LUUKI 15

1Sahanseaa ka lampodeaariba pam daa kyɛnni Yisa saani na, ni ala'akyi dima gba, ni ba ti wum u yɛttɔ'a. 2Ka Farisii dima ni karimbadima daa nyurimni yɛttɔ'adɔ'asa, ni, “Doo wa deaari la ala'akyi dima ka ŋɔn ni ban la'amni n‑dira.” 3Tɔ, ka Yisa daa yɛli ba yɛttɔ'anyɛsiri wa, ni, 4“Ya ninvugsɔ yi mari la u peesi kɔbga ka ba yinni ti bɔrigi, u bu ya m‑bɔ u ziiya? Ay! - u nin kyɛ u peesi kɔbga‑yinni‑ka la ka ba kpalim m‑bɛ moo maa ni ka kyaŋŋi nti gyili m‑bɔ pɛsɔ ŋɔn bɔrigi ziiya halli nti nya u. 5Ka u yi ti nya u, u nin zaŋŋi u m‑bugi u bɔ'ari zugu ni sufupeelli m‑mari u n‑kuli yiri ni. 6U yi paai yiri ni na, u nin booli u zɔdima ni u kpeerintaaba ni ba la'amma na, ka yɛli ba. ‘Ya paasim n zugu m‑mari sufupeelli, dama n nya m pɛsɔ ŋɔn daa bɔrigi la.’ ” 7Ni, “N yɛtti ya ni, ni, lala gba ka ba mari sufupeelli arizana ni pam, ala'akyi daana yinni zugu, u yi ti takki u teesibeeri tuma n‑niŋi tuuba sahanseaa la: ka di gaari ban mari sufupeelli seem maa zaŋŋi n‑kyaŋŋi ninvugsuma pisiwai ni awai seeba taalli ŋɔn bu dɔli ni ba niŋma tuuba.”

8Ka u laa n‑yɛli ba, “Bee, yaasa: pɔ'a yi bɛ ni m‑mari u anzulifa ligri piiya ka a la'afu yinni lɔrigi n‑lu: u bu ya n‑nyoaai firila ka gbaai duu maa zaa piiri ni nimmoaa, ni u ti bɔ ka ziiya; halli nti nya? 9Ka u yi ti nya ka n‑naai, u nin booli u zɔdima ni u kpeerintaaba ni ba la'am na, ka yɛli ba, ‘Ya paasim n zugu m‑mari sufupeelli, dama n nya n la'aseaa kan da bɔrigi la!’ 10Ka n yɛtti ya, ni, lala gba n nyɛ di Naawunni malaakadima saani: ba mari la sufupeelli, ala'akyi daana yinni zugu, sɔ ŋɔn takki u teesibeeri tuma n‑niŋi tuuba maa.”

11Ka Yisa daa laa n‑yɛli ba m‑paasi, ni, “Dɔsɔ n daa bɛ ni m‑mari u bidibsi ayi. 12Dindahinseaa ka doo wa bisaani maa daa ti yɛli u, ‘M ba, tim ma n faari tɔrli!’ Ka u ba daa puri ŋɔn ni u beeri faari n‑ti ba. 13Di daa bu yuui ka bisaani maa daa la'asi u marigu zaa n‑yi n‑kpa n‑kyaŋŋi tinwa'aligu. Bɛni ka u daa ti bɛ yɔriyɔri n‑sa'am u marigu zaa. 14Ka ŋɔn daa ti di ŋɔn mari seelli kam zaa n‑naai sahanseaa la, kɔm daa lu tingbaŋŋu maa ni, ka u yi leebi ŋɔn kɔŋŋi bundira. 15Dizugu u daa kyaŋŋi tiŋŋa maa ni dɔsɔ saani ni u tim u tunseaa; ka u daa zaŋŋi u n‑kyɛ ka u bɛ moo ni n‑gɔsiri u kurikyuudima n‑ti u. 16Ka u daa yi ti boori la u di kurikyuu diibu maa, ka sɔ bu tiri u bunseelli. 17Di saha maa ka u yɛm daa ti zuligi na, ka u daa teesi u sufu ni n‑yɛli, ‘M ba yiri tuntumniba bɛ ni m‑mari diibu halli n‑diri ka kyeeri gba, ka man mun bɛ kpa wa ka kɔm kuuri ma wula? 18N nin yi n‑labi m ba saani n‑yɛli u, “M ba, n tum Naawunni taalli ni nyin gba taalli, m bu laa n‑sumni ni n nyɛ i biiya: 19kur zaŋŋma ma n‑leebi i yiri tuntumna.” ’ Ka u daa doaai n‑kyaŋŋi u ba saani. 20Amaa ŋɔn daa na bɛ wa'aligu n‑kyɛnni na maa, u ba daa nya u ka namboo daa gbaai u, ka u zɔ n‑tuusi u bii maa soori, ka zaŋŋi u nuusi n‑gɔbi u ka puusi u suŋŋasuŋŋa. 21Tɔ, ka bii maa yi yɛli u, ‘M ba, n tum Naawunni taalli ni nyin taalli gba, m bu laa n‑sumni ni n nyɛ i biiya ...’, amaa ka u ba daa yɛli u tuntumniba, ni, 22‘Ya kyɛm yooma! Ya kyɛma nti zaŋŋi kparisuŋŋu na n‑yeeli u, ka zaŋŋi nuntuuwa m‑piri u nubila, ka zaŋŋi namna na m‑piri u nɔba ni! 23Ka kyaŋŋi n‑gbaai na'asuŋŋu la n‑kɔrigi m‑maali ka ya ti la'am n‑di sufupeelli kyuu. 24Dama m bii wa daa kpi ni, ka laa n‑vu yaasa; u daa bɔrigi ni, ka n laa n‑nya u.’ Ka ba zaa sufu daa pɛligi pam di zugu.

25Ka ban daa diri kyuu maa sahanseaa maa, doo maa bikpeema daa bɛ la puu ni. Ŋɔn daa ti doaai n‑kunni na, m‑pɔtti yiri maa ni na, u daa wum bunŋmeera ni waasi damni, 26ka daa booli yiri maa bisɔ nti boosi u, ni, ‘Bɔ n niŋi?’ 27Ka u labsi n‑yɛli u, ni, ‘I tinzɔ la n kuli na, ka i ba gbaai na'asuŋŋu la n‑kɔrigi, ŋɔn labi na ni alaafɛ la zugu.’ 28Ka bikpeema maa daa gyɛ suuri ka za'asi, ni, u ku kpɛ dundɔŋŋu maa ni. Ka u ba maa daa yi na nti bɛlim u. 29Amaa ka u labsi n‑yɛli u ba, ni, ‘Gɔsima! Yuunseesi an gaari wa zaa mani n kur namsira, n‑tumni tunkpeema n‑tiri i, ka mun na zi n‑za'asi i noori halli yummu; amaa di zaa yɔri i na zi n‑gbaai halli bubila gba n‑ti ma ni n deaama ka mani ni n zɔdima la'am n‑di kyuu. 30Amaa i bisɔ ŋɔn sa'am i marigu ni pɔ'agoora wa ŋɔn ti gɔ n‑labi na, i gbaai na'asuŋŋu la n‑kɔrigi n‑ti u! Lala ka soori!’ 31Ka u ba maa yɛli u, ‘M bisuŋŋu, nyin kur bɛ la n saani saha kam, ka man mari bunseelli kam zaa nyɛ la i dinni. 32Amaa di kpa la talasi ni ti di kyuu wa ka mari sufupeelli: dama i tinzɔ wa daa kpi ni, ka laa n‑vu yaasa; u daa bɔrigi ni, ka ti nya u yaasa.’ ”

Currently Selected:

LUUKI 15: maw

Highlight

Copy