1 Corinthianee 6
6
CAB. VI
1Lhoys da fer erbee eu, as cooish echey noi fer elley, goll gys y leigh fenish y vooinjer neu‐chairagh, as cha nee fenish ny nooghyn? 2Nagh vel fys eu dy jean ny nooghyn yn seihll y vriwnys? as my vees yn seihll er ny vriwnys lieriuish, vel shiuish neu‐feeu dy vriwnys ny cooishyn s’fardalee? 3Nagh vel fys eu dy jean shinyn ainleyn y vriwnys? cre‐woad smoo reddyn ta bentyn rish y vea shoh? 4My ta shiu eisht son briwnys cooishyn seihltagh, jean‐jee adsyn y phointeil dy chur briwnys sloo ta soit jeu ayns yn agglish. 5Ta mee loayrt gys y nearey eu. Nee shen myr te, nagh vel dooinney creeney nyn mast’ eu? unnane hene vees abyl cooish y vriwnys eddyr e vraaraghyn? 6Agh ta braar goll gys y leigh rish braar, as shen ny enish ocsyn nagh vel jeh’n chredjue. 7Nish er yn oyr shen ta son shickyrys foill nyn mast’ eu, dy vel shiu gol gys y leigh ry‐cheilley: nagh baare diu goaill aggair? nagh baare diu surranse molteyraght? 8Agh ta shiu jannoo aggair as molteyraght, as shen er nyn mraaraghyn. 9Nagh vel fys eu nagh vow ny mee‐chrauee eiraght ayns reeriaght Yee? Ny bee‐jee mollit: chamoo yiow maarderee, ny adsyn ta cur ooashley da jallooyn, ny adsyn ta brishey‐poosey, ny ny soailtee, ny adsyn ta cur rish peccah noi dooghys, 10Ny maarlee, ny ny sayntoilee, ny meshtyllee, ny oltooanee, ny tranlaasee, eiraght ayns reeriaght Yee. 11As nyn lheid va paart euish: agh va shiu er nyn niee, agh va shiu er nyn gasherickey, agh va shiu er nyn seyrey ayns ennym y Chiarn Yeesey, as liorish Spyrryd yn Jee ain. 12Ta dy chooilley nhee lowal dou agh cha vel dy chooilley nhee cooie dy ve jeant; ta dy chooilley nhee lowal er my hon, agh cha bee’m er my choyrt lhiam fo pooar veg jeu. 13Bee son y volg, as y bolg son bee; agh nee Jee ad ny neesht y choyrt naardey. Nish cha vel y corp son maarderys, agh son y Chiarn; as y Chiarn son y chorp: 14As ta Jee chammah er hroggal seose y Chiarn, as nee eh myrgeddin shinyn y hroggal seose liorish e phooar hene. 15Nagh vel fys eu, dy vel ny kirp eu oltyn Chreest? jeanym eisht oltyn Chreest y ghoaill, as ad y yannoo oltyn streebagh? Ny lhig eh Jee. 16Cre, nagh vel fys eu dy vel eshyn ta lhiantyn gys streebagh yn un chorp r’ee? son bee ad ny‐neesht (t’eh gra) un eill. 17Agh eshyn ta lhiantyn gys y Chiarn, t’eh un spyrryd. 18Chea‐jee veih maarderys. Ta dy chooilley pheccah ta dooinney dy yannoo, cheu‐mooie jeh’n chorp; agh eshyn ta cur rish maarderys, t’eh jannoo peccah noi e chorp hene. 19Cre, nagh vel fys eu dy vel y corp eu chiamble y Spyrryd Noo ta ayndiu, ta eu veih Jee, as cha vel shiu lhieu hene? 20Son ta shiu kionnit lesh price: shen‐y‐fa jean‐jee Jee y ghloyraghey ayns nyn gorp, as ayns nyn spyrryd, ta lesh.
Currently Selected:
1 Corinthianee 6: CON1810
Highlight
Copy
Compare
Share
Want to have your highlights saved across all your devices? Sign up or sign in
© British and Foreign Bible Society 1810, 2019