Nisikawlane 3
3
Ku Pitiru si Yuhani pawadringai ki macaeme kalrunai ku drapale
1Yakai saka minakavalane, saka maka mwalringedele ki tulru ki tuki tainulrinulriane ka zikange, ku Pitiru si Yuhani la mwa ki daane ki Twaumase. 2Ikai kudra ki sia Mathariri ka lrawlrawdru niyane, yakai ku tangea ku sakitulalake macaeme kalrunai ku drapale, lukakaiya la kibulri ki umawmase si kipikaikai ki lrawlrawdru, la abababange ki lri mudaane ki daane ki Twaumase ku umawmase. 3La drele ki Pitiru si Yuhani sa lri mudaane ki daane ki Twaumase, la kitubi liniane ku akibaadhaneini ku lamanemane. 4Kai lamalala la drele iniane; ku Pitiru la iya kai, “Drela naiane!” 5Kwini lasu la kirarakete drele liniane, la sidrama ku atarumarane lwika manemane. 6Ku Pitiru la iya kai iniane, “Kadrua ku kingi si gingili, ai lri baadhaku ku pakaikaili patuelre; lri pangukaiyaku ku nagane ki swa Nazarethe ka Yesu Kirisitu drekase muswane, ngidrakala dadavace!” 7Ala malra tavanale iniane bilibili ku Pitiru, si arake drakale iniane. Kwini drapale si pakilri ki lasu la makakaai sapukwane, 8la ituku ngidrakale, si acegecege kadringelresenga, la pathagilinga dadavace. Ala tupapalra liniane karededele mudaane ki daane ki Twaumase, la dadadavace si takuititituku, drengedrengedrengere ki Twaumase. 9Kwini laumawmase makanaelre wadrele iniane sa dadadavace, si takudrengedrengedrengere ki Twaumase; 10kwini lalasu, sa thingale iniane ala ka amani kudra taneneeane ikai ki Mathariri ka lrawlrawdru sawalatadre ki daane ki Twaumase, si abababange ka amani kudra kiciacia, la kasamali ngituluku turamuru kudra tangimiane.
Ku Pitiru yakai ki daane ki Twaumase pelaelaela ku hukuingi
11Ikai Sulumungu lrawlrawdru ruka, kudra lasu tagalrimecemeecane kiraisi ki Pitiru si Yuhani, kudra yakai kwini ku laumawmase la kasamali, la lailai makanaelre mwa drele liniane. 12Ku Pitiru sa drele kai ki takaalra ka laumawmase, la iya kai liniane, “Lasakacekele ka swa Iseraylri! Asingithaanga ngwalai kai ki vaeva ka takaungane si kasamali? Anu ngithaanga ka talengeethane naiane? Lu kidremedreme numi naiane arakai ku puku si kisamulane ku takisuswane lini padadavace kai ki umawmase amia numi? 13Ku Twaumase ki Aberahame, Isake, si Yakubu, ka amani kudra Twaumase ki cucungulaneta, walrigunga ki sasiakawluini ka Yesu; kikai Yesu wabaai numi pukunkwane iniane, ku Pilatu nau tara mukeerenge la iya iniane, kunumi la ciilrilringa numi iniane ikai cucubungu ki Pilatu. 14Kwi lasu mabula kadringelrese, ai wacilri numi iniane kamani, la kitubi numi ki Pilatu ku apulatadrane si baai numiane kudra papacai ki umawmase kamani. 15Miyaiya kai, kunumi papacainga numi kudra ki Tamatama ki niake; ai ku Twaumase pasiaelanenga iniane patwalai ki wapacai. Amani nai ku tarapelaelaela ki kikai miyaiya kai. 16Kikai nagane ki Yesu ku tapakainganadhane ku puku wadulru pasapukwane kai ki macaeme kalrunai ku drapale. Kudra drele numi si thingale ku tangimiane ikai kai ki kinawmasane kai ki umawmase ngwalai ku takasalrwnenga ki naganeini. Asi lwiyane kai lasu masalru ki Yesu ala ka amani ku mudringaingaini, kikai mialri numi drelenga makanaelre.
17“Lakamani, laretesane, wathingalaku numiane si tabebelenge numi kudra tapangimiane numi kwini ki Yesu ngwalai ki kaika tathingalane numi. 18Ku Twaumase paswalaanga pangukai ki yuginsia sakalai ku atara akwalriane ki Kirisitu; kikai nisakaladhane laka tengatengane ka ngiamianga. 19Lakamani, kunumi yai ngitatupela, si ngibangulu papia ki Twaumase, lri pacepe ku pasalrivane numi. 20Lu mia kai, ku Tamatama lri baai numiane ku vai ku asapukwanane ki abake numi aru kabavane; si sikawlu ki Yesu, kamani kudra pasikaingaini numiane pilri ka Kirisitu kainganai. 21Ku Kirisitu lri tara asuru ikai subelebelenge, pakeela ku akabavanane sanaka maneemane; kikai yai pelaela ki Twaumase sakanadruma pangukai ki yuginsiaini. 22Ku Musi kawarivanga iya kai, ‘Ku Tamatama ka Twaumase numi lri patwalai ki retesane numi pasikai numiane pacegecege ku tangea ku yuginsia, mia ku tapacegeceganeini nakwane#3.22 “pasikai numiane pacegecege ku tangea ku yuginsia, mia ku tapacegeceganeini nakwane” ku wahunyake madu iya kai “pasiakai numiane pacegecege ku tangea ku miyaiya nakwane ka yuginsia”.. Ku takawrivane papia numiane ku vaga, lri kilalra numi pasalaladha patuelre. 23Ku kai kialalra pasalaladha ku vaga kai ki yuginsia ku umawmase, lri twalai ki lakawkawlu ki Twaumase kimwalra amudu.’ 24Ku yuginsia makanaelre ku peaelaelaela ku vaga ki Twaumase, paelre ki Samuile si la pacungulu iniane, peaelaelaela makanaelre kilakikai ki vai ku lrika angimiane. 25Kunumi yai amani numi ku lri pacungulu ki yuginsia; lri tarumara numi ku samakaketeketane ki Twaumase si cucungulane numi. Ku Twaumase naamianga kai ki Aberahame, ‘Lri pangukaiyaku ki lamwabaibalrithi muswane baai ku akaesadhane sanaka umawmase kawmasane.’ 26Lakamani, ku Twaumase lu cegecege ki sasiakawluini, paswala sikawlu iniane mwa numiane kikai, baai ku akaesadhane numiane, ala maka siwlriwlri numi, si katwase kidaili ki kadalranane ki ngililisiane.”
Currently Selected:
Nisikawlane 3: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
