Mateus 25
25
Parábola de las dieç birges
1«Antoce, l reino de ls cielos será acumparado a dieç birges que agarrórun sues lhinternas i fúrun-se a tener cul moço. 2Mas cinco deilhas éran boubicas i outras cinco éran ajuizadas. 3Las boubicas agarrórun sues lhinternas mas nun lhebórun azeite cun eilhas; 4mas las ajuizadas agarrórun azeite nũa azeiteira i tamien las lhinternas. 5Cumo l moço tardaba muito, ampeçórun-se a ambelesar i drumírun-se todas. 6A meia nuite oubiu-se un bózio: “Ben ende l moço! Ide a tener cun el al camino!” 7Anton, todas aqueilhas birges s’alhebantórun i purparórun sues lhinternas. 8Ende, las boubicas dezírun-le a las ajuizadas: “Dai-mos un azeitico de l buosso, porque las nuossas lhinternas stan-se a apagar.” 9Las ajuizadas respundírun-le, dezindo: “Cumo puode nun ser suberciente para nós i para bós, l melhor ye que bos báiades a quien l bende i que l mérquedes para bós.” 10Anton, anquanto l fúrun a mercar, chegou l moço: las que stában purparadas, antrórun cun el pa la boda i cerrórun la puorta. 11Mais tarde, benírun tamien las outras birges, dezindo: “Senhor, senhor, abre-mos la puorta.” 12Mas el respundiu-le, dezindo: “Quedai bien ciertas de l que bos digo: Nun bos conheço!”
13Portanto, belai, porque nun sabeis nien l die nien la hora.»
Parábola de ls talentos antregues
(Lucas 19,11–27)
14«Tamien ye acumparado a un home que treminou ũa biaige, chamou ls criados del i antregou-le ls sous bienes. 15A un dou-le cinco talentos, a outro dous i a outro un, a cada qual cunsante la sue capacidade. I fui-se ambora. 16L que habie recebido cinco talentos lhougo se fui a fazer negócio cun eilhes i ganhou outros cinco; 17tamien l que recebira dous lhucrou outros dous. 18Mas l que habie recebido un, fui-se a abrir ũa fóia na tierra i scundiu l denheiro de l sou amo.
19Apuis de muito tiempo, l amo daqueilhes criados tornou i fizo cuntas cun eilhes. 20I achegando-se l que recebira cinco talentos, amostrou-le outros cinco talentos, dezindo: “Senhor, antregueste-me cinco talentos; eiqui stan outros cinco que ganhei.” 21Dixo-le l amo del: “Baliente! Criado buono i fiél. Fuste fiél an cousas poucas, ponerei-te a gobernar muitas cousas; ben a fazer parte de la felcidade de l tou amo.” 22Achegou-se tamien l que recebira dous talentos i dixo: “Senhor, antregueste-me dous talentos; eiqui stan outros dous que ganhei.” 23Dixo-le l amo: “Baliente! Criado buono i fiél. Fuste fiél an cousas poucas, ponerei-te a gobernar muitas cousas; ben a fazer parte de la felcidade de l tou amo.” 24Achegando-se apuis, tamien, l que recebira un talento, dixo: “Senhor, sabie que sós un home duro: segas adonde nun sembreste i cuolhes adonde nun poniste; 25i cul miedo fui-me a scunder l tou talento na tierra. Eiqui tenes l que ye tou.” 26Anton l amo, respundendo-le, dixo: “Criado malo i malandro! Sabies que you sego adonde nun sembrei i cuolho adonde nun pus? 27Sendo assi, habies de haber antregado l miu denheiro al banco i, quando you tornasse, receberie l miu denheiro cun juros. 28Ala! Tirai-le l talento i dai-se-lo al que ten dieç talentos.”
29Porque a todo l que ten será-le dado i quedará cun muito; mas al que nun ten, até l que ten le será tirado. 30I al criado que nun sirbe para nada, botai-lo pa la scuridon de fuora: ende haberá choro i terrincar de dientes.»
L juízo final
31«Quando benir l Filho de l Home na sue glória i, cun el, todos ls anjos, sentará-se ne l trono de la sue glória. 32I seran ajuntadas delantre del todas las pessonas i apartará ũas de las outras, cumo l pastor aparta las canhonas de ls chibos, 33i ponerá las canhonas a la sue mano dreita i ls chibos a la sue mano squierda. 34Adepuis, l Rei dezirá a aqueilhes que stubíren a la sue mano dreita: “Beni acá, benditos de miu Pai, agarrai l’ardança de l Reino que stá purparado para bós zde l ampeço de l mundo. 35Porque you stube cheno de fame i bós destes-me a quemer; stube cheno de sede i bós destes-me a buer; era pelegrino i bós arrecolhistes-me; 36staba znudo i bós bestistes-me; staba malo i bós bejitestes-me; staba na cadena i bós fustes-me a ber.” 37Ende, respunderan-le ls justos, dezindo: “Senhor, quando fui que te bimos cheno de fame i te demos a quemer, ou cheno de sede i te demos auga? 38Quando fui que te bimos pelegrino i t’arrecolhimos, ou znudo i te cubrimos? 39Quando fui que te bimos malo ou na cadena i te fumus a ber?” 40Anton, l Rei dezirá-le: “Atentai bien ne que bos digo: Qualquiera cousa que fazistes a un destes mius armanicos, fui a mi que me la fazistes.” 41Apuis dezirá-le tamien als que stan a la mano squierda: “Ide-bos ambora d’an pie de mi, malditos, pa l fuogo eiterno, que stá purparado pa l Diabro i pa ls anjos del. 42Porque tube fame i nun me destes a quemer; tube sede i nun me destes auga; 43era pelegrino i nun m’arrecolhistes; staba znudo i nun me cubristes; staba malo i na cadena i nun me bejitestes.” 44Anton, respunderan-le tamien eilhes, dezindo: “Senhor, quando fui que te bimos cheno de fame ou cheno de sede ou pelegrino ou znudo, malo ou na cadena i nun quejimos saber de ti?” 45Adepuis respunderá-le a eilhes, dezindo: “Atentai bien ne que bos digo: Qualquiera cousa que nun le fazistes a un destes mais pequerricos, fui a mi que nun la fazistes.” 46I estes eiran pa l suplício eiterno, mas ls justos eiran pa la bida eiterna.»
Currently Selected:
Mateus 25: EM14
Highlight
Share
Copy
Want to have your highlights saved across all your devices? Sign up or sign in
Evangelhos em Mirandês © Sociedade Bíblica, 2014.
