MATIYU 4

1Tɔ. Di saha ka Naawunni Siiya Vuusim Kasi daa zaŋŋi Yisa n‑taasi yoo ni, ka Sintaani daa zamsi u. 2Ka u daa bɛ bɛni n‑loori noori dapisinaasi, wuntaŋŋa ni yuŋŋu zaa, ka di dabsa maa daa ti gaari ka kɔm wum u. 3Ka Sintaani, yɔmsigu daana, daa kyɛ u saani na n‑yɛli u, ni, “I yi siri nyɛ la Naawunni biiya, i ku kyɛ ka kuga wa leebi bundira?” 4Ka u daa labsi n‑yɛli, ni, “Di pun sɔbi n‑dɔya, ni#:-

‘Pa bundirigu kɔkɔ zugu ka ninsaala bɛ ni,

Amaa yɛttɔ'a zaa an yiiri Naawunni noori ni na -

Anŋɔ zugu ka u bɛ ni.’ ”

5Ka Sintaani daa laa n‑zaŋŋi Yisa n‑taasi Gyɛrusalɛm tinkasi la ni, n‑zaŋŋi u n‑du n‑tɔm Naawunni Gyeeŋŋu Yiri saazugu sa. 6N‑yɛli u, ni, “I yi siri nyɛ la Naawunni biiya, i ku zaŋŋi i maŋŋa m‑basi tiŋŋa? Di sɔbi n‑dooli, ni#:-

‘Naawunni nin yɛli i yɛla n‑ti u malaakadima maa,

Ni, ba zaŋŋma ba nuusi n‑teebi i saazugu

Ka i napɔŋŋu ku tuui kugri zaa.’ ”

7Ka Yisa daa yɛli u, ni, “Ka di laa n‑sɔbi m‑paasi, ni, nyin di zamsi i Dugma Naawunni!”

8Di nyaaŋŋa ka Sintaani daa zaŋŋi u n‑kyaŋŋi n‑duusi n‑tɔm zɔwa'alli saazugu m‑bulisi u duniya puuni tinsi zaasa, ni a gyirima maa. 9Ka yɛli u, ni, “I yi ti gbaani tiŋŋa n‑gyeem ma Naawunni gyeeŋŋu, n nin zaŋŋi anŋɔ zaa n‑ti i.” 10Ka Yisa yɛli u, ni, “Kyɛma sa, Sintaani! Di pun sɔbi n‑dɔya, ni#:-

‘Naawunni yinni kɔkɔa,

Ŋɔn nyɛ ya Dugma la,

Ŋɔn sumsi gbaanigu ni gyeeŋŋu.’ ”

11Ka Sintaani ŋɔn daa yi zamsi u n‑naai maa, u daa bakki ni ka kyɛ u, ka malaakadima daa kyɛ na n‑guri u.

12Ka Yisa ŋɔn daa ti wum, ni, ba gbaai Gyɔni n‑kpari, u daa bakki n‑kyaŋŋi m‑paai Galilii tingbaŋŋu ni. 13U daa bu kpalim Nazarɛti tiŋŋa, amaa u daa kyaŋŋi nti bɛ Kapirinyum tiŋŋa ni, tinseaa kan zɛ mɔ'ari gbiriŋŋu ni, Zɛbulɔn ni Naftaali tingbana ziiya. 14Dinŋɔ daa kyɛ ka anabi Aizaaya ŋɔn daa yɛli seem la niŋi yɛlimaŋni, ni#:-

15“Zɛbulɔn tingbaŋŋu, wumma!

Naftaali tingbaŋŋu, wumma!

Yan bɛ teeku la soori maa,

Yan bɛ Gyɔdin mɔ'ari ya'ari sa:

Yan bɛ Galilii, saamma tiŋŋa la ni, gba, wumma!#:-

16Ya nyɛ la ban daa zi zibsim ni,

Amaa pampaŋŋɔ ya bɛ la neesim ni, nyain!

Ya daa zi la kum tiŋŋa libilibi,

Amaa neesim doaaya, ka di neaari ya zugu.”

17Di saha maa zaŋŋi n‑kyɛnna ka Yisa daa gbaai mooligu n‑tɔ'asiri Naawunni yɛla n‑yɛtti, ni, “Ya takkma ya beebu ni ya teesibeeri! Dama Arizana naam la bɛ la ya saani.”

18Ka Yisa daa kyɛnni n‑dɔli la Galilii mɔ'ari duuri la nti nya niriba ayi, Saimoon ni u tunzɔ Anduru, ka ba daa lɔbri ba laama mɔ'ari maa ni, dama ba daa tumni la zingbaariba tuma. 19Ka u daa yɛli ba, “Ya dɔli ma na! N nin kyɛ ka ya leebi ninsaaligbaariba.” 20Ka ba daa basi ba laama maa yoomyooma ka dɔli u. 21Ŋɔn daa yi bɛni n‑kyaŋŋi tooni, u daa nya niriba ayi yaasa m‑paasi, Gyeemsi, Zɛbidii biiya, ni u tunzɔ Gyɔni; ka ban ni ba ba Zɛbidii daa bɛ nyariŋŋu ni m‑maanni ba laama. Ka Yisa daa booli ba ni ba dɔli u na. 22Di saha ka ba daa bakki ka kyɛ nyariŋŋu maa, halli n‑kyɛ ba ba Zɛbidii gba, ka kyaŋŋi n‑dɔli Yisa nyaaŋŋa.

23Ka u daa gyiligi Galilii tinsi zaa n‑kpeeri ba la'aŋŋu duri ni n‑wulisiri ka moonni lahabasuŋŋu zaŋŋi n‑kyaŋŋi Arizana naam yɛla, ka tibri niriba ban daa beeri zaa bɛni ka dooru balimbalim m mari ba, bee, ban kɔŋŋni yaa ni alaafɛa. 24Tɔ; ka lahabaari zaŋŋi n‑kyaŋŋi u yɛla daa paai halli Siriiya tingbaŋŋu ni sa, ka niriba daa mari ba baaridima zaa n‑kyɛ u saani na, dooru ni beerim kam zaa ŋɔn mari seeba la, ni arizimbeeri ŋɔn daa kpɛ seeba, ni kpisinkpiiri ŋɔn daa gbaai seeba, ni ban nuusi bee ban gbaya n daa kpi la. Ka Yisa daa tibi ba zaa. 25Ka Galilii dima daadam pam daa yi na n‑dɔli u, ni Tinsi Piiya tingbaŋŋu dima, ni Gyɛrusalɛm tiŋŋa, ni Gyuudii tingbaŋŋu dima, ni tingbanseaa zaa an bɛ Gyɔdin mɔ'ari ya'ari wa sa.

Currently Selected:

MATIYU 4: maw

Highlight

Copy