San Marcos 8

Sakuxi Jesús kumi mil yuvi

1Saa kuu iin kii ra kuaꞌa ka vi yuvi ndakaya tuku. Ra ndia nii loꞌo ñaꞌa köo niꞌi na kuxi na, saa kana Jesús ndia xika xiꞌin ra, ra ndikaꞌan ra xiꞌin ndia kachi ra saa:

2―Kundaꞌvi ni ini yu xini yu na yuvi yoꞌo, chi xa kii uni va ke iyoo na xiꞌin yu vichin, ra köo mii ñaꞌa niꞌi na kuxi vi na ra ndaꞌvi ni na. 3Ra tu saa na koo na xiꞌin so̱kò ndatiꞌvi yu na kunuꞌu na veꞌe na, saa ra kuaꞌan na ichi saa kundiëe ka na ra kuñaa nuu va na, chin sava na ke̱e xika va ―kachi ra.

4Saa ndakuiin ndia xika xiꞌin ra kachi ndia saa:

―Tata, ¿ndia mii ku kiꞌin yo ñaꞌa kuxi takundiꞌi na yoꞌo? Chi iku nuu köo yuvi va ke yoꞌo ―kachi ndia xiꞌin ra.

5Ra saa ndindakatuꞌun ra ndia kachi ra saa:

―¿Ndixaa ku ixta niꞌi ndo? ―kachi ra xiꞌin ndia.

Saa ndakuiin ndia kachi ndia saa:

―Uxa va ke niꞌi ndi, tata ―kachi ndia.

6Saa xaꞌndia ra chiñu ña na ndakundee takundiꞌi na yuvi kan nuu ñuꞌu. Ra kiꞌin ra uxa saa ixta kan, ra ndataxi ra tixaꞌvi ndaꞌa Ndioxi xaꞌa ña, ra te ndiꞌi saa taꞌvi ra ña ra taxi ra ña ndaꞌa ndia xika xiꞌin ra, ña na ndataꞌvi ndia ña xiꞌin na yuvi kan; ra saa ndixa xa va ndia. 7Ra niꞌi tu na iin tiꞌvi loꞌo tiaka ichi vali va, ra saa ndataxi tu ra tixaꞌvi ndaꞌa Ndioxi xaꞌa ri kan va. Ra te ndiꞌi saa xaꞌndia ra chiñu ña na ndataꞌvi tu ndia ri kan va xiꞌin na. 8Ra xixi na ndiakua nditiandiaa ini na. Ra uxa ka tuká sakutu na xiꞌin ñaꞌñu ña nindoo ndoso ndakaya na. 9Ra takundiꞌi na xixi kan ra kuꞌva kumi mil yuvi kuvi na, ra te ndiꞌi saa ndindiayu taꞌan Jesús xiꞌin na. 10Ra saa nandaa ra ini barca xiꞌin ndia xika xiꞌin ra, ra ndakiꞌin ndia kuaꞌan ndia chi ñuu Dalmanuta va.

Kaꞌan na fariseo xiꞌin Jesús ña na sa ra iin ña täan kuni na

11Ra te ndixaa ndia ñuu kan, saa ra ndixaa tu na fariseo va ra xaꞌa na tiin taꞌan na xiꞌin Jesús, ra kaꞌan na xiꞌin ra ña na sa ra iin ña ndichi kuni na, ña ixtondoso na ra, a ndixa ndivi ke kee ra. 12Saa ra iin ndiakua ndixaka ini ra, ña ndindiꞌi ini ra nuu na, ra ndakuiin ra kachi ra saa:

―¿Nichuun kuni̱ ni ndo kuni ndo ña xituꞌun? Ña ndixa kaꞌan yu xiꞌin ndo, ndia nii ña sä yu kuni ndo ―kachi ra xiꞌin na.

13Saa ndakoo Jesús na, ra nandaa tuku ra ini barca loꞌo kan, ra ndakiꞌin ra kuaꞌan ra chi inka xiyo yuꞌu mini kan xiꞌin ndia xika xiꞌin ra.

Kaꞌan Jesús ña na köo yo ta kuꞌva iyoo na fariseo

14Ra ndia xika xiꞌin Jesús, ra naa ini ndia ña kuꞌun ixta xiꞌin ndia kuxi ndia, ra indaa mituꞌun nuu vi ku ixta kuaꞌan xiꞌin ndia ini barca kan. 15Saa xaꞌndia Jesús chiñu nuu ndia ra kachi ra saa:

―Toꞌni ndo, ra kuenda ni koo ndo xiꞌin ixan iyá ña kuu ndavi na fariseo ra saa tu ra Herodes va ―kachi ra xiꞌin ndia.

16Ra saa xaꞌa ndatuꞌun taꞌan mii ndia kachi ndia saa:

―A ña ndixinïꞌi yo ixta va ke kachi ra saa xiꞌin yo ―kachi ndia.

17Saa xini Jesús ña xaꞌa ndatuꞌun xiꞌin taꞌan ni ndia, saa ra ndikaꞌan ra xiꞌin ndia kachi ra saa:

―¿Ni ke ndiee ni ndatuꞌun ndo xaꞌa? ¿Nichuun kaꞌan ndo ña köo ixta niꞌi ndo? ¿A ra ndixa ke ndia nii loꞌo chiin täan kundaa ini ndo, ra nii ndakïꞌin xini ndo? ¿Nichuun ndaku ni ini ndo ña küvi xinu ini ndo saa va? 18Iyoo nduchi nuu ndo ra xïni ndo; iyoo soꞌo ndo ra xïni soꞌo ndo. ¿A ndaküꞌun ini ndo xaꞌa ña xituꞌun xa yu 19te sakuxi yu uꞌun mil yuvi, xiꞌin takua uꞌun ixta, ña xiniꞌi ndo? ¿Ra ndixaa ka tuká ixta nindoo ndoso ndakaya ndo? ―kachi ra xiꞌin ndia.

Saa ndakuiin ndia kachi ndia saa:

―Uxi uvi ka tuká ndakiꞌin ndi, Tata ―kachi ndia xiꞌin ra.

20Saa ndikaꞌan ka ra xiꞌin ndia kachi ra saa:

―Ra te sakuxi tu yu kumi mil yuvi xiꞌin uxa kuiti ixta tu, ¿ndixaa ka tuká chitu nindoo ndoso ndakiꞌin ndo? ―kachi ra xiꞌin ndia.

Saa ndakuiin ndia kachi ndia saa:

―Uxa ka tuká ndakiꞌin ndi, Tata ―kachi ndia xiꞌin ra.

21Saa ndikaꞌan ra xiꞌin ndia kachi ra saa:

―Ra nani saa küvi kundaa ini ndo vichin va ―kachi ra xiꞌin ndia.

Sandaꞌa Jesús iin ra kuaa chi ñuu Betsaida

22Saa ndixaa Jesús ñuu Betsaida xiꞌin ndia xika xiꞌin ra. Ra ikan ndiaka na yuvi kan iin ra kuaa ndixaa ra xiꞌin na nuu Jesús, ra xakundaꞌvi na nuu ra ña na sa ra ña mani̱ chinduꞌu ra ndaꞌa ra sata ra kuaa kan. 23Saa tiin Jesús ndaꞌa ra kuaa kan ra ndiaka ra ra ndixaꞌan ra xiꞌin ra ndia nuu ñuu kan, ra ikan kondiaa ra tiasiꞌi ra nuu ra, ra te ndiꞌi chinduꞌu ra ndaꞌa ra sata ra, ra ndindakatuꞌun ra ra kachi ra saa:

―¿A xa tuvi loꞌo? ―kachi ra xiꞌin ra.

24Ra xa ndatuvì va loꞌo nuu ra kuaa kan, Saa ndakuiin ra kachi ra saa xiꞌin Jesús:

―Xa xini va yu na yuvi, Tata, ndi ta iin itun naꞌnu va, iin na tuvi yu, ra tu xika kuaꞌan va kuvi nuu tuvi yu ―kachi ra.

25Saa chinduꞌu tuku Jesús ndaꞌa ra nuu ra kuaa kan, ra ndikaꞌan ra xiꞌin ra na toꞌni ra, saa ra ndikun nduvaꞌa ndixa va nuu ra, ra iin kaxi kaxi ndakotoꞌni ra iinii kuvi. 26Ra saa ndatiꞌvi Jesús ra kuanuꞌu ra veꞌe ra, ra ndikaꞌan ra xiꞌin ra kachi ra saa:

―Kuaꞌan, ra kïꞌvi kun ñuu, ra ndia nii yuvi ndatüꞌun kun xiꞌin xaꞌa ña yoꞌo ―kachi ra xiꞌin ra.

Ndakuni ra Pedro Jesús ña kuu ra seꞌe Ndioxi

27Te ndiꞌi, saa ndakiꞌin Jesús kuaꞌan ra xiꞌin ndia xika xiꞌin ra chi ñuu vali ña ndoꞌni ñuu Cesarea ña ndikun ndiaa Filipo. Ra nani saa kuu ndia kuaꞌan ndia ichi kan, saa ndindakatuꞌun ra ndia kachi ra saa:

―¿Yoo kuu yuꞌu kachi na yuvi? ―kachi ra xiꞌin ndia.

28Saa ndakuiin ndia kachi ndia saa:

―Sava na kaꞌan ña kuu kun ra Juan ra sandakuchi yuvi, ra sava tu na kaꞌan ña kuu kun ra Elías va, ra inka tu na kaꞌan xaꞌa kun ña kuu kun ndia iin ra ndikaꞌan tuꞌun yuꞌu Ndioxi xinaꞌa va kuvi ra ndatiaku, kachi na ―kachi ndia xiꞌin ra.

29Saa ndikaꞌan ra xiꞌin ndia kachi ra saa:

―Ra ndoꞌo tu, ¿yo kuvi yu tuvi ndo? ―kachi ra xiꞌin ndia.

Saa ndakuiin ra Pedro kachi ra saa:

―Tata, yoꞌo ku Cristo ra ndikaxin Ndioxi sakaku na yuuvi yoꞌo ―kachi ra xiꞌin ra.

30Saa ndikaꞌan Jesús xiꞌin ndia kachi ra saa:

―Ndia nii yuvi ndatüꞌun ndo xiꞌin xaꞌa ña yoꞌo ―kachi ra xiꞌin ndia.

Kaꞌan Jesús ndia kuꞌva ke ndoꞌo ra ta xa na kuvi ra

31Saa xaꞌa Jesús ndakani ra nuu ndia kachi ra saa:

―Yuꞌu, ra xaa yoꞌo, ra xiniñuꞌu ndoꞌo ni yu, ra na xikuaꞌa ñuu Israel, xiꞌin na sutu kunaꞌnu, xiꞌin na maestro sañaꞌa ley Ndioxi ña ndakoo ra Moisés, ra kundasi ni na yuꞌu, ra kaꞌni na yuꞌu, su ndi kii uni ra ndatiaku va yu ―kachi ra xiꞌin ndia.

32Ra nditisëꞌe tuꞌun vaꞌa vi ra xaꞌa ña ndoꞌo ra chi iin kaxi kaxi va ndatuꞌun ra xiꞌin ndia. Ra saa tava siin ra Pedro Jesús ra ndiyaꞌa tuꞌun ndikaꞌan ra xiꞌin ra. 33Saa ndikokuiin Jesús ra ndakotoꞌni ra nuu ndia xika xiꞌin ra, ra nindaꞌyu ra nuu ra Pedro nuu ndia kuaꞌa kan, kachi ra saa:

―¡Kuatiaꞌa nuu yu, timiaꞌa! Chi yoꞌo, ra süvi chiñu Ndioxi ke ndiꞌi ini kun xaꞌa sa kun chi chiñu ña xa na yuvi yoꞌo va ke kiꞌin kun kuenda xiꞌin ―kachi ra xiꞌin ra Pedro. 34Ra saa ndakana Jesús ndia xika xiꞌin ra, xiꞌin na yuvi kan, ra ndikaꞌan ra xiꞌin na kachi ra saa:

―Tu ndia ndo kuni̱ kundikun yuꞌu, ra xiniñuꞌu kaꞌndia ini ndo xaꞌa mii ndo, ra ndakasoko ndo cruz ndo ra kundikun ndo yuꞌu. 35Saa chi yuvi na kuni̱ sakaku mii ra na kan kuvi na ndiꞌi xaꞌa va. Ra na sandoñuꞌu mii xaꞌa yuꞌu, xiꞌin xaꞌa tuꞌun Ndioxi, ra na kan kuvi na kuchuun kaku va. 36¿Ra ni ke vaꞌa niꞌi vi yuvi, tu na sakanaa na iinii saa ña yuuvi yoꞌo, ra sandoñuꞌu tu na mii na? 37Chi na yuuvi yoꞌo, ra ndia nii ñaꞌa kuchüun na chaꞌvi na xaꞌa ña kutiaku na. 38Ra yuvi na kukaꞌan nuu tu xiꞌin yu, a xiꞌin tuꞌun yu nuu na yuvi kuachi yoꞌo vichin, saa ra, saa sa tu yuꞌu, ra xaa yoꞌo va, chi kukaꞌan nuu tu yuꞌu va xiꞌin na nuu Tata yu, ta xa na ndiko yu kixi yu xiꞌin ndie̱e̱ Iva yu, xiꞌin na yii na ku tatun ra ―kachi Jesús xiꞌin na.

Currently Selected:

San Marcos 8: mxvNT

Highlight

Copy