Mathayo 9

1Go kɛɛc riɛi, ku tem lɔŋti bii panden. 2Ŋɛmka, go kɔc ran bec ci cath thuet bɛi enɔŋ en ne koom nom. Go Yecu gamden ŋem, ku yook ran ci cath thuet, Ye Wene, miɛte piɔu; karɛcku aa puɔl. 3Ku ŋɛmka, go dugɛɛr eke tɔ goki jam ne kepiɔth, Yi yerane ajam arac. 4Go Yecu tɛŋden nyic, ku jiɛm, Ye yeŋo tɛk we kerac ne wepiɔth? 5Ye keno kɔc, te luele ye, Ya karɛcku aa puɔl; ka luel, Ya jɔt rɔt, ku cathe? 6Ee bak nyic ke Wen de raan nɔŋ riɛr ne tiɔp nom yen karac puɔl (ku yook ran bec ci cath thuet), Ye jɔt rɔt, ku jɔt komdu, ku lɔɔr ɣondu. 7Go rɔt jɔt leer ɣonde. 8Na ci dun de kɔc ye ŋem, e ke riɔc, ku nomki Nhialic man ci riɛr yinla yiɛn kɔc.

9Ɣɔn ajiɛl Yecu yetɛɛn, go raan ŋem, ran cɔl Mathayo, ne rɛɛr te de juɛr: go yɔɔk, Ye biɔth ɣa. Go rɔt jɔt, ku biɔth.

10Ku tɔ, te cen nyuc ɣot ciɛm, ŋɛmka, go kɔc rac goki bɛn ku nyuucki kene Yecu ku kɔckek piocke. 11Na ci ye ŋem ne Parithai, goki kɔckek piocke yɔɔk, Yi yeŋo ciɛme Dupionyduɔn kene mejueer ku kɔc rac? 12Na ci ye piŋ, go jam, Ye kɔc piɛl aaci akem ye ŋaŋ, aye ŋaŋ ne kɔc bec. 13Ku lak la piɔcka ne luɛl de yekene, Ya kac de piɔu eka ya kɔɔr, ku kacie koc de rɔt: an ee ce bɔ ba kɔc lajik bɛn cɔɔl, aa kɔc rac.

14Go kɔcpiocke ke Jɔn bɛn enɔŋ en, jamki, Yi yeŋo ye wɔ wɔne Parithai dac thieel, ku ci kɔcku piɔceke ye thieel? 15Go Yecu ke thiec, Ye leu watmɛthken ke ran thiek dhien de piɔu te tɔ ran thiek ke keek? Akol bi bɛn, bii ran thiek liu ne keyic, ke yeneka bik kek thieel. 16Acin ran bi alanh jot buɔp ne ɣɔr de alanh thɛɛr; ke ci buɔp ee alath baan, ku ye ɣɔr cɔk lɔ ke dit. 17Ku kɔc aaci piukeabiɛi piɔc loi ye ciɛɛr ne ajura thɛɛr yic: kɛlke bi ajura reet yic, ku kueer piukeabiɛi wei, ku riak ajura. Aaye piukeabiɛi piɔc loi ciɛɛr ne ajura piɔcke loi yic, ke kaaye tɔ apiath.

18Te ŋoot en ke jam ke ke ne keekake, ŋɛmka, go randit go bɛn, bii ku door, jiɛm, Ye nyandie ee thou emane: yen bar, ba yiciin lɔ kan en ku kabi bɛɛr piir. 19Go Yecu rɔt jɔt, ku biɔth, kene kɔckek piocke. 20Ŋɛmka, ku bɔ tiik, tiŋ ye riɛm piɔk ne run thiɛr ku rou, ku wɛɛn rɔt ne yekɔu, bii ku jiɛk alanhde thok: 21ee jam ne yepiɔu, Ye na jak alanhde thok abac, ke an bi dɛm. 22Go Yecu rɔt wel, ku ŋem, ku jiɛm, Ye nyane, lɔ piɔu yum; gamdu aci yi cɔk dem. Ku go tiik guɔ dɛɛm ne yemanthine. 23Na ci Yecu bɛn ɣon de randit, ku yok kɔc ke kuɔth de tuŋ, ku dun diit de kɔc pɛl awuɔu, 24ke jam, Ye patka ɣa: nya aken thou, kanin. Goki dɔl ne buɔi. 25Na ci duut ciec, ke lɔ thin, ku dɔm ciin; go nya rɔt jɔt. 26Ku thoŋ de yeluɔine ee lɔ yepinye ebɛn.

27Na ye Yecu ye jɛl etɛɛn, go coor keerou biɔth, cotki, jamki, Yi kace piɔu enɔŋ wɔ, yin wen de Dabid. 28Te cen bɛn ɣot, go coor bɛn enɔŋ en. Go Yecu ke thiec, Ye yaka gam lan lɛu an yekene? Goki yɔɔk, Yi ee, Bɛnydit. 29Go ke jak nyiin, ku jiɛm, Ye kabi luɔi we ci gam ci we ye gam. 30Goki yin. Go Yecu ke lom thook, jiɛm, Ye ŋɛmka bi ciɛn ran dɛ nyic e. 31Goki leu wei, ku lek thoŋde thiai yepinye ebɛn.

32Te leu kek wei, ŋɛmka, go yiɛn ran cin thok cii jɔŋ rac muk. 33Na ci jɔŋ rac ciec, ke ran cin thok ke jam. Go duut gai, jiɛm, Ye kakene kan ŋem ne Yithraelic. 34Go Parithai luel, Yi kee riɛr de bɛny de jak rac yeneka yen jak rac ciec.

35Go Yecu lɔ cath ne bɛi dit kedhia ku bɛi thii, pioc kɔc ne luekken ke gueer yic, ku weetke ne welpiɛth ke ceŋ, ku cɔk tɔɔk ebɛn kene bec cɔk dem. 36Na ye ŋem duut, go piɔu kac ne keek, ne ke cik kek nal ku cik lɔ weerer, ci amɛl cin abiok. 37Go kɔcpiocke yɔɔk, Ye ka ci luɔk aajuec neyic, ku kɔc ke luɔi aalik. 38Yen yaka Benydiit de ka ye luɔk lɔŋ, bi kɔc ke luɔi ya tuɔc ne kakeek ci luɔk yic.

Currently Selected:

Mathayo 9: LEKJOT

Highlight

Copy