MAAKI 1

1Dinŋɔ n nyɛ lahabasuŋŋu maa, zaŋŋi n‑kyaŋŋi Yisa Kirisita Masiiya, Naawunni Bii maa. Di piili la kpa.

2Dinŋɔna Naawunni daa pun kyɛ ka Anabi Aizaaya sɔbi, ni:

“Nnya n tuumu maa nŋɔ,

N tumni u ni u ti daŋŋi i tooni:

Ŋɔna nin maali soori maa n‑ti i.”

3ni,

“Ya wumma!

Sɔ m bɛ moo ni n‑tasira,

Ni, ‘Ya maalim ti Dugma palli n‑ti u,

Ya sɛ'asim u sɔya zaa ka a tuusi kyippi!’ ”

4Tɔ; ka dizugu dɔsɔ n daa bɛ ni, ka u yuuri Gyɔni - ŋɔn daa suuri niriba Naawunni koom la n‑daa la. U daa bɛ la moo ni m‑moonna n‑yɛtti, ni, “Ya kyɛli ya tumbeeri m‑basi, ka lala zugu ya kyɛm na ka n su ya Naawunni koom, ka ŋɔn Naawunni nin kyɛ ya taalli zaa m‑pɛŋŋi ya.” 5Ka daadam daa la'am n‑yi u saani na pam; ba daa yi la Gyuudii tingbaŋŋu ni na, ni Gyɛrusalɛm tiŋŋa m‑paasi. Ka ba daa paai u na ka wulisiri ban tum tumbɛseesi maa, ka u daa su ba tumbeeri kyɛ-m‑pɛŋŋi kɔsuubu, Gyɔdin mɔ'ari la ni. 6Ŋɔn Gyɔni mun daa yɛ la arakoomi kɔbri kparigu, ka daa mari gbaŋŋu n‑loori u seaa, ka u diibu daa kur nyɛ la toori, ni siiri.

7Tɔ; ka Gyɔni daa moonni, ni, “Sɔ nin kyɛ n nyaaŋŋa na n‑kpeem n‑gaari ma, halli ka mani bu sumsi ni n kuntiri m‑pirigi u namna n‑tiri u. 8Ya nyama! - koom ka mani zaŋŋni n‑suuri ya wa, amaa ŋɔn mun nin zaŋŋi Sii Kasi Vuusim n‑suuri ya.”

9Di daa niŋiya ka Yisa daa yi Nazarɛti, tinseaa kan bɛ Galilii tingbaŋŋu ni la, ka daa kyɛ na nti kpɛ Gyɔdin mɔ'ari maa ni n‑su koom Gyɔni nuu ni. 10Ŋɔn daa ti yi koom maa ni na, u daa nya ka sangbana n bɔkki ka Sii maa daa sigri u zugu na. U daa gɔsi ka Sii maa gɔsibu daa ŋmani hoo naŋmanni ŋɔn bɛ seem la. 11Ka ba daa wum Naawunni kukɔri saazugu ni na, ni, “M bii n nyɛ i, ka n wuri i ni pam. N nini n tigi i.”

12Di saha ka Naawunni Siiya Vuusim Kasi daa zaŋŋi u n‑taasi yoo ni. 13Ka u daa bɛ bɛni dapisinaasi, ka Sintaani daa zamsiri u. U daa kpalim la bɛni, ka mooni bunkɔbri kɔkɔ n daa bɛ u saani, ka malaakadima daa guri u.

14Ka Naaba ŋɔn daa gbaai Gyɔni n‑kpari sahanseaa la, di saha ka Yisa daa kyaŋŋi m‑paai Galilii tingbaŋŋu ni n‑tɔ'asiri Naawunni lahabasuŋŋu maa yɛla. 15Ni, “Saha maa paaya; Naawunni naam la bɛ la ya saani. Ya takkma ya beebu, ni ya teesibeeri, ka niŋni lahabasuŋŋu maa yɛdda.”

16Ka u daa kyaŋŋi n‑dɔli Galilii mɔ'ari duuri la nti nya Saimoon ni u sunzɔ Anduru, ka ba daa lɔbri laaŋŋu mɔ'ari maa ni, dama ba daa tumni la zingbaariba tuma. 17Ka Yisa daa yɛli ba, “Ya dɔli ma na! N nin kyɛ ka ya leebi ninsaaligbaariba.” 18Yoomyooma ka ba daa basi ba laama maa ka dɔli u. 19Ŋɔn daa kyaŋŋi tooni beela maa, u daa nya Gyeemsi, Zɛbidii biiya, ni u sunzɔ Gyɔni, ka ba daa bɛ nyariŋŋu ni m‑maanni ba laama. 20Ka u daa booli ba, ni, ba dɔli u na, ka ba daa doaai n‑kyaŋŋi n‑dɔli u nyaaŋŋa, ka bakki ka kyɛ ba ba Zɛbidii, ni u tuntumniba, ka ba daa kpalim m‑bɛ nyariŋŋu maa ni.

21Ka ba daa kyaŋŋi nti paai Kapirinyum. M‑paaya, ka Vuusim dabsa maa ni ka Yisa daa la'amni ni Kapirinyum dima n‑kpeeri wumpuusigu la'aŋŋu duu maa ni nti wulisiri ba. 22Di daa niŋi ba alahazibu pam ŋɔn daa tɔ'asiri yɛttɔ'amaŋni zugu, ka u bu birisira halli beela; ni, di pa la kaman zaaligu baŋŋniba la ŋɔn yi wulisiri seem la. 23Di saha maa ka dɔsɔ daa bɛ la'aŋŋu duu maa ni, ka arizimbeoo daa kur bɛ u ni; di daama daa kaasi 24ka yɛli, “Yisa nyin Nazarɛti doo wa! Wula ka i ya mukki ti? I kyɛnni na ni i ti sa'am ti, bee? M mi nyin ŋɔn nyɛ sɔa: ni, nyin nyɛ la ŋɔn nyɛ bunkasikasi ka yi Naawunni saani na!” 25Amaa Yisa daa nyikki u, ka tasi u n‑yɛli, ni, “Sina i vuuri ka yi na ka kyɛ u!” 26Ka arizimbeoo maa daa dam doo maa n‑lusi kyirigiligi, ka kaasi pam m‑bakki ka kyɛ doo maa. 27Ka di daa gyɛri ba zaasa, ka ba yi yɛtti taaba, “Bɔ nŋɔa? Wulisigu paalli nŋɔa! U tɔ'asiri la ni yiiko, halli u yɛtti arizimbeeri gba ka ba sakkri u noori.” 28Ka lahabaari wa daa gyiligi tiŋŋa maa yoomyooma, ka u yɛttɔ'a n daa bɛ Galilii tinsi zaa ni.

29Ŋɔn daa yi la'aŋŋu duu maa, u daa kyaŋŋi n‑ti kpɛ Saimoon ni Anduru yiri ni, ŋɔna ni Gyeemsi ni Gyɔni. 30Di saha ka waari n daa mari Saimoon deempɔ'a ka u ningbina daa bii, ka u dɔya. Ka ba daa yɛli Yisa u yɛla. 31Ka u gaari tooni n‑gbaai pɔ'a maa nuu n‑suŋŋi u ka u doaai n‑zaani, ka u dooru daa basi u, ka u daa yi na n‑tum n‑ti ba. 32Di daari zaanɔyuŋŋu, wuntaŋŋa ŋɔn daa ti luri maa, ba daa mari seeba ban beera, ni arizimbeeri ŋɔn daa bɛ seeba zugri la, n‑kyɛ u saani na; 33ka tiŋŋa maa niriba zaa daa la'asi na nti mugi yiri maa za'anɔri. 34Ka u daa tibi ba dooribeeri maa zaa ka kari arizimbeeri pam n‑yiisi niriba saani. U daa bu sakki ni arizimbeeri maa tɔ'asira, dama ba daa mi ŋɔn nyɛ sɔa.

35Ka din daa kaai beoo asuba pinipini, u daa yisigi n‑yi. U daa kyaŋŋi nti kpɛ moo ni nti bɛ u kɔkɔ m‑puusiri Naawunni. 36Amaa Saimoon ni u taaba maa daa bɔ m‑bɔ 37nti nya u, n‑yɛli u, ni, “Ba zaasa boori la i ziiya.” 38Ka ŋɔn mun daa labsi n‑yɛli ba, “Ya kyɛ ka ti gaari n‑kyaŋŋi tingbaŋŋu wa tinkpanseesi ni, bɛni gba ka n ya mooli lahabaari maa: dama dinŋɔ zugu ka n yi na.” 39Lala ka u daa yi n‑gyiligi Galilii tinsi zaa n‑yiisiri wa'azu ba la'aŋŋu duri ni, ka katti arizimbeeri daadam saani.

40Tɔ: ka kɔnsɔ daa ti kyɛ u saani na n‑gbaani u tooni n‑susiri u; u daa yɛli, ni, “I yi da sakki, i naa n‑kyɛ ka n kɔmni wa naai ka n kpɛ n‑taabi ni.” 41Ka Yisa daa zɔ u namboo ka daa teaai u nuu n‑siisi u, ka yɛli, “N sakkiya, di naama!” 42Ka di saha maa ka u kɔmni maa daa basi u ka u daa niŋi kasi. 43Ka Yisa daa kpaamni u ni nimmoaa n‑kyeoosi u: 44ka yɛli, ni, “Di yɛli seelli n‑ti sɔ zaa. Kur kyɛm nti zaŋŋi i maŋŋa n‑wulisi maalimaanna ka maali sariseesi Musa ŋɔn daa sɔbi n‑zaali zaŋŋi n‑kyaŋŋi kɔmni tippu zii la; dina n nin kyɛ ka ba baŋŋi, ni, i siri nya tippu.” 45Amaa doo maa daa yi n‑kyɛ ka sɔkam zaa wum lahabaari maa, halli ka di ti niŋi ka Yisa daa bu nyaŋŋi n‑kpɛ tiŋŋa kam puuni ka ba nya u, amaa u daa kpalim m‑bɛ la moo ni. Amaa di zaa yɔri, niriba daa yiiri la lugri kam n‑kyɛnni u saani na.

Currently Selected:

MAAKI 1: maw

Highlight

Copy