San Marcos 11

Xaa Jesús ñuu kaꞌnu Jerusalén

1Ra saa te kuaꞌan kuyachin Jesús nuu ñuu kaꞌnu Jerusalén xiꞌin na xika xiꞌin ra, ra yaꞌa na kuaꞌan na ñuu Betfagé, xiꞌin ñuu Betania ña ñuꞌu chi nuu ixtondiaa suꞌva iku ña nani Olivo, saa xaꞌndia ra chuun nuu uvi ndia xika xiꞌin ra, 2kachi ra saa xiꞌin ndia:

―Kuaꞌan ndo ñuu loꞌo ña tuvi yachin kaa, ra te ndikiꞌvi ndo kuaꞌan ndo ra ichi kan, kuni ndo nuꞌni iin burru loꞌo, ti täan koso ndia nii yuvi, ra ndaxi ndo ri na kixi ri xiꞌin ndo. 3Ra tu ndia na ndakoyo kaꞌan xiꞌin ndo: “¿Nichuun ndaxi ndo ri?” kachi na, ra kaꞌan ndo xiꞌin na: “Iva yo ku ra kuniñuꞌu ri, ra takaꞌan va ndaxaa ri”, kachi ndo xiꞌin na ―kachi Jesús xiꞌin ndia.

4Saa ndakiꞌin ndia kuaꞌan ndia, ra te ndixaa ndia, saa xini ndia nuꞌni yachin burru loꞌo kan, ichi kuaꞌan yeꞌe na kan, saa ndaxi ndia ri.

5Ra saa ndindakatuꞌun sava na ndee kan ndia kachi na saa:

―¿Nichuun kuu ndo saa ndaxi ndo burru loꞌo ñaa? ―kachi na xiꞌin ndia.

6Saa ndakuiin ndia yuꞌu na, ra ndikaꞌan ndia xiꞌin na iin ta kuꞌva iyoo ña kachi Jesús xiꞌin ndia, ra saa taxi na ri kuaꞌan ri xiꞌin ndia. 7Ra saa ndiaka ndia burru loꞌo kan ndixaa ri xiꞌin ndia nuu iin Jesús, ra ti̱so ndia tikoto ndia sata ri, ra ndakoso Jesús ri kuaꞌan ra xiꞌin ndia chi ñuu Jerusalén. 8Ra kuaꞌa ni yuvi kan ra tikoto ña isukun na, ra xakin na ña iinii kuvi ichi nuu yaꞌa Jesús kuaꞌan ra, ra sava tu na kuaꞌan xaꞌnu i̱ku̱ ndaꞌa itun ra xakin na ña ichi nuu yaꞌa ra.

9Ra na inuu xiꞌin na ndikun, ra iin siso siso ndaꞌyu na kachi na saa:

―¡Tata, sakaku nduꞌu! ¡Ra kaꞌnu ni kuvi yoꞌo ra vaxi xiꞌin kivi Iva yo Ndioxi! 10Kaꞌnu ni ra yoꞌo, chin ra yoꞌo kuvi ra kuu rey ra kaꞌndia chiñu nuu yo, chi ra yoꞌo ku ra ndakiꞌin nuu xii xikua yo David, ra xikuu rey, ra ra kaꞌnu ni ku Iva yo Ndioxi ra nduꞌu ndivi ―kachi na.

11Ra te ndixaa Jesús ñuu Jerusalén, ra saa ndikiꞌvi ra ini korra veꞌe ñuꞌu kaꞌnu kan kuaꞌan ra. Ra xini ra takundiꞌi ñaꞌa ña iyoo ikan, ra saa xa kuaꞌan kuñuu va tu, ndia saa ra, ndakiꞌin ra kuaꞌan ra chi ñuu Betania va xiꞌin ndia uxi uvi ndia xika xiꞌin ra.

Satavi̱ chiꞌña Jesús iin itun koxi chi köo kuiꞌi ndaꞌa nu

12Ra te ndituvi inka kii, saa kee ndia ñuu Betania ra ndakiꞌin ndia vaxi tuku ndia, ra saa xaꞌa ndikaꞌun ini Jesús. 13Ra xika va xini ra ndichi iin itun koxi, ra vaꞌa ka vi ndukuii nu. Ra saa ndixaꞌan ra ixtoꞌni ra ndaꞌa nu, a iyoo koxi kaꞌan ra; su ndi te ndixaa ra nuu ndichi nu, ra ndia nii ri köo ndiniꞌi ra, chin takua niña i̱ku̱ va ke iyoo ndaꞌa nu, saa chi süvi tiempo ña xa ku̱chi ri kuvi ña, ra nii ri kuii̱ köo ndiniꞌi ra ndaꞌa nu. 14Saa ndikaꞌan Jesús xiꞌin itun koxi kan, kachi ra saa:

―Ndia nii ka yuvi na käxi kuiꞌi ña kuun ndaꞌa kun ―kachi ra xiꞌin nu.

Ra xini soꞌo takundiꞌi ndia xika xiꞌin ra, ña kachi ra saa xiꞌin itun koxi kan.

Ndukueꞌe Jesús xiꞌin na ndee ndaxiko nuu keꞌe veꞌe ñuꞌu kaꞌnu

15Ra saa te ndixaa Jesús ñuu Jerusalén xiꞌin na xika xiꞌin ra, ra ndikiꞌvi ra ini korra veꞌe ñuꞌu kaꞌnu kan kuaꞌan ra. Ra saa xaꞌa ra tava ra takundiꞌi na ndee ixiko kan ra saa tu na sata nuu va na, ra tiin ra mesa na ndee nama xuꞌun xiꞌin na yuvi, ra koꞌni ra nu kan, ra saa tu tiayu na ndee ixiko paloma va. 16Ra ndia nii ka na ixiko nditäxi ra kiꞌvi yeꞌe korra veꞌe ñuꞌu kaꞌnu kan. 17Saa xaꞌa ra ndakani ra nuu na kachi ra saa:

―Suꞌva kachi tuꞌun Ndioxi ña ndatiaa na xinaꞌa: “Veꞌe yu, ra veꞌe nuu kaꞌan takundiꞌi na yuvi xiꞌin Ndioxi va kunani ña.”

Chin saa kachi tuꞌun Ndioxi. Su ndi ndoꞌo ra kava nuu ndakuitaꞌan na kuiꞌna va ndasa ndo ña ―kachi ra xiꞌin na.

18Ra te kundaa ini na maestro na sañaꞌa ley Ndioxi ña ndakoo ra Moisés, xiꞌin na kunaꞌnu nuu na sutu, ña xa Jesús ña yoꞌo, ra saa xaꞌa na xika nduku na ndixaa koo ña kaꞌni na ra, chi xaꞌa iyuꞌvi ini na xini na ra, saa chin takundiꞌi na yuvi ra kusii ka vi ini na ña xini soꞌo na ña sañaꞌa ra na. 19Ra saa te xa kuaꞌan kuñuu, saa kanata Jesús ñuu kan ra ndakiꞌin ra kuaꞌan ra xiꞌin ndia xika xiꞌin ra.

Ndachi̱ itun koxi tu satavi̱ chiꞌña Jesús

20Ra te ndituvi inka kii, saa ndiyaꞌa na ichi nuu iin itun koxi kan, ra iin ndiakua tioꞌo nu ke ndachi̱ iin nu xini na. 21Ra saa ndakaꞌan ra Pedro ña satavi̱ chiꞌña Jesús nu, saa ndikaꞌan ra xiꞌin Jesús, kachi ra saa:

―Tata Maestro, ¡Koto vii! ¡Xa ndachi̱ va itun koxi, tu satavi̱ chiꞌña kun! ―kachi ra.

22Saa ndakuiin Jesús kachi ra saa xiꞌin ra:

―Ndinuni ni na kandixa ndo Ndioxi. 23Ra ña ndixa ke kaꞌan yu xiꞌin ndo, tu ndia iin ndo na kaꞌan xiꞌin iku yoꞌo, ra kachi ndo saa: “Kita nuu iin kun ñaa, ra sakoꞌni mii kun ini mini”, kachi ndo xiꞌin ña. Ra tu na kandixa vaꞌa ndo ña kaꞌan ndo, ra sä uvi ini ndo, saa ra, takundiꞌi ña kaꞌan ndo, ra xinu ndixa va nuu ña. 24Ña kan ke kaꞌan yu xiꞌin ndo, xaꞌa takundiꞌi ñaꞌa ña nduku ndo nuu Ndioxi, ra tu na kandixa ndo ña xa ndakiꞌin ndo ña, ra nii täan taxi va ra ña ndaꞌa ndo, ndi xa ta iyoo ña xa ndakiꞌin va ndo iyoo ña tuvi ndo, saa ra ni̱ꞌi̱ ndixa va ndo ña. 25Ra te kaꞌan ndo xiꞌin Ndioxi, ra tu väꞌa kuni ndo xini ndo iin yuvi, xaꞌa ndia iin kuachi ña xa na xiꞌin ndo, saa ra xiniñuꞌu na sakaꞌnu ini ndo xaꞌa na. Ra saa ke koo kaꞌnu tu ini Iva ndo Ndioxi, ra ^nduꞌu ndivi, xaꞌa kuachi ndoꞌo va. 26Chi tu na köo kaꞌnu ini ndo xaꞌa kuachi ña xa ndia iin yuvi xiꞌin ndo, saa ra nii Iva ndo Ndioxi, ra ^nduꞌu ndivi, köo kaꞌnu ini tu xaꞌa kuachi ndoꞌo va ―kachi Jesús xiꞌin na.

Ndiayu ña ku mii Jesús

27Saa xaa tuku Jesús ñuu kaꞌnu Jerusalén xiꞌin ndia xika xiꞌin ra, ra te saa kuu ra xika ra ini veꞌe ñuꞌu kan, saa xaa na kunaꞌnu nuu na sutu, xiꞌin na maestro sañaꞌa ley Ndioxi ña ndakoo ra Moisés, xiꞌin na xikuaꞌa ñuu kan, ra kuyachin na nuu Jesús. 28Ra ndindakatuꞌun na ra, kachi na saa:

―¿Yoo taxi ndiayu ndaꞌa kun ña xa kun ña yoꞌo? ¿Ni ndiayu ku mii kun ña xa kun saa? ―kachi na xiꞌin ra.

29Saa ndakuiin Jesús, kachi ra saa xiꞌin na:

―Kuni̱ tu yuꞌu va ndakatuꞌun yu ndoꞌo. Ra tu na ndakuiin ndo yuꞌu yu, ra saa ke ndatuꞌun tu yuꞌu va xiꞌin ndo yoo ko taxi ndiayu ndaꞌa yu ña xa yu suꞌva ―kachi ra xiꞌin na. 30Ra saa ndindakatuꞌun ra na, kachi ra saa:

―¿Yoo ko xaꞌndia chiñu nuu ra Juan ña sandakuchi ra yuvi? ¿Ndioxi taxi ña ndaꞌa ra, a na yuvi? Ndakuiin ndo. ―kachi ra xiꞌin na.

31Ra saa xaꞌa na kaꞌan na xiꞌin taꞌan na, kachi na saa:

―¿Ni ke kachi yo xiꞌin ra? Chi tu na kaꞌan yo: “Ndioxi va kuvi ra taxi ndiayu ndaꞌa ra”, saa ra, kachi ra saa xiꞌin yo: “¿Nichuun ndikandïxa tu ndo ña ndikaꞌan ra tu saa?”, kachi ra xiꞌin yo. 32Ra tu na kachi tu yo: “Na yuvi yoꞌo va kuvi na taxi ndiayu ndaꞌa ra”, saa ra, iyo ni kaꞌni na yo ―kachi na kunaꞌnu kan xiꞌin taꞌan na.

Saa chin iyuꞌvi ni na xikuaꞌa kan xini na na ñuu, chi takundiꞌi na ñuu ra ^kandixa va na ra Juan ña kuu ra, ra ndikaꞌan tuꞌun yuꞌu Ndioxi, chin Ndioxi ku ra tiꞌvi ra ña kixi va ra. 33Ra xaꞌa ña kan ke ninïꞌi na ni ke kachi na, ra saa ndakuiin na kachi na saa xiꞌin Jesús:

―Kundäa ini ndi yoo taxi ndiayu ndaꞌa ra Juan ña sandakuchi ra yuvi ―kachi na.

Ra saa ndakuiin Jesús kachi ra saa xiꞌin na:

―Saa ra nii yuꞌu ndatüꞌun tu xiꞌin ndoꞌo va, yoo ko taxi ndiayu ndaꞌa yu ña xa yu ña yoꞌo ―kachi ra xiꞌin na.

Currently Selected:

San Marcos 11: mxvNT

Highlight

Copy