anterrogou a Jasus a respeito de ls sous deciplos i de la sue doutrina. 20Jasus respundiu-le: «You falei-le çclaradamente al mundo; you siempre ansinei na sinagoga i ne l templo, adonde todos ls judius s’ajúntan, i nun dixe nada a las scundidas. 21Por que me preguntas a mi? Bai-le a preguntar als que oubírun l que le ansinei: Eilhes sáben bien l que le tengo dezido.»

22Quando acabou de falar, un de ls criados que stában eilhi dou-le ũa lhambada a Jasus, dezindo: «Ye assi que le respondes al sumo saçardote?» 23Jasus respundiu-le: «Se falei mal, amostra-me adonde stá l mal; mas se falei bien, porque me stás a dar?»

24I Anás mandou-se-lo, bien atado, al sumo saçardote, Caifás.

25Simon Pedro staba-se eilhi a calcer. Anton, dezírun-le: «Tu nun sós tamien un de ls deciplos del?» El negou i dixo-le: «Nó, nun sou.» 26Un de ls criados de l sumo saçardote, que era pariente daquel a quien Pedro le cortara l’oureilha, dixo: «Anton nun te bi you ne l huorto, cun el?» 27Pedro negou outra beç i ende lhougo l galho cantou.

Ne l tribunal de Pilatos

(Mateus 27,1–2.11–31; Marcos 15,1–20; Lucas 23,1–5.13–25)

28Apuis lhebórun a Jasus de la casa de Caifás pa l palácio de gobernador romano. Ampeçaba a rumper l die. Mas nun antrórun ne l palácio para nun quedáren puorcos i assi podéren quemer la Páscoa. 29Anton, Pilatos saliu para fuora i dixo-le: «Que acuso traieis contra este home?» 30Eilhes respundírun-le, dezindo: «Se nun fura un malfeitor, nun te l antregariemos.» 31Dixo-le, anton, Pilatos: «Lhebai-lo bós i julgai-lo al modo de la buossa lei.» Dezírun-le, anton, ls judius: «Nós nun podemos matar a naide.» 32Para que se cumprira la palabra que Jasus habie dezido, para amostrar la muorte de que habie de se morrer.

33Pilatos tornou a antrar ne l palácio, chamou a Jasus i dixo-le: «Tu sós l rei de ls judius?» 34Jasus respundiu-le: «Tu falas assi por ti mesmo ou fúrun outros que te l dezírun a miu respeito?» 35Pilatos respundiu-le: «Cuidas que you sou judiu? La giente de l tou pobo i ls xefes de ls saçardotes antregórun-te a mi: l que fui que faziste?» 36Jasus respundiu-le: «L miu reino nun ye deste mundo; se l miu reino fura deste mundo, ls mius suldados lhuitarien para que you nun fura antregue als judius; mas, agora, l miu reino nun ye dacá.» 37Dixo-le Pilatos: «Anton, tu sós rei?» Jasus respundiu-le: «Tu ye que dizes que you sou rei. Fui para esso que you naci i que you bin al mundo, para dar teçtemunho de la berdade. Quien ye de la berdade, oube la mie boç.» 38Dixo-le Pilatos: «L que ye la berdade?» I mal apenas acabou estas palabras, fui-se a tener outra beç culs judius i dixo-le: «Nun acho nel qualquiera crime. 39Mas bós teneis la questume de que you bos solte ũa pessona pula Páscoa. Quereis que bos suolte l rei de ls judius?» 40Ende, todos tornórun a boziar, dezindo: «Nun soltes este, mas a Barrabás.» I Barrabás era un lhadron de strada.

Currently Selected:

Juan 18: EM14

Highlight

Copy