TIBIRIK 25
25
Bara Sesang Abraham adi Bŭkŭn
(1Kr 1.32-33)
1Abraham sawan dinge ngga dayung bŭkŭn adi dŭn Keturah. 2Sawŭn-i anŭ biranak yŭn-i Zimran, Jokshan, Medan, Midian, Ishbak, ka Shuah. 3Jokshan inŭh sama Sheba ngga Dedan, ka bara sesang Dedan inŭh daya Asshurim, daya Letushim, ngga daya Leummim. 4Anak anak dari Midian inŭh Ephah, Epher, Hanoch, Abida, ka Eldaah. Sopŭrŭg ngara inŭh bara sesang Keturah.
5Abraham tingge sopŭrŭg buat rata-i di Isaac; 6pak sitadŭn ayŭh gibabŭ udip, ayŭh nggen pinganggen di bara anak dari-i adi so bara sawŭn-i adi bŭkŭn. Komŭnŭ ayŭh pait bara anak dari-i anŭ da rŭŭ di tarun tana di Timor, jo so anak-i Isaac.
Pinyikabŭs ngga Pinyikubur Abraham
7-8Abraham kabŭs kan ayŭh mbŭh sukup minyamba 175 sawa. 9Anak-i Isaac ngga Ishmael kubur ayŭh di Tang Machpelah, di tana tura ka timor Mamre adi ko dog dapu Ephron anak dari Zohar daya Hitti. 10#Tib 23.3-16 Tana anŭ inŭh adi Abraham ko miris so daya Hitti; ngara duwŭh, Abraham ngga sawŭn-i Sarah dog kubur diginŭ. 11Ripas pinyikabŭs Abraham, Tapa nyiberkat anak-i Isaac, adi rŭŭ sindŭk “Prigi Nyanŭ adi Udip adi Kiris Aku.”
Bara Sesang Ishmael
(1Kr 1.28-31)
12Ishmael, adi Hagar daya Egypt adi urun Sarah, biranak yŭn Abraham, 13biyŭn bara anak dari, dog nyusud nanyam ka pinyibranak ngara: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphish, ka Kedemah. 16Ngara inŭh tayung-babuk simŭng duwŭh tibaran-asar, ka dŭn dŭn ngara mbŭh dog pakai ngga kadŭn anak anak kupo ka tarun tarun tana adi yŭn ngara bibari. 17Ishmael agi 137 sawa umbur-i kan ayŭh kabŭs. 18Bara sesang Ishmael rŭŭ di tarun tana di asah Havilah ngga Shur, parad tura ka timor Egypt di aran nuju Assyria. Ngara rŭŭ birijo so bara sesang Abraham adi bŭkŭn.
Pinyibranak Esau ngga Jacob
19Ati inŭh dundan Isaac adi anak Abraham. 20Isaac mbŭh pat puru sawa umbur-i kan ayŭh tambit Rebecca ndu sawŭn, anak dayung Bethuel (daya Aram so Mesopotamia) ka jurud dayung Laban. 21Sabab Rebecca dŭh biyŭn anak, Isaac bidua ka TUHAN yŭn-i. TUHAN nam pimite-i, ka Rebecca meh rasu bite. 22Rebecca re biranak anak apid, ka sibayuh ngara dog biranak, ngara siraru birawan ngga dingan-i darŭm ite sindŭ-i. Rebecca nang, “Mani kah kayuh mun ati bisa jadi di aku?” Jadi ayŭh di siken TUHAN rati-i.
23 #
Rom 9.12
TUHAN nang di ayŭh,
“Duwŭh bangsa agi di darŭm ite mu;
Kuu re biranak duwŭh bangsa daya adi dŭh bisa bigaur.
Ndi re bake dŭ so sianŭ ndi;
Adi tuuh re bituan di sianŭ adi mara.”
24Tipuh adi ngga-i biranak mbŭh mandŭg, ka-i ruwan anak apid. 25Adi diŭ ruah agi bireh, ka kurit-i mun jipo-ambu adi piburuh, jadi ayŭh dog kadŭn Esau.#25.25 Esau: Dŭn ati dog pakai ngga kadŭn Seir, tarun tana adi re yŭn bara sesang Esau rŭŭ; Seir sak piminyu Hebrew adi nang “piburuh”. 26Adi numbor duwŭh ruah bidigen tagap di tiga Esau, ka ayŭh dog kadŭn Jacob.#25.26 Jacob: Dŭn ati sak piminyu Hebrew adi nang “tiga”. Isaac mbŭh nŭm puru sawa umbur-i kan ngara dog biranak.
Esau Jua Pangkat-I adi Anak Pinuai Dari
27So-duwŭh anak anŭ mbŭh baga, ka Esau jadi daya adi pandai ngasū, daya adi rindu pimudip di sapa tarun, pak Jacob inŭh daya adi dŭh piminyu ka raan dŭ rŭŭ di arŭn. 28Isaac rindu dŭ di Esau, sabab ayŭh gagā man dagin dāng adi Esau dapŭd, pak Rebecca rindu dŭ di Jacob.
29Ndi andu darŭm Jacob aŭn tanŭk sup ruwang kasang, Esau mari ngasū. Ayŭh mbŭh sibŭrŭk 30ka nang di Jacob, “Aku sibŭrŭk; nggen di aku kada pinguman adi bireh anŭ.” (Anŭ meh sabab ayŭh dog kadŭn Edom.#25.30 Edom: Dŭn ati sak piminyu Hebrew adi nang “bireh”.)
31Jacob nam, “Aku an nggen di kuu kambŭi kuu nggen pangkat mu adi anak pinuai di aku.”
32Esau nang, “Bisa! Re ku ngga mani pangkat pinuai ku anŭ; aku mbŭh re kabŭs sikirau tong-i!”
33 #
Heb 12.16
Jacob nam, “Kuu an diŭ bipayu adŭp mu re nggen pangkat mu anŭ di aku.”
Esau bipayu ka nggen pangkat-i anŭ di Jacob. 34Komŭnŭ Jacob nggen di ayŭh ruti ngga kada sup anŭ. Ayŭh man ka nok, komŭnŭ ayŭh makat ka bu. Esau mbŭh taran pangkat-i adi anak pinuai.
Currently Selected:
TIBIRIK 25: TBVONT
Highlight
Share
Copy
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
