LUUKI 13

1Tɔ. Din saha maa ka ninvugseeba ban daa bɛ bɛni daa tɔ'asiri Galilii dimseeba yɛla: ba daa yɛli Yisa, ni, Gɔmna Pailiti daa ku ba, ban daa maanni ba sara sahanseaa la, ka ba ziim ni bunkɔbri ziim maa daa gyɛtti taaba. 2Ka Yisa daa labsi m‑boosi ba, ni, “Kala, ya teesiya, ni, Galilii dima wa n daa nyɛ ninvugbeeri ni ala'akyi dima n‑gaari ba Galilii taaba zugu ka ba daa namsi ba dinŋɔ maa? 3N yɛtti ya, ni, Ay! Amaa faasee ka ya zaa takki ya teesibeeri ka kyɛ ya tunkyɔ'ama zaa: di yi pa lala ya gba nin baasi yɔri hoo ban daa baasi seem maa. 4Bee, ninvugpiiya ni anii ŋɔna, seeba ban daa bɛ Sailɔ'am fɔŋŋu ni ka gyirambisa la daa lu n‑ku ba la: ya teesiya, ni, ban daa mari taalli pam n‑gaari Gyɛrusalɛm dima zaa? 5N yɛtti ya, ni, Ay! Faasee ka ya takki ya teesibeeri ka kyɛ ya tunkyɔ'ama maa: di yi pa lala ya gba nin baasi yɔri hoo ban daa baasi seem maa.”

6Di saha maa ka u yi yɛli ba yɛttɔ'anyɛsiri, ni, “Dɔsɔ n daa bɛ ni, m‑mari u tiwanni u gaadi puuni. U daa ti kyaŋŋi ni u tɔsi tii maa wala ka bu nya halli tiwalli yinni. 7Ka u daa yɛli ninvugsɔ ŋɔn tumni u gaadi maa tuma n‑tiri u la, ni, ‘Yuuma ata nŋɔ ka n kyɛnni na m‑boori tii wa wala ka bu nyara. Ŋmaam ka n‑lusi tiŋŋa!’ Ni, ‘Wula ka ka kur diri tingbaŋŋu wa tam yɔriyɔri?’ 8Ka doo maa daa labsi n‑yɛli u, ‘M Bapira, kyɛli ka yuumni yinni m‑paasi yaasa, ka n nin gbi n‑gyiligi ka, n‑niŋi tam n‑niŋi ka, ka yuundaari ka ka ti wali wala, tɔ! 9Ka mun yi na bu ti wali, dinŋɔna nyin ŋmaama ka m‑basi.’ ”

10Tɔ. Ka Vuusim Dabsiri dahinseaa Yisa daa ti bɛ la'aŋŋu duu maa ni n‑wulisiri ba, 11ka pɔ'asɔ daa bɛ ni m‑mari arizimbeoo ŋɔn daa kyɛ ka u kɔŋŋi yaa halli nti paai yuuma piiya ni anii. Pɔ'a maa daa kuntiri ni ka bu nyaŋŋi n‑doaari n‑zaantiri kyippi. 12Yisa ŋɔn daa nya pɔ'a maa, u daa booli u na n‑yɛli u, “M ma, i dooru laa n‑ka i ni!”, 13ka daa zaŋŋi u nuusi m‑pa u zugu. Ka pɔ'a maa daa di teaai u maŋŋa n‑doaai n‑zaani suŋŋa, ka gbaai Naawunni pɛ'abu. 14Tɔ, ka la'aŋŋu duu zuguraana la sufu daa yisigi pam, Yisa ŋɔn daa tibi pɔ'a maa Vuusim Dabsiri maa zugu, ka u yɛli niriba maa, ni, “Dabsa ayoobu m bɛ ni, ni ba zaŋŋi n‑tum tuma: dizugu lala dabsa maa puuni ya kyɛm na nti tibi, ka pa ni Vuusim Dabsa.” 15Ka ti Dugma labsi u, ni, “Yarima birikɔ'anu dima wa! Vuusim Dabsiri daari maa ni ka ya nira zaa bu lɔrigri ya naafu bee ya buŋŋa n‑kyɛnni n‑nyuusiri ba koom? 16Amaa pɔ'a wa ŋɔna, Ibrahim bii n nyɛ u, ka Sintaani daa ba u bansi yuuma piiya ni anii. Di bu sumni ni ni u bansi wa kabi m‑basi ka kyɛ u Vuusim Dabsiri daari maa ni?” 17Ŋɔn daa yɛli dinŋɔ n‑naai, vi daa gbaai ban za'asiri u yɛla maa zaa, amaa zama maa daa mari la sufupeelli zaŋŋi n‑kyaŋŋi Yisa ŋɔn daa tum tunveela maa.

18Tɔ; ka Yisa daa laa n‑yɛli, ni, “Ka Naawunni naam maa yɛla muna - a ŋmani la bɔa? 19- A ŋmani la hoo zinzambeelli nira ŋɔn zaŋŋi m‑buri u puu ni; ka ka buli na n‑leebi hoo tiiya, ka niinsi tɔmni ka wula maa zugu.” 20Ka daa laa m‑boosi ba, ni, “Bɔ yaasa ka n nin zaŋŋi Naawunni naam yɛla maa m‑ma'asi? 21Di ŋmani la dabinseesi pɔ'a ŋɔn zaŋŋi n‑gyɛri zum ni, ni u ti sɛ paanu. U zaŋŋi dabina beela n‑niŋi zum pam, hoo kuriba ata, puuni, amaa a dɔli halli nti doaai zum maa zaa n‑fuusi.”

22Tɔ: Yisa daa yi bɛni n‑kyaŋŋi n‑dɔli tinsi ni tinkpansi n‑wulisira; ka gatti n‑wa Gyɛrusalɛm. 23Ka dɔsɔ daa boosi u, ni, “M Bapira, niriba beela n nyɛ ban nin tuligi, bee?” Ka u labsi n‑yɛli ba, 24“Ya kpaŋŋma ya mansi n‑kpɛ za'anɔmugriga maa ni, dama niriba pam nin boori ni ba kpɛ, ka ku nyaŋŋi.” 25Ni, “Yiri maa daana yi sarigi n‑doaai n‑zaani ka kpari za'anɔri maa, ya nin zaani za'anɔri tooni sa m‑boonna ka kpaasira, ka nin susiri, ni, ‘Ti daana, yoaam n‑ti ti!’; amaa u nin labsi n‑yɛli ya, ni, ‘M bu mi yan yi seela na!’ 26Ka ya nin yɛli u, ni, ‘Tirima ni nyini n daa la'am n‑dira, ka nyuura, halli ka i daa dɔli ti tiŋŋa sɔya n‑wulisira.’ 27Ka u nin labsi n‑yɛli ya, ‘M bu mi yan yi seela na. Ya kyɛma sa, yarim tumbeeri dima wa!’ 28Ka ya nin paai ya'aseelli niriba ŋɔn bɛ ni n‑kumna ka ŋɔbri ba nyina la. Ka ya nin ti nya Ibrahim ni Yisahaaku ni Yaakubu, m‑paasi anabidima maa zaa, ka ba ti bɛ Naawunni naam ziiya, ka ba zaŋŋi yarima n‑yiisi m‑basi sa. 29Niriba nin ti yi wuntampusiri n‑kyɛ na, ni wuntanluri, ni nudirigu ni nuzaa luga zaa, nti zinni ba ziziisi ni, Naawunni naam kyuu diibu maa ni.” 30Ni, “Yɛlimaŋni, ninvugseeba m bɛ ni n‑kpalim nyaaŋŋa ka nin ti leebi ban daŋŋni tooni, ka ban mun daŋŋi tooni la nin ti kpalim nyaaŋŋa!”

31Tɔ. Di saha maa ka Farisiseeba daa kyɛ Yisa saani na nti yɛli u, “I bu ya yi kpa na n‑gaari n‑kyaŋŋi luginseaa? Dama NaaHɛroodi boori ni u ku i.” 32Ka Yisa labsi n‑ti ba, ni, “Yɔbaa n kur nyɛ u! Ya kyɛma nti yɛli u, ni, zuna ni beoo n na kur nin katti arizimbeeri n‑yiisiri niriba ni, ka tibri baaridima, ka daba ata daari n nin paai n tuma zaa tɔriga. 33Amaa di kpa ma la talasi ni n siri yi soori zugu zuna ni beoo ni daari, dama di ku toaai n‑niŋi ni ba ku anabisɔ kam zaa tinseelli ni, ka di pa la Gyɛrusalɛm timpuuni.” 34Ka u daa gbaai kunkuma Gyɛrusalɛm zugu, ni, “Gyɛrusalɛm, Gyɛrusalɛm! Waay, waay, waay! Nyin ŋɔn kuuri anabidima ka zaŋŋni ban daa tum tuumudimseeba i saani maa n‑lɔbri ba kuga wa! N da kur boori la n la'asi i niriba lugri yinni ni, kaman nɔnyaaŋŋa ŋɔn la'asi u biisi ka yirigri u kpunkpama n‑ligri ba seem la; amaa ya bu sakki n‑ti ma. 35Ya gɔsima! Ya Gyeeŋŋu Yiri maa yi kpalim la daboo. Dinzugu n yɛtti ya ni, ni, ya ku laa n‑nya ma yaasa halli ka ya ti yɛli ‘Zugsuŋŋu bɛ n‑ti ŋɔn zaŋŋi ti Dugma yuuri na!’ ”

Currently Selected:

LUUKI 13: maw

Highlight

Copy