MATIYU 28

1Alahadaari, bɛkyikyeoo, ka Mariama, Magdala tiŋŋa pɔ'a la, ni u tɔ'ama la, daa kyaŋŋi ni ba ti gɔsi tampifeoo gballi maa. 2Di daa bu yuui ka tingbaŋŋu daa vibgi pam, ka ti Dugma malaaka daa yi arizana ni n‑sigi na n‑vuui gballi dunoori kugbiliŋŋu maa m‑biligi ka n‑yi kpaŋŋa n‑zinni ka zugu. 3Ka u nindaa nya'ari ni n‑ŋmanni hoo saa ŋɔn yi nya'asi seem la, ka u neema pɛligi hoo gumni. 4Dabeem daa gbaai gbaliguriba maa, halli ka ba ningbina kpi m‑maai hoo kum la. 5Ka malaaka maa daa tɔ'asi n‑yɛli pɔ'aba maa, ni, “Ya di kyɛ ka dabeem mari ya. M mi halli, ni, ya boori la Yisa ziiya, Nazarɛti dɔsɔ ban daa kpaasi la. 6U laa n‑ka kpa. U yigsiya hoo ŋɔn daa pun yɛli seem. Ya kyɛm na n‑nya, ŋɔn daa dɔ seela nŋɔa! 7Amaa ya kyɛm yooma n‑yɛli u nyaandɔliba, ni, u neaai kum ni ka u nin daŋŋi ya tooni n‑kyaŋŋi Galilii. Bɛni ka ya nin ti nya u. Ya nyama, m pun yɛli ya ni.” 8Di daa gyɛri pɔ'aba maa pam; dabeem daa mari ba, ni sufumaasim gba. Ka dizugu ba daa zɔ yooma n‑kyaŋŋi nti yɛli u nyaandɔliba maa. 9Di saha maa ka Yisa daa tuusi ba soori ni m‑puusi ba, ni, alaafɛa? Ba daa pɔri u saani na n‑gbaani u tooni m‑bɔbli u nɔba ka gyeemni u. 10Ka Yisa daa yɛli ba, ni, “Ya di zɔri dabeem. Ya kyɛma nti yɛli m mabiisi la, ni, ba kyɛm Galilii tingbaŋŋu ni - bɛni ka ba nin nya ma.”

11Tɔ: ka pɔ'aba maa ŋɔn daa ti yi soori, tɔbbiisi la seeba ban daa guri gballi maa daa labi timpuuni nti yɛli Gyeeŋŋu Toondaandima la seelli zaa din niŋi. 12Ka Toondaandima la daa la'asi kpamma zaa na nti zinni n‑ŋmɛ taaba saawara ka gbaai gbaari. Ba daa zaŋŋi la ligri pam n‑da tɔbbiisi maa noori 13ka yɛli, ni, sɔ yi ti boosi ba Yisa yɛla, ban yɛlima, ni, ba daa gbisiri ni yuŋŋu ka Yisa nyaandɔliba la kyɛ na n‑zu Yisa ningbiŋŋu la u tampifeoo gballi maa ni. 14Ni, “Gɔmna maa yi ti wum lala, ti nin tɔ'asi n‑ti u, ka kyɛ ka taaliseaa zaa ku gbaai ya.” 15Ka tɔbbiisi maa daa deaai ba ligri ka daa tum ban daa bulisi ba seem la. Di zugu lahabaari kanŋɔ na bɛ Yɛhudiya dima maa saani halli ni zuna.

16Yisa nyaandɔliba piiya ni yinni maa mun daa kyaŋŋi nti paai Galilii. Ba daa du zɔseaa Yisa ŋɔn daa pun wulisi ba ka yɛla maa zugu, 17ka bɛni ka ba daa nya u. Di saha ba daa gyeemni u ni, amaa baseeba daa birisiri ni. 18Yisa daa paai ba na ka yɛli ba, ni, “Ba ti ma la yiiko zaa duniya wa ni, ni arizana ni gba. 19Dizugu ya kyɛma n‑yi m‑paai duniya wa lugri kam zaa n‑wulisiri tinsi zaa niriba. Ya deaama ba n‑su Naawunni koom ya Ba Naawunni yuuri zugu, ni u Biiya, ni u Siiya Vuusim Kasi yuuri zugu gba. 20Ya wulisima ba, ni, ba dɔla man zaali ya noori seem maa zaa. Ka ya baŋŋma, ni, n nin bɛ ya saani, halli ni duniya wa saha maa naari.”

Currently Selected:

MATIYU 28: maw

Highlight

Copy