San Lucas 8

Na siꞌi na chindiee taꞌan xiꞌin Jesús

1Ra ta ndiꞌi, ra ndakiꞌin Jesús kuaꞌan ra xiꞌin uxi uvi saa ndia itaꞌan xiꞌin ra. Ra iinii kuvi ñuu naꞌnu, xiꞌin ñuu vali kaꞌan ndoso ra tuꞌun Ndioxi. Ra ndatuꞌun ra xiꞌin na xaꞌa ichi nuu xaꞌndia Ndioxi chiñu. 2Ra kuaꞌan tu sava na siꞌi va xiꞌin Jesús, ra na kan kuvi na tava ra tachi ndivaꞌa ini ta yachi, ra sandaꞌa ra na xiꞌin kueꞌe ña ndoꞌo na. Ra ikan kuaꞌan ña nani María ña ñuu Magdala, ra ña yoꞌo ke tava Jesús uxa nuu tachi ndivaꞌa ini. 3Ra kuaꞌan tu ña Juana ña yasiꞌi ra Chuza ra xindiso chiñu xiꞌin veꞌe ra rey Herodes va; ra kuaꞌan tu ña Susana va, ra kuaꞌa ni ka tu sava na siꞌi va kuaꞌan. Ra na siꞌi kan kuvi na chindiee taꞌan xiꞌin Jesús, ña taxi na ndia ndia ka ñaꞌa ña xiniñuꞌu ra xiꞌin ndia itaꞌan xiꞌin ra.

Tuꞌun ndichi xaꞌa ra chiꞌi

4Ra iin ndisaa ñuu ke̱e yuvi ndixaa na nuu Jesús. Ra kuaꞌa ka vi kuvi na ndakuitaꞌan ña kuni soꞌo na ña kaꞌan ra. Ra saa xaꞌa ra ndatuꞌun ra iin tuꞌun ndichi xiꞌin na kachi ra saa:

5―Saa kuu, ra kee iin ra chiꞌi kuaꞌan ra chiꞌi ra itu trigo, ra saa kuu ra xatia yava ra nuni vali kan kuaꞌan ra. Ra sava ña ndikoyo yuꞌu ichi, ra ndixañu va na ña, ra xaa tu saa ra ndakiꞌin ri ña xaxi va ri. 6Ra sava ña ndikoyo tiañu yuu va ra ndindutia va ña. Ndi su kama ni va ndachi ña chi kuëe kani koꞌyo xaꞌa ña. 7Ra sava tu ña ndikoyo nuu iyoo ndikin ìñu̱, ra inuu ndindutia va ña. Ndi su ndiküvi vi kuaꞌnu ña chi ìñu̱ kan va sanduxin ñaꞌa. 8Ra ña ndikoyo nuu ñuꞌu xaꞌan, ra vaꞌa ni xaꞌnu ña. Chi iin mituꞌun yoko trigo ra ndia iin ciento va nuni vali taxi ña ―kachi Jesús xiꞌin na.

Ra te sandiꞌi ra ndikaꞌan ra xiꞌin na xaꞌa ña yoꞌo, ra saa ndiee ka vi ndikaꞌan ra xiꞌin na, kachi ra saa:

―Ndoꞌo, na xini soꞌo ña kaꞌan yu. Ra ndakiꞌin xini ndo ni ke kuni kachi ña ―kachi ra xiꞌin na.

Ni xaꞌa ke kaꞌan Jesús tuꞌun ndichi

9Saa ndindakatuꞌun ndia itaꞌan xiꞌin Jesús, kachi ndia saa xiꞌin ra:

―Tata, ¿ni ke kuni kachi tuꞌun ndichi ña ndikaꞌan kun? ―kachi ndia xiꞌin ra.

10Ra saa ndakuiin Jesús kachi ra saa:

―Ndoꞌo, ra mii Ndioxi va kuvi ra ^taxi ndiayu ndaꞌa ndo ña kundaa ini ndo xaꞌa ichi mii ra, ña iyoo seꞌe nuu xaꞌndia ra chiñu. Ndi su inka yuvi, ra ^täxi vi ra ña ndaꞌa na kan. Ra xaꞌa ña kan ke takundiꞌi ña kuni yu kaꞌan yu xiꞌin na, ra xiꞌin tuꞌun ndichi va kaꞌan yu ña xiꞌin na. Ra nii ixtoꞌni na, ndi küni na, ra nii xini soꞌo va na, ndi kundäa ini na ni ke kuni kachi vi ña.

Ndakani Jesús nuu ndia itaꞌan xiꞌin ra xaꞌa tuꞌun ndichi xaꞌa ra chiꞌi

11Ra suꞌva ke kachi tuꞌun ndichi yoꞌo:

Nuni ña ndixitia yava yoꞌo kuvi tuꞌun Ndioxi. 12Ra ña ndikoyo yuꞌu ichi, kuvi yuvi na xini soꞌo tuꞌun Ndioxi. Ra xaa timiaꞌa tava ri ña nima na, ña na kandïxa na Ndioxi ra käku na. 13Ra ña ndikoyo tiañu yuu, kuvi yuvi na xini soꞌo tuꞌun Ndioxi. Ra kusii ni ini na ndakiꞌin na ichi Ndioxi, ndi su kuëe kunu ñuꞌu tioꞌo ña nima na, chi loꞌo ni va tiempo ^kandixa na, ra ta vaxi tundoꞌo nuu na, saa ra ndiko ini va na. 14Ra ña ndikoyo tiañu ìñu̱, kuvi yuvi na xini soꞌo tuꞌun Ndioxi, ndi su kuee kuee naa ini va na xaꞌa tuꞌun Ndioxi. Ra xaꞌa ndakundiꞌi ini na xaꞌa ña kuika, xiꞌin xaꞌa ña sii ini iyoo nuu ña yuuvi yoꞌo va, ra xä ka na ña vaꞌa. 15Ra ña ndikoyo ñuꞌu xaꞌan, kuvi yuvi na xini soꞌo tuꞌun Ndioxi. Ra ndinuni ni kandixa na tuꞌun ña xini soꞌo na, ra chuvaꞌa na ña nima na. Ra kuëe ndiko ini na, chi niña ña vaꞌa va xa na ―kachi Jesús xiꞌin ndia.

Ndikaꞌan Jesús tuꞌun ndichi xaꞌa iin ñuꞌu ña tuun nuu na

16Ra saa ndikaꞌan Jesús kachi ra saa:

―Köo iin yuvi ndatuun ñuꞌu, ra ndasi tu na nuu ña. A chikaa seꞌe tu na ña tixi ixto. Chi nuu sukun va chinduꞌu na ña, ra saa ke vaꞌa yeꞌe nuu takundiꞌi na kuaꞌan kiꞌvi veꞌe. 17Ra takundiꞌi ñaꞌa ña iyoo seꞌe, ra ndatuvi ndiꞌi va xaꞌa ña, ra saa tu ña kundäa ini yuvi xaꞌa va, chi vaxi kii ra kundaa va ini na xaꞌa ña.

18’Ra ña kan ke kuenda ni koo ndo xiꞌin ña kaꞌan yu xiꞌin ndo yoꞌo ra na sa ndo ña. Chi na xiin xini soꞌo ña sañaꞌa yu ra kuaꞌa ni ka ña ndichi taxi Ndioxi ndaꞌa na; ndi su na xïin kuni soꞌo tuꞌun yu, ra ndia ña loꞌo ña xa xini na tuvi mii na ke kindiaa Ndioxi ndaꞌa va na ―kachi Jesús xiꞌin ndia.

Xaa siꞌi Jesús xiꞌin na ñani ra nuu xika ra

19Ra saa xaa siꞌi Jesús xiꞌin na ñani ra nuu iin ra, ra ndiküvi kiꞌvi na veꞌe nuu iin ra, chi chitu ni yuvi xiꞌin ra. 20Ra saa ndikaꞌan iin tiaa xiꞌin Jesús kachi ra saa:

―Tata, chi keꞌe xaa siꞌi kun xiꞌin na ñani kun, ndita na, ra kuni na kaꞌan na xiꞌin kun ―kachi ra xiꞌin ra.

21Ra saa ndakuiin Jesús, kachi ra saa:

―Na xini soꞌo tuꞌun Ndioxi ra kandixa na ña, ra na kan va kuvi siꞌi yu xiꞌin ñani yu ―kachi ra.

^Sayaa Jesús tachi xiꞌin tiakuii

22Saa kuu iin kii ndaa Jesús xiꞌin ndia itaꞌan xiꞌin ra ini itun tu xika nuu mini. Ra ndikaꞌan ra xiꞌin ndia kachi ra saa:

―Na kuꞌun yo inka xiyo yuꞌu mini ―kachi ra.

Ra saa ndakiꞌin ndia kuaꞌan ndia xiꞌin nu. 23Ra nani saa kuu ndia kuaꞌan ndia xiꞌin itun kan nuu mini, ra nditavi maꞌna Jesús ra ndikixi va ra. Ra saa xaꞌa tachi ndiee ni sakandita ña mini kan ra ndikee ra ini itun kan, ra iin chitu ndaa ini nu xiꞌin tiakuii. Ra ndiakua ^kuni saꞌvi nu kaꞌa mini kan, ra iyo ka vi ^kuu. 24Ra saa sandoto ndia Jesús ra ndikaꞌan ndia xiꞌin ra kachi ndia saa:

―¡Tata Maestro! ¡Tata Maestro! ¡Kuandee itun yoꞌo xiꞌin yo kaꞌa mini! ―kachi ndia xiꞌin ra.

Ra saa ndakoo Jesús ra xaꞌndia ra chiñu nuu tachi xiꞌin tiakuii, ra ndikun ndixkuiin va ña, ra iin yayaa kutaxin va. 25Ra saa ndikaꞌan ra xiꞌin ndia itaꞌan xiꞌin ra kachi ra saa:

―¿Nichuun kuëe kandixa ndo? ―kachi ra.

Ra ndakanda ka vi ini ndia, ra ndiyuꞌvi ni ndia, ra saa xaꞌa ndakatuꞌun taꞌan ndia, kachi ndia saa:

―¿Yoo kuvi ra yoꞌo, ra ndia tachi xiꞌin tiakuii ra xaꞌndia ra chiñu nuu ña ra kandixa ña ra? ―kachi ndia xiꞌin taꞌan ndia.

Sandaꞌa Jesús iin tiaa ra ñuꞌu tachi ndivaꞌa ini ra ke̱e ñuu Gadara

26Ra saa ndixaa ndia xiꞌin itun kan inka xiyo yuꞌu mini, nuu ndikaa ñuu Gadara, chi xitondiaa Galilea. 27Ra ta nuu Jesús ñuꞌu, ra niniꞌi taꞌan ra xiꞌin iin tiaa ra ke̱e ñuu kan, ra xa naꞌa ni tiempo ke ñuꞌu tachi ndivaꞌa ini ra. Ra iin saa kaa chala va ra xika ra, ra nii veꞌe ra ndixkandüꞌu ka ra, chi ndia yavi ndii va ndixkuu veꞌe ra. 28Ra ta xini ra Jesús, saa ra ndindaꞌyu koꞌo ra, ra ndikun ndixkusiti ra, ra ndiee ka vi ndikaꞌan ra, kachi ra saa:

―¡Jesús, Seꞌe Ndioxi Ra Kaꞌnu! ¿Ni ke kuni kun xiꞌin yu? Xaku ndaꞌvi yu nuu kun, ña na sandöꞌo kun yuꞌu ―kachi ra xiꞌin Jesús.

29Ra ndikaꞌan ra tuꞌun yoꞌo saa chi xa ndikaꞌan va Jesús xiꞌin tachi ndivaꞌa kan ña na kee ña kuꞌun ña. Chi xa naꞌa ni ndikaa ña ra. Ra kuaꞌa ni ichi ndiee ni ^xa ña xiꞌin ra. Ra nii chikaa na yoꞌo kàà ndaꞌa ra xiꞌin xaꞌa ra, ña ndiaa na ra, ndi su xaꞌndia ndiꞌi va ra ña, ra tava tachi ndivaꞌa kan ra kuaꞌan ra iku yuu va iyoo ra. 30Saa ndindakatuꞌun Jesús ra, kachi ra saa xiꞌin ra:

―¿Ni ke nani kun? ―kachi ra.

Ra saa ndakuiin ra, kachi ra saa:

―Legión va nani yu ―kachi ra. Saa chi kuaꞌa ni tachi ndivaꞌa ndikee ini ra.

31Ra saa xaku ndaꞌvi ka vi tachi ndivaꞌa kan nuu Jesús, ña na tïꞌvi ra ña kuꞌun ña ndiaya kaꞌnu nuu ndoꞌo ni ña. 32Ra yachin iku kan xika iin tiꞌvi chee kini xaxaꞌan ri. Ra saa xakundaꞌvi ka vi tachi ndivaꞌa kan nuu Jesús, ña na taxi ra ndiayu ndaꞌa ña nde̱e ña ini kini kan. Ra saa taxi ra ndiayu ndaꞌa ña. 33Ra saa ke̱e tachi ndivaꞌa ini tiaa kan, ra ndandee ña ini kini. Ra xaꞌa sasana ndiꞌi ña ri, ra xinu ndiꞌi ri ndixaꞌan ri ndikoyo ri iin taꞌvi sukun nuu ndikaa mini, ra ndikaꞌa ndiaa ndiꞌi ri ndixiꞌi ri.

34Ra ta xini ndia ndiaa kini ña kuu kan, ra saa ke̱e ndia xinu ndia ndixaꞌan ndia ndatuꞌun ndia xiꞌin na ndee ñuu. Ra ndatuꞌun tu ndia xiꞌin na ndee iku va. 35Ra saa ke̱e yuvi kan kuaꞌan na kuni na ña kuu. Ra ta ndixaa na nuu iin Jesús, ra xini na tiaa ra ke̱e tachi ndivaꞌa ini, ra xa nduvaꞌa va ra, ra ndakundixi ra tikoto nduꞌu koo ra xaꞌa Jesús, ra ndiyuꞌvi ka vi na. 36Ra na xini ña kuu kan, ra ndatuꞌun na xiꞌin takundiꞌi yuvi ndia kuꞌva ke nduvaꞌa tiaa ra xindoꞌni tachi ndivaꞌa ini kan. 37Ra takundiꞌi na ñuu Gadara, ra xaku ndaꞌvi ni na nuu Jesús, ña na kuꞌun ra inka xiyo, chi iyuꞌvi ni na ^xini na ra. Saa ndandaa Jesús ini itun kan ra ndakiꞌin ra kuaꞌan va ra xiꞌin ndia itaꞌan xiꞌin ra. 38Ra tiaa ra kee tachi ndivaꞌa ini kan, ra xaku ndaꞌvi ka vi ra nuu Jesús ña na taxi ra kuꞌun ra xiꞌin ra. Ndi su ra nindiayu taꞌan va kuvi Jesús xiꞌin ra, kachi ra saa:

39―Kuanuꞌu veꞌe kun, ra ndatuꞌun kun xiꞌin takundiꞌi yuvi xaꞌa ña xa Ndioxi xiꞌin kun ―kachi ra xiꞌin ra.

Saa ndakiꞌin tiaa kan kuanuꞌu ra. Ra ndatuꞌun ra xiꞌin takundiꞌi yuvi xaꞌa ña vaꞌa xa Jesús xiꞌin ra.

Sandaꞌa Jesús ña loꞌo seꞌe ra Jairo xiꞌin ñaꞌa ña nditiandiaa ndaꞌa tikoto ra

40Ta ndiko Jesús ndaxaa ra inka xiyo yuꞌu mini nuu ke̱e ra ta kuaꞌan ra, ra xa iin chitu ndaa va yuvi ndee na ndiatu na ra. Ra ^kusii ka vi ini na ndakiꞌin na ra. 41Ra saa xaa iin tiaa ra nani Jairo nuu iin Jesús. Ra ra xikuaꞌa ndiso chiñu xiꞌin veꞌe ñuꞌu kuvi ra, ra ndikun ndixkusiti va ra nuu Jesús, ra xaku ndaꞌvi ka vi ra nuu ra ña na kuꞌun ra xiꞌin ra veꞌe ra. 42Saa chi ña loꞌo seꞌe ra, ña mituꞌun nuu ra, ra sakan uxi uvi va kuiya ndikaa ña, ra ndiee ni ndoꞌo ña chi xa yachin va kuvi ña.

Ra saa ndakiꞌin Jesús kuaꞌan ra xiꞌin ra Jairo. Ra kuaꞌa ka vi yuvi ndikun kuaꞌan sata ndia, ra iin chindaꞌni taꞌan mii na kuaꞌan na xiꞌin ndia. 43Ra tiañu yuvi kan ndikaa iin ñaꞌa ña ndiee ni ndoꞌo kuaꞌan ña xiꞌin na, ra xa uxi uvi kuiya ke xatia ña nii ña. Ra xa sandiꞌi yaa va ña xuꞌun ña xiꞌin na xatatan, ra ndia nii na ndikuchüun sandaꞌa ñaꞌa. 44Ra saa kuyachin ña chi sata Jesús ra nditiandiaa ndaꞌa ña yuꞌu tikoto ra. Ra ndikun ndixkuiin va ña ndixätia ka ña nii ña.

45Ra saa ndikaꞌan Jesús, kachi ra saa:

―¿Yoo kuvi na nditiandiaa ndaꞌa yuꞌu? ―kachi ra.

Ra iin xa xïni ndiꞌi va na.

Ra saa ndikaꞌan ra Pedro, kachi ra saa:

―Tata Maestro, iin takundiꞌi na chindaꞌni taꞌan sata kun, ¿ra ni ke sa kun ña kundaa ini kun yo kuvi na nditiandiaa ndaꞌa yoꞌo? ―kachi ra xiꞌin Jesús.

46Saa ndakuiin tuku Jesús kachi ra saa:

―Ndi su iyoo va iin na nditiandiaa ndaꞌa yuꞌu, chi kundaa ini yu ña ke̱e ndie̱e̱ yu sandaꞌa ña na ―kachi ra.

47Ra te kundaa ini ñaꞌa yoꞌo ña ndiküvi koo seꞌe, ña ndoꞌo ña, ra iyuꞌvi ka vi ña, ra iin ndiakua kisi ña ña xaa ña ndixkusiti ña nuu Jesús. Ra nuu ndiꞌi na ndakani ña ni xaꞌa ke nditiandiaa ndaꞌa ña tikoto ra. Chi ta nditiandiaa ndaꞌa suꞌva ña tikoto ra, saa ra ndikun nduvaꞌa va ña. 48Ra saa ndikaꞌan Jesús xiꞌin ña, kachi ra saa:

―Seꞌe, xaꞌa ña ndiaa ini kun yuꞌu va ke xa nduvaꞌa kun. Ra vichin kuanuꞌu, ra ndïꞌi ka ini kun ―kachi ra xiꞌin ña.

49Ra ta kaꞌan ka va Jesús, saa xaa iin ra ke̱e veꞌe ra Jairo, ra ndikaꞌan ra kachi ra saa xiꞌin ra:

―Tata, xa ndixiꞌi va seꞌe kun, sandïꞌi ka kun ra Tata Maestro ―kachi ra xiꞌin ra.

50Ra ta xini soꞌo Jesús, ña ndikaꞌan tiaa kan, ra saa ndikaꞌan ra xiꞌin ra Jairo, kachi ra saa:

―Kuayüꞌvi kun. Indaa yuꞌu va kandixa kun, ra ndatiaku va seꞌe kun ―kachi ra xiꞌin ra.

51Ra ta kuyachin na yeꞌe ra Jairo, ra nditäxi Jesús kiꞌvi ndiꞌi na xiꞌin ra veꞌe nuu kanduꞌu ña loꞌo kan, chi takua ra Pedro, xiꞌin ra Jacobo, xiꞌin ra Juan xiꞌin takua iva ña xiꞌin siꞌi va ña kuvi na ndikiꞌvi xiꞌin ra. 52Ra xaku ka vi yuvi ndee kan xaꞌa ña. Saa ndikaꞌan Jesús xiꞌin na, kachi ra saa:

―Xäku ndo chi süvi ña ndixiꞌi kuvi ña. Chi ña kixi va kuvi ña ―kachi ra xiꞌin na.

53Ra xaꞌa na ^xa siki na ra, chi xa kundaa va ini na ña ndixa ke xa ndixiꞌi va ña. 54Ra saa tiin Jesús ndaꞌa ña. Ra ndiee ni ndikaꞌan ra xiꞌin ña, kachi ra saa:

―¡Ña loꞌo, ndakoo! ―kachi ra xiꞌin ña.

55Saa ra, ndikun ndatiaku ndixa va ña, ra ndakoo ña. Ra saa xaꞌndia ra chiñu nuu na, ña na taxi na ña kuxi ña. 56Ra saa ndakanda ni ini na ivasiꞌi ña. Ra ndikaꞌan Jesús xiꞌin na, kachi ra saa:

―Ndia nii na ndatüꞌun ndo xiꞌin xaꞌa ña ndoꞌo ña loꞌo seꞌe ndo ―kachi ra xiꞌin na.

Currently Selected:

San Lucas 8: mxvNT

Highlight

Copy