Jɔn 20

1Ku akol tueŋ de wik go Mari Magdalene riɛr ɣɔn miak aŋoot piny ke col, te de raŋ, go kuur ŋem ne ci nyaai ne raŋ thok. 2Go kat, ku bii enɔŋ Thimon Petero ku ran dɛ pioce, nhiɛr Yecu, ku yook keek, Ye kaaci Bɛnydit nyaai rɛɛŋ, ku kakuc wɔ te cik ke ye kan thin. 3Go Petero lɔ kene ran dɛ pioce, biki te de raŋ. 4Aake riŋ netok: go ran dɛ pioce Petero wuɔr, kɔn bɛn te de raŋ; 5bii ku guŋ, ku luiitic; go alɛth linon ŋem e ke tai; ku cii lɔ thin. 6Go Thimon Petero bɛn, ke kuɛny cok, bii ku leer rɛɛŋ; ke ŋem alɛth linon ne tai, 7ku ci alanh e ci duɔt ne yenom cii tai kene alɛth linon, ci dol tede yetok. 8Go ran dɛ pioce go lɔ thin eya, man e kɔn bɛn te de raŋ, go ŋem, go jal gam. 9Aake ŋoot e ke kuc kecigɔɔr, ya kabi rɔt bɛr jɔt ne thouic. 10Go kɔcpiocke bɛɛr jal leki panden.

11Ku kaac Mari ne raŋ thok ke dhiau: na ye dhiɛu ku ye guŋ, ye luiit raŋic, 12ke ŋem malaikai ceŋ alath ɣer keerou ne rɛɛr, tok ne yenom ku kene ne yecok, te cene guɔp de Yecu kan thin. 13Goki thiec, Yi tiŋe, yeŋo dhiɛue? Go ke yɔɔk, Ye kaaci Bɛnydiitdie nyaai, ku kakuɔc ɣan te cik ke ye tau thin. 14Na ci jam yeya, ku ye wel rɔt, ke ŋem Yecu ne kaac, ku kuc lan yen Yecu. 15Go Yecu thiec, Ye tiŋe, yeŋo dhiɛue? Ku yeŋa kɔɔr? Go cɔɔl ye ye duŋem de genen, a go yɔɔk, Ye Bɛny, na ca ye nyaai etene, ke lɛkne ɣa te cin en kan thin, ku kaba lar. 16Go Yecu yɔɔk, Ye Mari. Go rɔt wel, ku yook, Ye Raboni; luɛlde kee, Dupioc. 17Go Yecu yɔɔk, Ye duk ɣa jak; an ken guɔ lɔ nhial enɔŋ Awa: yen lɔɔr enɔŋ mɛɛthcie, ku yɔɔke keek, Wu ya ɣan lɔ nhial enɔŋ Awa ku ye Wuɔrduɔn; ku nenɔŋ Nhialinydie ku ye Nhialinyduɔn. 18Go Mari Magdalene lɔ ku lek kɔcpiocke, Ye ɣan ci Bɛnydit ŋem, ku kee keekake luel kene ɣɛn.

19Na ɣɔn thei, ne ekole, kol tueŋ de wik, ku te cene thok thiɛk te tɔ kɔcpiocke thin ne riɔc riɔc kek ne Judai, ke Yecu bɔ ku kɛɛc ne keciɛl yic, ku yook ke, Ye keeyabi dɔɔr tɔ ke we. 20Na ci yekene luel, e ke nyuthke yecin ku yelɔɔm. Go kɔcpiocke piɔth miɛt te cik kek Bɛnydit ŋem. 21Go Yecu ke bɛɛr yɔɔk, Ye keeyabi dɔɔr tɔ ke we; ci man ci Awa ɣa tuɔc, yenekee caŋ tuɔc an week. 22Na ci yekene luel, go weei ne kenhiim, ku yook ke, Ye lɔmka Jɔŋdiit Lajik: 23raan ebɛn ye we karɛcke puɔl, ke kaye puɔl; raan ebɛn ye we karɛcke jai, ke kaye jai.

24Ku Thoma, ran toŋ de thiɛrkurou, cɔl Acuek, ee ce tɔ ne keyic ɣɔn biine Yecu. 25Go kɔc kɔk piocke goki yɔɔk, Yi wɔ ci Bɛnydit ŋem. Go ke yɔɔk, Ye te can ɣɔr de theet ber ŋem ne yecin, ku ba aciin cuɔk ne ɣɔr de theetic, ku cuɔk aciin ne yelɔɔm, e kacaa gam.

26Na ci nin bɛr ya bɛt, ke kɔcpiocke tɔ ɣot, ku tɔ Thoma ke ke. Go Yecu bɛn, ku ci thook thiɛk, ku kɛɛc ne keciɛl yic, ku jiɛm, Ye keeyabi dɔɔr tɔ ke we. 27Ku yook Thoma, Ye thiu yiciin, ku ŋem acin; ku thiu yiciin, ku cuɔke ne ɣalɔɔm: ku duk beer ya riɛr, ye gam. 28Go Thoma dhuk yook, Ye Bɛnydiitdie ku ye Nhialinydie. 29Go Yecu yɔɔk, Ye Thoma, ee ŋem cin ɣa ŋem, yenekee gɛm yin ɣa: kɔc ye gam, ke cik ye ŋem, keeka ye thiei.

30Cit juec kɔk kaacii Yecu ke loi ne kɔcpiocke nhiim, ka keneke gaar ne ekitamneic: 31ku keekake aacike gɔɔr, bak ya gam wuɔ Yecu kee Kritho, Wen de Nhialic; ku bak ya naŋ piir ne rinke ne gamduɔn.

Currently Selected:

Jɔn 20: LEKJOT

Highlight

Copy