TIBIRIK 19
19
Dosa Sodom
1Kan duwŭh naan malaikat anŭ ndŭg kupo Sodom singumi andu anŭ, Lot agi guru di tiban-bās kupo. Kan-i kiris ngara mandŭg, ayŭh rasu makat di bidapŭd ngga ngara. Ayŭh mutu ubak-i ka ngara, 2ka nang, “Tuan, aku an ngidang angān. Turung mŭrŭt ramin ku. Angān bisa ngu kaja ngan ka nyirŭmŭn. Sipagi isan isan angān bisa awar makat ka pijuu pimanu ngan.”
Pak ngara nam, “Dŭh, kieh re nyirŭmŭn digiti di pakan kupo.”
3Ayŭh darah mite, ka sikasŭn-i ngara mŭrŭt ramin-i. Lot bada bara daya gaji-i ndai ruti ka sidia pinguman adi sidi yŭn pinyandong-i. Kan-i mbŭh sidia, ngara man.
4Sibayuh pinyandong anŭ bŭŭs, bara daya so Sodom kirurung ramin anŭ. Sopŭrŭg dari so kupo, adi mara ngga adi minyamba, mbŭh agi diginŭ. 5#Akm 19.22-24 Ngara bagan Lot ka siken, “Diki daya adi mandŭg nyirŭmŭn di ramin mu ngarŭm ati? Taban ngara ngga ruah!” Bara dari so Sodom an nyiket ngara.
6Lot ruah ka sapa ka tŭŭp tiban. 7Ayŭh nang di ngara, “Bara dingan, aku mite angān turung dŭhnyah ndai urah ginaka adi mun anŭ! 8Dingah, aku biyŭn duwŭh madis anak dayung bujang tibŭn. Aku bisa nggen ngara di angān, ka angān bisa sikamun kamun ngan ngga ngara. Pak dŭhnyah ida ida ngga dari adi duwŭh naan anŭ; ngara duwŭh pinyandong ku, ka aku dŭh siŭn dŭh jaga ngara.”
9Pak ngara nang, “Dŭhnyah matŭn kieh, tami! Asi kuu nak kidaan di kieh kayuh adi patut ami ndai? Bu, dŭhnyah matŭn kieh; kieh ndai di kuu kayuh adi rabis arap so anŭ adi kieh an ndai di ngara rai-i.” Ngara turak Lot ka bŭngŭn ka tudu tiban an nyirubuh-i. 10Pak dari adi duwŭh naan anŭ, so darŭm, tarik Lot ka darŭm ramin, ka tŭŭp tiban. 11#2Ra 6.18 Ka ngara bada sopŭrŭg dari anŭ adi di sapa karak, isa ngara dŭh puan diki tiban.
Lot bu Tingge Sodom
12Ngara adi duwŭh naan anŭ nang di Lot, “kambŭi kuu biyŭn anak anak dari, anak anak dayung, iban iban dari, puan kah madis madis adi bŭkŭn adi rŭŭ di kupo ati, taban ngara ngga bu so ti, 13sabab kieh re pirabur tarun ati. TUHAN mbŭh dingah pinganang raru bat nyarah bara daya ati ka mbŭh pait kieh da pirabur Sodom.”
14Lot kidaan di duwŭh naan dari adi re sawŭn anak anak dayung-i, ka nang, “Rikas, ja ata bu so ti; TUHAN re pirabur tarun ati.” Pak ngara pikir ayŭh bitapat.
15Ngga arong siri jawa duwŭh naan malaikat anŭ suba bada Lot rikas. “Rikas!” ngara nang. “Taban sawŭn mu ngga anak dayung mu adi duwŭh madis ngga bu so ti, isa angān dŭh kabŭs kan kupo ati dog pirabur.” 16#2Pe 2.7 Lot sais. TUHAN masi di ayŭh; jadi ngara tambit tangan-i, sawŭn-i ka duwŭh madis anak dayung-i ka kayak ngara ngga ruah so kupo anŭ. 17Ndi so malaikat anŭ nang, “Nyiramat adŭp ngan! Dŭhnyah kimat punok ka dŭhnyah rŭŭ di rubān. Bikaduh ka sandah ajeh, isa angān dŭh kabŭs.”
18Pak Lot nam, “Dŭh, turung dŭhnyah bada kieh di kamanŭ, tuan. 19Kaam mbŭh raru kana ngga aku ka mbŭh nyiramat aku. Pak sandah ajeh paŭh jo; pinyirusag re nyandat aku, ka aku re kabŭs sibayuh aku ndŭg nŭ. 20Kiris mai kah anak kupo ajeh? Anŭ agi mua sindŭk-i. Bada aku di kamanŭ. Kaam kiris gŭh tarun anŭ sŭ, ka aku bisa siramat diginŭ.”
21Malaikat nam, “Bisa, aku situju. Aku dŭh re pirabur kupo anŭ. 22Rikas! bikaduh meh! Aku dŭh bisa ndai ani ani sibayuh angān mbŭh ndŭg nŭ.”
Sabab Lot nang-i sŭ, kupo anŭ mbŭh dog kadŭn Zoar.#19.22 Zoar: Dŭn ati sak piminyu Hebrew adi nang “Sŭ”.
Pinyirabur Sodom ngga Gomorrah
23Batŭh andu aŭn makat kan Lot ndŭg Zoar. 24Gŭgŭh TUHAN buān apui mirirang ka kupo Sodom ngga Gomorrah 25#Mat 10.15, 11.23-24; Luk 10.12, 17.29; 2Pe 2.6; Jud 7 ka pirabur-i samŭn arong rubān anŭ, samŭn sopŭrŭg daya adi agi diginŭ, ka samŭn sopŭrŭg kayuh adi udip di tarun tana anŭ. 26#Luk 17.32 Pak sawŭn Lot kimat punok ka rasu marui jadi uros garo.
27Awar isan isan andu jawa ndi, Abraham rikas di ka tarun adi yŭn-i ko mijog di sirung jawin TUHAN. 28Ayŭh nyirangga tingga kupo Sodom ngga Gomorrah samŭn rubān anŭ ka kiris asuh makat so tarun tana anŭ, mun jambung asuh so tibande buwang apui. 29Pak di tipuh Tapa pirabur kupo kupo anŭ di rubān adi yŭn Lot ko rŭŭ, Ayŭh ingat Abraham ka bada Lot bu so nŭ di nyiramat adŭp-i.
Tibirik asar daya Moab ngga daya Ammon
30Sabab Lot mbŭh taru rŭŭ di Zoar, ayŭh ngga duwŭh madis anak dayung-i maad sandah anŭ ka rŭŭ darŭm tang. 31Anak pinuai dayung nang di sude-i, “Sama ta mbŭh dŭ dŭ minyamba, ka mating dari di ndi ong ong#19.31 ndi ong ong; puan kah: tarun tana ati. re sawŭn ata isa ata biyŭn anak. 32Ja ata bada sama mabuk, isa ata bisa nyibŭŭs ngga ayŭh, ka dapŭd anak so ayŭh.” 33Ngarŭm anŭ ngara bada sama ngara nok wain, ka anak pinuai dayung nyibŭŭs ngga ayŭh. Ayŭh mbŭh ruai mabuk, dŭh rada kayuh adi jadi.
34Ngga andu jawa, anak pinuai anŭ nang di sude-i, “Aku muko nyibŭŭs ngga ayŭh singumi. Ja ata bada ayŭh mabuk dinge ngarŭm ati, ka kuu nyibŭŭs ngga ayŭh, isa so-duwŭh ta dapŭd anak so ayŭh.” 35Jadi ngarŭm anŭ ngara bada ayŭh mabuk, ka sude-i nyibŭŭs ngga ayŭh. Babŭ gŭh ayŭh ruai nang mabuk-i ndŭg ka dŭh rada kayuh adi jadi. 36Simŭnŭ inŭh meh so-duwŭh anak dayung Lot bite da sama adŭp ngara. 37Anak pinuai dayung biranak anak dari ka kadŭn-i Moab#19.37 Moab: Dŭn ati sak adi nang darŭm piminyu Hebrew “So sama ku”. Ayŭh inŭh babuk daya Moab adi madin. 38Anak sibusu gŭh dapŭd anak dari, adi-i kadŭn Benammi.#19.38 Benammi: Rati dŭn ati darŭm piminyu Hebrew “anak madis ku” buang sak adi nang “daya Ammon” darŭm piminyu Hebrew. Ayŭh inŭh babuk daya Ammon adi madin.
Currently Selected:
TIBIRIK 19: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
