San Lucas 5

^Xa Jesús ña xituꞌun xiꞌin ndia tava tiaka

1Saa kuu iin kii ndichi Jesús yuꞌu mini kaꞌnu ra nani Genesaret, ra kuaꞌa ka vi yuvi ndakutaꞌan, ra ndixaa na nuu ra, ra iin chindaꞌni taꞌan na ña kuni na kuni soꞌo na tuꞌun Ndioxi. 2Ra suvi yachin yuꞌu mini kan tu xini Jesús ndita vichi uvi itun vali xika nuu mini. Ra köo ka ixtoꞌo nu ñuꞌu ini nu, chi xa nuu va ndia ña ndakatia ndia inu ndia ña ^tiin ndia tiaka. 3Ra saa ndaa Jesús ini iin nu; ra kuenda ra Simón va kuvi nu. Ra nduku Jesús ña mani nuu ra, ña na sakundutiaꞌa ra loꞌo nu chi nuu xa kunu ka loꞌo mini kan. Ra saa sakundutiaꞌa ra nu, ra ndakunduꞌu Jesús ini nu ra xaꞌa ra sañaꞌa ra yuvi. 4Ra te ndiꞌi sañaꞌa ra na, ra saa ndikaꞌan ra xiꞌin ra Simón, kachi ra saa:

―Na koꞌo xiꞌin nu chi nuu kunu ra kaa, ra chikaa ndo inu ndo ña tiin ndo tiaka ―kachi ra xiꞌin ndia.

5Saa ndakuiin ra Simón, kachi ra saa:

―Tata Maestro, xa iinii ñuu ndaa ndixika ndi xaꞌa ri, ra ndia nii ri nditïin vi ndi. Ndi su tu xa mii kun kachi saa, ra vaꞌa, na chikaa tuku va ndi ña ―kachi ra.

6Ra saa chikaa tuku va ndia inu ndia. Ra kuaꞌa ka vi ri tiin ndia ra xaꞌa ndia ixita ndia inu, ra saa xaꞌa ndindata va ña xiꞌin ri. 7Ra saa ndixika ndaꞌa ndia nuu ndia taꞌan ndia, ndia ndoꞌni ini inka nu, ña na kixi ndia chindiee taꞌan ndia xiꞌin ndia. Ra saa xaa ndia kan chindiee taꞌan ndia xiꞌin ndia. Ra iin chitu ndaa va uvi saa nu xiꞌin tiaka, ra saloꞌo koyo nu xiꞌin ndia kaꞌa mini kan. 8Ra ta xini ra Simón ña xa Jesús, saa ra ndikun ndakusiti ra nuu ra, ra kachi ra saa:

―Tata, tiaa ra iyoo kuachi va kuvi yuꞌu, ndi su yoꞌo, ra ra yii va kuvi kun. Ña kan ke küvi kitaꞌan yu xiꞌin kun, ra vaꞌa ka na kutiaꞌa va kun nuu yu ―kachi ra xiꞌin Jesús.

9Saa chi ndakanda ni ini ra Simón xaꞌa ña kuaꞌa ni tiaka tiin ndia. Ra ndakanda ni tu ini ndia itaꞌan xiꞌin va ra. 10Ra ndakanda ni tu ini ra Jacobo, xiꞌin ra Juan ndia seꞌe ra Zebedeo, ndia itaꞌan xiꞌin ra Simón va. Ra saa ndikaꞌan Jesús xiꞌin ra Simón, kachi ra saa:

―Kuayüꞌvi kun; chi vichin nduu kun ra sañaꞌa yuvi ña ndakundikun na yuꞌu ―kachi ra xiꞌin ra.

11Ra saa ke̱e ndia chi yuꞌu mini kan xiꞌin barca ndia. Ra ndakoo ndiꞌi ndia chiñu ndia. Ra ndakundikun ndia Jesús, kuaꞌan ndia xiꞌin va ra.

Sandaꞌa Jesús iin ra ndoꞌo kueꞌe tiaꞌyu

12Saa kuu iin kii ra xika Jesús iin ñuu, ra ndixaa iin tiaa ra ndoꞌo kue̱ꞌe̱ tiaꞌyu nuu ra. Ra ndakusiti ra, ra ndixinu nuu ra ndia ñuꞌu, ra xakundaꞌvi ka vi ra nuu ra, kachi ra saa:

―Tata, tu kuni kun, ra na sa kun ña mani ra na sandaꞌa va kun yuꞌu ―*kachi ra.

13Ra saa nditandiaa ndaꞌa Jesús ra ndoꞌo kueꞌe tiaꞌyu kan ra ndikaꞌan ra xiꞌin ra, kachi ra saa:

―Kuni va yu; ra na nduvaꞌa kun ―kachi ra xiꞌin ra.

Ra ndikun saa ndindoñuꞌu va kue̱ꞌe̱ tiaꞌyu kan sata tiaa kan. 14Ra saa xaꞌndia Jesús chiñu nuu ra kachi ra saa:

―Kuaꞌan, ra ndia nii yuvi ndatüꞌun kun xiꞌin xaꞌa ña sandaꞌa yu yoꞌo. Chi takua nuu ra sutu va na kuꞌun kun, ra na kaniꞌi kun ñaꞌa ña soko kun ta kuꞌva kachi ndiayu Ndioxi ña ndakoo ra Moisés ta yachi; ra na kundaa ini ndia sutu ña xa nduvaꞌa va kun ―kachi Jesús xiꞌin ra.

15Ra vaꞌa ni ndikaꞌan ni va Jesús xiꞌin ra ña na ndatüꞌun ra, ndi su xa saa kundaa va ini yuvi xaꞌa ña nduvaꞌa ra. Ra iin vichin vichin ndindutia ndoso tuꞌun xaꞌa Jesús, ra kuaꞌa ka vi yuvi kuaꞌan nuu ra ña kuni soꞌo na ña ndakani ra, ra sandaꞌa ra na xiꞌin kueꞌe ña ndoꞌo na. 16Ra kuaꞌa ni ichi ke̱e siin ra nuu na, ña ndixaꞌan ra iku yuu nuu köo yuvi ña ndikaꞌan ra xiꞌin Ndioxi.

Sandaꞌa Jesús iin ra küvi kaka

17Saa kuu iin kii ra íin Jesús sañaꞌa ra yuvi. Ra ikan ndee sava ndia fariseo, xiꞌin ndia sañaꞌa ndiayu Ndioxi ña ndakoo ra Moisés. Ra saa tu na ke̱e ñuu ña ndikun ndiaa chi Galilea, ra saa tu na ke̱e ñuu ña ndikun ndiaa chi Judea va. Ra saa tu na ke̱e ñuu Jerusalén va. Ra mii Ndioxi taxi ndie̱e̱ ndaꞌa Jesús ña ^sandaꞌa ra yuvi na xiꞌi. 18Ra saa kuu, ra ndixaa sava tiaa xiꞌin iin ra xiꞌi ra ndachi xaꞌa küvi kaka, ra kanduꞌu ra nuu ixto ndixaa ra xiꞌin ndia. Ra ndixika nduku ndia kiꞌvi ndia ña chikanduꞌu ndia ra ini veꞌe nuu nduꞌu Jesús. 19Ndi su ndiküvi vi kiꞌvi ndia xiꞌin ra, chi iin chitu ndaa va yuvi. Ra saa ndaa ndia chi xini veꞌe, ra kaan ndia iin yavi xini ña. Ra yavi kan sanuu ndia ixto nuu kanduꞌu ra. Ra saa nduxinu ra tiañu takundiꞌi yuvi, nuu nduꞌu Jesús. 20Ra te kundaa ini Jesús ña ndinuni ni ini ndia ^kandixa ndia, ña kuchuun va ra sandaꞌa ra ra. Ra saa ndikaꞌan ra xiꞌin ra xiꞌi kan, kachi ra saa:

―Tata, xa xa kaꞌnu va ini yu xaꞌa kuachi kun ―*kachi ra xiꞌin ra.

21Ra ta xini soꞌo ndia fariseo, xiꞌin ndia sañaꞌa ndiayu Ndioxi ña ndakoo ra Moisés, ña ndikaꞌan Jesús xiꞌin ra, ra saa xaꞌa ndia ndakani ini ndia: “¿Yoo ku ra yoꞌo, ra kachi ra saa xiꞌin ra kaa? Chee ni kuachi ke yoꞌo nuu Ndioxi, chi ndia nii yuvi, ra küvi sakaꞌnu ini na xaꞌa kuachi yo, chi indaa mituꞌun Ndioxi va ku ra kuvi sakaꞌnu ini xaꞌa kuachi yo”, kaꞌan ndia.

22Ra kundaa kuaꞌa va ini Jesús ña ^ndakani ini ndia, ra saa ndikaꞌan ra xiꞌin ndia, kachi ra saa:

―¿Nichuun ndakani ini ndo ña köo ndiayu yu ña sakaꞌnu ini yu xaꞌa kuachi yuvi? 23¿Ra ni ke vaꞌa kachi yu xiꞌin ra yoꞌo, tuvi ndo? ¿A vaꞌa ka na kachi yu ña: “Xa xakaꞌnu ini yu xaꞌa kuachi kun”? ¿Ra a vaꞌa ka na kaꞌan yu xiꞌin ra: “Ndakoo, ra kaka xaꞌa kun kunuꞌu kun”?, kachi yu. 24Ra ña na kundaa vaꞌa ini ndo, ra vichin nuu ndo yoꞌo, na sandaꞌa yu ra yoꞌo, saa ke kundaa ini ndo chi yuꞌu kuvi ra tiꞌvi Ndioxi xaa, ra kuu mii yu ndiayu ña sakaꞌnu ini yu xaꞌa kuachi na yuuvi ―kachi ra xiꞌin ndia.

Ra saa ndikaꞌan ra xiꞌin ra nduchiꞌña kan, kachi ra saa:

―Ndakoò, ra ndakiꞌin kun ixto kun, ra kunuꞌu kun veꞌe kun ―kachi ra xiꞌin ra.

25Ra ndikun nuu na saa ndakoò tiaa kan, ra ndakiꞌin ra ixto ra, ra kuanuꞌu ra veꞌe va ra. Ra ^ndasakaꞌnu ka vi ra Ndioxi xaꞌa ña nduvaꞌa ra. 26Ra ndakanda ka vi ini yuvi xaꞌa ña xa Jesús. Ra ndasakaꞌnu ni na Ndioxi. Ra ndayuꞌvi ka vi ini na, kachi na saa:

―¿Ni ke yoꞌo? Ndia nii kii täan kuni yo ña, ra ndia vichin xini yo ña xituꞌun yoꞌo ―kachi na xiꞌin taꞌan na.

Kana Jesús ra Leví ña kundikun ra ra

27Ra ta sandiꞌi Jesús, saa ra ndakiꞌin ra kuaꞌan va ra, ra ndiyaꞌa ra nuu nduꞌu iin ra nani Leví ra ndiso chiñu kaya xuꞌun ndaꞌa na ñuu, ña kuaꞌan ndaꞌa gobierno ñuu Roma. Ra ndikaꞌan Jesús xiꞌin ra kachi ra saa:

―Na koꞌo xiꞌin yu ―kachi ra.

28Saa ra, ndikun ndakoo ndiꞌi ra Leví chiñu ra, ra ndakiꞌin ra kuaꞌan ra xiꞌin Jesús va.

29Saa kuu, xakin ra Leví iin viko kaꞌnu veꞌe ra ña ndasatoꞌo ra Jesús. Ra kuaꞌa ka vi na kaya xuꞌun ndaꞌa na ñuu, xiꞌin sava ka yuvi xaa ndixkundee nuu mesa ña kuxi na xiꞌin ra. 30Ra ndia fariseo, xiꞌin ndia sañaꞌa ndiayu Ndioxi ña ndakoo ra Moisés, ra xaꞌa ndia xa kuachi ndia ra ndikaꞌan ndia xiꞌin ndia itaꞌan xiꞌin Jesús, kachi ndia saa:

―¿Nichuun xixi ndo xiꞌin ndia kaya xuꞌun ndaꞌa yuvi, xiꞌin sava ka yuvi kuachi? Ra süvi na vaꞌa kuvi na ―kachi ndia.

31Ra saa ndakuiin Jesús, kachi ra saa xiꞌin ndia:

―Na iyoo vaꞌa ini, ra xiniñüꞌu vi na kan na xatatan, chi na ndiee ndoꞌo va ku na xiniñuꞌu na xatatan. 32Saa chi yuꞌu, ra växi yu chindiee taꞌan yu xiꞌin na vaꞌa, na köo kuachi, tuvi na. Chi xaꞌa na iyoo kuachi va ke xaa yu, ña vaꞌa na ndandiko ini na ra ndakiꞌin na ichi Ndioxi ―kachi Jesús xiꞌin ndia fariseo.

Ndatuꞌun Jesús nichuun ke iyöo suꞌun ndia itaꞌan xiꞌin ra

33Ra saa ndikaꞌan ndia xiꞌin Jesús, kachi ndia saa:

―Na itaꞌan xiꞌin ra Juan, xiꞌin na itaꞌan xiꞌin ndia fariseo, ra kuaꞌa ni va ichi xïxi na, ña iyoo suꞌun na, ra kaꞌan ni tu na xiꞌin Ndioxi va. ¿Ra nichuun iyöo suꞌun tu ndia itaꞌan xiꞌin yoꞌo? Chi niña ndia xixi va kuvi ndia ―kachi ndia xiꞌin Jesús.

34Ra saa ndakuiin Jesús, kachi ra saa:

―Na ndee kusii ini xiꞌin migo na nuu iyoo viko tandaꞌa, ra küvi vi koo suꞌun na, ña koo na saa soko, chi ta íin va ra tandaꞌa xiꞌin na, ña kan ke küvi koo suꞌun na. 35Ndi su vaxi kii, ra tiin ndia ra tandaꞌa kuꞌun ra xiꞌin ndia, ra saa vi ke ndoo na itaꞌan xiꞌin ra ña koo suꞌun na ―kachi Jesús xiꞌin ndia.

36Ra saa ndikaꞌan ka ra iin tuꞌun ndichi xiꞌin ndia, kachi ra saa:

―Ndia nii yuvi ra ndakäꞌma na iin ñaꞌñu tikoto xaa xiꞌin tikoto yata. Saa chi tu saa na sa na, saa ra ndiꞌi xaꞌa va tikoto xaa. Ra nii kindöo vaꞌa tu ña xiꞌin tikoto yata va. 37Ra ndia nii yuvi ra täan na vino xaa ini ñii̱ yata, chi tu saa na sa na, saa ra, ndata va ñii̱ yata kan sa ra, ra ña uun va kuitia ndiꞌi ra, ra ndia ñii̱ kan ke ndiꞌi xaꞌa va. 38Ña kan ke vino ra xaa, ra ini ñii̱ xaa ke xiniñuꞌu kuꞌun va ra, ra saa ke nii vino kütia, ra nii ñii̱ ña ñuꞌu ra ke ndïꞌi xaꞌa vi. 39Ra na xiꞌi vino yata, ra küni na koꞌo na vino ra xaa, chi vaꞌa ni ka va xiꞌi vino yata kachi na ―kachi Jesús xiꞌin ndia.

Currently Selected:

San Lucas 5: mxvNT

Highlight

Copy