LUUKI 17

1Ka Yisa daa yɛli u nyaandɔliba maa, ni, “Di ku toaai n‑niŋi ka yɛttɔ'abeeri bu paari ya na, yɛttɔ'aseesi an lusiri niriba n‑kpeesiri tumbeeri ni. Amaa ninvugsɔ ŋɔn taasi a na muna - waay, waay, waay! 2Ba yi da zaŋŋi neeri n‑lɔ di daama nangoori ni ka zaŋŋi u n‑lɔsi mɔ'azuliŋŋu ni, di da sɔ u zugu n‑gaari u kyɛ ka bibisi wa yinni lu n‑kpɛ tumbeeri ni.” 3Ni, “Ya gbaam ya mansi suŋŋa! I mabiiya yi tum i taalli, nyin sɛ'asim u; ka u yi deaai u galinsi maa, nyin kyɛri u taalli m‑pɛŋŋi u. 4Halli u yi ti tum i taalli napɔmbuyɔpɔi dahinyinni ka ŋmaligi buyɔpɔi n‑yɛli i, ni, ‘N galimiya.’ nyin kyɛri u taalli m‑pɛŋŋi u.” 5Tɔ, ka tuumudima maa daa yɛli ba dugma, ni, “Paasim ti yɛdda!” 6Ka u daa labsi n‑yɛli ba, “Ya yi mari yɛdda ka di sa'ai hoo zinzam beelli, ya nin toaai n‑yɛli kinkaŋŋa wa, ni, ka voaama ka zaazii wa ni n‑kyaŋŋi nti sa mɔ'ari puuni, ka di nin niŋi lala.”

7Ka Yisa daa boosi ba, ni, “Ya puuni ŋɔni n lee m‑mari u daabri ka u koora, bee, ka u guri la bunkɔbri, ka u ti yi moo na ka u di yɛli u, ‘Kyɛm na nti zinni n‑di bundirigu.’ 8Kala, i ku yɛli u, ni, u kyɛm na n‑dugi bundirigu na nti zaali ka i di ka nyu pɔi, ka u mun naayi kyaŋŋi nti maali u siri n‑zinni n‑di ka nyu? 9Ka daabri maa ŋɔn tum lala maa, i nin puusi u dizugu? Ay! ban zaali u tunseesi maa nla. 10Dizugu lala n nyɛ di#:- ya gba yi niŋi ban zaali ya ni ya niŋi seem maa zaa, ya yɛlima, ni, ‘Ti bu sumni pɛ'abu, dama ti tum la ti tuma ŋɔn nyɛ seelli kɔkɔa.’ ”

11Tɔ: ka Yisa ŋɔn daa ti yi soori zugu n‑wa Gyɛrusalɛm, u daa dɔli Samɛrii ni Galilii tingbana sunsukkuni n‑gatta. 12N‑kpeeri tinkpanseaa ni, ka kɔnsi piiya daa ti kyirigi u. 13Ba daa zɛ la wa'aligu sa ka tasi pampam n‑yɛli u, “Ti Ba Yisa, zɔm ti namboo!” 14Ka Yisa ŋɔn daa nya ba lala maa, u daa yɛli ba, “Ya kyɛma nti zaŋŋi ya mansi n‑wulisi maalimaanniba.” Ban daa ŋmaligi n‑kyɛnni maa, ba daa nya alaafɛ zaa. 15Ka ba ninvugyinni ŋɔn daa ti nya ka u kpaŋŋi maa n‑naai, 16u daa ŋmaligi n‑labi Yisa saani na, ka kur kaasiri pampam m‑pɛ'ari Naawunni, 17halli nti sɔmni Yisa tooni m‑puusiri u. Doo maa mun daa nyɛ la Samɛrii nira. Di saha ka Yisa boosi u, ni, “Pa ya niriba piiya n da kpaŋŋi maa? 18Ka niriba awai la kpalim m‑bɛ la yani? Bee sɔsɔ bu labi na ni u ti pɛ'ai Naawunni na'ala tinzuŋŋu nira wa kɔkɔa?” 19Ka ŋmaligi n‑yɛli u, “Doaama! Ka i yɛdda niŋbu zugu ka i kpaŋŋi.”

20Farisiseeba daa ti boosi Yisa, ni, “Bɔ saha ka Naawunni naam maa ti ya m‑piili?” Ka u gyɛrigi n‑yɛli ba, “Naawunni naam piiligu pa la niriba ŋɔn gɔsiri n‑nyari bunseelli. 21Bee, sɔ di yɛli, ‘Nyama, di bɛ kpa wa!’, bee, ‘Di bɛ kpa sa!’ Dama Naawunni naam pun bɛ la ya saani.” 22Ka Yisa daa yɛli u nyaandɔliba maa, ni, “Saha kyɛnni na ka ya nin ti boori ni ya nya man Ninsaala Bii saha wa dabsiri yinni gba, ka ku nya ka. 23Niriba nin ti yɛli ya, ni, ‘Nnya kpa sa!’, bee, ‘Nnya kpa wa!’ - yan di kyaŋŋi, ya mun di dɔli ba. 24Dama Ninsaala Bii dabsiri maa yi ti paai, u nin ŋmani hoo saa ŋɔn yi nya'asiri la, n‑neaai sangbana gbinni n‑yi ya'ari wa zaŋŋi n‑kyaŋŋi ya'ari wa sa. 25Amaa faasee ka u daŋŋi n‑di wahala pam pɔi, ka zuna niriba ti za'asi u yɛla ka zeem u. 26Ka din daa kur niŋi seem Nuhu saha la, lala ka di ti ya niŋi Ninsaala Bii gba dabsiri maa daari. 27Niriba daa diri ni ka nyuura di dabsiri maa, ka diri pɔ'aba ka zaŋŋni ba bipunsi n‑tiri dɔppa, halli nti paai Nuhu ŋɔn daa ti kpɛ nyarintitaari maa ni dahinseaa maa. Di nyaaŋŋa ka koom daa kyɛ na nti di ba zaa. 28Lɔti saha la gba daa nyɛ la lala. Ba daa kur diri ni ka nyuura, ka daara, ka koosira, ka butti bumbura, ka meeri yiya; 29halli nti paai Lɔti ŋɔn daa yi Sɔdoom tiŋŋa na dahinseaa maa, ka bugum daa yi saazugu na, ni farinwuta bugum, n‑laŋŋi n‑di ba zaa. 30Lala ka di nin ti niŋi Ninsaala Bii gba dabsiri maa yi ti yi paalu. 31Dindaari maa ka ninvugsɔ ŋɔn ti bɛ piiya duu zugu ka u neema kpalim m‑bɛ duu puuni, u di yɛli, ni, u sigi na n‑kpɛ n‑zaŋŋi a. Ka ŋɔn mun bɛ puu ni, ŋɔn di labi u nyaaŋŋa n‑kuli. 32Ya teaama din daa niŋi Lɔti pɔ'a seem la. 33Ŋɔnkam boori ni u tuligi u nyɔvuri nin ti sa'am ka m‑basi, ka ŋɔnkam sakki ni u nyɔvuri sa'amna, ŋɔn mun nin ti nya nyɔvuri ni yɛlimaŋni. 34N yɛtti ya wa, ni, di daari maa ka niriba ayi nin ti la'am n‑dɔ bundoaa yinni zugu yuŋŋu, ka Naawunni nin ti kpikki ninvugyinni ka kyɛ ŋɔnla. 35-36Ka pɔ'aba ayi nin ti la'am n‑neemni ba kyi neeri zugu, ka Naawunni kpikki yinni ka kyɛ ŋɔnla.” 37Ka u nyaandɔliba maa boosi u, “Ti dugma, yani zii nla?” Ka u yɛli ba “Bunkpiiŋŋu ŋɔn bɛ luginseaa, bɛni ka zuusi la'amni taaba m‑bɛ ni.”

Currently Selected:

LUUKI 17: maw

Highlight

Copy