LUUKI 16

1Tɔ; ka Yisa daa laa n‑yɛli u nyaandɔliba maa, ni, “Bundaansɔ n daa bɛ ni, m‑mari u tuntunsɔ ŋɔn daa su u arizikki tuma fukumsi zaa. Ka ba daa kyɛ bundaana wa saani na nti wulisi u, ni, u tuntumna maa diri la u ligri maa yɔriyɔri. 2Dizugu ka bundaana maa daa booli u na n‑yɛli u, ‘Ka bɔ yɛttɔ'a ka n wumni zaŋŋi n‑kyaŋŋi i saani wa? Kyɛma nti sɔbi laasaabu gbaŋŋu zaŋŋi n‑kyaŋŋi n yɛliseesi an bɛ i nuu ni la zaa, ka mari na n‑ti ma; ka i ku laa n‑su n tuma maa fukumsi yaasa!’ 3Ka doo maa daa yɛli u sufu ni, ni, ‘N yi ya niŋi la wula, n daana ŋɔn ya yiisi ma u tuma maa ni wa? N ka yaa di nin toaai n‑kɔa; di mun laa m‑mari ma vi ni m maanni bara.’, ni, 4‘Tɔ! M baŋŋiya man nin niŋi seem din nin kyɛ ka niriba nin deaai ma ba yiya ni, ba yi ti kari ma n kpa wa tuma wa ni m‑basi sahanseaa la!’ 5Ka dizugu u daa la'asi la ninvugseeba ban di u daana sama maa zaa, yinniyinni: ka daŋŋi m‑boosi tooni daana maa, ni, u daana samni ala m bɛ u saani? 6- ka u daa labsi n‑yɛli, ni, kpaŋmana kɔbga; ka u daa yɛli u, ‘Tɔ, deaam i samni gbaŋŋu ya'abi n‑takki n‑sɔbi, ni, kpaŋmana pisinu!’ 7Ka daa laa m‑boosi ŋɔn pa tooni daana maa zugu gba, ni, u daana samni ala m bɛ u saani? ka u labsi n‑yɛli, ni, kabootu kɔbga; ka u daa yɛli u, ‘Deaam i samni gbaŋŋu ya'abi n‑takki n‑sɔbi, ni, bootu pisinii!’ 8Ka u daana ŋɔn daa baŋŋi tumbeeri daana wa ŋɔn niŋi seem wa, u daa yɛli, ‘Wooy! U mari la yɛm pam!’ Dama duniya wa ninvugbeeri mari la yɛm zaŋŋi n‑kyaŋŋi ba duniya wa yɛla n‑gaari ban dɔli neesim soori maa ŋɔn mari seem.”

9Ni, “N ya yɛli ya ni, ni, duniya wa ligri nyɛ la bunyɔya: ya zaŋŋma a m‑bɔ niriba zoori, ka lala nin kyɛ ka a yi ti gaari ka kyɛ ya sahanseaa maa, ya zɔdima nin zaŋŋi ya n‑niŋi ba yiri maasim ni, saha din ka tɔriga. 10Dama ba yi kyɛ ka ninvugsɔ su yɛttɔ'abisi fukumsi ka u zɛ yimmu, ba yi ti kyɛ ka u su yɛttɔ'akara gba u nin zɛ yummu. Amaa ninvugsɔ ŋɔn su yɛttɔ'abisi ka ka yɛdda a puuni, ŋɔn nin laa n‑kɔŋŋi yɛdda yɛttɔ'akara gba puuni. 11Dizugu ya yi bu zɛ yimmu zaŋŋi n‑kyaŋŋi duniya wa la'ayɔya yɛla, ŋɔni nin lee nin sakki n‑zaŋŋi arizikki maŋni n‑niŋi ya nuu ni. 12Bee ba yi zaŋŋi sɔ bunni n‑niŋi ya nuu ni ka ya bu zɛ yimmu, ŋɔni n lee nin zaŋŋi ya mammaŋŋa dinni n‑ti ya? 13Ninvugyinni ku toaai n‑leebi dugmadima ayi daabri: see ka u za'asi yinni yɛla ka wuri yinni la, bee u tibgi yinni la, ka zeem ŋɔnla. Ya ku toaai n‑kyɛ ka Naawunni su ya yɛla ka laa n‑kyɛ ka ligri gba su ya.”

14Tɔ; ka Farisii dima daa nyɛ ban wuri ligri pam: ba daa wum Yisa ŋɔn daa yɛli seem maa ka ba daa maanni u ansarisi. 15Ka u yɛli ba, “Yarima n nyɛ ban boori ni ninsaala nya ya yɛla n‑yɛli, ni yɛlimaŋni niriba n nyɛ ya; amaa Naawunni ŋɔn mi din bɛ ya sufu puuni. Ninsaalidima ŋɔn tibgri bunseelli pam la nyɛ la Naawunni ŋɔn kyisiri seelli.” 16Ni, “Musa zaaligudima ni anabidima sɔppu yɛla n daa pun bɛ ni, halli ka Gyɔni ti kyɛ na; amaa di saha zaŋŋi n‑kyɛnna ba na kur moonni Naawunni naam lahabasuŋŋu ka sɔkam zaa zaŋŋi kpeeŋŋu m‑moori ni u kpɛ di maasim ni.” 17Ni, “Musa zaaligu muna - arizana ni duniya zaa yi ti gaari m‑basi, di bu tɔa; amaa zaaligu bumbila fiiŋ gba basibu tɔ ni halli nti yakki.” 18Ni, “Ŋɔnkam kari u pɔ'a ka laa n‑di pɔ'asɔ tumni la zina, ka dɔsɔ ŋɔn di lala pɔ'a maa gba tumni la zina.”

19Ka Yisa daa laa n‑yɛli, “Bundaansɔ n daa bɛ ni, n‑yeeri kparikara ni bunyeerisuma zaa, ka diri u sufu yuubu bundira dabsiri kam zaa. 20Ka faradaansɔ mun gba daa bɛ ni, ka u ningbina zaa daa niŋi nɔra: doo wa yuuri daa boonni la Lazarusi. Ka beoo kam ka ŋɔn Lazarusi daa yi kyɛnni bundaana wa yiri za'anɔri ni na n‑dɔ bɛni. 21U daa yi dɔya m‑boori la bundaana maa bundirikyɛba ti lu tiŋŋa ka u piisi n‑di, ka baasi kur kyɛnni na n‑leenni u nɔra maa. 22Tɔ, di daa niŋi lala, ka faradaana maa daa ti kpi, ka malaakadima zaŋŋi u n‑taasi ti yaaba Ibrahim saani. Ka bundaana maa gba daa ti kpi, ka ba sɔ'ai u. 23Ka ŋɔn mun daa kyaŋŋi nti bɛ kpiimma ŋɔn bɛ seela n‑nyari wahala la, ka daa wukki u zugu n‑gɔsi saazugu n‑nya ti yaaba Ibrahim wa'aligu sa, ka Lazarusi bɛ u saani. 24Ka bundaana maa daa tasi n‑yɛli, ‘Ti Yaaba Ibrahim, zɔm ma namboo, ka tum Lazarusi ka u zaŋŋi u nubila n‑tum koom ni n‑tɔkki n‑niŋi n zilimni wa ni na, ka ka maai; ka n diri wahala pam bugum wa puuni.’ 25Ka Ibrahim yɛli u, ‘M biiya, teaam nyin daa bɛ i nyɔvuri sahanseaa la yɛla, ni, i daa nyari i sufu yuubu, sahanseaa ka Lazarusi mun daa nyari wahala. Amaa pampaŋŋɔ ŋɔn sufu maaya, ka nyin mun gba yi bɛ wahala ni. 26Din paasi dinŋɔ zugu, bɔ'atitaari n dɔya tirim ni yarima sunsukkuni, ka sɔ ku toaai n‑yi ti saani n‑yakki ka m‑paai ya saani sa, ka sɔ mun gba ku toaai n‑yi bɛni n‑kyɛ ti saani na.’ 27Di saha ka bundaana maa daa yɛli, ‘M Ba! N susiri i ni, ni, i tum Lazarusi ni u kyaŋŋi m ba yiri ni, 28dama m mabiisi anu na bɛ ni, ka u kyaŋŋi nti sɛ'asi ba ni ba di kyɛ na n‑kpɛ man ŋɔn bɛ wahala seaa wa ni.’ 29Ka Ibrahim daa labsi n‑yɛli u, ni, ‘Musa sɔppu, ni anabidima dinni, bɛ la ba saani, dizugu ba wumma ba yɛligu ka sɛ'asi ba mammansi.’ 30Ka bundaana maa laa n‑yɛli, ‘N Yaaba Ibrahim, pa lala. Amaa sɔ mun yi da neaai kum ni n‑kyaŋŋi ba saani nti yɛli ba, ba da naa n‑takki ba beesigu n‑niŋi tuuba.’ 31Ka u yɛli u, ‘Ba yi ku niŋi Musa ni anabidima yɛligu yɛdda, halli sɔ yi neaai kum ni n‑kyaŋŋi nti yɛli ba, ba ku niŋi u gba yɛligu maa yɛdda.’ ”

Currently Selected:

LUUKI 16: maw

Highlight

Copy