San Mateo 27

Ndataxi na Jesús ndaꞌa ra Pilato

1Ra ñaꞌa ni ndakutaꞌan takundiꞌi ndia kunaꞌnu nuu ndia sutu, xiꞌin takundiꞌi ndia xikuaꞌa kunaꞌnu nuu na ñuu, ña ndikataꞌan ndia xaꞌa Jesús, ndia kuꞌva ke sa ndia ña vaꞌa kaꞌni ndia ra. 2Ra saa chikuꞌni na Jesús, ra ndakundiaka na ra kuaꞌan ra xiꞌin na, ña ndataxi na ra ndaꞌa ra Poncio Pilato ra kuu gobernador.

^Xaꞌni ra Judas mii ra

3Ra saa te xini ra Judas ra ndataxi Jesús, ña ndikataꞌan ndia ña kaꞌni ndia Jesús, saa ra nandiko ka vi ini ra xaꞌa ña xa ra, ra saa ndixaꞌan ra sandiko ra oko uxi saa xuꞌun ña plata ndaꞌa ndia kunaꞌnu nuu ndia sutu, xiꞌin ndia xikuaꞌa kunaꞌnu nuu na ñuu, 4ra ndikaꞌan ra xiꞌin ndia kachi ra saa:

―Chee ni kuachi xa yu, saa chi ndataxi yu iin tiaa ra köo kuachi ndaꞌa ndo, ña kaꞌni ndo ra ―kachi ra xiꞌin ndia.

Ra saa ndakuiin ndia kachi ndia saa xiꞌin ra:

―¿Ra ni ke ndoꞌo vi tu nduꞌu ndiꞌi ini ndi xaꞌa ña xa yoꞌo? ¡Mii kun xini va! ―kachi ndia xiꞌin ra.

5Ra saa koꞌni ra Judas oko uxi saa xuꞌun ña plata kan, ini veꞌe ñuꞌu kan, ra saa kanata ra chi keꞌe ra ndixaꞌan ra sakuaꞌña ra mii va ra. 6Saa ndakiꞌin ndia kunaꞌnu nuu ndia sutu xuꞌun kan, ra ndikaꞌan ndia xiꞌin taꞌan ndia kachi ndia saa:

―Xuꞌun yoꞌo ra küvi ndataan yo ña ini xatun nuu ndoꞌni xuꞌun ña soko yuvi nuu Ndioxi, saa chi süvi ka xuꞌun vaꞌa kuvi ña, chi nii iin tiaa va ndixitia xaꞌa ña ―kachi ndia.

7Ra te ndiꞌi saa ndikataꞌan ndia ña sata ndia iin yoso kaꞌnu ña nani “Yoso Alfarero” xiꞌin xuꞌun kan, ra ikan ku nuu nduxin na takundiꞌi yuvi na kee inka ñuu, tu na xaa na kuvi na ñuu kan. 8Ra xaꞌa ña kan ke, ndia kii vichin ra “Yoso ña ndixitia nii xaꞌa” ke nani va yoso kan. 9Ra yoꞌo ke ndixinu nuu tuꞌun ña ndikaꞌan ra Jeremías ra ndikaꞌan tuꞌun yuꞌu Ndioxi xinaꞌa, te kachi ra suꞌva: “Ndakiꞌin na oko uxi xuꞌun ña plata, xuꞌun ña chaꞌvi na xaꞌa iin tiaa ra ndiaa yaꞌvi ni, ta kuꞌva ndikataꞌan na ñuu Israel ña kuu yaꞌvi ra, 10ra xiꞌin xuꞌun kan ke sata na iin yoso, ña nani alfarero, ra iin ta kuꞌva kachi Ndioxi xiꞌin yu ke kuu va”, kachi ra Jeremías.

^Ndakatuꞌun ra Pilato Jesús

11Ra saa ndiaka na Jesús ndixaa na xiꞌin ra nuu ra Pilato ra kuu gobernador, ra saa nindakatuꞌun ra Jesús kachi ra saa:

―¿A ndixa yoꞌo kuvi ra kuu rey na Judío? ―kachi ra.

Saa ndakuiin Jesús kachi ra saa xiꞌin ra:

―Ta kachi kun ke iyoo va ña ―kachi Jesús xiꞌin ra. 12Ra na kunaꞌnu nuu ndia sutu, xiꞌin ndia xikuaꞌa nuu na ñuu, ra xaꞌa ndia taxi ndia kuachi xaꞌa Jesús nuu ra Pilato, ndi su Jesús ra ndia nii tuꞌun loꞌo nindäkuiin ra. 13Ra saa ndikaꞌan ra Pilato xiꞌin Jesús kachi ra saa:

―¿A xini soꞌo kun takundiꞌi kuachi ña taxi ndia yoꞌo xaꞌa kun, ra a ndixa kuachi kun kuvi ña? ―kachi ra xiꞌin Jesús. 14Ndi su ndia nii tuꞌun loꞌo nindäkuiin Jesús yuꞌu ra, ra saa ndakanda ka vi ini ra gobernador kan xini ra Jesús.

Nditiaꞌndia chiñu ña kuvi Jesús

15Ra vichin na kundaa ini yo, chi kii te ndatava na viko pascua, ra yunaꞌa ra Pilato ña saña ndika ra iin na ñuꞌu veꞌe kàà, ta kuiya ta kuiya, ndia ndia ka mii na kaꞌan na ñuu xaꞌa va. 16Ra mii kuiya kan ndikaa iin tiaa, ra nani Barrabás veꞌe kàà, ra yoso tuꞌun ni ra xiꞌin chuun kiꞌvi ña ^xa ra. 17Ra saa nindakatuꞌun ra Pilato takundiꞌi yuvi na ndakaya ndixaa kan, kachi ra saa:

―¿Yoo kuvi ndia kuni ndo saña ndika yu: ra Barrabás, a Jesús ra kaꞌan ndo xaa sakaku ndoꞌo va? ―kachi ra xiꞌin na.

18Saa chi xa kundaa va ini ra Pilato, chi xaꞌa ña ndukuini ini va na ke ndataxi na Jesús. 19Ra sakan saa kuu ra Pilato nduꞌu ra tiayu nuu xandaku ra kuachi, ra saa tiꞌvi ña yasiꞌi ra chiñu ndixaa ña nuu ra, ra kachi ña saa:

―Ndia nii ña na sä kun xiꞌin tiaa ñaa, chi ra vaꞌa va kuvi ra, saa chi iin ni ñuu ndaa, ra iyo ni ndixani yu xaꞌa ra ―kachi ña xiꞌin chuun kan.

20Ndi su ndia kunaꞌnu nuu ndia sutu xiꞌin ndia xikuaꞌa nuu na ñuu, ra xaꞌa ndia chikaa yuꞌu ndia na ñuu ña na kaꞌan na xaꞌa ra Barrabás ña na saña ndika ra, ra Jesús, na kuvi va kachi ndia xiꞌin na. 21Ra saa nindakatuꞌun tuku ra gobernador kan na kachi ra saa:

―¿Yoo kuvi ndia kuni ndo saña ndika yu?, ―kachi ra xiꞌin na.

Ra saa ndakuiin na kachi na saa:

―Ra Barrabás kuvi ra na saña kun ―kachi na.

22Ra saa ndikaꞌan ra Pilato xiꞌin na kachi ra saa:

―¿Ra ni ke sa yu xiꞌin Jesús, ra kaꞌan ndo xaa sakaku ndoꞌo tu? ―kachi ra xiꞌin na.

Ra saa iin siso siso ndakuiin na kachi na saa:

―¡Na kutakaa ra ndaꞌa cruz! ―kachi na. 23Ra saa ndikaꞌan tuku ra gobernador kan xiꞌin na kachi ra saa:

―¿Ndia ña kuu kuachi xa ra tuvi ndo? ―kachi ra xiꞌin na.

Ndi su yuvi kan ra na ndiee ka ndaꞌyu va kuvi na, kachi na saa:

―Na kutakaa ra ndaꞌa cruz ―kachi tuku va na.

24Ra te xini ra Pilato ña kundiëe ka tuꞌun ra xiꞌin yuvi kan, saa chi na ndiee ka xaꞌa xa va kuvi na, saa ra xaꞌndia ra chiñu ña taxi na tiakuii ndaꞌa ra, ra saa ndakatia ra ndaꞌa ra nuu takundiꞌi na ñuu, ra ndikaꞌan ra xiꞌin na kachi ra saa:

―Ndïso ka yu xaꞌa nii tiaa yoꞌo, ña kutia ña, saa chi ra vaꞌa va kuvi ra, ra ndia ñaa ke kotoꞌni mii ka va ndo ―kachi ra xiꞌin na.

25Ra saa ndakuiin takundiꞌi na ñuu kan kachi na saa:

―Nduꞌu, xiꞌin seꞌe ndi kuvi na, na kuiso xiꞌin nii ra ña kutia ―kachi na.

26Ra saa tava ra ra Barrabás veꞌe kàà ña kuaꞌan ndika ra, ra xaꞌndia ra chiñu ña na kani na Jesús xiꞌin ñii ña kuu kuarta, ra te na ndiꞌi, saa na kuꞌun na xiꞌin ra ña katakaa na ra ndaꞌa cruz.

27Ra saa ndakiꞌin ndia soldado ndia xachiñu nuu ra gobernador kan Jesús, kuaꞌan ra xiꞌin ndia, ra ndixaa ra xiꞌin ndia chi nuu keꞌe veꞌe chiñu kaꞌnu kan, ra ikan ndakaya takundiꞌi ndia soldado ra iin xinunduu ndia ra ndita ndia. 28Ra saa tava ndia tikoto ña ndixi ra, ra ndachikaa ndia iin tikoto kuaꞌa ña kani sukun ra, 29ra chikaa na iin corona ña xavaꞌa na xiꞌin ìñu̱ xini ra, ra taxi na iin ndoo ñuꞌù ndaꞌa kuaꞌa ra, ra saa xaꞌa na ndakusiti na nuu ra, ña xa siki na ra, ra kaꞌan na xiꞌin ra kachi na saa:

―Kaꞌnu ni yoꞌo ra kuu rey na judío ―kachi na.

30Ra saa xaꞌa na kondiaa na tiasiꞌi na nuu ra, ra ndakiꞌin na ndoo ñuꞌù kan ndaꞌa ra, ra xaꞌa na xakin na nuu xini ra. 31Ra saa te sandiꞌi na, ña xa siki na ra, ra saa tava na tikoto ña chikaa na sukun ra, ra ndachikaa na tikoto mii ra sukun ra, ra ndakiꞌin na ra kuaꞌan ra xiꞌin na, ña katakaa na ra ndaꞌa cruz.

Ndiaka na Jesús kuaꞌan ra kutakaa ra ndaꞌa cruz

32Ra ta kee na ndakiꞌin na kuaꞌan na xiꞌin Jesús, ra saa ndakutaꞌan na xiꞌin iin tiaa ra nani Simón ra kee ñuu Cirene, ra xa nduxa na xiꞌin ra ña na kasoko ra cruz tun kasoko Jesús. 33Ra te ndixaa na xiꞌin Jesús iin nuu nani Gólgota, ra tuꞌun yoꞌo: “Ra iku leke xini ndii” ke kachi ña, 34ra ikan taxi na vino tia ndikava nuu iku iva xiꞌin, ña na koꞌo Jesús kuni na, ndi su te ixtondoso Jesús ndutia kan, saa ra ndixïin ra koꞌo ra rá.

35Ra te ndiꞌi katakaa ndia soldado kan Jesús ndaꞌa cruz; ra saa xaꞌa ndia keꞌe taꞌan ndia xaꞌa tikoto ra, yoo ku ndia ndakiꞌin ña. Ra suꞌva ke kuu ña ndixinu nuu tuꞌun Ndioxi ña ndikaꞌan iin ra ndikaꞌan tuꞌun yuꞌu Ndioxi xinaꞌa, ta kachi ra suꞌva: “Ndataꞌvi na tikoto yu xiꞌin taꞌan na, ra sata tikoto yu ke, keꞌe taꞌan na, ra kundaa ini na yoo ku na kuchuun ndakiꞌin ña”, kachi ra. 36Ra saa ndakundee ndia soldado kan ña ndiaa ndia Jesús. 37Ra tia̱à ndia nuu iin vitu loꞌo chinundiaa ndia xini cruz ra, ra kaꞌan tuꞌun kan ni xaꞌa ke kuvi ra, ra suꞌva ke kachi ña: “Ra yoꞌo ku Jesús ra kuu Rey na Judío”, kachi ña.

38Ra katakaa tu ndia soldado kan uvi ndia kuiꞌna va xiꞌin Jesús, ra iin ra katakaa ndia ndaꞌa cruz tu iin chi kuaꞌa, ra iin ra katakaa tu ndia ndaꞌa cruz tu iin chi ichin va. 39Ra yuvi na yaꞌa kuaꞌan ichi kan, ra iin xiko xini na, ra kañaꞌa na xiꞌin Jesús, 40kachi na saa:

―¡Yoꞌo, ra ndikaꞌan kani veꞌe ñuꞌu Ndioxi, ra kii uni xa ndakanindichi tuku kun ña, kachi kun, ra sakaku mii kun vichin, ra sanuu mii kun ndaꞌa cruz, tu ndixa seꞌe Ndioxi kuvi kun! ―kachi na xiꞌin Jesús.

41Ra iin saa xa tu ndia kunaꞌnu nuu ndia sutu, xiꞌin ndia maestro sañaꞌa ndiayu Ndioxi, xiꞌin ndia fariseo, xiꞌin ndia xikuaꞌa kunaꞌnu nuu na ñuu, ña xasiki ndia Jesús, ra kaꞌan ndia xaꞌa ra kachi ndia saa:

42―Kuchuun va ra sakaku ra inka yuvi, ra kuchüun tu ra sakaku ra mii ra ―kachi ndia.

Ra saa kaꞌan ka ndia kachi ndia saa:

―Tu ndixa Rey na Israel kuvi ra, ra na sanuu ra mii ra ndaꞌa cruz vichin, ra saa ke kandixa yo ra. 43Saa chi ndikaꞌan ra ña ndiaa ni ini ra Ndioxi, ra kuu tu ra seꞌe mii Ndioxi va kachi ra. Ra tu ndixa ke kuꞌvi ni ini Ndioxi xini ra ra, saa ra na sakaku ra ra vichin ―kachi ndia.

44Ra iin saa xa tu ndia kuiꞌna, ndia takaa ndaꞌa cruz kan va xiꞌin ra, saa chi kañaꞌa ni tu ndia kan va xiꞌin ra.

Suꞌva ke kuu te ndixiꞌi Jesús

45Ra kuꞌva ka uxi uvi kaꞌñu ke, xaꞌa kuñaa nuu iinii saa ña yuuvi yoꞌo, ra iin saa ndia ka uni xikuaa. 46Ra mii hora kan ndiee ka vi nindaꞌyu Jesús kachi ra saa:

―Elí, Elí, ¿lama sabactani? ―kachi ra. Ra suꞌva ke kachi tuꞌun yoꞌo: “Tata yu Ndioxi, Tata yu Ndioxi, ¿nichuun ndakoo ndaꞌa kun yuꞌu?”, ^kachi ña.

47Ra te xini soꞌo sava na ndita yachi kan, ra saa ndikaꞌan na xiꞌin taꞌan na kachi na saa:

―Tiaa soꞌo ndo, chi ra Elías ra ndikaꞌan tuꞌun yuꞌu Ndioxi va kuvi ra kana ra ―kachi na.

48Ra saa ndikun xinu iin ra ndixaꞌan ra chindaxi ra iin koꞌndo kachi ini iin ñaꞌa nuu ñuꞌu ndutia iyá, ra chinduꞌu ra ña xini iin itun ndoo ñuꞌu, ra sakuyachin ra ña yuꞌu Jesús ña na koꞌo ra ndutia iyá kan kuni ra.

49Ndi su ndixïin sava na ndita kan, ra ndikaꞌan na xiꞌin ra kachi na saa:

―Koyaa kun xiꞌin ra, ra na kuni yo a ndixa ke kixi ra Elías sanuu ra ra ―kachi na.

50Saa ra ndiee ka vi nindaꞌyu tuku Jesús, ndia saa ra kuaꞌan va tachi ra ña ndixiꞌi ra.

51Ra tikoto yii ña ndasi nuu yii ini veꞌe ñuꞌu kaꞌnu kan, ra iin nindata sava ña, kiꞌin ña yuꞌu ña chi ni̱nù ra iin saa ndia chi ni̱nu̱, ña saña taꞌan ña, ra nduu ña uvi ñaꞌñu va. Saa ra ndiee ni nditaan, ra ninduva kava naꞌnu; 52ra ndanuña kuaꞌa ni yavi nuu ñuꞌu na ndii, ra kuaꞌa ni na yii, na xindikun Ndioxi, ndatiaku. 53Ra te ndiatiaku Jesús, ra saa ndakoyo tu na kan va ini yavi nuu ñuꞌu na, ra kee na ndixaꞌan na ñuu kaꞌnu Jerusalén ña yii, ra kuaꞌa ni yuvi xini ñaꞌa.

54Ra ra soldado ra kuchee kan xiꞌin ndia itaꞌan xiꞌin ra, ña ndiaa ndia Jesús, ra te xini ndia ña ndiee ni nditaan, ra xini tu ndia takundiꞌi ña kuu kan va, saa ra tiaa ni ndiyuꞌvi ndia, ra ndikaꞌan ndia kachi ndia saa:

―Ña ndixa ke seꞌe Ndioxi kuvi ndixa va ra yoꞌo ―kachi ndia.

55Ra xika va ndita kuaꞌa ni na siꞌi, na kee ndia chi Galilea, ña ixtoꞌni na, ña ndixiꞌi Jesús. Ra na siꞌi yoꞌo kuvi na xindikun sata Jesús, ra chindiee taꞌan na xiꞌin ra te ndixika ra ñuu ña ndoꞌni chi Galilea, ra iin saa ndikun na sata ra xaa na, ndia Jerusalén va. 56Ra tiañu na kan ndichi ña María Magdalena, ra ndichi tu ña María siꞌi ra Jacobo xiꞌin ra José va, ra ndichi tu ña siꞌi ndia seꞌe ra Zebedeo va xiꞌin na.

Ninduxin na Jesús

57Ra te xa kuaꞌan kuñuu kii kan, ra saa ndixaa iin tiaa ra kuika ni, ra kee ñuu Arimatea, ra José ke nani ra, ra ra xindikun sata Jesús ku tu ra yoꞌo va. 58Ra saa kee ra ndixaꞌan ra nuu ra Pilato, ra ndikaꞌan ra xiꞌin ra, ña na ndataxi ra iki kuñu Jesús ndaꞌa ra, ña nduxin ra ña. Ra saa xaꞌndia ra Pilato chiñu ña na ndataxi na iki kuñu Jesús ndaꞌa ra. 59Ra saa ndakiꞌin ra José kan iki kuñu Jesús, ra ndasuvi ra ña iin manda xaa ña vaꞌa, 60Ra ndixaꞌan ra ninduxin ra ña ini yavi xaa, ña kaan ra ndika iin kava nuu ñuꞌú ra te yachi. Ra te ndiꞌi saa satuvi satuvi ra iin yuu chee ra nandasi ña yuꞌu yavi kan, ndia saa ra ndakiꞌin ra kuaꞌan va ra. 61Ra ña María Magdalena, xiꞌin inka tuku ña nani María, ra ndixaa na xikundee na yachin yuꞌu yavi kan, ña ixtoꞌni na ndia mii ku nuu ninduxin na iki kuñu Jesús.

Ndiaa ndia soldado yavi nuu ninduxin na Jesús

62Ra saa te ndituvi inka kii, te xa ndiꞌi xa nduvi na ña ndakindiee na kii sábado, ña kuu kii yii, ra saa ndixaꞌan ndia kunaꞌnu nuu ndia sutu, xiꞌin ndia fariseo nuu ra Pilato, 63ra ndikaꞌan ndia xiꞌin ra kachi ndia saa:

―Tata gobernador, vaxi ndi nuu kun ndatuꞌun ndi xiꞌin kun, saa chi ndakuꞌun ini ndi xaꞌa tuꞌun ña ndikaꞌan Jesús, ra maña, ra sandaꞌvi yuvi kan, te xitiaku ra, chi ndikaꞌan ra kachi ra saa: “Te xa na kuvi yu ra kii uni ndatiaku tuku va yu”, kachi ra. 64Ra ña kan ke kuni ndi, ña na tiꞌvi kun ndia soldado kun kuꞌun ndia kondiaa ndia yuꞌu yavi nuu ndikaa ra uni saa kii. Chi koto iyo ni kuꞌun ndia xitaꞌan xiꞌin ra, ra tava seꞌe ndia iki kuñu ra yavi kan, ra te na ndiꞌi, xaꞌa ndia kaꞌan ndia xiꞌin yuvi, kachi ndia saa: “Xa ndatiaku va Jesús”, kachi ndia. Ra tu saa na sa ndia, saa ra tiaa ni ka va kuaꞌa yuvi sandaꞌvi ndia vichin nuu ña te xitiaku ra ―kachi ndia xiꞌin ra Pilato. 65Saa ndikaꞌan ra Pilato xiꞌin ndia kachi ra saa:

―Ñaa ndee ndia soldado, ra vaꞌa na kuꞌun ndia xiꞌin va ndo, ra na kondiaa ndia yuꞌu yavi kan, ra tuun vaꞌa na nandasi ndia ña, ta kuꞌva kachi mii va ndo ―kachi ra xiꞌin ndia. 66Ra saa kee ndia soldado kan ndixaꞌan ndia ndasatuun vaꞌa ka ndia yuꞌu yavi kan, ra xakin ndia kuꞌva yuu ña ndasi yuꞌu yavi kan, ra nindoo ka sava ndia ña kondiaa ndia yuꞌu yavi nuu ndikaa iki kuñu Jesús.

Currently Selected:

San Mateo 27: mxvNT

Highlight

Copy