Tabekacane 13
13
Ku Aberame si Lute mauvagai
1Ku Aberame mailuku ki taelrelreini si lamanemaneini patuelre katwase Izipiti, si papia tali dradha katwase, la mudaane tali lrawdru ka Kanange; ku Lute la mialri katwase tupapalra iniane. 2Ku Aberame amani ku satacekecekelane turamuru, piakai ku thathatha ku lanilapulapwane si lakingi gingi. 3Sakabilrilinga la katwasenga kwini, si arwakaikaai papia tali dradha taluela, deethenga ka Bithele. Kai lasu siaulri mwa kwini kabicelrakane ki Bithele si Ai, ka amani kwidra nataikaiyaneini tudaane ku balrawbau, si sulasulai, 4ka nataraedrane ku tapatarumaramarane; kwi lasu la ikai kwini sukubu ki Tamatama.
5Kwini twapapalra ki Aberame ka Lute la mialri ikai ku lalwange, lakiu, si lawacekecekele si durini. 6Kikai taidrusa ka wacekecekele sakakalranga turamuru ku lwange si kiu, kadrwanga ku kadaengane ku swaadrau ku amakakelretane ikai, 7la ngwalai kikai kudra latarapagwagu ikai ki Aberame si Lute la kai telrai ku amakakalisiane. (Sakamani kwidra ku swa Kanange si swa Perizi yakaikaaiyana kwini.)
8Ngwalai kwini, ku Aberame la iya kai ki Lute, “Padethaneanata turamuru, pikakwa makakalisi; kai taraagwagu muswane si taraagwagu nakwane la mialri pikakwa makakalisi. 9Alata mauvagai! Kikai swadradraadrau kai kadaengane kai yacucubungu muswane, lu pilrisu ki tali vanale, nau pilri ki tali viri; lu pilrisu ki tali viri, nau pilri ki tali vanale.”
10Ku Lute la masiasirare pangithalringulu, la drele kwini valrwalru Yuredange padaruru kavai sanaka drataane kwini Zuare; kikai dratane taaciladhane, mia ki Idingi ka mawivaivai#13.10 “Idingi ka mawivaivai” ku pacase ki swa Hiburu yai “mawivaivai ki Tamatama” amia., la mia ki kadaengane ka Izipiti; (sakamani kwidra ku Tamatama kaiyana waamudu kavai cekele Sudume si Gumura.) 11Ku Lute la pilri kwini valrwalru ka Yuredange ka dratane, la katwase taluela papia tali talrawane. Kwini tadrusa la pangimia kikai si mauvagai. 12Ku Aberame la ikai Kanange; ku Lute la ikai kwini ki cekele dratane valrwalru, si tudaane ku balrawbau ikai deethe Sudume. 13Ku swa Sudume ngialisianenga turamuru, kai lalasu pakialringaunga pasalriu ki Tamatama.
Ku Aberame talwaela mu Hiburungu
14Sa katwasenga ku Lute, ku Tamatama amia kai ki Aberame, “Kusu twaladha kwini ki taacegeceganesu la papia talrawane, talriwgane, tali lrawdru si tali dradha drele masiasirare. 15Lri baadhaku muswane si lamwabaibalrithi muswane kikai sanaka pakelasu drele kai kadaengane palraelre; kikai kadaengane lrika numiane palralrawthu. 16Lri paedhalaku ki lamwabaibalrithi muswane, ku pangalane kadrwa ku umawmase ku lri maka asipi; kai umawmase lu dulru asipi ki enai kai ki kadaengane lri maka asipi ki lamwabaibalrithi muswane. 17Ngidrakaala! La katwasa dadavace alraelre kai ki kadaengane; lri baadhaku muswane.” 18Ku Aberame la suburu si suragele kwini balrawbau, si taluela mu Hiburungu, ikai kwini ki adeethe ki tharialupu ka angatu ki Mamere; kwi lasu la ikai kwini pasikai ki Tamatama raedre ku taluvale ku tapatarumaramarane.
Currently Selected:
Tabekacane 13: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
