LUUKI 14

1Tɔ. Di daa ti lu la Vuusim Dabsiri daari, ka Yisa kyaŋŋi Farisii dima kpeensɔ yiri, ni ba ti la'am n‑di bundirigu. Ka Farisidoo maa daa kur gɔsiri u. 2Ka ba nya ka baarisɔ daa bɛ Yisa tooni, ka u ningbina zaa daa kur fuusi u dooru maa zugu. 3Ka Yisa daa boosi zaaligu baŋŋniba ni Farisii dima, ni, “Di tuusiya ni nira kyɛ ka baara kpaŋŋi Vuusim Dabsiri daari, bee di bu tuusi?” 4Ka ba zaa daa sini u. Ka Yisa daa tibi doo maa, ka ti u soori ni u labi n‑kuli. 5Di saha ka Yisa daa laa m‑boosi ba, ni, “Ya ŋɔni n lee nin mari u biiya - bee, halli u naafu gba - ka u ti lu buliga ni Vuusim Dabsiri daari, ka u ku kyaŋŋi nti yiisi u yoomayooma?” 6Ka ba daa kɔŋŋi u labsigu.

7Ka Yisa daa gɔsi n‑nya ban daa booli ninvugseeba ni ba la'am na nti di maa, ka ba kur boori gyirima ziziisi n‑zintira. Ka daa yɛli ba yɛttɔ'anyɛsiri, ni, 8“Ba yi ti booli i ni i kyɛm amriya kyuu diibu ni na, di daŋŋi n‑kyaŋŋi n‑zinni gyirima zizii ni, dama di pa seem ŋɔn mari gyirima pam n‑gaari i nin ti kpɛ na, 9ka ninvugsɔ ŋɔn booli ya bayi maa na nin ti yɛli nyini, ni, i doaama ka kyɛ zizii maa n‑ti u. Di saha maa vi nin ti gbaai i, ka i doaai nti zinni tarimma ziziiya. 10Ay! amaa ba yi booli i, see ka i daŋŋi n‑kyaŋŋi nti zinni tarimma zizii ni, ka ŋɔn booli i nin kyɛ na nti yɛli, ‘N zɔsuŋŋu, doaam na n‑du n‑zinni toonni zizii wa ni!’ Di saha maa ka i nin nya gyirima i taaba maa saani. 11Yɛlimaŋni, ninvugsɔ ŋɔn duusi u maŋŋa, ba nin sigsi u; amaa ŋɔn sigsi u maŋŋa muna, ba nin duusi lala nira pam.” 12U daa laa n‑yɛli dɔsɔ ŋɔn booli ba maa, ni, “I yi ti boonni niriba ni ba kyɛ i yiri na n‑di kyuu bundirigu, di booli i zɔdima, bee i dɔ'ariba, bee i zizii kpɛseeba ban nyɛ bundaandima. Lala niriba nin ti booli i gba ba maŋtoori kyuusi diibu ni, ka lala ka ba nin yɔ i samni maa. 13Amaa i yi ya di kyuu, boolim faradima, ni gbarisi, ni wɔbsi, ni zoomma. 14I yi niŋi lala i nin nya laara. Lala niriba ku nyaŋŋi n‑labsi n‑yɔ i. I nin nya zugsuŋŋu, dama Naawunni nin ti labsi n‑yɔ i, ninvugsuma yi ti neaai kum ni sahanseaa maa.”

15Tɔ, ka ninvugsɔ n daa bɛ ban la'amni n‑zintiri maa sunsukkuni, ka daa wum lala, ka u daa yɛli u, “Zugsuŋŋu bɛ ni n‑ti ninvugsɔ ŋɔn la'am n‑diri kyuu maa diibu, Naawunni naam kyɛnni saha na!” 16Amaa ka Yisa daa yɛli u, ni, “Wumma! Dɔsɔ n daa bɛ ni, n‑ya di u kyutitaari, ka tum m‑booli niriba pam. 17Tɔ, ka kyuu maa diibu daari ŋɔn daa ti paai, u daa tum u daabsɔ ni u kyaŋŋi m‑booli ŋɔn pun zuusi ninvugseeba la, ni, ba kyɛm na, ni, di zaa siri biya. 18Amaa ba zaa yinni yinni daa susiri u soori, ni, ba ku nyaŋŋi n‑kyɛ na. Ŋɔn daa daŋŋi m‑booli sɔ maa daa yɛli u, ni, u da la puu ka di kpa la talasi ni u kyaŋŋi nti kaai ka; ni, ‘N susiri i ni: n ku toaai n‑kyɛ na.’ 19Ka ba yinni gba laa n‑yɛli, ni, u da la na'akoora piiya ka u ya n‑kyaŋŋi nti nya ban tumni seem maa; ni, ‘Dizugu n susiri i ni: n ku toaai n‑kyɛ na.’ 20Ka ba sɔ gba laa n‑yɛli, ni, u di la pɔ'a, ka dizugu ŋɔn gba ku toaai n‑kyɛ na. 21Dizugu ka daabri maa daa labi na nti yɛli u dugma ba zaa ŋɔn yɛli seem maa. Ka yiri wa daana sufu daa yisigi pam, ka u daa yɛli u daabri maa, ni, ‘Zɔm yooma n‑yi n‑kpɛ tiŋŋa wa puuni m‑paai sɔkyira, ni daasi ni, nti booli faradima ni gbarisi ni zoomma ni wɔbsi, n‑zuusi ba na.’ 22Ka daabri maa daa kyaŋŋi ka labi na n‑yɛli u, ‘N dugma, n niŋi nyin yɛli seem maa, amaa paalu na kur kpalim ni.’ 23Ka u dugma maa daa yɛli u, ‘Yim yaasa n‑dɔli sɔbisi ni tiisi gbina nti mugsi niriba ni ba kyɛ na ka n yiri wa paali zaa. 24N ya n‑yɛli ya ni, ni, ninvugseeba ban daa daŋŋi n‑zuusi maa zaa - ba sɔsɔ ku lam n kyuu bundirigu maa, halli beela!’ ”

25Tɔ; ka zama pam daa la'asi n‑dɔli u, ka u daa ŋmaligi n‑yɛli ba, 26“Sɔ yi ti kyɛ n saani na, ka bu yaai u toori ba, ni u ma, u pɔ'a ni u biisi, u bɛya ni u tinzɔppa ni u tinzɔpɔ'aba, halli ni u mammantoori nyɔvuri gba, di daama ku toaai n‑niŋi n nyaandɔla.” 27Ni, “Ninvugsɔ ŋɔn ku sakki n‑kpikki u toori kum dɔpulli n‑dɔli n nyaaŋŋa ku toaai n‑niŋi n nyaandɔla. 28Sɔ yi ti bɛ ya saani n‑teesiri, ni, u nin mɛ gyirambisa yiri, u nin daŋŋi n‑zinni n‑zamsi lala tuma ligri ŋɔn ya lu seem, n‑nya u yi mari ligri an nin toaai m‑mɛ ka n‑naai: bee, m ma'ai ni? 29Di yi pa lala, u nin ti piili ka nyeebri, ka ku toaai n‑naai ka zaa, 30ka ninvugseeba zaa ban gɔsi n‑nya ka piiligu la nin ti maali u ansarisi n‑yɛtta. ‘Doo wa piili u yiri meebu ka kɔŋŋi ka naari!’ 31Bee, nasɔ yi ti bɛ ni m‑boori ni u tuusi u nataraansɔ tɔppu, u nin daŋŋi n‑zinni m‑mari u sufu ni laasaabu n‑nya u langyima maa nyɛ la babala: bee, di pa lala? Ba yi ti paai tusipiiya ka u dindaana mari la tusa pisi, u nin boosi u maŋŋa, ni, u niriba maa nin toaai n‑nyaŋŋi ban zoaai n‑gaari ba buyi lala, bee? 32U yi ku nyaŋŋi, u nin daŋŋi n‑tum biiya ka u kyaŋŋi naa ŋɔnla saani n‑susi u, ni, ba maalim ba yɛttɔ'a maa. 33Dizugu ninvugsɔ zaa ŋɔn bu za'asi u seelikam zaasa yɛla ku toaai n‑niŋi man nyaandɔla.”

34Ni, “Yaarim nya'asa, amaa yaarim nya'asim yi ti yi ka kyɛ di, di laa n‑ya n‑niŋi la wula ka di nya'asim maa labi na yaasa? Di laa n‑ka bukyi: ba bu ya zaŋŋi di n‑niŋi puri ni bumbura, 35halli n‑niŋi binduuri gba, see ka ba kur ya zaŋŋi di m‑basi di yɔri.” Ni, “Ŋɔnkam mari tuba n nin wum, ŋɔn wumma!”

Currently Selected:

LUUKI 14: maw

Highlight

Copy