San Marcos 7
7
Ñaꞌa ña kuyakua na yuvi xiꞌin
1Saa kuu ra ndixaa sava na fariseo xiꞌin na maestro sañaꞌa ley Ndioxi ña ndakoo ra Moisés; ra na ñuu Jerusalén ke kee na, xaa na nuu xika Jesús. 2Ra xini na ña nindäꞌa sava ndia xika xiꞌin Jesús, ra ndakundee ndia xixi ndia, saa ra väꞌa ni ndikuni na kuni na ndia, chi nuu na fariseo yoꞌo ra iin kuachi chee ku ña yoꞌo nuu Ndioxi tu na ndäꞌa iin yuvi ra kuxi na, kachi na. 3Saa chi na fariseo xiꞌin takundiꞌi na judío, ra xiꞌna ka ndaꞌa na saa ^xixi na. Chi ña yoꞌo ku costumbre ña sañaꞌa na xii xikua va na na, ra ta iyoo iin ña yii ni saa iyoo ña tuvi na. 4Ra te na ndiko na ndaxaa na veꞌe na, te xaꞌan na nuu yaꞌvi, ra xiꞌna ka ndaꞌa na saa xaxi na ndia ndia ka ñaꞌa, ra saa ke saxinu ndiꞌi na costumbre ña ndakoo xii xikua na, ra ndiee ni xatoꞌo na ña. Na kachi yo saa, ta kuu ña ndakatia na yaxin na, xiꞌin ña ndoo kisi na, xiꞌin ña ndoo xikoꞌo na, xiꞌin ña ndoo ixto kixi̱ na, takundiꞌi ña yoꞌo ra iin ndiakua nduxa xa na ña. 5Xaꞌa ña kan ke kuyachin na fariseo xiꞌin na maestro sañaꞌa ley Ndioxi nuu xika Jesús ra ndindakatuꞌun na ra, kachi na saa:
―¿Nichuun xätoꞌo ndia xika xiꞌin kun costumbre na xikuaꞌa? ¿A kundäa ini ndia, ña xiꞌna xiniñuꞌu ndaꞌa ndia saa kuxi ndia? Ra ndia yoꞌo ra iin saa iyoo ndaꞌa va ndia xixi ndia ―kachi na xiꞌin Jesús.
6Saa ndakuiin Jesús kachi ra saa xiꞌin na:
―Ña ndixa ni ke ndikaꞌan ra Isaías xaꞌa ndoꞌo na maña te yachi, ra suꞌva ke kachi Ndioxi ndikaꞌan ra xiꞌin ra xaꞌa ndo, kachi tuꞌun ña ndatiaa ra:
“Na yuvi yoꞌo, ra takua iin tuꞌun ni̱nù va ke kaꞌan na ña xatoꞌo na yuꞌu.
Ndi su nima na, ra xika ni va iyoo ña nuu yu.
7Ra ña uun va ke kaꞌan na ña kañuꞌu na yuꞌu.
Saa chi süvi ichi yuꞌu ke sañaꞌa na yuvi, chi ichi ña ndaku ini mii va na ke sañaꞌa taꞌan na”, kachi Ndioxi xaꞌa ndo,
kachi ña ndatiaa ra Isaías te yachi. 8Ra ña ndixa ni kuvi va ña, saa chi ndakoo ñaꞌa va ndo chiñu ña xaꞌndia Ndioxi, ra costumbre ña sandaku mii na yuvi yoꞌo va ndiee ni ndakundikun ndo, saa chi takuu ña ndakatia ndo kisi ndo, xiꞌin ña ndakatia ndo yaxin ndo, xiꞌin ña xa ndo kuaꞌa ni ka chiñu, su ndi chiñu yoꞌo, ra ña xaꞌndia na yuuvi yoꞌo va ke yoꞌo ―kachi Jesús xiꞌin na.
9Saa ndikaꞌan ka ra xiꞌin na kachi ra saa:
―Ndoꞌo, ra iin xiyo va ndakoo ndo ndiayu ña xaꞌndia Ndioxi, ra chiñu ña ndakoo na xii xikua va ndo, ndiee ni xayii ndo, ra xanduvi ndo ña. 10Ra kaꞌan yu saa xiꞌin ndo, saa chi ndiayu Ndioxi ña ndakoo ra Moisés, ra suꞌva va kachi ña: “Satoꞌo kun iva kun xiꞌin siꞌi kun” chin “Yuvi na kaꞌan ndivaꞌa xiꞌin vasiꞌi, ra na köo ña kaꞌnu ini xiꞌin na, chi xiniñuꞌu na kuvi va na”, kachi ña. 11Su ndi ndoꞌo, ra süvi saa ^xa ndo, chi suꞌva va kachi ndo̱: “Iin tiaa ra kuvi kachi ra suꞌva xiꞌin siꞌi ra a xiꞌin iva ra: ‘Küvi chindiee taꞌan yu xiꞌin kun, chi takundiꞌi xuꞌun ña xani xini yu taxi yu ndaꞌa kun, ra xa ta iyoo ña xa ndisoko yu nuu Ndioxi va iyoo ña, ra xa corbán va nduu ña’, kachi ra xiꞌin vasiꞌi ra. Saa ra xavaꞌa va. Xiniñüꞌu ka ndiakua nduxa toꞌni ra na”, kachi ndoꞌo. 12Ra suꞌva va ke xa ndo kava ndo yuvi, ra sasi ndo nuu na; täxi ndo satoꞌo na iva siꞌi na, ña kiꞌin na kuenda xiꞌin na. 13Ra suꞌva ke ^xa tu ndo ña sandiꞌi ndo xaꞌa tuꞌun Ndioxi va xiꞌin costumbre ndo, chi costumbre ña sandaku mii ndo yoꞌo va ke ndiee ni ndasatoꞌo ndo, ra chiñu xaꞌndia Ndioxi sandiꞌi ndo xaꞌa va. Ra süvi takua ña yoꞌo ke ^xa ndo, chin kuaꞌa ni ka va ña xa ndo ―kachi Jesús xiꞌin na.
14Saa ndakana ra takundiꞌi na yuvi kan ra ndu̱yachin na nuu ra, ra ndikaꞌan ra xiꞌin na kachi ra saa:
―Tiaa ni soꞌo takundiꞌi ndo ña kaꞌan yu xiꞌin ndo yoꞌo, ra na kundaa ini ndo xiꞌin ña. 15Ndia nii ñaꞌa ña iyoo nuu ñuꞌú yoꞌo, ra xaxi na ña, a xixi tu na ña, ra xayäkua ña na; chi tuꞌun ña ndakoyo nima va na ke xayakua ñaꞌa. 16Ndoꞌo, na xini soꞌo ña kaꞌan yu xiꞌin ndo yoꞌo, ra ndakiꞌin xi̱ni̱ ndo xiꞌin ña ―kachi ra xiꞌin na.
17Ra saa te ndiꞌi ra ndakoo ra na yuvi kan, ra ndaxaa ra chi veꞌe, saa ndindakatuꞌun ndia xika xiꞌin ra ra xaꞌa tuꞌun ndichi ña ndikaꞌan ra, ni ke kuni kachi ña: 18Saa ndikaꞌan ra xiꞌin ndia kachi ra saa:
―¿A ta iyoo na yuvi kan ke iyoo tu ndoꞌo va ña ndakïꞌin xi̱ni̱ ndo xiꞌin ña ni ke kuni kachi ña? ¿A kundäa ini ndo takundiꞌi ñaꞌa ña iyoo nuu ñuꞌu yoꞌo, ra xaxi na ña, a xixi tu na ña, ra xayäkua ña na? 19Chi süvi nima na kuaꞌan ña, chi ini siti va na ke kuaꞌan ña, ra te ndiꞌi xitia ña kuaꞌan ña ni̱nu̱ va ―kachi ra xiꞌin ndia.
Ra suꞌva ke kachi Jesús xiꞌin ndia ña na kundaa ini ndia, ña kuvi kaxi yo takundiꞌi va ñaꞌa, chi ña vaꞌa ku takundiꞌi va ña; köo ña yakua. 20Saa ndikaꞌan ka ra xiꞌin ndia kachi ra saa:
―Takundiꞌi tuꞌun ña kee yuꞌu mii va yuvi ke kuyakua na xiꞌin. 21Saa chi nima na ke kaku takundiꞌi va ña väꞌa, ña vaxi xini na kuni na sa na, ña kotoo na kaka na ña yuuvi, ra kuaꞌa ni koo tani na kuni na, nii na siꞌi kuvi na, ra nii tiaa kuvi va ndia, ra nii ndakatüꞌun taꞌan tu na a kuachi na a naꞌnu na, chi inuu xasiki taꞌan ndiꞌi va na, ra saa tu ña kuni na kaꞌni na ndìì va, 22xiꞌin ña xakuiꞌna na, xiꞌin ña iin suꞌva kuni̱ na koo kuika na, xiꞌin ña xa na takundiꞌi nuu ña väꞌa, xiꞌin ña sandaꞌvi na yuvi, xiꞌin ña kuni na kindiaa na ñaꞌa iyoo nuu inka yuvi koo nuu na, xiꞌin ña ndukuini na xiꞌin taꞌan na, xiꞌin ña kandivaꞌa kini na xiꞌin taꞌan na, xiꞌin ña kutiaa na nuu ñani taꞌan na, ra niña chuun kiꞌvi va xani xini na sa na. 23Takundiꞌi ña ki̱ꞌvi yoꞌo ra nima va yuvi ke kana ña, ra ña yoꞌo ke kuyakua na xiꞌin, ra nduu na na väꞌa nuu Ndioxi ―kachi Jesús xiꞌin ndia.
Ndinuni ni ini iin ñaꞌá, ña küu judío kandixa ña Jesús
24Saa kee Jesús ñuu kan ra ndakiꞌin ra kuaꞌan ra ñuu Tiro xiꞌin Sidón. Ra ndixaa ra ndikiꞌvi ra iin veꞌe ndakunduꞌu ra, chi ndiküni ra ña na kundaa ini yuvi ña ndixaa ra kan, su ndi ndikuchüun ra ña koo seꞌe ra nuu na. 25Ra ñuu kan iyoo iin ñaꞌá, ra tachi ndivaꞌa ke tiin ña loꞌo seꞌe ña. Ra te xini ña tuꞌun ña ndi̱xaa ra, saa ra ndikun ndakiꞌin ña ndi̱xàà ña nuu nduꞌu ra, ra xikisiti ña nuu ra. 26Ra ñaꞌa yoꞌo ra süvi taꞌan na judío kuvi ña, chi ña ñuu Sirofenicia va kuvi ña. Ra xakundaꞌvi ka vi ña nuu Jesús ña na sa ra ña mani tava ra tachi ndivaꞌa kan kuꞌun ña, ra na saña ña ña loꞌo seꞌe ña. 27Saa ndikaꞌan Jesús xiꞌin ñaꞌa yoꞌo kachi ra saa:
―Kundiatu ñaꞌa kun nana, xiꞌna ka mii na xiꞌin veꞌe kuvi na, na kuxi ñaꞌa, chi väꞌa kita ña tu na kindiaa yo ixta yuꞌu seꞌe yo, ra taxi yo ña ndaꞌa tina kuxi ri ―kachi ra xiꞌin ña.
28Saa ndakuiin ña, kachi ña saa xiꞌin ra:
―Ña ndaa ni kuvi va ña kaꞌan kun Tata, su ndi tina, ra ndia ikin vali ña koyo yuꞌu na kuachi chi tixi mesa va ndakaya ri xixi ri, ―kachi ña xiꞌin ra.
29Saa kusii ni ini Jesús ña kachi ña saa, ra ndikaꞌan ra xiꞌin ña kachi ra saa:
―Vaꞌa ni ndikaꞌan kun nana, ra kuanuꞌu veꞌe kun chi xa kita va tachi ndivaꞌa kuaꞌan ña, ra xa nduvaꞌa va seꞌe kun, xaꞌa tuꞌun ña ndikaꞌan kun yoꞌo ―kachi ra xiꞌin ña.
30Ra saa te ndaxàà ndixa ñaꞌa kan veꞌe ña, ra xa nuu ixto va yayaa kanduꞌu ña loꞌo seꞌe ña, ra xa kita va tachi ndivaꞌa ini ña kuaꞌan ña.
Sandaꞌa Jesús iin ra miꞌmi ra xïni tu soꞌo va ra.
31Saa kuu kanata Jesús ñuu Tiro ra ndiyaꞌa ra chi ñuu Sidón iin saa ndixaa ra ndia yuꞌu tiañuꞌu Galilea, chi inka xiyo nuu ndikaa Decápolis. 32Ra ikan ndixaa na nuu ra xiꞌin iin ra miꞌmi ra xïni tu soꞌo va ra, ra xakundaꞌvi ka vi na nuu ra, ña na sa ra ña mani̱ chinduꞌu ra ndaꞌa ra sata ra xiꞌi̱ kan. 33Saa kuxiyo Jesús xiꞌin ra kueꞌe̱ kan, chi nuu köo yuvi, ra ikan chinii ra nduku ndaꞌa ra ini soꞌo ra kue̱ꞌe kan, ra koꞌni ra loꞌo tiasiꞌi ra nuu ndaꞌa ra, ra nditiandiaa ndaꞌa ra nuu yaa ra küvi kaꞌan kan. 34Ra ndoniꞌi ra nuu ra chi ndivi, ra ndixaka ini ra, ra ndikaꞌan ra kachi ra saa:
―¡Efata! ―kachi ra. Tu̱ꞌun yoꞌo kachi ña saa: “Na ndanuña ña”.
35Saa ra ndikun ndanuña ndixa va soꞌo ra, ra ndukama tu yaa va ra, ra ndikun vaꞌa ndakaꞌan va ra. 36Ra ndikaꞌan Jesús xiꞌin na, ña na ndatüꞌun na xiꞌin ndia nii yuvi xaꞌa ña yoꞌo; su ndi na ndiee ka xa va kuvi na, chi te kaꞌan ra xiꞌin na, ña na ndatüꞌun na xiꞌin inka yuvi xaꞌa ña xa ra xiꞌin na, ra na ndiee ka ndatuꞌun va kuvi na. 37Ra ndakanda ka vi ini na yuvi kan kachi na saa:
―Vaꞌa ni ^xa Jesús chi ndia na soꞌo xiꞌin na küvi kaꞌan ra vaꞌa sanduvaꞌa ra na ―kachi na xaꞌa Jesús.
Currently Selected:
San Marcos 7: mxvNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved
