Takatwasane Izipiti 4

Ku Twaumase wabaai ki Musi ku pukuini kaungu ku pinangu Twaumasane ka puku

1Ku Musi la tubalre ki Tamatama, “Lwiyasi ku swa Iseraylri la kai kipawtenga nakwane, kai kituvaga ku vagali, si iya kai, kadrwana ku taadrelaneanasu nakwane, lai lri tumanaku?”

2Ku Tamatama la tubalre, “Manemane kwini ecengesu?”

La tubalre, “Vaeva ka ukudru.”

3Ku Tamatama la iya kai, “Verevera kwini ukudru picakena.” Ku Musi sa pwa verevere kwini ukudru la makakai asulrau; kwi lasu la katwase mubere. 4Ku Tamatama la iya kai ki Musi, “Sega kwi alrimasu, si ruthuka kwini tawthu ki sulrau.” Ku Musi la sege ku alrima si ruthuku kwini tawthu ki sulrau, kwini sulrau la akabalrithi aukudru. 5Ku Tamatama la kawriva, “Lu piane kikai lri dulru ka sapelaelane ki swa Iseraylri, ku yabelenge ka Tamatama ka Twaumase ki cucungulane lini, Twaumase ki Aberahame, Isake, Yakubu, naadrelane muswane.”

6Ku Tamatama la iya kai ki Musi, “Kwi alrimasu puadringa ki alrimane.” Ku Musi la puadringi ku alrima; sa malra pulatadre, ku alrima la kacaeme ki raibiu, mia ki pasabu ku lrapungane. 7Ku Tamatama la iya kai, “Puadringa kwi alrimasu.” La pangimia ku taiyane, kikai sa pulatadre, la mudringainga, mararaamaunga ki talidrumane ki kinawmasane. 8Ku Tamatama la kawriva, “Lwiyasi la kai kipawtenga muswane, kai kasalru kwini ki aswalala ka pinangu Twaumasane ka puku, kikai puku lri tara kamani ku pakiapawtenga liniane. 9Lwiyasi kikai taidrusane ka puku la kai maka pakipawtenga liniane, laka sakamiana kai kilalra muswane, malranga ngutikiane ku acilai drakerale Nile, la ubu pwa cakena, kwini acilai lri akabalrithi aerai.”

10Ai ku Musi amia kai, “Tamatama, ini, madha sikawkawlu nakwane. Makulrungaku kawriva; adravane kai takawrivanengasu nakwane la miana kai akabalrithi. Amaniaku ku makukulrungunga avavaga ka umawmase.”

11Ku Tamatama la iya kai iniane, “Aneane ku wabaai ki umawmase kalrigili avavaga? Aneane ku pakacele pakamenene? Aneane ku padrele? Aneane ku pakamukici? Amaniaku ka Tamatama. 12Kusu lu mwa, lri paralubaku muswane kawriva; lri pelaelaku ku lrika saiyaiyasu.”

13Ai, ku Musi twabalre, “Ini, Tamatama, ala sikawla pamwa ki palrapalra.”

14Lakamani, ku Tamatama maelaela ki Musi iya kai, “Kai ka yakaai ku tangea ku taka ka swa Lrivi ka Arungu? Wathingalaku iniane ka malrigili kawriva. Kikavai mwalatalatadre kidredresenge muswane; lri tara kiraragai drele muswane. 15Pelaela iniane lukamanemane ku akawrivaneini; lri baadhaku ku lrigilane kawriva muswane si lasu; lri bulrwaku ku apangimianesu. 16Kwi lasu lri atalingikaiyane muswane avavaga, papia ki mapapangale kawriva, lalri miasu ki Twaumase, pelaela ku akawrivaneini. 17Lu iluka kikai ukudru, asi lwiyane lri arakaisu kikai pia ku pinangu Twaumasane ka puku.”

Ku Musi siaulri mu Izipiti

18Ku Musi la siwlri mwa ki tama ki labaibaini ka Yetheru, la iya kai iniane, “Pasiwlriaili mu Izipiti lidrau ki laretesaneli luka panianianiakeana lutumane.” Ku Yetheru la palraingi, la kipusau iniane.

19Ku Musi sa ikaiyana Midiange, ku Tamatama amia kai iniane, “Kusu lu siwlria mwa Izipiti, kudra la pasana papacapacai muswane ku umawmase makitua pacainga.” 20Ku Musi la mailuku ki labaibaini si tadrusa ka lalakeini, la pubelenge ki ruba liniane, papia talikai Izipiti katwase; la malra ku ukudru ku iluka iya ki Twaumase iniane.

21Ku Tamatama la iyanga kai ki Musi, “Lu mwangasu Izipiti, tara picucubunga ki talialalai si padredrele kwini baaili muswane kwini makaelaela ka pinangu Twaumasane ka puku. Ai lri pakakawlukulaku ku takidremedremaneini, kai pakatwase ki kawkawluli. 22Ikai kwini, lri pelaelasu ki talialalai ki swa Izipiti, ku Tamatama amia kai, ‘Ku Iseraylri amani ku eapeli ka lalake. 23Ani pakatwase ki lalakeli sukubu nakwane amiaku muswane, la kaisu tarumara, lakamani ku apapacadhaneli ki eapesu ka lalakesu.’ ”

24Sa siwlriwlri ikadalranane, ku Musi la sulai ikadadalranane, ikai kwini, ku Tamatama la madradresenge iniane, nau papacai iya iniane. 25-26Lakamani ku Zipura ka labaibai ki Musi ku malraini ku vaeva ku marangisi ku piciane ka lrenege, gelregelre ku lrangici ki iniane ki lalakeini, la arakai pakielre ki drapale#4.25-26 “drapale” yakai kai latarakinkiu si tuhungu ku amia kai, kikai yai amani ki sawvaladhane amia. ki Musi. Ngwalai kai ki lrisi, ku Zipura ala iya kai ki Musi, “Amanisu ku tengane ka arakaili ku erai ki takigelregelrane ka tauwaneli.” Lakamani, ku Tamatama kai papacainga ki Musi.

27Thadaalrane ikai kwini, ku Tamatama kawriva ki Arungu, “Lu mwa ka calragulragu kidredresenge ki Musi.” Ku Arungu la papia tali lregelrege ki Twaumase kidredresenge ki Musi; ku Arungu sadrele ki Musi, la mwa uma iniane. 28Ku Musi la pelaela patuelre kwini mwa Izipiti iya ki Tamatama iniane, ka amani kudra lrika akaungane ku pinangu Twaumasane ka puku ki Arungu. 29Ku Musi si Arungu la katwase mwa ka Izipiti, sarubu ki lamarudrange ki swa Iseraylri. 30Ku Arungu la pelaela liniane singibila ku takawrivane ki Tamatama ki Musi; ku Musi la padredrele ki mapapangale kwini lrika apangimianeini ku pinangu Twaumasane ka puku. 31La kasalru makanaelre kwini lalasu, sa kilalra ala ka wadrangalru ku Tamatama liniane, la thingale ku Tamatama wadrele kwini takisidreadrekasane lini, la makitu pidruru sukubu.

Currently Selected:

Takatwasane Izipiti 4: NDV

Highlight

Copy