LUUKI 22

1Tɔ. Bundiripaalli Kyuu saha daa pɔtta, ban boonni Yakki-n‑Gaari la. 2Ka gyeeŋŋu kpambaya ni zaaligu karimbadima maa daa boori sɔseaa ban nin zaŋŋi n‑gbaai Yisa, amaa ba daa zɔri zama maa dabeem. 3Di saha ka Sintaani daa kpɛ Yisa nyaandɔlisɔ sufu ni. Nyaandɔliba piiya ni ayi maa ni yinni n daa nyɛ u, ka u yuuri boonni Gyuudasi Isikariyɔti. 4Ka u daa kyaŋŋi gyeeŋŋu kpambaya maa ni Gyeeŋŋu Yiri Pirinsi toondaandima saani nti tɔ'asi ŋɔn nin niŋi seem n‑figsi Yisa n‑niŋi ba nuusi ni. 5Ba sufu daa maaya ŋɔn daa yɛli ba lala yɛttɔ'a maa zugu, ka ba daa sakki ni ba ya n‑ti u la ligri dizugu. 6Ka Gyuudasi daa sakki lala, ka daa piili m‑boori sɔseaa ŋɔn nin dɔli n‑zaŋŋi Yisa n‑ti ba, ka di bɛ luginseaa ka zama maa ŋɔn ka ni.

7Kyuu maa dabsiri daa paai na, peesi kɔribu dabsiri maa, 8ka Yisa daa tum Piita ni Gyɔni n‑yɛli ba, “Ya kyam nti sɛ'asi Yakki-n‑Gaari Kyuu diibu yɛla n‑ti ti ka ti di.” 9Ka ba labsi m‑boosi u, ni, “Yɛni ka i boori ni ti kpɛ n‑sɛ'asi?” 10Ka Yisa daa labsi n‑yɛli ba, “Nyama ya yi kur ti kpeeri timpuuni, doo nin paai ya na - dɔsɔ ŋɔn ziiri koom la: ya dɔla u nyaaŋŋa n‑kyaŋŋi n‑kpɛ ŋɔn kpeeri yiri seaa ni, 11ka yɛli yiri maa daana, ni, ya Karimba la ya m‑boosi u m‑baŋŋi dukani ka ŋɔn ni u nyaaŋŋa ya n‑kpɛ n‑di ba kyuu bundirigu maa? 12Ka u nin wulisi ya dutitaari gyirambisa zugu ban pun sɛ'asi seaa n‑zaali. Ya sɛ'asim n‑ti ti bɛni.” 13Ka ban daa kyaŋŋi maa, di daa niŋi ba hoo ŋɔn pun yɛli ba seem maa, ka ba daa sɛ'asi kyuu maa siri.

14Tɔ; ka kyuu saha ŋɔn daa ti paai na, Yisa ni u nyaandɔliba daa la'am n‑zinni. 15Ka u daa yɛli ba, ni, “Nimmoaa ka m pun boori ni mani ni yarima la'am n‑di Yakki-n‑Gaari Kyuu wa pɔi ka n wahala diibu saha naayi paai. 16N yɛtti ya ni, ni, n ku laa n‑di ka yaasa, halli ni Naawunni naam saha, ka kyumaŋni maa ti di.” 17Ka u daa zaŋŋi bunnyuura kɔbeaa la m‑puusi Naawunni ka yɛli “Ya deaam n‑nyu, ka ti taaba! 18Dama n yɛtti ya ni, ni, zuna zaŋŋi n‑kyɛnna n ku laa n‑nyu tiwala daam wa taabu halli ka Naawunni naam ti kyɛ na.” 19Ka u daa zaŋŋi diseebu m‑puusi pɛ'abu ka ŋmaai n‑zaŋŋi n‑tisi ba, ka yɛli, “N ningbina nla. N zaŋŋi a m‑pa talima yarima zugu; lala ka ya niŋma ka teaari n yɛla.” 20Ka bundira maa diibu nyaaŋŋa ka u daa laa n‑zaŋŋi kɔbeaa n‑niŋi lala yaasa, ka yɛli, “Nangbanyinni zaalipaalli maa nla; n ziim ŋɔn nin yi na, ka di nin maali lala zaaligu maa n‑ti ya.” 21Ka laa n‑yɛli ba, ni, “Ya nyama! Mani ni dɔsɔ ŋɔn ya n‑yi n nyaaŋŋa la n la'amni n‑diri kpa wa. 22Man Ninsaala Bii maa nin bakki n‑kyaŋŋi kaman din pun lɔ seem, amaa ŋɔn mun yi n nyaaŋŋa n‑figsi ma n‑ti n dindaandima maa - di daama yɛla tɔ ni!” 23Ka ba daa piili m‑boosiri taaba, ni, “Ŋɔni n lee n‑nyɛ u?”

24Tɔ; di saha ka Yisa nyaandɔliba maa daa ŋmeeri taaba nangbankpeemni ni ba nya ŋɔni n‑gaari u kpeaa ba puuni. 25Ka Yisa yɛli ba, “Ban bu gyeemni Naawunni la saani, ba nadima n su ba yɛla ni kpeeŋŋu. Ba ninvugseeba ban su fukumsi maa n niŋni ba putoo, ka ba boonni ba, ni, ‘Suŋŋniba’! 26Amaa yarim saani di pa lala, see ka ya kyɛ ka ŋɔn nyɛ ya zaa kpeema leebi ya biiya, ka ya zuguraana leebi ŋɔn tumni bii tuma n‑tiri ya zaa.” 27Ka boosi ba, ni, “Ammi, ŋɔn ziya ka ba kpukkri bundira na n‑tiri u, ni ŋɔn kpukkri bundira na n‑tiri ŋɔn ziya la, ba ŋɔni n lee n‑gaari u kpeaa? - Pa ŋɔn ziya maa n gaari? Amaa man bɛ la ya saani kaman ŋɔn kpukkri bundira n‑tiri ya. 28Ka yarima mun nyɛ ban pun kpalim m‑bɛ n saani, n wahala diibu ni, halli ni zuna. 29Dizugu m Ba Naawunni ŋɔn zaali ma naam seem la, lala ka n gba zaali ya naam. 30Mani ni yarima nin ti la'am n‑zinni n naam zii maa ni, n‑diri ka nyuura. Di saha ya nin ti zinni naam gbana zugu n‑katti Izraɛli za'anɔya pii ni ayi niriba sariya.”

31Ni, “Nyin Saimoon, nyama! Sintaani boori ni u zamsi ya hoo ban yeeli kyi n‑nya kasuma seem la. 32Amaa m pun susi Naawunni n‑ti nyini, ni, i yɛdda di fiilim. Ka i yi ti ŋmaligi n‑labi n saani na yaasa, nyin kpamsim i mabiisi wa gba yɛdda.” 33Ka u daa labsi n‑yɛli u, ni, “N Dugma, m maali siri ni n dɔli i halli nti kpɛ sarika duu ni, halli nti kpi gba!” 34Ka Yisa yɛli u, “Yɛlimaŋni ka n yɛli i wa, nɔroo bu ya n‑kum zuna yuŋŋu wa halli ka i ti kyiisi napɔmbuta, ni, i zi ma.”

35Di saha ka u daa boosi ba zaa, ni, “Man ŋɔn daa tum ya ka ya bu zi baagyi bee la'abooriga bee namna sahanseaa la, seelli daa pɔsigi ya?” Ka ba daa gyɛrigi n‑yɛli u, ni, “Ay.” 36Ka u labsi n‑yɛli ba, “Tɔ; pampaŋŋɔ ŋɔna, ŋɔn mari baagyi ŋɔn zaŋŋma ka, ka ŋɔn mari la'abooriga gba zaŋŋma ka; halli ŋɔn ka takoobi ŋɔn koosim u kparigu n‑da. 37Dama di sɔbi n‑dooli, ni, ‘Ba zaŋŋi u n‑kyɛ ka u la'am m‑paasi tumbeeri dima ziiya.’, ka lala m‑paari ma na. Yɛlimaŋni n yɛla zaa naari ni maa.” 38Ka u nyaandɔliba maa yɛli u, “Ti Dugma, nyama, takoobidima ayi nŋɔa!”; ka u yɛli ba, “Tɔ. Di sakkiya!”

39Tɔ; ka u daa yi n‑kyaŋŋi Ɔlivii Zoori ziiya hoo u yuŋŋu kam soori ŋɔn daa bɛ seem la, ka u nyaandɔliba maa daa dɔli u. 40Ŋɔn daa ti paai bɛni, u daa yɛli u nyaandɔliba maa, ni, “Ya susim Naawunni ka lala nin kyɛ ka ba ku zamsi ya halli ka ya ti lu.” 41Di saha maa ka u tugsi tooni beela - n‑sa'asi hoo kugri lɔppu wɔ'alim, 42ka gbaani tiŋŋa n‑susi Naawunni n‑yɛli, “M Ba, di yi nyɛ la i yuubu ŋɔn bɛ seem, kyɛ ka namsigu kɔbeaa wa gaari ka kyɛ ma: di kyɛ ka n nyu di! - Amaa di pa man ŋɔn boori seem la niŋma, amaa nyin ŋɔn boori seem maa niŋma!” 43Ka malaaka yi arizana ni n‑kyɛ u saani na n‑kpamsiri u. 44Ka u sufu ŋɔn daa sa'am pam zugu, u daa laa n‑gbaai u wunsusigu ni nimmoaa, halli ka u wɔligu ti pusiri n‑ŋmanni hoo ziim n‑tɔ'ari n‑luri tiŋŋa. 45Tɔ, ka ŋɔn daa doaai wunsusigu maa ni, u daa labi u nyaandɔliba maa saani. N‑daa paai, ka ba daa gbisiri la ba sufusa'aŋŋu zugu. 46Ka u boosi ba, ni, “Wula ka ya gbisira? Ya doaama n‑susi Naawunni ka lala nin kyɛ ka ba ku zamsi ya halli ka ya ti lu.”

47Tɔ; ka ŋɔn daa na kur tɔ'asiri sahanseaa maa, niriba pam daa kyɛ u saani na. Ka dɔsɔ ŋɔn yuuri boonni Gyuudasi, sɔ ŋɔn daa nyɛ u nyaandɔliba pii ni ayi maa yinni, daa bɛ ba tooni. Ka u daa paai Yisa saani na ni u ti puusi u suŋŋasuŋŋa, 48ka Yisa boosi u, ni, “Gyuudasi, i nin kyɛ ka i puusigu la figsi ma n‑niŋi n dindaandima nuusi ni, bee wula?” 49Ka u nyaaŋŋa dima daa baŋŋi din ya n‑niŋi, ka daa yɛli, “Ti Dugma, ti zaŋŋma takoobi n‑kyɛ ba, bee?”; 50ka ba yinni daa zaŋŋi u takoobi n‑kyɛ kpambaya bisɔ n‑fikki u nudirigu tubri m‑basi: 51amaa ka Yisa yɛli ba, “Ya di niŋni lala!”, ka daa siisi doo maa tubri maa n‑tibi u. 52Di saha maa ka Yisa tɔ'asi gyeeŋŋu toondaandima ni Gyeeŋŋu Yiri Pirinsi zuguraandima, ni kpamma maa, bankam zaa yi na ni ba ti gbaai u, m‑boosi ba, ni, “N nyɛ la ban zabri ka faari neema maa ninvugsɔ, bee wula? - ka ya mari takoobidima ni dɔya n‑yi na? 53Beoo kam n daa bɛ la ya saani Naawunni Gyeeŋŋu Yiri maa ni, ka ya daa bu zaŋŋi ya nuusi n‑gbaai ma. Amaa saha wa nyɛ la ya dinni, ni zibsim yiiko gba!”

54Tɔ; ka ba daa gbaai u n‑zaŋŋi u n‑kyaŋŋi Gyeeŋŋu Toondaana la yiri. Ka Piita daa sɔ'ai n‑dɔli Yisa nyaaŋŋa sa. 55Ka ban daa maali bugum dundɔŋŋu sunsukkuni ka la'am n‑zi bɛni maa, Piita gba daa zi ba saani. 56Ka pɔ'asarisɔ nya ŋɔn zinni bugum maa ni maa, ka gɔsi u ka yɛli ba, “Doo wa gba daa dɔli la Yisa!” 57Amaa ka Piita kyiisi n‑yɛli, “Nyin pɔ'asariga wa, n zi u!” 58Ka di toaai beela ka sɔ gba laa n‑nya u ka yɛli u, “I gba nyɛ la niriba wa yinni!” Ka Piita yɛli u, “N zɔa, m pa ba yinni.” 59Ka di daa yuui beela, hoo hawa yinni, ka dɔsɔ gba daa ti tɔ'asi nimmoosi n‑yɛli, ni, “Yɛlimaŋni doo wa gba daa dɔli u, dama u gba nyɛ la Galilii nira.” 60Amaa ka Piita yɛli “N zɔa, m bu mi nyin tɔ'asi sɔ maa yɛla.” Ka ŋɔn daa kur bɛ ni n‑tɔ'asiri maa, nɔroo kum. 61Ka ti Dugma Yisa ŋmaligi n‑gɔsi u, ka Piita daa teaai Yisa ŋɔn daa pun yɛli u seem la, ni, “I nin kyiisi ma napɔmbuta pɔi, ka nɔroo naayi kum.” 62Ka Piita zɔ n‑yi samanni ka kumni kunkuma.

63Di saha maa ka ninvugseeba ban daa mari Yisa maa daa maanni u ansarisi ka buuri u; 64ka zaŋŋi bunni n‑vili u nini ka boosi u, ni, “Nyin anabi wa, bugma m‑baŋŋi! Ŋɔni n ŋmɛ i wa?” 65Ka ba daa tɔ'asi yɛttɔ'a pam n‑gyɛnni u ka tuuri u.

66Tɔ; ka beoo ŋɔn daa ti neaai, Izraɛli dima kpamma zaa daa la'amiya, halli ba gyeeŋŋu toondaandima ni karimbadima zaa gba, ka zaŋŋi Yisa n‑taasi ba la'aŋŋu maa na. 67Ka yɛli u “I yi siri nyɛ la Masiiya ŋɔn ya fa ti m‑basi ka leebi naaba la, nyin yɛlim ti!” Amaa ka u labsi n‑yɛli, “Halli n yi ti yɛli ya, ya ku niŋi yɛdda. 68M mun yi na boosi ya boosigu, ya ku gyɛrigi ma. 69Amaa pampaŋŋɔ zaŋŋi n‑kyɛnna Ninsaala Bii maa ya n‑zinni Naawunni Ŋɔn Su Yiiko nudirigu ya'ari.” 70Ka ba daa daa boosi u, ni, “Dinŋɔna, Naawunni Bii n nyɛ i?”; ka u yɛli ba, ni, “Tɔ, ya yɛliya!” 71Ka ba yɛli, “Ti bu laa m‑boori sɛharadima yaasa, bee bɔa? Ti mammansi pun wum u noori ni yɛttɔ'a!”

Currently Selected:

LUUKI 22: maw

Highlight

Copy