Nisikawlane 2
2
Taulebeane ki Siri
1Saka tatulrisisisiane ki Malrimale ka vai, ku lasinzia yarubu ikai ki taluvaale. 2Ala pangitutuluku ikai ku lingau ku twalai subelebelenge kainganai mulebe, mia ki lingau ki maadrau ka valrigi, si suete ikai ki taneneane lini ki daane. 3Kwini lalasu la drele ku mia ki lridame ka apwi ku tangimiamiane, la ngisagai, si mulebe makakai ki kinawmasane ki tangeea. 4Kwini lalasu la kisuete makanaelre ki Siri, la singikai ku tabaadhane ki Siri ku puku si kawriva ku drumanane ka vaga.
5Sa kamani kwidra, yakai ku twalai ki sanaka kuni kai kawmasane ku kaiyanganai kela si ikai Yerusalrime ka la kiasamulamula ku takisuswane ka swa Yuda ka umawmase. 6Kwini lalasu sa kilalra kwini ki lingau, ku takaalra ku laumawmase la kainganai makanaelre irubu ikai kudra ki taingeane. Kwini laumawmase la kiragai turamuru, asi lwiyane kwini la tangeea kialalra makanaelre ki lasinzia ku kawarivariva arakai ku vaga lini. 7Kwini lalasu la kasamali turamuru, si iya kai, “Drela, kikai amiamia kai kawriva kaika la swa Galrilri ka laumawmase? 8Ata kilalra makanaelre ki lalasu sa arakai kai vaga ki cekeleta kawriva? 9Ikai mitane yakai kai swa Parethia, Media, si swa Ilame; la ikai kai twalai Mesuputamia, Yuda, si Kapadukia; la ikai ki twalai Puntu si Asia, 10Peregia si Pamepilia, twalai Izipiti si ngwadadethe talikai Kurini ka Lribia, la ikaiyana kai twalai Ruma kainganai, 11paelre ki swa Yuda si kiasusunga ki Yudaiyakiu ka sakamaelanane ka umawmase; la ikaiyana kai twalai Kerite si swa Arabia. Kialalrata makanaelre kai ki lalasu sa arakaikai kai vaga ki cekeleta pelaelaela ku takaungane ki Twaumase!” 12Kai lalasu masamali si animia la iya kai thingale ku talininu, la kirimu makivagavaga iya kai, “Ani miya kikai?”
13Yakai ku la mwalralrakai ki sinzia iya kai, “Kikai laumawmase yai lamabusuku!”
Sabulrwane ki Pitiru
14Kikai kwidra, ku Pitiru si drumane ka ta 11 ka nisikawlane la acegecege. Kwi Pitiru la papia ki laumawmase iya kai: “Sakacekeleli ka swa Yuda si yakai Yerusalrime ka laumawmase makanaelre, thingala, la kicacaligiri kilalra kai vagali. 15Mabusuku amia numi kai ki laumawmase? Ini, asi lwiyane kaiasasane mialrealreana ka yakaiyana ki bangate ki tuki. 16Kikai tangimiane amaninga kudra taiyane kai ki yuginsia ka Yuile:
17Ku Twaumase amia kai:
Kikai yai apianeli lulri alikainga kai kawmasane:
Lri malraku kai Rili pasaela baai ki sanaka aneanenga.
Ku lalalake numi lri pelaela ku vagali;
ku lalangukathabarane si tawvailekete numi lri drele ku maburusi;
ku tarudrawdrange numi lri sipi ku palrealrebane.
18Ikai kwini ki vai,
kai Rili lri malraku putaluvaivai,
si baai ki sasiakawluli ka sawvalai si ababai;
kwi lalasu lri pelaela ku vagali.
19Lri ikaiyaku subelebelenge putaluvaivai ku pinangu Twaumasane ka puku,
la pia ku matiasamali ka awngane ikai kai kawmasane;
yakai ku erai, yakai ku apwi, yakai ku ebelre;
20kai vai lri kadradrimiti kakadrwa ku ledra;
kai dramare lri mia ki erai ku duliane;
aswala ki akelane mulebe ku vai ka maadrau ka lrigu ki Tamatama,
ki kikai lri ngimia patuelre,
21Lu kelanga kwidra, sanaka kiatubi ku nagane ki Tamatama lri tara kipalribulu.
22“Sakacekeleli ka swa Iseraylri, kilalra kai vagali. Ku atara piane ki swa Nazarethe ka Yesu ka maadrau ka awngane, athingalane ka twalai ki Twaumase si pangukai ki tapianeini ku pinangu Twaumasane ka puku, si palrealrebane ka puku, matiasamali ka awngane, papianga numiane putaluvaivai. Kikai ngimiyaiya kai wathingale numi patuelre, asi lwiyane ngiamia ikai numiane. 23Ku Twaumase singiakai ku takidremedremaneini si tapaswalanengaini drele wakelreteenga ku lrika amalraneini ki Yesu si baai numiane; ai kunumi arakai numi ku kaika kakudhane kedrekedre iniane pikai ki ziwzika, la papacai iniane. 24Ai ku Twaumase patwalai ki wapacai pasielane iniane, la malra suburu ku sakwalrialri ki apacadhane, asi lwiyane ku apacadhane kai maka waruvu iniane. 25Ku Davidi napapia iniane si iya kai:
Wadrelenga naku ki Tamatama sa icucubungu nakwane,
yakai tali vanale nakwane, kainaku lri lrudralrudrai.
26Lakamani, kai kidremedremeli kiararagai,
kai vagali swaete ku sakiaragai;
kikai lri tara kaburau ka kinawmasaneli lrika sakamiya isadra ikai ki sasiadradrama.
27Asi lwiyane lri kaisu pamwa nakwane swadriadringi,
lai kaisu palraingi pakaburau ki madringelrese ku takidremedremane ka sasiakawlusu.
28Peaelaelangasu ku kadalranane ki niakeli;
ku tatapalranesu nakwane swaete kai sakiaragaili.
29“Laretesaneli, ku ngwakai ki cucungulaneta ka Davidi, lri tara putaluvaivadhaku palalrwai numiane. Kwi lasu kaika wapacai sikakathane, mialri kidralreke; ku takidralrekaneini yakaiyana mitane pakela kaikameane. 30Kwi lasu yuginsia, wathingale ku palraingi ki Twaumase ka atara baadhane iniane: Ku Twaumase nakiaketekete ka lri patwalai ki agaganeini pacegecege ku tangea ku talialalai si panene ikai ki taetalaneini. 31Ku Davidi paswalanga thingale ku niapadrekadrekasane ki Twaumase, ala kamani ku sa matikai ki ngwakai ki asielane ki Kirisitu, amia kai:
Kwi lasu kai kiacilri puswadriadringi;
Ku kinawmasaneini la kai kaburau.
32Kikai Yesu, ku Twaumase pasiaelanga iniane; kuta makanaelre wadreleta si lrika amanita ku lri pelaela. 33Ku Yesu kiapusubelebelengenga si ikai ki vanale ki Twaumase, si patwalai ki Tamaini tarumara ku nipalrainganenga baai ka Siri, kaiasasane ku drele numi ku kilalra numi, amani kudra baai gugu ki Twaumase mitane ka migemi. 34Ku Davidi kai wamwa subelebelenge, ai amia kai:
Ku Tamatama amia kai ki Tamatamali:
Nenea ikai ki tali vanaleli,
35la ukalava ku lrika amalraneli ki badhasu la putailebeane ki drapalesu.
36“Lakamani, retesaneli ka swa Iseraylri makanaelre, thingala pudriadringai, kikai Yesu ka kedrekedre numi pikai belenge ki ziwzika, ku Twaumase wacegecegenga iniane pa Tamatama, pa Kirisitunga!”
37Sakilalranga makanaelre kikai vaga, la ceneke ki kidremedreme turamuru, la papia ki Pitiru si drumane ka nisikawlane si iya kai, “Laretesane, lri tumane nai?”
38Ku Pitiru la pelaela liniane iya kai, “Kunumi makanaelre makitu cilria patuelre ki pasalrivane, si pangukai ku nagane ki Yesu Kirisitu kipabanau, lanu kipacepe ku pasalrivane, lai lri dulru numi tarumara ku baai ki Twaumase ku Siri. 39Asi lwiyane ku palrainginga ki Twaumase lri baai ki sanaka dawlu ki Tamatama ka Twaumaseta kudra laumawmase, ka amani numi, lalalake numi, si makanaelre kudra la yakai adaili ku umawmase.”
40Ku Pitiru la arakaiyana ku makaalra ku vaga pelaelaela liniane, la pasapukwane liniane iya kai, “Kunumi ngipapalribula kalrabuthu kidaili kudra ki akipathavungane kikai ki lamanganga ka umawmase!” 41Takaalra ku laumawmase ku tarwamara ku pelaelaini, si la kipabanau, sakavai kwini ku wadrima ku lasinzia lri ikaai ku tatulru ka kudrulu. 42Kwini lalasu la kirarakete turamuru kibulru ki lanisikawlane, si kipaelre kudra ki tayelrelreane, kalringulringulu, taelre inulrinulri.
Tayelrelrelreane lini kudra ki kiasususu
43Ku lanisikawlane paiya kudra makaalra ku pinangu Twaumasane ka puku si matiasamali ka awngane; ku laumawmase la ngwalai kikai si ikai kudra ukuludrane usakenane ka kidremedreme. 44Ku lasinzia la pacungulu yelrelrelre cekecekele, ku lamanemane patuelre la murielre arakai. 45Kwi lalasu la kilangaiyana ku kadaengane si tacekecekelane lini, la singikai ku murikai ki tangeea baai ku paisu apavalavala liniane makanaelre. 46Kwini lalasu la maramaraamau maelrelre ku kidremedreme lini, lukavaivai yakai ki daane ki Twaumase irubu, la ikai ki daane lini kalringulringulu, arakai ku kiragadhane ku kidremedreme taelre kane ku aga, 47la drengedrengere ki Twaumase, si makisudawdalru sanaka umawmase. Ku Tamatama lukavaivai padriima liniane ku kiapalribulu ku umawmase.
Currently Selected:
Nisikawlane 2: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
Nisikawlane 2
2
Taulebeane ki Siri
1Saka tatulrisisisiane ki Malrimale ka vai, ku lasinzia yarubu ikai ki taluvaale. 2Ala pangitutuluku ikai ku lingau ku twalai subelebelenge kainganai mulebe, mia ki lingau ki maadrau ka valrigi, si suete ikai ki taneneane lini ki daane. 3Kwini lalasu la drele ku mia ki lridame ka apwi ku tangimiamiane, la ngisagai, si mulebe makakai ki kinawmasane ki tangeea. 4Kwini lalasu la kisuete makanaelre ki Siri, la singikai ku tabaadhane ki Siri ku puku si kawriva ku drumanane ka vaga.
5Sa kamani kwidra, yakai ku twalai ki sanaka kuni kai kawmasane ku kaiyanganai kela si ikai Yerusalrime ka la kiasamulamula ku takisuswane ka swa Yuda ka umawmase. 6Kwini lalasu sa kilalra kwini ki lingau, ku takaalra ku laumawmase la kainganai makanaelre irubu ikai kudra ki taingeane. Kwini laumawmase la kiragai turamuru, asi lwiyane kwini la tangeea kialalra makanaelre ki lasinzia ku kawarivariva arakai ku vaga lini. 7Kwini lalasu la kasamali turamuru, si iya kai, “Drela, kikai amiamia kai kawriva kaika la swa Galrilri ka laumawmase? 8Ata kilalra makanaelre ki lalasu sa arakai kai vaga ki cekeleta kawriva? 9Ikai mitane yakai kai swa Parethia, Media, si swa Ilame; la ikai kai twalai Mesuputamia, Yuda, si Kapadukia; la ikai ki twalai Puntu si Asia, 10Peregia si Pamepilia, twalai Izipiti si ngwadadethe talikai Kurini ka Lribia, la ikaiyana kai twalai Ruma kainganai, 11paelre ki swa Yuda si kiasusunga ki Yudaiyakiu ka sakamaelanane ka umawmase; la ikaiyana kai twalai Kerite si swa Arabia. Kialalrata makanaelre kai ki lalasu sa arakaikai kai vaga ki cekeleta pelaelaela ku takaungane ki Twaumase!” 12Kai lalasu masamali si animia la iya kai thingale ku talininu, la kirimu makivagavaga iya kai, “Ani miya kikai?”
13Yakai ku la mwalralrakai ki sinzia iya kai, “Kikai laumawmase yai lamabusuku!”
Sabulrwane ki Pitiru
14Kikai kwidra, ku Pitiru si drumane ka ta 11 ka nisikawlane la acegecege. Kwi Pitiru la papia ki laumawmase iya kai: “Sakacekeleli ka swa Yuda si yakai Yerusalrime ka laumawmase makanaelre, thingala, la kicacaligiri kilalra kai vagali. 15Mabusuku amia numi kai ki laumawmase? Ini, asi lwiyane kaiasasane mialrealreana ka yakaiyana ki bangate ki tuki. 16Kikai tangimiane amaninga kudra taiyane kai ki yuginsia ka Yuile:
17Ku Twaumase amia kai:
Kikai yai apianeli lulri alikainga kai kawmasane:
Lri malraku kai Rili pasaela baai ki sanaka aneanenga.
Ku lalalake numi lri pelaela ku vagali;
ku lalangukathabarane si tawvailekete numi lri drele ku maburusi;
ku tarudrawdrange numi lri sipi ku palrealrebane.
18Ikai kwini ki vai,
kai Rili lri malraku putaluvaivai,
si baai ki sasiakawluli ka sawvalai si ababai;
kwi lalasu lri pelaela ku vagali.
19Lri ikaiyaku subelebelenge putaluvaivai ku pinangu Twaumasane ka puku,
la pia ku matiasamali ka awngane ikai kai kawmasane;
yakai ku erai, yakai ku apwi, yakai ku ebelre;
20kai vai lri kadradrimiti kakadrwa ku ledra;
kai dramare lri mia ki erai ku duliane;
aswala ki akelane mulebe ku vai ka maadrau ka lrigu ki Tamatama,
ki kikai lri ngimia patuelre,
21Lu kelanga kwidra, sanaka kiatubi ku nagane ki Tamatama lri tara kipalribulu.
22“Sakacekeleli ka swa Iseraylri, kilalra kai vagali. Ku atara piane ki swa Nazarethe ka Yesu ka maadrau ka awngane, athingalane ka twalai ki Twaumase si pangukai ki tapianeini ku pinangu Twaumasane ka puku, si palrealrebane ka puku, matiasamali ka awngane, papianga numiane putaluvaivai. Kikai ngimiyaiya kai wathingale numi patuelre, asi lwiyane ngiamia ikai numiane. 23Ku Twaumase singiakai ku takidremedremaneini si tapaswalanengaini drele wakelreteenga ku lrika amalraneini ki Yesu si baai numiane; ai kunumi arakai numi ku kaika kakudhane kedrekedre iniane pikai ki ziwzika, la papacai iniane. 24Ai ku Twaumase patwalai ki wapacai pasielane iniane, la malra suburu ku sakwalrialri ki apacadhane, asi lwiyane ku apacadhane kai maka waruvu iniane. 25Ku Davidi napapia iniane si iya kai:
Wadrelenga naku ki Tamatama sa icucubungu nakwane,
yakai tali vanale nakwane, kainaku lri lrudralrudrai.
26Lakamani, kai kidremedremeli kiararagai,
kai vagali swaete ku sakiaragai;
kikai lri tara kaburau ka kinawmasaneli lrika sakamiya isadra ikai ki sasiadradrama.
27Asi lwiyane lri kaisu pamwa nakwane swadriadringi,
lai kaisu palraingi pakaburau ki madringelrese ku takidremedremane ka sasiakawlusu.
28Peaelaelangasu ku kadalranane ki niakeli;
ku tatapalranesu nakwane swaete kai sakiaragaili.
29“Laretesaneli, ku ngwakai ki cucungulaneta ka Davidi, lri tara putaluvaivadhaku palalrwai numiane. Kwi lasu kaika wapacai sikakathane, mialri kidralreke; ku takidralrekaneini yakaiyana mitane pakela kaikameane. 30Kwi lasu yuginsia, wathingale ku palraingi ki Twaumase ka atara baadhane iniane: Ku Twaumase nakiaketekete ka lri patwalai ki agaganeini pacegecege ku tangea ku talialalai si panene ikai ki taetalaneini. 31Ku Davidi paswalanga thingale ku niapadrekadrekasane ki Twaumase, ala kamani ku sa matikai ki ngwakai ki asielane ki Kirisitu, amia kai:
Kwi lasu kai kiacilri puswadriadringi;
Ku kinawmasaneini la kai kaburau.
32Kikai Yesu, ku Twaumase pasiaelanga iniane; kuta makanaelre wadreleta si lrika amanita ku lri pelaela. 33Ku Yesu kiapusubelebelengenga si ikai ki vanale ki Twaumase, si patwalai ki Tamaini tarumara ku nipalrainganenga baai ka Siri, kaiasasane ku drele numi ku kilalra numi, amani kudra baai gugu ki Twaumase mitane ka migemi. 34Ku Davidi kai wamwa subelebelenge, ai amia kai:
Ku Tamatama amia kai ki Tamatamali:
Nenea ikai ki tali vanaleli,
35la ukalava ku lrika amalraneli ki badhasu la putailebeane ki drapalesu.
36“Lakamani, retesaneli ka swa Iseraylri makanaelre, thingala pudriadringai, kikai Yesu ka kedrekedre numi pikai belenge ki ziwzika, ku Twaumase wacegecegenga iniane pa Tamatama, pa Kirisitunga!”
37Sakilalranga makanaelre kikai vaga, la ceneke ki kidremedreme turamuru, la papia ki Pitiru si drumane ka nisikawlane si iya kai, “Laretesane, lri tumane nai?”
38Ku Pitiru la pelaela liniane iya kai, “Kunumi makanaelre makitu cilria patuelre ki pasalrivane, si pangukai ku nagane ki Yesu Kirisitu kipabanau, lanu kipacepe ku pasalrivane, lai lri dulru numi tarumara ku baai ki Twaumase ku Siri. 39Asi lwiyane ku palrainginga ki Twaumase lri baai ki sanaka dawlu ki Tamatama ka Twaumaseta kudra laumawmase, ka amani numi, lalalake numi, si makanaelre kudra la yakai adaili ku umawmase.”
40Ku Pitiru la arakaiyana ku makaalra ku vaga pelaelaela liniane, la pasapukwane liniane iya kai, “Kunumi ngipapalribula kalrabuthu kidaili kudra ki akipathavungane kikai ki lamanganga ka umawmase!” 41Takaalra ku laumawmase ku tarwamara ku pelaelaini, si la kipabanau, sakavai kwini ku wadrima ku lasinzia lri ikaai ku tatulru ka kudrulu. 42Kwini lalasu la kirarakete turamuru kibulru ki lanisikawlane, si kipaelre kudra ki tayelrelreane, kalringulringulu, taelre inulrinulri.
Tayelrelrelreane lini kudra ki kiasususu
43Ku lanisikawlane paiya kudra makaalra ku pinangu Twaumasane ka puku si matiasamali ka awngane; ku laumawmase la ngwalai kikai si ikai kudra ukuludrane usakenane ka kidremedreme. 44Ku lasinzia la pacungulu yelrelrelre cekecekele, ku lamanemane patuelre la murielre arakai. 45Kwi lalasu la kilangaiyana ku kadaengane si tacekecekelane lini, la singikai ku murikai ki tangeea baai ku paisu apavalavala liniane makanaelre. 46Kwini lalasu la maramaraamau maelrelre ku kidremedreme lini, lukavaivai yakai ki daane ki Twaumase irubu, la ikai ki daane lini kalringulringulu, arakai ku kiragadhane ku kidremedreme taelre kane ku aga, 47la drengedrengere ki Twaumase, si makisudawdalru sanaka umawmase. Ku Tamatama lukavaivai padriima liniane ku kiapalribulu ku umawmase.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017