Tabekacane 21
21
Kiatulalake ku Isake
1Ku Tamatama swabulrubulru ki Sara, singikai kudra tapuvaganeini; 2kwi alisu la katawbaliri, la tulalake ku vaeva ku sawvalai saka tarudrawdrangenga ku Aberahame; kwini lalake ala ngimiya kudra takelretane ku vai ki Twaumase si kitulalake. 3Ku Aberahame la sunagane iniane pasi Isake. 4Ku Aberahame la pasusu ku taiyane ki Twaumase, ku Isake sa makavalrulunga ku vai ku takitulalakane la pakigelregelre tulrisi iniane. 5Sa kitulalake ku Isake yai, ku Aberahame taraidainga ku caili. 6Ku Sara amia kai, “Ku Twaumase pakiaragai paulrakai nakwane; kudra kialalra kikai tangimiane ku umawmase la mialri tupapalra nakwane makitu kiragai si mulrakai.” 7Kwini alisu la iyana kai, “Aneane ku lri maka yugingi ki Aberahame ku Sara lri sirapale ku lalake iya? Saka tarudrawdrangenga, ala tulalakeanaku pasikai iniane ku sawvalai.”
8Kwini lalake la swasuuai kadrau, saka taisadrane kai thuthunga kwini ki vai, ku Aberahame la tuadrau pangitaleke.
Ku Hagare si Isemaele kiapakatwase
9Yakai sakavaivai, kwini swa Izipiti ka duri ka Hagare kudra tulalakeini ka lalake ki Aberahame ka Isemaele si lalake ki Sara ka Isake#21.9 “si lalake ki Sara ka Isake” singiakai ki lasidrumane ka hungu, ku pacase ki Hiburu kai wapacase kikai. la tadrusa kivavavange#21.9 “Isemaele si lalake ki Sara ka Isake la tadrusa kivavavange” ku wahunyake madu iya kai “Isemaele mwalralrakai ki lalake ki Sara ka Isake”.. 10Ku Sara la drele liniane, la iya kai ki Aberahame, “Pakatwasa kai ki duri ka ababai si lalakeini. Kikai lalake ki ababai kai lri maka uridrusa ki lalakeli ka Isake mucungulu ki tacekecekelanesu.” 11Ngwalai kikai la kwalri turamuru ku Aberahame, asi lwiyane ku Isemaele mialri ka lalakeini. 12Ai ku Twaumase amia kai ki Aberahame, “Madha ngwalalai kai ki lalake si duri ka Hagare si kathekelre. Singikaiya ku taiyane muswane ki Sara la pangimia, asi lwiyane lri patwalaisu ki Isake tarumara kudra puvagali muswane ku lamwabaibalrithi. 13Ala kwini lalake ki duri ka ababai, lri mialriaku baai iniane ku mapaangale ku lalalake, lri avaeva ka kuni, asi lwiyane mialrini ka lalakesu.”
14Sakakaiyane ki mialrealre, ku Aberahame la pailuku ki Hagare ku lataleke si akuvaeva ki lrangici ka thuthubungu ku acilai, si baai patarumara ki Hagare kwini lalake, si pakatwase liniane. Ku Hagare la katwase kwini, la kela ka calragulragu Bereseba, la ikai kwini si amama ki kadalranane. 15Sa elemenga ungulu ku acilai, la malra kwini ki lalake pitailebe ki angatu, 16la katwase kidaili ki lalake ikaai kau lu lrailane ku adailane si nene ikai kwini. La ngikakawrivariva, “Kainaku walreme dredredrele ki lalakeli lu pacai.” Kwini alisu#21.16 “alisu” ikai ki sidrumane ka nihunyakane “kwini lalake” amia. la nene ikai kwini si tungawngaungau tubitubi.
17Ku Twaumase kialalranga ku tatubiane ki lalake, “Ku sasiakawlu ki Twaumase la twalai belenge kawriva ki Hagare iya kai: Hagare, asungithanga pia kai kawpupungu? Madha mukuludru, ku Twaumase kialalranga ku tatubiane ki lalake. 18Ngidrakaala, la drakale ki lalake, si sasa iniane; lri twadravaku ka kuni ki lamwabaibalrithi iniane.” 19La pacungulu, ku Twaumase paledra kwini maca ki Hagare, la drele kwini alisu ku taluvaale ku dralremedreme; kwini alisu la mwa thili ki dralremedreme, si pasaela pasuete ki lrangici ka thuthubungu ku acilai, la paungulu ki lalake. 20Ku Twaumase la tapalra ki lalake; la swasuai kadrau, ikaikai kwini calragulragu Parange, ka amaninga kwidra taraalwalupu. 21Ku tinaini la pamwa ki tangea ka swa Izipiti ka ababai pasitaelrelre iniane.
Ku Aberahame si Abimileke makaketekete
22Sakamani kwidra, ku Abimileke si kiacapili ki kwapingini ka Pikule matwase mwa kikawriva ki Aberahame, la iya kai iniane, “Sanaka tatumananesu ki maneemanenga taikaiyane ku Twaumase tapalra muswane; 23lakamani, ikaiya kikai, icucubungu ki Twaumase kiketekete, kaisu lri draedrangelre nakwane, ki lalalakeli si lamwabaibalrithi nakwane lutuumane. Kai takilibaakaneli muswane, lri mialrisu kilibake nakwane si taikaiyanesu kai ki kuni.”
24Ku Aberahame la tubalre iya kai, “Palraingaku kiketekete.”
25Ku Aberahame la ngwalai ki sasiakawlu ki Abimileke ku taribicane ku taluvaale ku dralremedreme si kalisi ki Abimileke. 26Ku Abimileke la iya kai, “Kainaku wathingale luka aneane ku paiya kikai. La kaisu matikaiyana pelaela nakwane kikai, kikai yai tau kilaalraku.” 27Ku Aberahame la baai ki Abimileke ku piya ku lakiu si lwange, kwini tadrusa la makaketekete. 28Ku Aberahame la malra ku pitu ka lrulai ka tina ka kiu sarare pikai thili. 29Ku Abimileke la kivaga iniane, “Asu piya kikai?”
30Ku Aberahame la tubalre, “Ala tarumara kikai pitu ka lrulai ka tina ka kiu, sapelaelanesu ka patengane kikai dralremedreme ala ka amaniaku ka walruku.” 31Laka miyaiya kikai, kwini kadaengane lakamani ku kipasi Bereseba#21.31 “Bereseba” ku pacugane “nimakaketeketane ka dralremedreme” ku amia kai “pitu ka dralremedreme” (drela ki 26.33)., asi lwiyane kikwini tadrusa yakai kwini makaketekete.
32Kwini lalasu sa ikai Bereseba makaketeketenga, ku Abimileke si kiacapili ki kwapingini ka Pikule la katwase siwlri mu Pelisitine. 33Ku Aberahame la ikai Bereseba lredreke ku vaeva ku yanagi, ikai kwini sukubu ki Tamatama ka palralrawthu panianiake ka Twaumase. 34Ku Aberahame la ikaikai Pelisitine kaulai.
Currently Selected:
Tabekacane 21: NDV
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
